ၾူၼ်တူၵ်းႁႅင်း ၼမ်ႉၼွင်းထူမ်ႈတီႈဝဵင်းလႃႈသဵဝ်ႈ၊ ၶူဝ်းၶွင်ၵူၼ်းမိူင်းလုသုမ်းၼမ်၊ ၵူၼ်းတၢႆၵေႃႉၼိုင်ႈ၊ မိူဝ်ႈလဵဝ် မီးၵူၼ်းထူပ်းၽေးႁၢမ်းႁႅၵ်းႁိူၼ်းယေးၼပ်ႉ ႁူဝ်ႁဵင်။

မိူဝ်ႈဝၼ်းထိ 19/08/12 ဢိင်ၼိူဝ်ၾူၼ်တူၵ်းႁႅင်းသေ ၼမ်ႉလုပ်ႇၼွင်းထူမ်ႈၼႂ်းဝဵင်းလႃႈသဵဝ်ႈ 6 ပွၵ်ႉ၊ ပွၵ်ႉ 1,7,8,9,11,12 ၊ ၶူဝ်းၶွင်ၵူၼ်းဝၢၼ်ႈၵူၼ်းမိူင်းလုသုမ်းႁၢႆၵႂႃႇတင်းၼမ်၊ ၵူၼ်းတၢႆၵေႃႉၼိုင်ႈ။ မိူဝ်ႈလဵဝ် မီးၵူၼ်းထူပ်းၽေးၸိူဝ်းႁၢမ်းႁိူၼ်းတီႈ ယူႇမွၵ်ႈ 2,000 ၵေႃႉ။ ၾၢႆႇၸဝ်ႈၼႃႈတီႈမၢၼ်ႈၶဝ် ပိုတ်ႇပၼ် ဝႆႉပၢင်သဝ်း ၵူၼ်းပၢႆႈၽေး တီႈပွၵ်ႉၼိုင်ႈ 4 တီႈ၊ တီႈပွၵ်ႉၸဵတ်း 1 တီႈ၊ တီႈပွၵ်ႉၵဝ်ႈ 1 တီႈ- ဢူးထုၼ်း သူၺ်ႇ ၵေႃႉပဵၼ်ၵူၼ်းၸွႆႈထႅမ်ပၼ်ၵူၼ်းထူပ်းၽေးၼမ်ႉထူမ်ႈ လၢတ်ႈၼႄၼင်ႇၼႆ။

ၼၢင်းသႅင် ၵူၼ်းလႃႈသဵဝ်ႈလၢတ်ႈဝႃႈ- မိူဝ်ႈဝႃးၼမ်ႉလူတ်းယွမ်းလူင်းၽွင်ႈ၊ ၵူၼ်းၼႂ်းပွၵ်ႉယွမ်ႇၵမ်ႈၽွင်ႈ ပေႃးမိူဝ်းပတ်းထူ ႁိူၼ်းယေးၶဝ်ယူႇ၊ ၵူၺ်းၵႃႈၵမ်ႈၼမ်ယင်းတိုၵ်ႉမီးယူႇတီႈပၢင်သဝ်းၵူၼ်းပၢႆႈၽေး။ မိူဝ်ႈၽွင်းၼမ်ႉထူမ်ႈၼၼ်ႉ ၵူၼ်းၵမ်ႈ ၽွင်ႈတၼ်းပိၵ်ႉၽၵ်းတူႁိူၼ်းသေပၢႆႈၼမ်ႉ၊ ၵမ်ႈၽွင်ႈဢမ်ႇတၼ်း ပိၵ်ႉၽၵ်းတူႁိူၼ်းၺႃးၽူႈလၵ်ႉ ၶိုၼ်ႈႁိူၼ်းၵေႃႈမီး။ ၶဝ်ႈၼမ်ႉတၢင်းၵိၼ်ၵမ်ႈၼမ်တႄႉ လုၵ်ႉတီႈဝတ်ႉမုၼ် ၸဝ်ႈသေမႃးၸႅၵ်ႇပၼ်၊ ပလိၵ်ႈၶဝ်ၵေႃႈ ႁၼ်မႃးတေႃႉၶူဝ်းၶွင်ၸွႆႈၵူၼ်း မိူင်းၸိူဝ်းထူပ်းၽေးၽွင်ႈယူႇ။
ႁၢၼ်ႉတေႃႇမိူဝ်ႈၼႆႉ ဝၼ်းထိ 21/08/12 ၼမ်ႉတိုၵ်ႉထူမ်ႈၶူဝ်ဢီႇၼၢႆးဢၼ်ၶိုၼ်ႈၵႂႃႇတၢင်းႁူဝ်ပိုၵ်ႉ၊ ၶူဝ်ဢေႊၻီႊ (AD) ၵေႃႈၼမ်ႉတိုၵ်ႉထူမ်ႈတၢင်းႁူဝ်တၢင်းႁၢင်၊ ႁဵတ်းႁႂ်ႈလူတ်ႉၵႃးၸိူဝ်းလုၵ်ႉဝဵင်းလိူဝ်ႇ (မၼ်းတလေး) ၶိုၼ်ႈ ဢိၵ်ႇလူတ်ႉၵႃးၸိူဝ်း လုၵ်ႉတၢင်းမူႇၸႄႈလူင်းမႃး ၶၢင်ႉၶမ်ဝႆႉၸွမ်းတၢင်းၼပ်ႉႁူဝ် ႁဵင်လမ်း-ၼႆယဝ်ႉ။

ဝဵင်းလႃႈသဵဝ်ႈၼႆႉ ၼႂ်းဝဵင်းတႄႉတႄႉဢမ်ႇမီးၵေးမႄႈၼမ်ႉယႂ်ႇလူင်၊ မီးမႄႈၼမ်ႉတွၼ် ဢၼ်ႁူဝ်မၼ်း မီးတီႈတိၼ်လွႆ သႃသၼႃ 2,500 (ၵၢင်ဝဵင်း) လႆလူင်းၵႂႃႇၶဝ်ႈၼွင်ၸဝ်ႈၾႃႉသေ လၢႆႇၼွင်ၸဝ်ႈၾႃႉ သိုပ်ႇလႆၵႂႃႇၶဝ်ႈၼမ်ႉယၢဝ်ဢၼ်လႆ လတ်းၽၢၼ်ႇၾၢႆႇႁွင်ႇဝဵင်း၊ ၼမ်ႉတွၼ်ၼႆႉၵေႃႈ ပဵၼ်ၼမ်ႉႁွင်ႈဢွၼ်ႇ ႁွင်ႈဢိတ်းလႆလူင်းၶွၼ်ႈၵၼ်သေ ပဵၼ်မႃးမႄႈ ၼမ်ႉတွၼ်။ ၼွၵ်ႈသေၼၼ်ႉ ၵေးမႄႈၼမ်ႉယႂ်ႇမီးထႅင်ႈ ၼမ်ႉပႃၶီး လႆလတ်းၽၢၼ်ႇၾၢႆႇတူၵ်းဝဵင်း၊ မႄႈၼမ်ႉသဵဝ်ႈသမ်ႉလႆ ၽၢၼ်ႇၾၢႆႇဢွၵ်ႇဝဵင်း။