သိုၵ်းမၢၼ်ႈႁႅင်းၼပ်ႉႁူဝ်ပၢၵ်ႇထႅမ်ႁႅင်းသိုၵ်းႁိမ်းႁွမ်းတႃႈ သၢမ်ပူးဝႆႉ၊ ယွၼ်ႉၶႂ်ႈႁႂ်ႈသိုၵ်းတႆးထွၼ်ဢွၵ်ႇ တႃႈသၢမ်ပူး။ ၵူၺ်းၵႃႈ SSPP/SSA ဢမ်ႇထွၼ်ပၼ်လႆႈငၢႆႈငၢႆႈ ၵွပ်ႈပဵၼ်သဵၼ်ႈတၢင်းၵၢၼ်မၢၵ်ႈမီး ႁူးထူၺ်ႈၸႂ်တူဝ်ၵဝ်ႇ။

ၸဝ်ႈႁၢၼ်ၸၢႆးလႃႉ ၽူႈၶၢၼ်ပၢၵ်ႇတပ်ႉသိုၵ်းၸိုင်ႈတႆး SSPP/SSA လၢတ်ႈဝႃႈ- မိူဝ်ႈလဵဝ် သိုၵ်းမၢၼ်ႈႁႅင်း 300 ထႅမ်ႁႅင်းသိုၵ်း ႁိမ်းႁွမ်းတႃႈသၢမ်ပူးဝႆႉ၊ ၶႂ်ႈႁႂ်ႈသိုၵ်းတႆးထွၼ်ဢွၵ်ႇတႃႈသၢမ်ပူး။ ၵူၺ်းၵႃႈ တႃႈသၢမ်ပူး (ၼမ်ႉပၢင်) ပဵၼ်တႃႈဢၼ်လမ်ႇလွင်ႈ ၶိုၵ်ႉၶမ်ႇတႃႇၵပ်းသိုပ်ႇၶဝ်ႈဢွၵ်ႇၵၼ်တင်း တပ်ႉၸုမ်း 7 ၵေႃႈပိူင် ၼိုင်ႈ၊ ၾၢႆႇၼိုင်ႈသမ်ႉ ယွၼ်ႉပိူဝ်ႈတပ်ႉသိုၵ်းမၢၼ်ႈၵမ် ၵိၼ်းသေ မိူဝ်ႈလဵဝ်သဵၼ်ႈတႃႈသၢႆတၢင်းလုၵ်ႉတၢင်း ငဝ်ႈငုၼ်းဝၢၼ်ႈႁႆးၵႂႃႇ တၢင်း မိူင်းဝႃႉၵေႃႈယၢပ်ႇၽိုတ်ႇ၊ ပဵၼ်သဵၼ်ႈတၢင်း တၼ်ၵႂႃႇသေ သဵၼ်ႈတၢင်း ၵၢၼ်မၢၵ်ႈမီးၶွင် SSPP/SSA လႆႈပိုင်ႈဢိင်ၸႂ်ယႂ်ႇၵိုတ်းသဵၼ်ႈတၢင်းၼႆႉၵူၺ်းလႄႈ ဢမ်ႇၸၢင်ႈ ထွၼ်ပၼ် ငၢႆႈငၢႆႈ။ ပေႃးႁဝ်းၶၢႆႉထွၼ်ပၼ် တိၵ်းတိၵ်း လိုၼ်းသုတ်းႁဝ်းတေၵႂႃႇယူႇတီႈလႂ်။ ၵွပ်ႈၼႆ ပေႃးဝႃႈသိုၵ်း မၢၼ်ႈ မႃးမိပ်ႇႁႂ်ႈႁဝ်းထွၼ်ဢွၵ်ႇ တိၵ်းတိၵ်းၵေႃႈ သဵင်ၵွင်ႈတႅၵ်ႇထႅင်ႈၵမ်းၼိုင်ႈ- ဝႃႈၼႆ။

တင်ႈတႄႇလႆႈယိုဝ်းၵၼ်မႃးၼႆႉ ယူႇတီႈ SSPP/SSA လႆႈထွၼ်ပၼ်တပ်ႉ 10 ပၢႆ၊ ၵူႈတပ်ႉလမ်ႇလွင်ႈၾၢႆႇ ၵၢၼ်သိုၵ်းလႄႈ ၵၢၼ်မၢၵ်ႈမီး၊ ဢၼ်ထွၼ်ပၼ်ၵႃႈပူၼ်ႉမႃးၵေႃႈ ႁဵတ်းၸွမ်းၶေႃႈတုၵ်းယွၼ်းလူင်ပွင် ၸိုင်ႈမၢၼ်ႈ။ မိူဝ်ႈလဵဝ် ပေႃးထွၼ်ပၼ် တေတုမ်ႉတိူဝ်ႉၵၢၼ်မၢၵ်ႈမီးမူႇၸုမ်းတင်းၵူၼ်းႁဵတ်းၵၢၼ် ၼႂ်းတပ်ႉ-ၼႆယဝ်ႉ။

တႃႈသၢမ်ပူးၼႆႉ ယၢၼ်ငဝ်ႈငုၼ်းဝၢၼ်ႈႁႆးမွၵ်ႈ 10 လၵ်း၊ ယူႇၼႂ်းဢိူင်ႇႁၢႆးပႃ ၸႄႈဝဵင်းမိူင်းသူႈ။ ၵႃႈပူၼ်ႉ မႃးၵေႃႈ မီးပၢင်တိုၵ်း လၢႆပွၵ်ႈလၢႆၵမ်း။

ၼွၵ်ႈသေၼၼ်ႉ တီႈတၢင်းၽႄ၊ တီႈၼမ်ႉပုၵ်း၊ တီႈလွႆၵူင်လွႆၵႅင်းၸိူဝ်းၼႆႉၵေႃႈယႃႇဝႃႈသိုၵ်းမၢၼ်ႈ တေထွၼ်ပၼ်ၸွမ်းၼင်ႇ ၶေႃႈတူၵ်းလူင်းမိူဝ်ႈဢုပ်ႇဢူဝ်းၵိုတ်းယိုဝ်းၵၼ် ဢၼ်ဢူးတဵင်းၸေႃႇဝႃႈ တေထွၼ်ပၼ်ပၢႆးၼႂ်း 5 ဝၼ်း၊ မိူဝ်ႈလဵဝ် ဢမ်ႇထွၼ် ပၼ်ၵူၺ်းပႆႇပေႃး ယင်းႁဵတ်းတပ်ႉဝႆႉၶႅမ်ႉလိူဝ်ၵဝ်ႇ။ ၵွပ်ႈၼၼ်လ ၸွမ်ၸိုင်ႈတဵင်းၸဵင်ႇ ပိုၼ်ၽၢဝ်ႇယိုၼ်ႈမိုဝ်းလွင်ႈငမ်းယဵၼ် မႃးၶွပ်ႈတဵမ်ပီယဝ်ႉၵေႃႈ တွၼ်ႈတႃႇ SSPP/SSA ဢမ်ႇပေႃးလၢၵ်ႇလၢႆးသင်၊ ၼွၵ်ႈသေၼၼ်ႉ သိုၵ်းတႆးတူင်ႉၼိုင်ၵႂႃႇမႃးၵေႃႈ ယင်းပႆႇထၢင်ႇႁၢင်ႈလွတ်ႈလႅဝ်း၊ တႆးတင်းမၢၼ်ႈယင်းတိုၵ်ႉလႆႈဝႆႉ မိူၼ်ၶဵၼ်ၵၼ်ယူႇ-ဝႃႈၼႆ။

ပူၼ်ႉမႃးမိူဝ်ႈႁူဝ်လိူၼ်ၵျူႊလၢႆႊ ၽွင်း SSPP/SSA ပဵၼ်ပၢင်တိုၵ်းၵၼ်ပွတ်း တပ်ႉ 7 လၵ်း တင်း ၵွင်းမႆႉ ၸူင် ၼႂ်းဢိူင်ႇ မိူင်းၵၢဝ်၊ ၸႄႈဝဵင်းတၢင်ႉယၢၼ်းၼၼ်ႉ တပ်ႉသိုၵ်းမၢၼ်ႈဢၼ်ပိုတ်ႇသိုၵ်းတေႃႇတပ်ႉတႆး ပွတ်းႁွင်ႇမီး 3 တပ်ႉၵွင်၊ ပွတ်းၸၢၼ်း ၼႂ်းၸႄႈဝဵင်းမိူင်းသူႈ 7 တပ်ႉၵွင်၊ ႁူမ်ႈတင်းမူတ်း 10 ၵွင်။ ပဵၼ်တပ်ႉပႃႈတႂ်ႈ တိူင်းသိုၵ်းဝၼ်းဢွၵ်ႇၵၢင်(ၶူဝ်လမ်)လႄႈ တႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ)။