ၸွမ်းၼင်ႇလူင်ပွင်ၸိုင်ႈထႆး လႆႈတုင်းႁပ်ႉမၵ်းမၼ်ႈ ၶေႃႈလဝ်ႈတၢင်ႇၶွင်ၵေႃလိၵ်ႈလၢႆးလႄႈ ၾိင်ႈငႄႈတႆးၼႂ်းၵဵင်းမႆႇ ၸိုင်ႈထႆး ႁႂ်ႈပဵၼ်ၸုမ်းဢၼ်ထုၵ်ႇမၢႆမီႈၸိုင်ႈမိူင်းထႆး (Register) မႃးမိူဝ်ႈဝၼ်းထိ 30 လိူၼ်မၢတ်ႉၶျ်ၼၼ်ႉယဝ်ႉ သမႃးၶူမ်းပၢႆး ပၺ်ၺႃလႄႈ ၾိင်ႈငႄႈတႆးတေၸတ်း ပၢင်ပိုတ်ႇပိုၼ်ၽၢဝ်ႇ လွင်ႈ ပဵၼ်မႃးၸုမ်းဢၼ်ထုၵ်ႇမၢႆမီႈ ၸိုင်ႈမိူင်းထႆးလႄႈၶေႃႈ ဢဵၼ်းဢၢၼ်းၶွင်သမႃးၶူမ်း။

ဝၼ်းထိ 19/08/2012 ၼႆႉသမႃးၶူမ်းပၢႆးပၺ်ၺႃလႄႈၾိင်ႈငႄႈတႆး တေၸတ်းပၢင် ပိုတ်ႇလုမ်းပွင်ၵၢၼ် ပိုၼ်ၽၢဝ်ႇ ၼႄႉၼမ်းတူဝ် ၽူႈၶဝ်ႈပႃးၼႂ်းၵေႃၵမ်ၵၢၼ် လႄႈဢဵၼ်းဢၢၼ်းၶွင်သမႃးၶူမ်း ဢွင်ႈတီႈလုမ်း “ၵေႃလိၵ်ႈလၢႆးလႄႈ ၾိင်ႈငႄႈတႆး-ၵဵင်းမႆႇ” - “သမႃးၶူမ်းပၢႆးပၺ်ၺႃလႄႈ ၾိင်ႈငႄႈတႆး” ဝတ်ႉၵူႇတဝ်ႈ မၢႆ 60 သဵၼ်ႈတၢင်းၵူႇတဝ်ႈ ဢိူင်ႇသီၽုမ်း ၸႄႈဝဵင်းမိူင်း ၸႄႈတွၼ်ႈ ၵဵင်းမႆႇ။ ဢိၵ်ႇတင်းၵၢၼ်ငၢၼ်းဢၼ် တေ ႁဵတ်းသၢင်ႈၵႂႃႇမိူဝ်းၼႃႈလႄႈ ၸင်ႇလႆႈပိုၼ်ၽၢဝ်ႇ ဝွၵ်ႇၸိူၼ်း ၽူႈယႂ်ႇၵူၼ်းလူင် ထႆး/တႆး မုၵ်ႉမူႇ ၾုင်ၸုမ်း ႁူမ်ႈတင်းသုၼ်ႇၿုၵ်ႉၶလ (သုၼ်ႇၵေႃႉ) ၶဝ်ႈႁူမ်ႈ။

ႁူဝ်ႁုပ်ႈၶပ်းမၢႆၵၢၼ် ပၢင်ပိုတ်ႇပိုၼ်ၽၢဝ်ႇလွင်ႈပဵၼ်မႃးသမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ဢၼ်ထုၵ်ႇ မၢႆမီႈ ၸိုင်ႈမိူင်း ထႆးလႄႈတင်း ဢဵၼ်းဢၢၼ်းၶွင်သမႃးၶူမ်းၼၼ်ႉ - ၵၢင်ၼႂ် 10.00 မူင်း တေပိုတ်ႇပၢႆႉ ၸိုဝ်ႈၶွင်သမႃးၶူမ်းသေ 11.00 မူင်း တၢၼ်းၽဵၼ်း (ၵၢပ်ႈသွမ်းသင်ၶၸဝ်ႈ) 9 တူၼ် သူတ်ႇမင်းၵလ (မင်ႇၵလႃႇ)။ ဝၢႆးၼၼ်ႉၵေႃႈ ၵပ်းသိုပ်ႇမိုတ်ႈၵိုဝ်းတၵ်ႉ တၢႆးၵၼ် ၼႂ်းပၢင်လဵင်ႉလူ ၶႅၵ်ႇၽူႈၶဝ်ႈႁူမ်ႈပၢင်။

လိူဝ်သေၼၼ်ႉ ၵၢင်ၶမ်ႈတႄႇယၢမ်း 17.00 မူင်း တေမီးပၢင်ၵိၼ်ၶဝ်ႈႁူမ်ႈမူႇ (ၶၼ်တူၵ်ႇ ဝႅပ်ႇၾၢင် - လၢႆးပိုၼ်ႉမိူင်း လၢၼ်ႉၼႃး) ပဵၼ်တၢင်း ၵၢၼ်၊ ၼၢႆႊယူၵ်ႉ (ၼႃယၵ) တေမွၵ်ႇလၢတ်ႇၶေႃႈၵႂၢမ်းပိုတ်ႇပၢင် လွင်ႈပဵၼ်မႃး “သမႃးၶူမ်းပၢႆးပၺ်ႇၺႃ လႄႈၾိင်ႈငႄႈတႆး” ပဵၼ်ၸုမ်းဢၼ်ထုၵ်ႇမၢႆမီႈပၵ်းပိူင်ၵူတ်းမၢႆ ၸိုင်ႈမိူင်းထႆး ဢွၼ်တၢင်းသုတ်းၶွင်တႆး လႄႈ ၼႄႉၼမ်း တူဝ်ၽူႈၶဝ်ႈပႃးၼႂ်း ၸုမ်းၵေႃၵမ်ၵၢၼ်သမႃးၶူမ်း ႁူမ်ႈတင်းမီးပၢင်ၼႄတၢင်းၵႃႈဝႅၼ် လႄႈၾိင်ႈၵႂၢမ်းတႆး ၶွင်မေႃႁွင်ႉၽဵင်းဝွၵ်းမၢၵ်ႇၵႂၢမ်းတြေႃး ၸိုဝ်ႈယႂ်ႇ။

မၢႆတွင်း -
ၽိူၼ်ၶဝ်ႈ (ၶၼ်တူၵ်ႇ ဝႅပ်ႇၾၢင်- လၢႆးပိုၼ်ႉမိူင်းလၢၼ်ႉၼႃး) 1 ၽိူၼ် 500 ၿၢတ်ႇတႃႇ 5 ၵေႃႉ

တိတ်းတေႃႇၵပ်းသိုပ်ႇတီႈမၢႆၾူၼ်ႊ - 087-1906928, 089-6366895, 089-2627848