ပႃႇတီႇမိူင်းဝႃႉၽွမ်ႉႁူမ်ႈ ငဝ်ႈငုၼ်းပၢင်သၢင်းၵေႃႇသၢင်ႈ သဵၼ်ႈတၢင်းလၢႆသၢႆၼႂ်းၼႃႈလိၼ်ၽွင်းငမ်း တူဝ်ၵဝ်ႇဝႃႉ သဵင်ႈငိုၼ်းၶႄႇႁဵင်လၢၼ်ႉယႂၼ်။ လွင်ႈၼႆႉ ၸုမ်းလူင် ပွင်ၸိုင်ႈတဵင်းၸဵင်ႇၵႂႃႇၵမ်ႉၸွႆႈငိုၼ်း မၢၼ်ႈၼပ်ႉႁူဝ်ပၢၵ်ႇ လၢၼ်ႉၼင်ႇၵဝ်ႇ။

“ဢၼ်ၸုမ်းဝႃႉၵေႃႇသၢင်ႈသဵၼ်ႈတႃႈသၢႆတၢင်း သၢႆၼမ်ႉတိုၵ်း၊ မိူင်းမႂ်ႇ၊ ပၢင်သၢင်း၊ မင်းသႅင်ၸိူဝ်းၼႆႉ သဵင်ႈငိုၼ်းၶႄႇ 10,000 လၢၼ်ႉယႂၼ်ယဝ်ႉ။ ပိူဝ်ႈတႃႇၵေႃႈသၢင်ႈသဵၼ်ႈတၢင်းၼႂ်းမိူင်းဝႃႉၼႆႉ ယူႇတီႈ လူင်ပွင်ၸိုင်ႈတဵင်းၸဵင်ႇၵေႃႈ မိူဝ်ႈဢူးၸေႃႇဝိၼ်း ၵႅမ်ၽွင်းလူင်ၾၢႆႇလႅၼ်လိၼ် မႃးယဵမ်ႈဢႅဝ်ႇတီႈမိူင်းဝႃႉ မိူဝ်ႈပူၼ်ႉမႃးဢမ်ႇႁိုင်ၼႆႉ မႃးၸွႆႈပၼ်ငိုၼ်း 400 လၢၼ်ႉပျႃး (4,000 သႅၼ်)”-ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းထိ 27/08/12 ၽိုၼ်ၶၢဝ်ႇမၢၼ်ႈ မျၢၼ်ႇမႃႇဢလိၼ်းဢွၵ်ႇၶၢဝ်ႇဝႃႈ ၸွမ်ႁၢၼ် ၸေႃႇဝိၼ်း ၵႅမ်ၽွင်း လူင်ၾၢႆႇလႅၼ်လိၼ် လႆႈၵႂႃႇယဵမ်ႈဢႅဝ်ႇတီႈမိူင်းဝႃႉ၊ မိူဝ်ႈဝၼ်းထိ 16/08/12 မၼ်းၸဝ်ႈ လႆႈၵႂႃႇၶၢမ်ႈၶူင်းတီႈတႃႈၵွင်းဢႅတ်း သေ လႆႈၵႂႃႇလူလွမ်တူၺ်းတီႈႁူင်းၵၢၼ်ၾႆးၾႃႉႁႅင်းၼမ်ႉ “သူင်ႇၽူး” တီႈဝဵင်းၵၢဝ် (ၼႃႈလိၼ်ၶိုၵ်ႉတွၼ်းဝႃႉမၢႆ 2) ဢၼ်သူင်ႇ ၾႆးၾႃႉပၼ်ဝဵင်းပၢင်သၢင်း၊ ဝဵင်းၵၢဝ်လႄႈမင်းသႅင် ၸိူဝ်းၼႆႉ။

ဝၼ်းထိ 17/08/12 ဝၢႆးဝၼ်း ၸုမ်းၸိူဝ်းၵႅမ်ၽွင်းလူင်ၾၢႆႇလႅၼ်လိၼ် လႆႈၵႂႃႇႁူပ်ႉထူပ်းၵၼ်တင်းၸုမ်း ဢွၼ်ႁူဝ်ၼႃႈလိၼ် ၽွင်းငမ်းၶိုၵ်ႉတွၼ်းမၢႆ 2 ၶွင်ဝႃႉလၢႆလၢႆၸဝ်ႈ၊ မိူၼ်ၼင်ႇ ၵႅမ်ႁူဝ်ပဝ်ႈသႅဝ်းမိၼ်လျႅင်၊ ပဝ်းယဵဝ်ႇယီး၊ ၸၢဝ်ႉၸူင်းတၢင်း၊ ပဝ်းယဵဝ်ႇလျႅင်၊ ဢၢႆႈလူၼ်း၊ ၸၢဝ်ႉၵေႃႇဢၢင်း၊ ဢူးဢွင်ႇမျိၼ်ႉ (ႁွင်ႉလီႇၸူးလျႄႉ) လႄႈၸဝ်ႈပူဝ်ႇလႃၶမ်း ၸိူဝ်းၼႆႉ။ ယူႇတီႈ ၵႅမ်ၽွင်းလူင်ၸေႃႇဝိၼ်း လႆႈပၼ်ငိုၼ်း ၵမ်ႉၸွႆႈ မူႇၸုမ်းဝႃႉ 30 လၢၼ်ႉပျႃးလႄႈငိုၼ်းၵႃႈၶဝ်ႈသၢၼ် 66 လၢၼ်ႉပျႃး၊ သမ်ႉၵမ်ႉ ၸွႆႈပၼ်ငိုၼ်းၵႃႈ ႁဵတ်း သဵၼ်ႈတႃႈသၢႆတၢင်း 400 လၢၼ်ႉပျႃး တီႈၵႅမ်ႁူဝ်ပဝ်ႈ သႅဝ်းမိၼ်လျႅင်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ယူႇတီႈသႅဝ်းမိၼ်ႇလျႅင် လၢတ်ႈဝႃႈ- ၶွပ်ႈၵုၼ်းမုၼ်တၢင်ႇယႂ်ႇၼမ်တီႈဢၼ်ၵမ်ႉၸွႆႈ ပၼ်ဢဵၼ်ႁႅင်းငိုၼ်း တွင်းလႄႈလၢႆလၢႆလွင်ႈ မိူၼ်ၼင်ႇပိူဝ်ႈတႃႇလွင်ႈပူၵ်းပွင်ၼႃႈလိၼ်၊ သူင်ႇမႃး ပၼ်ၸုမ်း UN ၶဝ်ႈမႃးၵမ်ႉၸွႆႈ၊ ၸွႆႈပၼ်ပိူဝ်ႈတႃႇ ႁဵတ်းသဵၼ်ႈတၢင်းႁဵတ်းၶူဝ်၊ ၸွႆႈပၼ်ယၢင်သိူဝ်ႇတၢင်း၊ သူင်ႇမႃးပၼ် ၵူၼ်းႁဵတ်းၵၢၼ်ပၢႆးပၺ်ႇၺႃႇ၊ ပၢႆးယူႇလီလႄႈ ၵၢၼ်ပူၵ်း ပွင် (ၼတလ)ၸိူဝ်းၼႆႉ။ မိူဝ်ႈလဵဝ် ၾၢႆႇႁဝ်းၵေႃႈ တိုၵ်ႉၵေႃႇသၢင်ႈသဵၼ်ႈတၢင်းလူင် သၢႆပၢင်သၢင်း-မိူင်းမႂ်ႇ၊ သမ်ႉသဵၼ်ႈတၢင်း ပၢင်သၢင်း-မိူင်းပွၵ်ႉ-ႁူဝ်တဝ်း ၸိူဝ်းၼႆႉယူႇ။ ၼွၵ်ႈသေၼၼ်ႉ ပေႃးဝႃႈဢွၵ်ႇႁႅင်းမႃးႁဝ်းၶႃႈတေသိုပ်ႇႁဵတ်းထႅင်ႈ သဵၼ်ႈတၢင်း ပၢင်သၢင်း-မင်းသႅင် ဝႃႈၼႆ။