ၾူၼ်တူၵ်းႁႃႇယႂ်ႇႁႃႇလူင် လွႆၵူၼ်ႇ၊ တူၼ်ႈမႆႉလူမ်ႉ၊ ၼမ်ႉၼွင်းႁႅင်း ပွတ်းၵူတ်ႉၶၢႆ ႁဵတ်းႁႂ်ႈသဵၼ်ႈတၢင်း လူင် ၶၢတ်ႇ၊ လူတ်ႉၵႃးၼပ်ႉႁူဝ်ႁဵင်လႆႈၵိုတ်းႁႅမ်းတၢင်း။

ၼမ်ႉၼွင်းပွတ်းသႅၼ်ဝီ

ပူၼ်ႉမႃးၶမ်ႈဝၼ်းထိ 13/08/12 ၼၼ်ႉ ယွၼ်ႉၾူၼ်တူၵ်းတင်းၶိုၼ်း၊ ထိုင်မႃးဝၼ်းထိ 14 လွႆသုၶိၼ်းတႃႇ တီႈဢၼ် ပဵၼ်သၼ်လွႆၵူတ်ႉငွၵ်း ၼႂ်းၵႄႈၵၢင်ၼမ်ႉၽၵ်းၵႃလႄႈၵူတ်ႉၶၢႆၵူၼ်ႇ 3-4 တီႈ၊ တူၼ်ႈမႆႉႁၵ်းလူမ်ႉ တဵင်တၢင်း 2 တီႈ။ ၼွၵ်ႈသေၼၼ်ႉ ၼမ်ႉၵူတ်ႉ(ၵႄႈၵၢင်လွႆသုၶိၼ်းတႃႇတင်းၵူတ်ႉၶၢႆ)သမ်ႉၼွင်းထႅင်ႈ လႄႈ ႁဵတ်းႁႂ်ႈသၢႆသဵၼ်ႈတၢင်းလူင် ၸိုင်ႈမိူင်းႁူမ်ႈတုမ် ဝဵင်းလိူဝ်ႇ-လႃႈသဵဝ်ႈ-မူႇၸႄႈ ၶၢတ်ႇၵႂႃႇ၊ လူတ်ႉၵႃး ၸိူဝ်းဢွၵ်ႇတၢင်း ၼပ်ႉႁူဝ်ႁဵင်လႆႈၵိုတ်းယိုတ်းဝႆႉ။ ဢၼ်ႁဵတ်းႁႂ်ႈလူတ်ႉၵႃးၶၢင်ႉၶမ်ၵႂႃႇမႃးယၢပ်ႇထႅင်ႈ ၼၼ်ႉ ယွၼ်ႉလူတ်ႉၵႃးလူင် လမ်းၼိုင်ႈပလၢတ်ႈတၢင်း တေလူမ်ႉဢမ်ႇ လူမ်ႉသေၶႂၢင်တၢင်းဝႆႉ ၵေႃႈပႃးၽွင်ႈ-ၼႆယဝ်ႉ။

လႆႈႁူႉဝႃႈ ၼမ်ႉၵူတ်ႉ ၼွင်းထိုင်ဢႅဝ်၊ ပေႃးၸၢင်ႈၵူၼ်းတေႃႉ/ႁၢမ်ပၼ် လူတ်ႉၶိူင်ႈ 1 လမ်းလႆႈၸၢႆႇ 5,000 ပျႃး၊ ပေႃးၸၢင်ႈ ဢီးလူတ်ႉဝႅၼ်ႊၵေႃႈ 1 လမ်း 5,000 ပျႃးၼင်ႇၵဝ်ႇ။ ၼႂ်းၵႄႈလၢၼ်ႇ/ၵဵတ်ႉဢေႊသျိူဝ်ႊ ဝိူဝ်ႊလ် မႃးတေႃႇထိုင်ၼႂ်း ဝဵင်းၵူတ်ႉၶၢႆၼၼ်ႉ လူတ်ႉၵႃးၵိုတ်းဝႆႉပဵၼ်ထႅဝ် ပဵၼ်ထႅဝ်လူင်ဝႆႉဢမ်ႇယွမ်းႁူဝ် ႁဵင်၊ တင်ႈတႄႇလၢၼ်ႇဢေႊသျိူဝ်ႊဝိူဝ်ႊလ် တေႃႇထိုင်ဝဵင်းမူႇၸႄႈ ဢမ်ႇယွမ်း 2,000 လမ်း- ၼႆယဝ်ႉ။

တင်ႈတႄႇႁူဝ်လိူၼ်ဢေႃႊၵတ်ႉသ်ၼႆႉမႃး ၵွပ်ႈၾူၼ်ၵႆႉတူၵ်းႁႃႇယႂ်ႇလႄႈ ၼမ်ႉပေႃႈၵေႃႈၼွင်း၊ ၼမ်ႉတူႈ ၵေႃႈၼွင်း၊ ၼမ်ႉယၢဝ်ၵေႃႈၼွင်း ႁဵတ်းႁႂ်ႈထူမ်ႈသဵၼ်ႈတႃႈသၢႆတၢင်း ၶူဝ်ၵွႆတၢင်းၵွႆ။ မိူဝ်ႈႁူဝ်လိူၼ်ၼႆႉ ယွၼ်ႉပိူဝ်ႈၼမ်ႉတူႈ (ပွတ်းသႅၼ်ဝီ) ၼွင်းလႄႈ ၵူၼ်းတေႃႉလူတ်ႉၶိူင်ႈလႆလွင်ႈၸွမ်းၼမ်ႉၵႂႃႇတၢႆၵေႃႉ ၼိုင်ႈ- ၼႆယဝ်ႉ။