ပၢင်တိုၵ်းဝူင်ႈၵၢင်သိုၵ်းၶၢင် တင်းသိုၵ်းမၢၼ်ႈၼႂ်းၸိုင်ႈ တႆးပွတ်းႁွင်ႇ ဢၼ်ၵႆႉပဵၼ်ၶိူဝ်းယႂ်း၊ မီးလွင်ႈ ဝၢတ်ႇၸဵပ်း လုတၢႆၼင်ႇၵၼ်ၼၼ်ႉ မၢင်တီႈသိုၵ်းတႆးၵေႃႈႁူမ်ႈသိုၵ်း ၶၢင်ယိုဝ်းမၢၼ်ႈ။

ပူၼ်ႉမႃးမိူဝ်ႈဝၼ်းထိ 07/08/12 ယၢမ်းၵၢင်ၼႂ် 4 မူင်း သိုၵ်းၶၢင် KIA တပ်ႉၵွင် 34 ဢၼ်တူင်ႉၼိုင် ပွတ်းမိူင်းမိတ်ႈ ၵႂႃႇယိုဝ်းတပ်ႉပလိၵ်ႈတီႈမၢၼ်ႈတူင်ႈ၊ တပ်ႉပလိၵ်ႈဢမ်ႇပဵၼ်သင်၊ ၾၢႆႇသိုၵ်းၶၢင် KIA ၵေႃႈ ဢမ်ႇမီးလွင်ႈလုသုမ်းတၢႆဝၢတ်ႇ။ ၵူၺ်းၵႃႈ မၢၵ်ႇလူင်ပွႆႇၺႃးသႂ်ႇၵူင်းယူင်း လုၵွႆၼမ်ဝႆႉ-လႆႈႁူႉၼင်ႇၼႆ။

ဝၼ်းထိ 7 ၼႆႉၼင်ႇၵဝ်ႇ ယၢမ်းၵၢင်ၶမ်ႈ 9 မူင်း သိုၵ်းမၢၼ်ႈၶလယ 130 ဢၼ်ပၵ်းတၢင်းမၢၼ်ႈတူင်ႈ၊ ဢဝ်ၵွင်ႈလူင် လမ်းယိုဝ်းပွႆႇသႂ်ႇသိုၵ်းၶၢင် KIA ၶိုၼ်း၊ ႁဵတ်းႁႂ်ႈသွင်ၾၢႆႇလႆႈပဵၼ်ပၢင်တိုၵ်းၵၼ်ထႅင်ႈ၊ ၵူၺ်းၵႃႈ ဢမ်ႇလႆႈႁူႉၸွမ်းလွင်ႈလုတၢႆ ဝၢတ်ႇၼင်ႇၵဝ်ႇ။ ထိုင်မႃးဝၼ်းထိ 08/08/12 ယၢမ်းၵၢင်ၼႂ် 8 မူင်း၊ သိုၵ်းမၢၼ်ႈ ၶမယ 324 ဢၼ်ပၵ်းတီႈၼမ်ႉႁႆး ထုၵ်ႇသိုၵ်းၶၢင် KIA ၵႂႃႇပႂ်ႉယိုဝ်းတီႈၵၢတ်ႇၼမ်ႉႁႆး၊ သိုၵ်းမၢၼ်ႈတၢႆ 2 ၵေႃႉ၊ ဝၢတ်ႇၸဵပ်း 1 ၵေႃႉ။ ၾၢႆႇသိုၵ်းၶၢင် KIA တၢႆ 1 ၵေႃႉ-ၼႆယဝ်ႉ။

ၾၢႆႇၼိုင်ႈတၢင်းၼိုင်ႈ မိူဝ်ႈၼႂ်းဝူင်ႈပူၼ်ႉမႃး လူတ်ႉၵႃးသိုၵ်းမၢၼ်ႈတပ်ႉ ၶမယ 506 လုၵ်ႉတၢင်းႁူဝ်ပိုၵ်ႉ (ႁူဝ်ပိုၵ်ႉလႃႈသဵဝ်ႈ) ၵႂႃႇတၢင်းသႅၼ်ဝီ၊ လႆႈထုၵ်ႇသိုၵ်းဢမ်ႇႁူႉၸၵ်းၸုမ်းငွႆးယိုဝ်း တီႈယၢၼ်ႁူဝ်ပိုၵ်ႉ 9 လၵ်း၊ ၾၢႆႇသိုၵ်းမၢၼ်ႈတၢႆ 3 ၵေႃႉ၊ ပႃးၸၼ်ႉၵႅမ်ၶုၼ်ႁၢၼ် (1 တုမ်ႇ)ၵေႃႉၼိုင်ႈ-ၼႆယဝ်ႉ။

ပၢင်တိုၵ်းၼႆႉ ဢွၼ်ၼႃႈၼႆႉ ၵူၼ်းလႃႈသဵဝ်ႈၵေႃႉၼိုင်ႈလၢတ်ႈဝႃႈ- ပဵၼ်သိုၵ်းၶၢင် KIA တပ်ႉၵွင် 8 ပႃႈတႂ်ႈ တပ်ႉၸုမ်း 4 ငွႆးယိုဝ်း လူတ်ႉၵႃးသိုၵ်းမၢၼ်ႈ ၽွင်းၶဝ်တေလုၵ်ႉၾၢႆႇတူၵ်းတၢင်းၶၢမ်ႈတၢင်းၵႂႃႇၾၢႆႇ ဢွၵ်ႇတၢင်း ပွတ်းထုင်ႉမိူင်းယေႃ။ ၵမ်ႈၽွင်ႈသမ်ႉဝႃႈပဵၼ်သိုၵ်းတႆး SSA ငွႆးယိုဝ်း၊ ၵွပ်ႈသိုၵ်းမၢၼ်ႈလႆႈၶၢဝ်ႇ ဝႃႈ သိုၵ်းတႆးၵႂႃႇတူင်ႉၼိုင်ပွတ်းၼၼ်ႉသေ ၵဵပ်းၵိၼ်ၶွၼ်ႇ၊ ပၼ်ဢမ်းၼၢၸ်ႈၵူၼ်းမိူင်းၽွင်းငမ်းၼႂ်း ပိုၼ်ႉတီႈ၊ သိုၵ်းမၢၼ်ႈၶႂ်ႈၵႂႃႇၵုမ်းၵႅဝ်ၸွမ်းလႄႈ ၽိူဝ်ႇၵႂႃႇၵေႃႈ ၺႃးသိုၵ်းတႆးပႂ်ႉယိုဝ်းဢွၼ်တၢင်း။ ၵပ်းၵၢႆႇ လွင်ႈၼႆႉ လိုၼ်းသုတ်းလႆႈႁူႉဝႃႈ တပ်ႉသိုၵ်းၸိုင်ႈတႆး SSPP/SSA တင်းသိုၵ်းၶၢင် KIA ႁူမ်ႈၵၼ်ၵႂႃႇပႂ်ႉ ယိုဝ်းမၢၼ်ႈ- ၼႆယဝ်ႉ။

ဢွင်ႈတီႈၵိူတ်ႇပဵၼ်ပၢင်တိုၵ်းၼႆႉ ယၢၼ်ႁူဝ်ပိုၵ်ႉ 9 လၵ်း၊ ၼိူဝ်သဵၼ်ႈတၢင်းႁူဝ်ပိုၵ်ႉ-သႅၼ်ဝီ၊ ႁူဝ်ပိုၵ်ႉ သမ်ႉယၢၼ်လႃႈသဵဝ်ႈ 3 လၵ်း- ၼႆယဝ်ႉ။