မိူဝ်ႈၸဝ်ႈၼႃႈတီႈၶႄႇမႃးထဵတ်ႈထၢမ် ၸၢႆးဢွင်ႇမျၢတ်ႈ (ၵႅမ်ၸၢႆးၼေႃႇၶမ်း)တီႈၵဵင်းတုင်ၼၼ်ႉ ၸိၼႄး ဝႃႈမၼ်း ၸၢႆး ဢမ်ႇၸႂ်ႈၵူၼ်းမိူင်းမၢၼ်ႈ။ ၵွပ်ႈၼႆ ၸဝ်ႈၼႃႈတီႈမၢၼ်ႈ တိုၵ်ႉၶပ်းၶိုင်ပိူဝ်ႈတႃႇထတ်းသၢင် လႄႈႁဵတ်းဝႂ်ၵပ်းတူဝ် ပၼ်မၼ်းၸၢႆး။

ပူၼ်ႉမႃးမိူဝ်ႈဝၼ်းထိ 07-08/08/12 ၶၢဝ်းတၢင်း 2 ဝၼ်း၊ ဢၼ်ၸဝ်ႈၼႃႈတီႈၶႄႇမႃး တွင်ႈထၢမ်ၸၢႆး ဢွင်ႇမျၢတ်ႈ တင်ႈတႄႇ ၵၢင်ၼႂ် 9 မူင်းတေႃႇထိုင်ၵၢင်ၶမ်ႈ 9 မူင်းၼၼ်ႉ ယူႇတီႈၶႄႇၸိၼႄးဝႃႈ ၸၢႆးဢွင်ႇ မျၢတ်ႈ(ၸၢႆးၸဵၼ်းႁူင်) ဢမ်ႇၸႂ်ႈၵူၼ်းမိူင်း မၢၼ်ႈ၊ ဢမ်ႇမီးဝႂ်ၵပ်းတူဝ်ၵူၼ်းမိူင်းမၢၼ်ႈ။ ၵပ်းၵၢႆႇလွင်ႈၼႆႉ လွင်ႈဝႃႈၸၢႆးဢွင်ႇမျၢတ်ႈ ပဵၼ်ၵူၼ်းၵိုၵ်းမိူင်းမၢၼ်ႈ(မိူင်းတႆး) ၼႆၼၼ်ႉ မိူဝ်ႈၼႆႉ ဝၼ်းထိ 09/08/12 ၸဝ်ႈၼႃႈတီႈမၢၼ်ႈ ၽူႈၵွၼ်းတပ်ႉ ပလိၵ်ႈတီႈၵဵင်းတုင်တင်း ၶႃႈႁၢပ်ႇၵၢၼ်ၶုၼ်ၾၢႆႇ ႁဵတ်းပၼ်ဝႂ်ၵပ်းတူဝ် (လဝၵ) လုၵ်ႉၵဵင်းတုင်လူင်းမႃးတႃႈၶီႈလဵၵ်း၊ ပိူဝ်ႈတႃႇတေၵႂႃႇတၢင်း ၵိင်ႇၸႄႈဝဵင်းတႃႈလိူဝ်ႇ ဢၼ်ပဵၼ် ဝၢၼ်ႈၸႃႇတိတီႈၵိူတ်ႇၸၢႆးဢွင်ႇမျၢတ်ႈသေ ၵူတ်ႇထတ်းသဵၼ်ႈမၢႆႁူဝ်ႁိူၼ်းလႄႈ ႁဵတ်းပၼ်ဝႂ်ၵပ်း တူဝ်ပၼ်- ၵူၼ်းၶဝ်ႈဢွၵ်ႇ လႆႈတပ်ႉပလိၵ်ႈၵဵင်းတုင် လႄႈ ၽူႈၸမ်ၸႂ်ၾၢႆႇႁူမ်ႇ လူမ်ႈသိုၵ်းမၢၼ်ႈ (ၸယၽ)ၵေႃႉၼိုင်ႈလၢတ်ႈၼင်ႇၼႆ။

သိုပ်ႇလၢတ်ႈဝႃႈ- ၶႄႇၶဝ်ၼႆႉ ပိူဝ်ႈတႃႇႁႂ်ႈမၢၼ်ႈမွပ်ႈတူဝ်ၸၢႆးဢွင်ႇမျၢတ်ႈ ပၼ်ၶဝ်ၼၼ်ႉ မႃးတုၵ်းယွၼ်း 2 ပွၵ်ႈ၊ ၵူၺ်းၵႃႈ ၸဝ်ႈၼႃႈတီႈမၢၼ်ႈဢမ်ႇႁပ်ႉသေ ၸႂ်ႉၵႂႃႇတွင်ႈထၢမ်ဢဝ်ႁင်းၵူၺ်း လွင်ႈၵဵဝ်ႇၶွင်ႈ ဢမ်ႇၵဵဝ်ႇၶွင်ႈၵၢၼ် ၶႃႈၵူၼ်းတၢႆ 13 ၵေႃႉၼၼ်ႉ၊ ၶႄႇၶဝ်ၵေႃႈမႃးတွင်ႈထၢမ်ၸၢႆးဢွင်ႇမျၢတ်ႈ ဝၼ်းထိ 7-8 သွင်ဝၼ်းထပ်းၵၼ်သေ ပဵၼ်မႃးလွင်ႈၼႆႉ။ လွင်ႈဢၼ်ၶႄႇၸိၼႄးဝႃႈ ၸၢႆးဢွင်ႇမျၢတ်ႈ ဢမ်ႇၸႂ်ႈ ၵူၼ်းမိူင်းမၢၼ်ႈၼၼ်ႉ မၼ်းၸၢႆးတွပ်ႇဝႃႈ- ဝႂ်ၵပ်းတူဝ်ၵေႃႈယၢမ်ႈမီးမႃး၊ ၵူၺ်းၵႃႈ ယွၼ်ႉပိူဝ်ႈတူၵ်း ႁၢႆႁိုင်ယဝ်ႉ ဢမ်ႇတွင်းလႆႈမၢႆမၼ်း။ ၵဝ်ၶႃႈၼႆႉပဵၼ် ၵူၼ်းဝၢၼ်ႈၼမ်ႉၶိုမ်း ဢိူင်ႇမိူင်းလဵၼ်း ၵိင်ႇၸႄႈဝဵင်း တႃႈလိူဝ်ႇ၊ မီးပေႃႈမီးမႄႈ မီးလုၵ်ႈမေးပီႈၼွင်ႉတီႈၼၼ်ႈ၊ ၵႂႃႇမိူဝ်းၵူတ်ႇထၢမ်တူၺ်းၵေႃႈလႆႈ-ဝႃႈၼႆ။

ၸၢႆးဢွင်ႇမျၢတ်ႈၼႆႉ ၵွပ်ႈပဵၼ်ၵူၼ်းၵေႃႉဢွၼ်ႁူဝ်ၵူၼ်း 15 ၵေႃႉ ဝၢင်းၶိူင်ႈၵွင်ႈၵၢင်ႇၸူးတပ်ႉသိုၵ်းမၢၼ်ႈ လႄႈ တႃႇလူင် ပွင်ၸိုင်ႈမၢၼ်ႈတေမွပ်ႈပၼ်ၶႄႇၼၼ်ႉဢမ်ႇပဵၼ်လႆႈ။ ၵွပ်ႈၼၼ် ပေႃးဝႃႈၶႄႇၶဝ် တွင်ႈထၢမ်ဢၼ်ၶႂ်ႈႁူႉၶႂ်ႈထၢမ်ၸိူဝ်းၼၼ်ႉ ယဝ်ႉ လႆႈငိၼ်းဝႃႈၸဝ်ႈၼႃႈတီႈမၢၼ်ႈၶဝ်တေပွႆႇပၼ်တူဝ်ၸၢႆး ဢွင်ႇမျၢတ်ႈ ၵႂႃႇမႃးထၢင်ႇႁၢင်ႈလွတ်ႈလႅဝ်း မိူၼ်ၼင်ႇၵူၼ်းမိူင်း ၵေႃႉၼိုင်ႈမီးသုၼ်ႇလႆႈသုၼ်ႇပဵၼ်ၼၼ်ႉ- ၼႆယူႇ။