ၸွမ်ၽွင်းလူင် 9 ၵေႃႉ ၼႂ်းလူင်ပွင်ၸိုင်ႈတဵင်းၸဵင်ႇ လႅၵ်ႈလၢႆႈၶၢႆႉတၼ်းႁဵင်း၊ ဢၼ်ၸွမ်းၽွင်းလူင်ၾၢႆႇ သိုဝ်ႇသၢရ် လႅၵ်ႈလၢႆႈၵေႃႉမႂ်ႇၼၼ်ႉ လၢႆၾၢႆႇယုမ်ႇယမ်ဝႃႈ ၵၢၼ်သိုဝ်ႇတေလီမႃးလိူဝ်ၵဝ်ႇ။

မိူဝ်ႈဝၼ်းထိ 27/08/12 လူင်ပွင်ၸိုင်ႈတဵင်းၸဵင်ႇ ပိုၼ်ၽၢဝ်ႇလႅၵ်ႈလၢႆႈၽွင်းလူင် ၼႂ်းလူင်ပွင်ၸိုင်ႈ 9 ၵေႃႉ၊ ၼႂ်းၽွင်းလူင် 9 ၵေႃႉၼႆႉ တႅင်ႇတင်ႈၵႅမ်ၽွင်းလူင်ထႅင်ႈ 15 ၵေႃႉ။

ၼႂ်းၽွင်းလူင် 9 ၵေႃႉၼၼ်ႉ 1.ဢူးၸူဝ်းတဵင်း ၽွင်းလူင်ၾၢႆႇႁူၵ်းၸၢၵ်ႈ၊ 2.ဢူးဢွင်ႇမိၼ်း ၽွင်းလူင် ၾၢႆႇတေႃႉသူင်ႇလူတ်ႉ ၾႆး၊ 3.ဢူးလႃႉထုၼ်း ၽွင်းလူင်ၾၢႆႇၵၢၼ်ငိုၼ်းတွင်း၊ 4.တိၼ်ႇၼၢႆႇတဵင်း ၽွင်းလူင်ၾၢႆႇဝၢင်းၽႅၼ် လႄႈၵၢၼ်မၢၵ်ႈမီး၊ တင်းမူတ်း 4 ၸဝ်ႈၼႆႉ လႅၵ်ႈလၢႆႈၶၢႆႉမႃးပဵၼ်ၽွင်းလူင် ၵိုၵ်းလုမ်းၸွမ်ၸိုင်ႈ။

ၽွင်းလူင်ထႅင်ႈတၢင်ႇတၼ်းႁဵင်း မိူၼ်ၼင်ႇ 5.ဢူးဢွင်ႇၵျီႇ လုၵ်ႉတီႈၽွင်းလူင်ၾၢႆႇႁႅင်းငၢၼ်း တႅင်ႇတင်ႈ ပဵၼ်ၽွင်းလူင် ၾၢႆႇၶၢဝ်ႇသၢရ်။ 6.ဢူးၵျေႃႇသၢၼ်း လုၵ်ႉတီႈၽွင်းလူင်ၾၢႆႇၶၢဝ်ႇသၢရ် လႅၵ်ႈလၢႆႈၶၢႆႉပဵၼ် ၽွင်းလူင်ၾၢႆႇၸုမ်းၵႃႉၶၢႆ (သမဝယႃမ)။ 7.ဢူးဝိၼ်းမျိၼ်ႉ လုၵ်ႉတီႈၽွင်းလူင်ၾၢႆႇၸုမ်းၵႃႉၶၢႆ ပဵၼ်မႃးၽွင်းလူင် ၾၢႆႇလဵင်ႉသတ်းလႄႈလႃႈၼမ်ႉ၊ 8.ဢူးဢေးမျိၼ်ႉ ၽွင်းလူင်ၾၢႆႇပၢႆႊသႅၼ်ႊလႄႈ ထဵၵ်ႊၼူဝ်ႊလူဝ်ႊၵျီႊ ပဵၼ်မႃးၽွင်းလူင်ၾၢႆႇၶိူင်ႈၸၢၵ်ႈ၊ 9.ဢူးတိၼ်ႉသၢၼ်း ၽွင်းလူင်ၾၢႆႇၵၢၼ်လဵၼ်ႈႁႅင်း၊ ႁူင်းႁႅမ်းလႄႈ ၵၢၼ်တွင်ႈတဵဝ်း ပဵၼ်မႃးၽွင်းလူင်ၾၢႆႇၵၢၼ်လဵၼ်ႈႁႅင်းၵမ်းသိုဝ်ႈ။

သိုဝ်ႇလၢႆၾၢႆႇလၢတ်ႈဝႃႈ- ဢူးၸူဝ်းတဵင်း၊ ဢူးဢွင်ႇမိၼ်း၊ ဢူးလႃႉထုၼ်း၊ တိၼ်ႇၼၢႆႇတဵင်းၸိူဝ်းၼႆႉ ပိူဝ်ႈတႃႇၵႂႃႇပဵၼ်ၽွင်း လူင်ၵိုၵ်းလုမ်းၸွမ်ၸိုင်ႈၼၼ်ႉ လၢႆၾၢႆႇလၢမ်းဝႆႉႁိုင်ယဝ်ႉ။ ၵူၺ်းၵႃႈ ဢၼ်လၢၵ်ႇ လၢႆး/ လမ်ႇလွင်ႈလိူဝ်ပိူၼ်ႈ ပဵၼ်ၵၢၼ် လႅၵ်ႈလၢႆႈၶၢႆႉတၼ်းႁဵင်း ဢူးဢွင်ႇၵျီႇတင်းဢူးၵျေႃႇသၢၼ်း။ ၵွပ်ႈဝႃႈ ဢူးၵျေႃႇသၢၼ်းၼႆႉ လႆႈထုၵ်ႇလၢႆၾၢႆႇပွင်ႉလႃႇမႃးတင်းႁိုင် ၵဵဝ်ႇၵပ်းလွင်ႈသႅၼ်ႊသိူဝ်ႊ (Sencor) ၾၢႆႇသိုဝ်ႇ (Media) ။ ဢူးဢွင်ႇၵျီႇ သမ်ႉလႆႈၸိုဝ်ႈသဵင်ဝႆႉ ၸဵမ်မိူဝ်ႈႁဵတ်းၶဵဝ်ပၼ်ဝူင်ႈၵၢင် လူင်ပွင်ၸိုင်ႈတင်း ဢွင်ႇသၢၼ်းၸုၵျီႇလႆႈႁူပ်ႉဢုပ်ႇၵၼ် ပၢၼ်တၢၼ်းသူၺ်ႇတိုၵ်ႉမီးယူႇ။ မၼ်းလႆႈမႃးပဵၼ်ၽွင်းလူင်ၾၢႆႇ သိုဝ်ႇ/ ၶၢဝ်ႇသၢရ်ၼႆႉ လၢႆၾၢႆႇလၢမ်းဝႃႈၾၢႆႇသိုဝ်ႇတေၸၢင်ႈလီၶိုၼ်ႈမႃးယူႇ၊ ၵူၺ်းၵႃႈ ၽွၼ်းၵၢၼ်မၼ်းပႆႇ ဢွၵ်ႇလႄႈ ပႆႇၸၢင်ႈဝႃႈ- ၼႆယဝ်ႉ။