သမႃးၶူမ်းပၢႆးပၺ်ႇၺႃႇလႄႈၾိင်ႈငႄႈတႆး ဢၼ်တၢင်ႇ ယွၼ်းတီႈလူင်ပွင်ၸိုင်ႈထႆး လႆႈလွင်ႈႁပ်ႉႁွင်းပဵၼ် တၢင်းၵၢၼ် ႁဵတ်းပၢင်ပွႆးပိုတ်ႇလုမ်းတီႈၵဵင်းမႆႇ၊ မီးပီႈၼွင်ႉ တႆးၼႂ်းမိူင်းထႆးလၢႆတီႈလၢႆတၢင်း၊ လၢႆမူႇလၢႆ ၸုမ်းၶဝ်ႈႁူမ်ႈ ၵိုၼ်းၶွၼ်ႈလီ။

ဝၼ်းထိ 19/08/12 (မိူဝ်ႈဝႃး) “သမႃးၶူမ်းပၢႆးပၺ်ႇၺႃႇလႄႈၾိင်ႈငႄႈတႆး” ဢၼ်ၸိုဝ်ႈၽႃသႃထႆးဝႃႈ (สมาคมการศึกษาและวัฒนธรรมไทยใหญ่)၊ ၸိုဝ်ႈဢင်းၵိတ်ႉဝႃႈ (Taiyai Education and Culture Association) ၸတ်းပၢင်ပွႆးပိုတ်ႇလုမ်း တီႈဝတ်ႉၵူႈတဝ်ႈ၊ ဢိူင်ႇသီၽုမ်း ၵဵင်းမႆႇ။ မီးၽူႈယႂ်ႇၵူၼ်းလူင်တႆး၊ ၸဝ်ႈၼႃႈတီႈတၢင်းၵၢၼ်ထႆး၊ ပီႈၼွင်ႉတႆးမိူင်းၵွၵ်ႇ၊ မိူင်းပၢႆး၊ မႄႈႁွင်ႈသွၼ်၊ မိူင်းၾၢင်၊ မႄႈသၢႆ၊ ၵဵင်းမႆႇ ဢိၵ်ႇမူႇၸုမ်းတႆးၼႂ်းၵဵင်းမႆႇ လၢႆလၢႆၸုမ်းၶဝ်ႈႁူမ်ႈတင်းၼမ်။ ပွတ်းၼႂ်မီးၵၢၼ် လူႇတၢၼ်းၵၢပ်ႈသွမ်း (ၵၢပ်ႈပဵၼ်း)သင်ၶၸဝ်ႈလႄႈ ပွတ်းၶမ်ႈ တင်ႈတႄႇယၢမ်း 19:00-22:30 မူင်း မီးၽိူၼ်ၶဝ်ႈပၼ်ႁႅင်း ႁူမ်ၸူမ်း ၵၢၼ်ပိုတ်ႇလုမ်း ၸိူဝ်းၼႆႉ။

ၸၢႆးသႅင်မိူင်း ႁူဝ်ပဝ်ႈသမႃးၶူမ်းပၢႆးပၺ်ႇၺႃႇလႄႈၾိင်ႈငႄႈတႆး မွၵ်ႇလၢတ်ႈၵႂၢမ်းဝႃႈ- သမႃးၶူမ်းပၢႆးပၺ်ႇ ၺႃႇလႄႈၾိင်ႈငႄႈ တႆးၼႆႉ ႁဝ်းၶႃႈလႆႈတၢင်ႇယိုၼ်ႈယွၼ်း ႁႂ်ႈပဵၼ်မႃးမူႇၸုမ်းထုၵ်ႇမႅၼ်ႈၸွမ်းမၢႆမီး ၸဵမ်မိူဝ်ႈဝၼ်းထိ 16/07/2009 ၊ ၵူၺ်းၵႃႈ တိုၵ်ႉလႆႈထုၵ်ႇမၵ်းမၼ်ႈႁပ်ႉႁွင်းပဵၼ်သမႃးၶူမ်း မိူဝ်ႈဝၼ်းထိ 30/03/2012 ၼႆႉၵူၺ်း။ လွင်ႈတၢင်းလႆႈၵေႃႇတင်ႈသမႃးၶူမ်း တႆးၼႆႉ ဢိင်ၼိူဝ်ၼႂ်းၸိုင်ႈထႆးမီးလၢႆၸၢဝ်း ၶိူဝ်း၊ မီးလွင်ႈလၢၵ်ႇလၢႆပႅၵ်ႇပိူင်ႈၵၼ် တၢင်းၾိင်ႈငႄႈၾိင်ႈထုင်းသေ ပိူဝ်ႈတႃႇ ပဵၼ်ငဝ်ႈငုၼ်းမႅတ်ႇ ပႅင်းပႂ်ႉပႃးၽႃသႃလႄႈၾိင်ႈငႄႈၸၢဝ်းၶိူဝ်းတႆး၊ ၼင်ႇႁိုဝ်တေဢမ်ႇၸူမ်ႁၢႆႇၵႂႃႇၼႂ်းၵၢပ်ႈပၢၼ်ဝၢၼ်ႈမိူင်း ၶိုၼ်ႈယႂ်ႇမႃးလႄႈ ပဵၼ်တီႈလႅၵ်ႈလၢႆႈတၢင်းႁူႉတၢင်းႁၼ် ၵၼ်လႄႈ ပူၵ်းပွင်ၼမ်ႉၵတ်ႉပၼ်တူင်ႇဝူင်း ၵူၼ်း။ ၾၢႆႇၼိုင်ႈၵေႃႈ လူင်ပွင်ၸိုင်ႈထႆးၵေႃႈႁၼ်လီၵမ်ႉထႅမ်မႃးလၢႆ သိုပ်ႇပၢၼ် ၸင်ႇလႆႈယိုၼ်ႈတၢင်ႇ ယွၼ်းပဵၼ်မူႇၸုမ်းမႃး။

ၸဝ်ႈပိုၼ်ၶမ်း မွၵ်ႇလၢတ်ႈဝႃႈ- ႁဝ်းၶႃႈပီႈၼွင်ႉတႆးၵူႈတီႈတီႈ ႁူမ်ႈပီႈၼွင်ႉတႆးတၢင်းမိူင်းၾၢင်-မႄႈဢၢႆ လႆႈၶတ်းၸႂ် ပိူဝ်ႈတႃႇ တင်ႈလႆႈမူႇၸုမ်းၼႆႉမႃးႁိုင် 10 ပီပၢႆယဝ်ႉ၊ ၵူၺ်းၵႃႈဢမ်ႇပဵၼ်မႃး။ (ပွၵ်ႈၼႆႉ ၸူမ်းသိူဝ်းၶွပ်ႈၸႂ်ၼိူဝ်တၢင်းၵၢၼ်ထႆးတႄႉတႄႉ ဢၼ်လႆႈႁပ်ႉႁွင်း သမႃးၶူမ်းပၢႆးပၺ်ႇၺႃႇလႄႈ ၾိင်ႈငႄႈတႆး ထုၵ်ႇမႅၼ်ႈၸွမ်းမၢႆမီႈ- ၼႆယဝ်ႉ။

ယိူင်းဢၢၼ်းၶွင်သမႃးၶူမ်း 1.ပိူဝ်ႈတႃႇမႅတ်ႇပႅင်းပႂ်ႉပႃး ၾိင်ႈငႄႈႁိတ်ႈႁွႆးၸၢဝ်းၶိူဝ်းတႆးၼႂ်းၸိုင်ႈထႆး။ 2.ပိူဝ်ႈ တႃႇႁဵၼ်းႁူႉလႄႈ ၾိုၼ်ႉၽူး ၾိင်ႈပိူင်ၸၢဝ်းတႆးၸိူဝ်းယူႇသဝ်းၼႂ်းမိူင်းထႆး မိူၼ်ၼင်ႇၾိင်ႈပွႆး သၢင်ႇလွင်း၊ ပွႆးၶဝ်ႈဝႃႇ ဢွၵ်ႇဝႃႇ၊ ၸၢတ်ႈသႅင်းတႆး၊ တၢင်းၵႃႈၼူၵ်ႉ/တူဝ်း၊ ၵွင်မွင်းၵူႈၸိူဝ်းၸိူဝ်း။ 3.ၵမ်ႉထႅမ်ႁႂ်ႈလုၵ်ႈ ၸုမ်း မီးသုၼ်ႇႁူမ်ႈၵၢၼ်မႅတ်ႇပႅင်းၶူဝ်းၶွင်ၾိင်ႈထမ်းမၸၢတ်ႈ (ၾိင်ႈတိုၼ်းပဵၼ်)လႄႈသိင်ႇဝႅတ်ႉလွမ်ႉ။ 4.ႁႂ်ႈပဵၼ်လွင်ႈ ၵမ်ႉထႅမ်ၵၢၼ်တွင်ႈတဵဝ်းဢႅဝ်ႇမိူင်း။ 5.ႁႂ်ႈလုၵ်ႈၸုမ်းမေႃပိုင်ႈဢိင် တူဝ်ၵဝ်ႇလႄႈၸွႆႈထႅမ် တူင်ႇဝူင်းၵူၼ်း။ 6.ပဵၼ်ငဝ်ႈငုၼ်း ၵပ်းသၢၼ်ပိုၼ်ၽႄႈတၢင်းႁူႉ၊ ၶေႃႈမုလ်းၶၢဝ်ႇသၢၼ်၊ ၵၢၼ်ႁဵၼ်း ၵၢၼ်သွၼ် ဢၼ်ပဵၼ်ၽွၼ်းလီ တႃႇတူင်ႇဝူင်းၵူၼ်း။ 7.သၢင်ႈလွင်ႈၽွမ်ႉႁူမ်ႈၼႂ်းၸၢတ်ႈ။ 8.ယူႇတီႈမူႇ ၸုမ်းတေဢမ်ႇ ၵဵဝ်ႇၶွင်ႈၵၢၼ်မိူင်းၵၢၼ်သိုၵ်း သေ ႁႃၼမ်ႉတွၼ်းၶဝ်ႈမူႇၸုမ်း။

သမႃးၶူမ်းၼႆႉ ပိုတ်ႇငဝ်ႈလုမ်းဝႆႉတီႈၼႂ်းဝတ်ႉၵူႇတဝ်ႈ၊ မၢႆ 60 သဵၼ်ႈတၢင်းၵူႇတဝ်ႈ၊ ဢိူင်ႇသီၽုမ်း ၵဵင်းမႆႇ 50000 ၊ တိတ်း တေႃႇလႆႈတီႈ e-mail: taiyai.eca@gmail.com ၊ မၢႆၾူၼ်ႊ 080-3167443 ။