သိုၵ်းမၢၼ်ႈမိူင်းၽျၢၵ်ႈ တိဢဝ်ပူႇသႅၼ်ဝၢၼ်ႈသၢမ်ပူးတင်း ၵႅမ်မၼ်း 2 ၵေႃႉၶိုၼ်ႈၵႂႃႇၸွမ်းမႄႈၼမ်ႉၶွင်၊ လွၵ်ႇငိုတ်ႈ ယိုဝ်းၵွင်ႈ ထၢမ်ႁႃၶူဝ်းငိုၼ်းၶမ်းၸၢႆးဢွင်ႇမျၢတ်ႈ။ ၼွၵ်ႈသေၼၼ်ႉ တပ်ႉတႃႈလိူဝ်ႇၵေႃႈ ႁွင်ႉၵႂႃႇထႅင်ႈ။

ပူၼ်ႉမႃးမိူဝ်ႈဝၼ်းသဝ်ထိ 18/08/12 သိုၵ်းမၢၼ်ႈတပ်ႉပိဝ်ႇႁႃႇမိူင်းၽျၢၵ်ႈ ၸိုဝ်ႈဝိၼ်းမိၼ်းဢွင်ႇ၊ မႃးတိ ဢဝ်ပူႇၵႄႇ/သႅၼ် ဝၢၼ်ႈသၢမ်ပူး တင်းၵူၼ်းၸွႆႈမၼ်း 2 ၵေႃႉ၊ ႁူမ်ႈတင်းမူတ်း 3 ၵေႃႉ ႁွင်ႉဢဝ်ၶိုၼ်ႈ ၵႂႃႇၸွမ်းၾင်ႇ မႄႈၼမ်ႉၶွင်၊ ၵႂႃႇထိုင်တီႈ ၶဝ်ၶုတ်းလုၵ်းလူင်ယႂ်ႇယႂ်ႇဝႆႉတႃႇၾင်ၶဝ် ႁိမ်းဝၢၼ်ႈႁူၺ်ႈပႃႇၶႃး၊ တဵၵ်းပေႃႉထုပ်ႉၶဝ်၊ ထဵတ်ႈထၢမ်ၶဝ်ဝႃႈ- ၶူဝ်းငိုၼ်းၶမ်းၶွင် ၸၢႆးဢွင်ႇမျၢတ်ႈဝႆႉတီႈလႂ်၊ ၾၢၵ်ႇဝႆႉႁိူၼ်းလႂ်၊ မီးတီႈလႂ် သူတိုၼ်းႁူႉ။ လွၵ်ႇငိုတ်ႈဝႃႈ ပေႃးဢမ်ႇလၢတ်ႈတေဢဝ်တၢႆၼႆသေ ဢဝ်ၵွင်ႈၵၢႆႇႁူဝ်ဝႃႇၶဝ်သေ ယိုဝ်း။ ၵူၺ်းၵႃႈ ဝၼ်းၼၼ်ႉၼင်ႇၵဝ်ႇၽိူဝ်ႇပွတ်းၶမ်ႈမႃး သမ်ႉပွႆႇပၼ်ၸိူဝ်းၶဝ်ပွၵ်ႈမိူဝ်းႁိူၼ်းၶိုၼ်း-ၼႆယဝ်ႉ။

ၸိူဝ်းထုၵ်ႇႁွင်ႉၵႂႃႇၼၼ်ႉ ပူႇသႅၼ်ၸၢႆးလေႃး၊ ဢၢႆႈဢီး၊ ၵုတ်ႉဝုၼ်း။ မိူဝ်ႈဝႃးၵၢင်ဝၼ်းၼႆႉ ၸဝ်ႈၼႃႈတီႈ မၢၼ်ႈၶဝ်တီႈတပ်ႉ တႃႈလိူဝ်ႇမႃးႁွင်ႉဢဝ်ၶဝ် 3 ၵေႃႉၵႂႃႇၼႂ်းတပ်ႉ၊ ၵႂႃႇထဵတ်ႈထၢမ်ထႅင်ႈ၊ မၢင်ၽဝ်ႇၵေႃႈ တေၶိုၼ်းႁႃလိူင်ႈ ၶိုၼ်းလွင်ႈ ဝိၼ်းမိၼ်း ဢွင်ႇႁိုဝ် ၵေႃႈဢမ်ႇႁူႉ- ၵူၼ်းပွတ်းမိူင်းၽျၢၵ်ႈၵေႃႉၼိုင်ႈ လၢတ်ႈၼႄ ၼင်ႇၼႆ။

ၾၢႆႇၼိုင်ႈတၢင်းၼိုင်ႈ ၸၢႆးဢွင်ႇမျၢတ်ႈ ၵေႃႉတိုၵ်ႉထုၵ်ႇၵုမ်းတူဝ်ယူႇတီႈၵဵင်းတုင်ၵေႃႈ မိူဝ်ႈဝႃး 19/08/12 ၼႆႉလႆႈငိၼ်းဝႃႈ ပလိၵ်ႈၶဝ်ႁွင်ႉဢဝ်မၼ်းလုၵ်ႉတီႈၾၢႆႇႁူမ်ႇလူမ်ႈသိုၵ်း (ၸယၽ)ၵႂႃႇဝႆႉတီႈၶွၵ်ႈၵုမ်းၶင်တီႈ ႁူင်းပလိၵ်ႈ၊ လၢတ်ႈဝႃႈ မႆႈၸႂ် လွင်ႈႁူမ်ႇလူမ်ႈမၼ်း။

ထႅင်ႈၾၢႆႇၼိုင်ႈ ဢၼ်ၸဝ်ႈၼႃႈတီႈမၢၼ်ႈၶဝ် လူင်းၵူတ်ႇထတ်းသဵၼ်ႈမၢႆႁူဝ်ႁိူၼ်းၸၢႆးဢွင်ႇမျၢတ်ႈၼၼ်ႉ လႆႈႁူႉဝႃႈမၼ်း ပဵၼ်ၵူၼ်းဝၢၼ်ႈၼမ်ႉၶိုမ်းတႄႉ၊ လႆႈၵႂႃႇႁူႉလွင်ႈပေႃႈမႄႈ ပီႈၼၢင်းမၼ်း၊ ၼၢင်းမေးမၼ်း ၵေႃႉ ဢၼ်တၢႆၵႂႃႇၸိူဝ်းၼႆႉ။ ၵပ်းၵၢႆႇလွင်ႈၼႆႉ ပိူဝ်ႈတႃႇႁဵတ်းပၼ်ဝႂ်ၵပ်းတူဝ်မၼ်းၸၢႆးၼၼ်ႉ လႆႈငိၼ်း ဝႃႈၸဝ်ႈၼႃႈတီႈ ၶဝ်တၢင်ႇၵႂႃႇတီႈၼေႇပျီႇတေႃႇ ယဝ်ႉ- ပီႈၼွင်ႉၸမ်ၸႂ်ၸၢႆးဢွင်ႇမျၢတ်ႈၵေႃႉၼိုင်ႈလၢတ်ႈ ၼႄၼင်ႇၼႆ။