ဝၼ်းၶုၵ်းထူပ်း ၸုမ်းသိုဝ်ႇႁႅင်းၼုမ်ႇ ၶွပ်ႈတဵမ် 10 ပီ မီးၵၢၼ် မွၵ်ႇလၢတ်ႈပူင်ၵႂၢမ်း လွင်ႈငဝ်းလၢႆးၵၢၼ်မိူင်းမၢၼ်ႈ၊ ၸၢဝ်းၶိူဝ်း တႆး ယႃႇႁႂ်ႈမိူၼ်တိူၵ်ႇလိူၼ်၊ ယႃႇပၼ်ႈလိၼ်ၼဵဝ်ၼႂ်းမိုဝ်း ဢွၵ်ႇမႃးပဵၼ်ၽီလူးၽီၽၢႆး၊ ၼွၵ်ႈသေၼၼ်ႉ မီးၵၢၼ်သူၼ်း တုမ်ႁႂ်ႈတႆးပဵၼ်ၼမ်ႉၼိုင်ႈၸႂ်လဵဝ်။

ဝၼ်းထိ 05/08/12 တင်ႈတႄႇယၢမ်း 13:00-17:00 မူင်း၊ ၸုမ်းသိုဝ်ႇႁႅင်းၼုမ်ႇ SYP (Youth Power Media) ၸတ်းပၢင်ၶုၵ်းထူပ်း ဢဝ်ၵုၼ်းမုၼ်ဝၼ်းၵိူတ်ႇမူႇၸုမ်း ဢၼ်ၸႂ်ႉၸိုဝ်ႈဝႃႈ “ၶၢဝ်းတၢင်းတိုၼ်ႇၼႄလႅင်း သိုဝ်ႇႁႅင်းၼုမ်ႇ 10 ပီ” ၵႂႃႇတီႈၼႂ်းမိူင်းထႆး ၵဵင်းမႆႇတီႈၼိုင်ႈ၊ မီးၵူၼ်းၼုမ်ႇ/ၸုမ်းသိုဝ်ႇၶဝ်ႈႁူမ်ႈဢမ်ႇယွမ်းမွၵ်ႈ 300 ၵေႃႉ၊ မီးၽူႈယႂ်ႇၵူၼ်းလူင် မိူၼ်ၼင်ႇဢႃးၸၢၼ်ၶိုၼ်းသႂ်၊ ဢႃးၸၢၼ်ၽိပ်ႉၽႃႊ၊ ၸဝ်ႈၵၼ်းၸဵတ်း လႄႈၶႅၵ်ႇၶိုၵ်ႉ တွၼ်းၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်း။

ဢႃးၸၢၼ်ၶိုၼ်းသႂ် မွၵ်ႇလၢတ်ႈပူင်ၵႂၢမ်း ၵဵဝ်ႇၵပ်းသၢႆငၢႆငဝ်းလၢႆးၵၢၼ်မိူင်းၼႂ်းဝၼ်းမိူဝ်ႈၼႆႉမီးႁူဝ်ႁုပ်ႈဝႃႈ- မိူဝ်ႈၵူႈပွၵ်ႈပိူၼ်ႈဢွၼ် ၵၼ်ၶဝ်ႈထိူၼ်ႇ၊ မိူဝ်ႈလဵဝ်ဢွၼ်ၵၼ်ၶိုၼ်းၶဝ်ႈၼႂ်းမိူင်း၊ ၸုမ်းသိုဝ်ႇၵေႃႈဢွၼ်ၵၼ်ၶဝ်ႈ မိူဝ်းတၢင်ႇမၢႆၾၢင် (Register) ႁႂ်ႈထုၵ်ႇ မႅၼ်ႈၸွမ်းတၢင်းၵၢၼ်၊ ၵူၺ်းၵႃႈငဝ်းလၢႆးဝၼ်းမိူဝ်ႈၼႆႉ ၸုမ်းယိပ်း ၵွင်ႈၵၢင်ႇၶဝ်ဢဝ်လွင်ႈငမ်းယဵၼ် ၵိုတ်းယိုဝ်းၵႂႃႇယဝ်ႉၵေႃႈ တိုၵ်ႉမီးပၢင်တိုၵ်းယူႇၶိူဝ်းယႂ်း၊ မိူၼ်ၼင်ႇဝူင်ႈၵၢင် တပ်ႉသိုၵ်းၸိုင်ႈတႆး RCSS/SSA တင်းသိုၵ်းမၢၼ်ႈၵူၺ်း ပဵၼ်ဢမ်ႇယွမ်း 27 ပွၵ်ႈ။ ၵွပ်ႈၼႆ ႁႂ်ႈၵူၼ်းၼုမ်ႇ မေႃတူင်ႉၼိုင်/ၼပ်ႉသွၼ်ႇ/ၶိုတ်းတၼ်းငဝ်းလၢႆး ဢၼ်ပဵၼ်မႃးသေ ႁဵတ်းၵၢၼ်ႁႂ်ႈထိုင်တီႈထိုင်လႅၼ်- ဝႃႈၼႆ။

ဢႃးၸၢၼ်ၽိပ်ႉၽႃႊ မွၵ်ႇလၢတ်ႈၵႂၢမ်းမီးႁူဝ်ႁုပ်ႈဝႃႈ- မိူဝ်ႈလဵဝ်မိူင်းဝၼ်းတူၵ်းၶဝ် တေၸွႆႈပၼ်ၶၵ်ႉၵၢၼ်လွင်ႈငမ်း ယဵၼ်မိူင်းမၢၼ်ႈ ႁႂ်ႈပဵၼ်ၵၢၼ် လူၺ်ႈႁႅင်းငိုၼ်းၼမ်လူင်လၢင်။ ၵူၺ်းၵႃႈ ၸႂ်ႉႁႅင်းငိုၼ်းၼမ် ၵႃႈႁိုဝ်ၵေႃႈယဝ်ႉ လွင်ႈငမ်းယဵၼ်ၼႆႉ ပေႃးဝႃႈတိုၵ်ႉ မီးၵၢၼ်တိုၵ်းယိုဝ်းၵၼ်ယူႇတိၵ်းတိၵ်းၸိုင် ၵွၼ်ႈငိုၼ်း ၼမ်လူင်လၢင်ၼၼ်ႉ ဢမ်ႇၵႄႈလိတ်ႈလႆႈပၼ်ႁႃ။ ၵွပ်ႈၼၼ် ၵၢၼ်ၵေႃႇ သၢင်ႈလွင်ႈငမ်းယဵၼ်ႁႂ်ႈယိုၼ်းယၢဝ်း ၼၼ်ႉ တၵ်းလႆႈၵိုတ်း ယိုတ်းလွင်ႈႁၢင်ႈသိုၵ်းတေႃႇၸုမ်းၸၢဝ်းၶိူဝ်းလႄႈ ၸၢဝ်းၶိူဝ်းတၵ်း လႆႈမီးသုၼ်ႇႁူမ်ႈၼႂ်း ၶၵ်ႉၵၢၼ်လွင်ႈငမ်းယဵၼ်- ဝႃႈၼႆ။

မႄႈၶူးၶိူဝ်းသႅၼ် မွၵ်ႇလၢတ်ႈၵႂၢမ်းဝႃႈ- ပိူၼ်ႈဝႃႈတႆးႁဝ်းၼႆႉမိူၼ်တိူၵ်ႇလိူၼ်၊ တိူၵ်ႇလိူၼ်ၼႆႉဢမ်ႇမီးႁူ/တႃ/ ႁူဝ်/တိၼ်/မိုဝ်း။ မူၵ်းယူႇၼႂ်းလိၼ်၊ ၸီးလိၼ် ၵိၼ်လိၼ်၊ ၶီႈၵေႃႈပဵၼ်လိၼ်၊ ယူႇတီႈပိူဝ်ႉဢုင်ၵူမ်ႇဝူၺ်ႇႁင်ႈ၊ ပေႃးပိူၼ်ႈတႅပ်းပဵၼ်လၢႆပွတ်းၵေႃႈ ပဵၼ်ၵႂႃႇလၢႆတူဝ်။ လွင်ႈမၼ်းၶီႈသေပဵၼ်လိၼ်ၼၼ်ႉသမ်ႉ ဢမ်ႇပဵၼ် ၽွၼ်းလီသင်တႃႇမၼ်း၊ မီးၸဝ်ႈသူၼ်ၸဝ်ႈႁႆႈၸဝ်ႈၼႃး ၵူၺ်းလႆႈၼမ်ႉတွၼ်းၽွၼ်းလီမၼ်း။ ငဝ်းလၢႆးတႆး ႁဝ်းဝၼ်းမိူဝ်ႈၼႆႉၵေႃႈ ဢၼ်ပိူၼ်ႈဝႃႈမိူၼ်တိူၵ်ႇလိူၼ်ၼႆႉ ၶႂ်ႈမႅၼ်ႈယူႇ- ဝႃႈၼႆ။

သိုပ်ႇလၢတ်ႈဝႃႈ- ငဝ်းလၢႆးပၢႆးပၺ်ႇၺႃႇလုၵ်ႈဢွၼ်ႇႁႅင်းၵၢၼ်ယၢၼ်မိူင်း ၸၢဝ်းၶိူဝ်းတႆးၸိူဝ်းတူၵ်းႁွတ်ႈမိူင်းထႆး ၵမ်ႈၽွင်ႈၵေႃႈ လႆႈဝႃႈမီးၼႂ်းမိုဝ်းၸုမ်းသိုဝ်ႇႁႅင်းၼုမ်ႇၵမ်ႈၽွင်ႈ၊ မိူၼ်ၼင်ႇသိုဝ်ႇႁႅင်းၼုမ်ႇယိပ်းဝႆႉလိၼ်ၼဵဝ်၊ ၶႂ်ႈပၼ်ႈဢွၵ်ႇမႃးပဵၼ်ႁၢင်ႈၵႆႇ ႁၢင်ႈမူ ႁၢင်ႈမီ ႁၢင်ႈသိူဝ် ႁၢင်ႈဝူဝ်း ႁၢင်ႈၵႂၢႆး တူဝ်မေႃၵိၼ်ယိူဝ်ႇၵိၼ်ၵိူဝ်ၵိၼ်ယိူဝ်ႈ ၵေႃႈယဝ်ႉ ယူႇတီႈၸုမ်းသိုဝ်ႇႁႅင်းၼုမ်ႇ၊ ၵူၺ်းၵႃႈ ယႃႇပေပၼ်ႈဢွၵ်ႇမႃးပဵၼ်ႁၢင်ႈၽီလူၽီၽၢႆး တူဝ်ဢၼ် ၸၢင်ႈႁဵတ်းႁၢႆႉပၼ်ၽေးတေႃႇၵူၼ်း။ ၼွၵ်ႈသေၼၼ်ႉ လၢတ်ႈပႃးဝႃႈ သိုဝ်ႇႁႅင်းၼုမ်ႇယိုၼ်းယၢဝ်းမႃးလႆႈ 10 သိပ်းပီၼႆႉ ဢဝ်ၵုၼ်းမုၼ်ယႂ်ႇၼမ်တႄႉတႄႉ၊ ပေႃးယိုၼ်းယၢဝ်းၵႂႃႇထႅင်ႈ 10 ပီ ၶႅၼ်းဢဝ် ၵုၼ်းမုၼ်ယႂ်ႇၼမ် လူင်လၢင်- လူပ်းလိုၼ်းၶွတ်ႇယွတ်ႈပၢႆႈၵႂၢမ်းၵႂႃႇၼင်ႇၼႆ။

ၸဝ်ႈၵၼ်းၸဵတ်း မွၵ်ႇလၢတ်ႈပူင်ၵႂၢမ်း တိုၵ်းသူၼ်းႁႂ်ႈမီးလွင်ႈၽွမ်ႉၵၼ်၊ ပဵၼ်ၼမ်ႉၼိုင်ႈၸႂ်လဵဝ်ၵၼ် လႄႈ တူၵ်ႇလၢတ်ႈပိုၼ်း ၵၢၼ်လုၵ်ႉၽိုၼ်ႉၵႃႈပူၼ်ႉမႃး ႁႂ်ႈၵူၼ်းၼုမ်ႇပၢၼ်မိူဝ်ႈလဵဝ်ဢဝ်ပဵၼ်တွၼ်ႈသွၼ်လႄႈ မေႃတူင်ႉၼိုင်ၶိုတ်းတၼ်းၵၢၼ်မိူင်း။ လၢတ်ႈပႃးဝႃႈ မၢၼ်ႈဢမ်ႇၵျႃႉ၊ ဢၼ်တႆးဢမ်ႇပေႉမၢၼ်ႈယွၼ်ႉတႆး ၺၢမ်ႉၶုၺ်ႈၵူၺ်း၊ ငိူၼ်ႈၼဵၼ်ႈလွင်ႈတႆးၶုၺ်ႈဢိူၼ်သမ်ႉ ယွၼ်ႉတႆးဢမ်ႇၽွမ်ႉၵၼ်- ဝႃႈၼႆ။

ဝၢႆးၼၼ်ႉ မီးၵၢၼ်ၼႄၵၢၼ်တူင်ႉၼိုင်ၸုမ်းသိုဝ်ႇႁႅင်းၼုမ်ႇ၊ လုၵ်ႈႁဵၼ်းဢၢၼ်ႇ “ဝွၵ်း” ၵဵဝ်ႇၵပ်းပၢႆးပၺ်ႇၺႃႇ၊ မီးတၢင်းၵႃႈ၊ ၵၢၼ်လဵၼ်ႈၸိူင်း လႄႈ ၵၢၼ်ႁွင်ႉၵႂၢမ်းၶွင်ဝူင်းၵူၼ်းၼုမ်ႇ “ၼူဝ်ႊၼဵမ်ႊ” လဝ်ႇမူၼ်ႈတူၼ်ႈၸႂ်ပၼ် လူပ်းလိုၼ်းၵႂႃႇ။

ၼႂ်းပၢင်ၶုၵ်းထူပ်း မီးၵၢၼ်ၼႄႁၢင်ႈထၢႆႇၵၢၼ်တူင်ႉၼိုင်ၵႃႈပူၼ်ႉမႃး မိူၼ်ၼင်ႇၶူင်းၵၢၼ်ပၢႆးယူႇလီ၊ ၶူင်းၵၢၼ် ပူၵ်းပွင်မူႇဝၢၼ်ႈ၊ ၵၢၼ်တူင်ႉၼိုင်လွင်ႈသိုဝ်ႇ ပပ်ႉလိၵ်ႈၵဝ်ႇ၊ ၶိူင်ႈမႆႉၶိူင်ႈမိုဝ်းၵဝ်ႇၸိူဝ်းယၢမ်ႈၸႂ်ႉႁဵတ်းၵၢၼ်မႃး၊ လွင်ႈၾိင်ႈငႄႈၾိင်ႈထုင်းတႆး၊ ၵၢၼ်ၸႅၵ်ႇပၼ်ၽႅၼ်ႊသီႊတီႊ (CD) ၵဵဝ်ႇၵပ်းတၢင်းႁူႉတၢင်းႁၼ်လႄႈ ပၢႆးယူႇလီ။ ၼွၵ်ႈသေၼၼ်ႉ ၽႂ်ၶႂ်ႈပၼ်ႁႅင်းၵေႃႈ မီးသိူဝ်ႈ တီႈတွင်းမၢႆမူႇၸုမ်းပႃး။

ၸုမ်းသိုဝ်ႇႁႅင်းၼုမ်ႇၼႆႉ ၵူၼ်းၼုမ်ႇမိူင်းတႆးပွတ်းႁွင်ႇ၊ ပွတ်းၸၢၼ်း၊ ပွတ်းဢွၵ်ႇၸိူဝ်းတူၵ်းႁွတ်ႈမိူင်းထႆး လၢႆလၢႆ ၵေႃႉႁူမ်ႈၵၼ် ၵေႃႇတင်ႈၶိုၼ်ႈမႃးမိူဝ်ႈၼႂ်းပီ 2002 ။ မိူဝ်ႈၼၼ်ႉ မီးယိူင်းဢၢၼ်း 5 ပိူင်မိူၼ်ၼင်ႇ 1.ယိူင်းဢၢၼ်း ဢဝ်ၵၢၼ်သိုဝ်ႇပဵၼ်လၵ်း ပူၵ်းတိုၼ်ႇ သူၼ်းတုမ်ၵူၼ်းၼုမ်ႇ၊ ႁႂ်ႈပဵၼ်တီႈလႅၵ်ႈလၢႆႈၶၢဝ်ႇငၢဝ်း လႄႈ တၢင်းႁူႉၵူႈ လွင်ႈလွင်ႈ ၼႂ်းၵႄႈၵၢင်ၵူၼ်းၼုမ်ႇ၊ 2.ႁႂ်ႈပဵၼ် ၵႅၼ်ၵၢင်ၵၢၼ်ၵပ်းသၢၼ်ၵူၼ်းၼုမ်ႇ၊ 3.တေပိုၼ်ၽႄႈၵၢၼ်တူင်ႉ ၼိုင်ၵူၼ်းၼုမ်ႇၵူႈတီႈတီႈ၊ 4.ႁႂ်ႈပဵၼ်တီႈၵူၼ်းၼုမ်ႇပိုတ်ႇဢူၵ်း ၶၢၼ်ပၢၵ်ႇလႄႈ ၼႄၼမ်ႉၵတ်ႉ တူဝ်ၵဝ်ႇ၊ 5.ႁႂ်ႈပဵၼ်တီႈတိတ်းတေႃႇၵပ်းသိုပ်ႇ ပိူဝ်ႈတႃႇပူၵ်းပွင်ၼမ်ႉၵတ်ႉၵူၼ်းၼုမ်ႇတႆး- ၸိူဝ်းၼႆႉ။

ဢိင်ၼိူဝ်မူႇၸုမ်းၵႂၢင်ႈၶႂၢင်မႃးသေ ၵႃႈၼင်ႇပွင်ပဵၼ်လႆႈၼၼ်ႉ ဝၢႆးမႃးတူင်ႉၼိုင်ပႃး- 1.ၵၢၼ်သိုဝ်ႇ လူၺ်ႈမီးဝႅပ်ႉသၢႆႉ၊ ပပ်ႉၽိုၼ်ၶၢဝ်ႇ၊ ဝီႊၻီႊဢူဝ်ႊ လွင်ႈပၼ်တၢင်းႁူႉ။ 2.ပၢႆးပၺ်ႇၺႃႇ သွၼ်ပၼ်လိၵ်ႈလၢႆး လုၵ်ႈဢွၼ်ႇ ၼႂ်းပၢင်သဝ်း ႁႅင်းၵၢၼ်ယၢၼ်မိူင်း လိၵ်ႈတႆး၊ ထႆး၊ ဢင်းၵိတ်း၊ ပၢႆးၼပ်ႉ၊ တၢင်းမေႃဢႆႊထီႊ (ၶွမ်ႊၽိဝ်ႊတိူဝ်ႊ)ပၼ်ၵူၼ်းၼုမ်ႇ လႄႈ လုၵ်ႈဢွၼ်ႇႁႅင်းၵၢၼ်ယၢၼ်မိူင်း။ 3.ပၼ် တၢင်းႁူႉပၢႆးယူႇလီ / ၵဵဝ်ႇၵပ်းလွင်ႈတူဝ်ၶိင်းၵူၼ်း၊ ၵၢၼ်ဝၢင်းၽႅၼ် ၼႃႈႁိူၼ်း၊ လွၵ်းလၢႆးႁႄႉၵင်ႈတၢင်းပဵၼ်။ 4.ၶူင်းၵၢၼ်ပူၵ်းပွင် မူႇဝၢၼ်ႈ၊ ပူၵ်းပွင်ၸွႆႈထႅမ်ပၼ်တၢင်းၶႂ်ႈလႆႈပီႈၼွင်ႉ ၼႂ်းဝၢၼ်ႈၼႂ်းၶူင်ႇၸိူဝ်းၼႆႉလႄႈ ပူၵ်းပွင်ပၼ်တူင်ႇဝူင်းၵူၼ်း ၵႃႈပွင်ပဵၼ်လႆႈ။