လွင်ႈသိုၵ်းဝႃႉတင်းသိုၵ်းတႆးၶဵင်ႈၶႅင်ၵၢၼ်သိုၵ်းတေႃႇၵၼ်၊ ယူႇတီႈလွႆတႆးလႅင်းသူင်ႇတူဝ်တႅၼ်းၵႂႃႇဢုပ်ႇ ၵေႃႈ ဝႃႉပႆႇ ႁပ်ႉဢုပ်ႇၼၼ်ႉ မိူဝ်ႈလဵဝ်မီးလၢႆၾၢႆႇမႆႈၸႂ် ၶဝ်ႈႁူမ်ႈၵႄႈ လိတ်ႈၸွမ်း၊ ၵူၼ်းမိူင်းၵေႃႈၵူဝ်ပဵၼ် ၵႂၢႆးတေႃးၵၼ် သၢင်ႈတေးၼႃး။

ပူၼ်ႉမႃးမိူဝ်ႈဝၼ်းထိ 04/08/12 ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA သူင်ႇတူဝ်တႅၼ်း ၶုၼ်သိုၵ်းဢွင်ႇသိုၵ်း တင်း ၶုၼ်သိုၵ်းလွၼ်ႉသၢင် ၵႂႃႇႁူပ်ႉဢုပ်ႇဢူဝ်း တပ်ႉသိုၵ်းမိူင်းဝႃႉ ၽွမ်ႉႁူမ်ႈ UWSA တီႈမိူင်းၵျွတ်ႈ၊ ပိူဝ်ႈတႃႇလူတ်းယွၼ်ႇ လွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်။ လႆႈငိၼ်းဝႃႈ ၾၢႆႇတပ်ႉဝႃႉဢမ်ႇႁပ်ႉဢုပ်ႇလႄႈ ဢမ်ႇတွပ်ႇ လၢတ်ႈသင်၊ ဝၼ်းထိ 5 ၵေႃႈပွၵ်ႈမႃးၶိုၼ်း- လႅင်ႇၶၢဝ်ႇၵူၼ်း ယူႇလႅၼ်လိၼ်ပွင်ႇမႃးၼင်ႇၼႆ။

ဢွၼ်ၼႃႈၼႆႉ ဝၢႆးသိုၵ်းဝႃႉႁွင်ႉၵုမ်းတူဝ်သိုၵ်းတႆးလွႆတႆးလႅင်းဝႆႉ မိူဝ်ႈဝၼ်းထိ 30/07/12 ယဝ်ႉ ဝၢႆးၼၼ်ႉ ဢမ်ႇလၢႆဝၼ်း တၢင်း RCSS/SSA လႆႈသူင်ႇတူဝ်တႅၼ်း 2 ၵေႃႉ ၵႂႃႇဢုပ်ႇဝႃႉတီႈမိူင်းၵျွတ်ႈ၊ ၵူၺ်းၵႃႈ ၾၢႆႇသိုၵ်းဝႃႉပႆႇႁပ်ႉဢုပ်ႇ၊ လၢတ်ႈဝႃႈ ဝၼ်းထိ 04/08/12 ၸင်ႇၵွႆႈမႃးထႅင်ႈ။ ၵူၺ်းၵႃႈ ထိုင်မႃးဝၼ်းထိ 4 တၢင်း RCSS/SSA လႆႈသူင်ႇတူဝ်တႅၼ်းၵႂႃႇႁူပ်ႉဢုပ်ႇ ထႅင်ႈၵေႃႈ ၾၢႆႇဝႃႉပႆႇႁပ်ႉဢုပ်ႇ။

ၾၢႆႇသိုၵ်းဝႃႉၼႂ်းပိုၼ်ႉတီႈလၢတ်ႈဝႃႈ- ဢၼ်ပႆႇၸၢင်ႈဢုပ်ႇၵၼ်ၼႆႉ ၵွပ်ႈဝႃႈတၢင်းၼိူဝ်ပႆႇသင်ႇမႃးလႄႈ ႁဝ်းပႆႇ ၸၢင်ႈဢုပ်ႇ၊ ႁဝ်းပႆႇလႆႈၶေႃႈၸိသင်ႇ။ ၵူၺ်းၵႃႈ ၵူၼ်းသိုၵ်းတႆးဢၼ်ႁွင်ႉၵုမ်းတူဝ်ဝႆႉၼၼ်ႉ ႁဝ်းဢမ်ႇႁဵတ်း သင်တီႈၶဝ်၊ ႁဝ်းတူၺ်း လွမ်ပၼ်ၶဝ်လီယူႇ၊ ႁဝ်းဢဝ်ၶဝ်ဝႆႉၼႂ်းဝၢင်းႁိူၼ်းတီႈၼိုင်ႈသေ ဢဝ်သိုၵ်းၵုမ်းဝႆႉ တၢင်းၼွၵ်ႈၵူၺ်း- ဝႃႈၼႆ။

ၾၢႆႇၼိုင်ႈတၢင်းၼိုင်ႈ၊ ၸဝ်ႈႁၢၼ်ႉၶၢႆၶူဝ်းၼႂ်းၼႃးၵွင်းမူးၵေႃႉၼိုင်ႈလၢတ်ႈဝႃႈ- လွင်ႈဢၼ်သိုၵ်းတႆးသိုၵ်း ဝႃႉၶဵင်ႈၶႅင်ၵၼ် ၼႆႉ သိုၵ်းဝႃႉၸၼ်ႉပႃႈတႂ်ႈၵမ်ႈၼမ် ၶဝ်ၵေႃႈဢမ်ႇပေႃးႁၼ်လီၸွမ်း၊ ငိၼ်းသိုၵ်းဝႃႉဢၼ် မႃး သိုဝ်ႉၶူဝ်းတီႈႁၢၼ်ႉလၢတ်ႈဝႃႈ ႁဝ်းၼႆႉဢမ်ႇထုၵ်ႇလီၽိတ်းမေႃးယိုဝ်းၵၼ်၊ ႁဝ်းပဵၼ်ၵူၼ်းၼႂ်းမိူင်းလဵဝ် ၵၼ်၊ ၵူၺ်းၵႃႈ ဢၼ်ပဵၼ်မႃးၸိူင်ႉၼႆၼႆႉ ႁဝ်းၵေႃႈဢမ်ႇႁူႉၵူၼ်းလူင်ႁဝ်းၶဝ်ဝူၼ်ႉၸိူင်ႉႁိုဝ်- ဝႃႈၼႆ။

ပိူဝ်ႈတႃႇလူတ်းယွၼ်ႇဢၼ်သွင်ၾၢႆႇၶဵင်ႈၶႅင်ၵၢၼ်သိုၵ်းတေႃႇၵၼ်ယူႇၼႆႉ ၵမ်ႈၽွင်ႈဝႃႈ- ႁႂ်ႈတၢင်းလွႆတႆး လႅင်း တႅမ်ႈလိၵ်ႈ မိူဝ်းၸူးတီႈပၢင်သၢင်း။ ၵပ်းၵၢႆႇလွင်ႈၼႆႉ ၸဝ်ႈၼႃႈတီႈလွႆတႆးလႅင်းၵေႃႉၼိုင်ႈလၢတ်ႈဝႃႈ- ၸဵမ်မိူဝ်ႈပီ 2009 မႃး ႁဝ်းၶႃႈ လႆႈသူင်ႇတူဝ်တႅၼ်းၵႂႃႇၸူးဝႃႉ (ငဝ်ႈငုၼ်းပၢင်သၢင်း)လၢႆပွၵ်ႈ၊ တူဝ်ႁူဝ်ပဝ်ႈ လူင် (ၸဝ်ႈယွတ်ႈသိုၵ်း)ၵေႃႈတႅမ်ႈလိၵ်ႈၵႂႃႇၸူး 3 ပွၵ်ႈ။ တၢင်းၾၢႆႇဝႃႉ တေမီးလွင်ႈပႅင်းၸႂ်သင်ဝႆႉဢမ်ႇႁူႉ၊ ဢမ်ႇတွပ်ႇ လၢတ်ႈသင်မႃးသေပွၵ်ႈ။ ဢၼ်ပဵၼ်မႃးလိူင်ႈၸိူင်ႉ ၼႆၵမ်းၼႆႉၵေႃႈ မၢင်ၽဝ်ႇယူဝ်မီးလွင်ႈ တၢင်းတၢင်ႇၸိူဝ်ႉ တၢင်ႇပိူင်ႁိုဝ်- ဝႃႈၼႆ။

မိူဝ်ႈလဵဝ် လႆႈႁူႉဝႃႈတၢင်းဝၢၼ်ႈႁႆးလႄႈသင်၊ မိူင်းလႃးလႄႈသင် မီးၵၢၼ်ၵပ်းသၢၼ်တၢင်းပၢင်သၢင်းသေ ၶတ်းၸႂ်ႁႄႉႁၢမ်ႈ ယႃႇႁႂ်ႈလႆႈၵိူတ်ႇပဵၼ်လိူင်ႈႁၢႆႉ- ၼႆယူႇ။

ၵူၼ်းမိူင်းတူင်ႇဝူင်းၵႂၢင်ႈ ဢၼ်ပဵၼ်တီႈၼပ်ႉထိုဝ်ၵူၼ်းတင်းၼမ်ၼႂ်းမိူင်းတူၼ်ၵေႃႉၼိုင်ႈၵေႃႈ လၢတ်ႈဝႃႈ- ၼင်ႇႁိုဝ် ပေႃးတေႁႄႉႁၢမ်ႈလႆႈၼႆႉ မွၵ်ႈမိူင်းလႃး၊ ဝၢၼ်ႈႁႆးၶဝ်ၵူၺ်းပႆႇပေႃး၊ ထုၵ်ႇလႆႈပႃးၾၢႆႇလူင်ပွင် ၸိုင်ႈမၢၼ်ႈ ၶဝ်ႈၵႄႈၸွမ်း၊ ၵွပ်ႈဝႃႈလူင်ပွင်ၸိုင်ႈမၢၼ်ႈၵေႃႈတင်ႈဝႆႉၶွမ်ႊမတီႊၵေႃႇသၢင်ႈ လွင်ႈငမ်းယဵၼ်၊ မၼ်းထိုင်ၶၢဝ်းယၢမ်းထုၵ်ႇလႆႈႁဵတ်းလွင်ႈ ငမ်းယဵၼ်ယဝ်ႉ၊ ပေႃးဝႃႈၵွတ်ႇၵႆႇပႂ်ႉတူၺ်းလၢႆမၼ်းႁိုဝ်တေ ပဵၼ်။ ၵွပ်ႈဝႃႈ ပေႃးပဵၼ်သိုၵ်းၵၼ်မႃး ဢၼ်တိူဝ်ႉသၢင်ႈ ႁႅင်းၼႆႉပဵၼ်ၵူၼ်းမိူင်းႁဝ်း ဢၼ်ယူႇၵႄႈၵၢင်မၼ်း ပဵၼ်တေးၼႃး၊ ဢမ်ႇၸႂ်ႈၸုမ်းဝႃႉ UWSA ၊ ဢမ်ႇၸႂ်ႈၸုမ်းတႆး RCSS/SSA - ဝႃႈၼႆ။

တၢင်းၾၢႆႇ RCSS/SSA ဝႃႈ- ၵူၼ်းပၢႆႈၽေးၶဝ် ၸိူဝ်းပိုင်ႈဢိင်ယူႇသဝ်းၸွမ်းလႅၼ်လိၼ်ထႆးၼႆႉဝၢႆး RCSS/SSA ၵိုတ်းယိုဝ်းဢဝ်လွင်ႈငမ်းယဵၼ်ၵၼ်တင်းလူင်ပွင်ၸိုင်ႈမၢၼ်ႈယဝ်ႉ ဢိင်ၼိူဝ်လႆႈထုၵ်ႇတတ်း တၢင်းၸွႆႈထႅမ်ၵူႈလွင်ႈလွင်ႈ သေ ၵူၼ်းပၢႆႈၽေးၶဝ်လႆႈႁႃၵိၼ်ႁင်းၵူၺ်းသေမႃးပဵၼ်ႁၢပ်ႇလူင်တပ်ႉသိုၵ်း၊ တပ်ႉသိုၵ်းလႆႈၸွႆႈထႅမ်ၸွမ်းၼင်ႇၵႃႈပွင် ပဵၼ်လႆႈ။ ၸဝ်ႈတိုၼ်းၶိူဝ်း ၽူႈၵွၼ်းတပ်ႉၸုမ်း 727 ၵေႃႈ ယၢမ်ႈလၢတ်ႈဝႃႈ- ၾၢႆႇသိုၵ်းတႆးဢၢင်ႈၵႂႃႇႁဵတ်းတပ်ႉတၢင်းပုင်ႇ ၽႃပုင်ႇတွင်း ပိူဝ်ႈတႃႇႁူမ်ႇလူမ်ႈၵူၼ်းပၢႆႈ ၽေး ၵႂႃႇႁဵတ်းၵၢၼ်ၽုၵ်ႇသွမ်ႈ၊ ယွၼ်ႉဝႃႈတင်ႈတႄႇၵိုတ်းယိုဝ်းမႃး လွင်ႈၸွႆႈထႅမ် ၸဝ်ႈတႃႇၼၵေႃႈလူတ်း ယွမ်းၵႂႃႇ- ၼႆယူႇ။

လွင်ႈႁၢင်ႈႁႅၼ်းၶဵင်ႈၶႅင်ၵၢၼ်သိုၵ်းၸိူင်ႉၼႆၼႆႉ ပူၼ်ႉမႃးမိူဝ်ႈဝၼ်းထိ 16/06/12 ယၢမ်ႈပဵၼ်မႃးတီႈ လွႆၵေႃႇဝၼ်း။ တပ်ႉသိုၵ်းဝႃႉၸႂ်ႉဢဵၼ်ႁႅင်းၵူၼ်းမွၵ်ႈ 500 မႃးဢိူမ်ႈၸမ်လွႆၵေႃႇဝၼ်း၊ ငဝ်ႈငုၼ်း RCSS/SSA ၼႃႈလိၼ်သိုၵ်းၵဵင်းတုင် ပႃႈတႂ်ႈၸဝ်ႈသိုၵ်းလူင်ၵွၼ်းၸိုၼ်ႈယိပ်းၵုမ်း။ မိူဝ်ႈၼၼ်ႉၵေႃႈ ၵူၼ်းလူင်သွင်ပႃႈ သွင်ၾၢႆႇၶတ်းၸႂ်ၵပ်းသၢၼ်ၵၼ်သေ မီးလွင်ႈလူတ်းယွၼ်ႇၵၢၼ်သိုၵ်းတေႃႇၵၼ်မႃး။

ႁၢႆးငၢၼ်းလိုၼ်းသုတ်းမီးဝႃႈ ၸဝ်ႈယွတ်ႈသိုၵ်းလၢတ်ႈဝႃႈ- ၵူၼ်းသိုၵ်း RCSS/SSA ၸိူဝ်းထုၵ်ႇသိုၵ်းဝႃႉၵုမ်း တူဝ်ဝႆႉမီး တင်းမူတ်း 14 ၵေႃႉ၊ ၵွင်ႈ 14 လဝ်း၊ ၸၢၵ်ႈလၢတ်ႈ 4 လုၵ်ႈ၊ ၵူၺ်းၵႃႈ လိူဝ်သေၼၼ်ႉ မီးၵူၼ်း မိူင်း ထႅင်ႈလၢႆၵေႃႉတႄႉပႆႇႁူႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈၼႆႉ (07/08/12) တၢင်းၾၢႆႇ RCSS/SSA လႆႈၵပ်းသၢၼ်ၵႂႃႇတီႈၽူႈၵွၼ်းတပ်ႉ သိုၵ်းဝႃႉၶဝ်တီႈ ငဝ်ႈငုၼ်းပၢင်သၢင်း။ ၾၢႆႇဝႃႉတွပ်ႇလၢတ်ႈဝႃႈ- လွင်ႈၼႆႉ တႃႇတေၵႄႈလိတ်ႈၵၼ် ႁႂ်ႈၶဝ်ႈ ၸႂ်ၵၼ်လီလီၼႆႉ တၢင်းၾၢႆႇ RCSS/SSA ထုၵ်ႇလီသူင်ႇၵူၼ်းလူင်မႃး ဢုပ်ႇဢူဝ်းၵၼ်၊ ပေႃးသူင်ႇၸဝ်ႈၼႃႈ တီႈၸၼ်ႉဢွၼ်ႇ မႃးဢုပ်ႇၵၼ်ၵူၺ်း တေဢမ်ႇၸၢင်ႈၵႄႈလိတ်ႈတႅပ်းတတ်း- ဝႃႈၼႆ။