ၸဝ်ႈၶုၼ်ထုၼ်းဢူး ၵေႃႉလႆႈႁပ်ႉလိူၵ်ႈတင်ႈပဵၼ်ႁူဝ်ပဝ်ႈပႃႇ တီႇႁူဝ်သိူဝ် မွၵ်ႇလၢတ်ႈၵႂၢမ်းၼႂ်းပၢင် ပိုတ်ႇလုမ်း ႁူဝ်သိူဝ် SNLD တီႈတႃႈၵုင်ႈ 3 လွင်ႈ။ မိူဝ်ႈလဵဝ်ၵူၼ်းၶဝ်ႈပႃႇတီႇမီး ႁဵင်ပၢႆ။ ၾၢႆႇၼိုင်ႈၵေႃႈ တေလိူၵ်ႈၵေႃၵမ်ၵၢၼ်ၵၢင်ထႅင်ႈ 4 ၵေႃႉ။

ဝၼ်းထိ 15/08/12 (မိူဝ်ႈဝႃး) ယၢမ်းၵၢင်ၼႂ် 09:00 မူင်း ပႃႇတီႇႁူဝ်သိူဝ် (ႁိုဝ်) ငဝ်ႈငုၼ်းၻီႊမွၵ်းၶရေႊသီႊ ၸိူဝ်ႉၶိူဝ်းတႆး (SNLD) ပိုတ်ႇလုမ်းတီႈႁိူၼ်းၸဝ်ႈၶုၼ်ထုၼ်းဢူး တီႈတႃႈၵုင်ႈ။ မီးပႃႇတီႇၵၢၼ်မိူင်းၸိူဝ်း ပၵ်းလုမ်း ၼႂ်းတႃႈၵုင်ႈ ပႃးၸဵမ် NLD ၶဝ်ႈႁူမ်ႈ 20 ပႃႇတီႇပၢႆ၊ ၸုမ်း CBO ၊ ၸုမ်းၵေႃလိၵ်ႈလၢႆး၊ ၸုမ်းထုင်ႉ မၢဝ်းၸိူဝ်းၼႆႉ ၵႂႃႇၶဝ်ႈႁူမ်ႈမီးၵူၼ်းမွၵ်ႈ 250 -ၼႆယဝ်ႉ။

ၸၢႆးလဵၵ်ႉ ၵေႃႉပဵၼ်ၵႅမ်ၽူႈၼမ်းၼႂ်းလႄႈ ၽူႈၶၢၼ်ပၢၵ်ႇလၢတ်ႈဝႃႈ- ၸဝ်ႈၶုၼ်ထုၼ်းဢူး လၢတ်ႈၵႂၢမ်း 3 ႁူဝ်ၶေႃႈ။ ၵဵဝ်ႇၵပ်း 1.ငဝ်းလၢႆးၵၢၼ်မိူင်း၊ 2.လွင်ႈမိူင်းမၢၼ်ႈၺႃးႁႅတ်ႉႁၢမ်ႈပၢႆးမၢၵ်ႈမီး (Sanction)၊ 3.လွင်ႈၼႃႈလိၼ် ၸၢဝ်းၶိူဝ်း/ၸႄႈမိူင်း တိုၵ်ႉမီးသုၼ်ႇလႆႈၽွင်းငမ်းတူဝ်ၵဝ်ႇဢေႇ။

လွင်ႈၵၢၼ်မိူင်း၊ ပိူင်လူင်မၼ်း ၶၵ်ႉၵၢၼ်ငမ်းယဵၼ်ဢၼ်ႁဵတ်းသၢင်ႈယူႇၼႆႉ ယွၼ်ႉၶႂ်ႈလႆႈပိုၼ်ႉတီႈ ၼႃႈလိၼ်၊ ၶႂ်ႈလႆႈသုၼ်ႇ လႆႈၵၢၼ်မၢၵ်ႈမီးၸိူဝ်းၼႆႉ ဢမ်ႇၸႂ်ႈ၊ ၵွပ်ႈပိူဝ်ႈၶႂ်ႈၵႄႈလိတ်ႈပၼ်ႁႃ ၵၢၼ်မိူင်း လူၺ်ႈလၢႆးၵၢၼ်မိူင်းၸုမ်းယိပ်းၵွင်ႈၵၢင်ႇၸၢဝ်း ၶိူဝ်းၶဝ်ၸင်ႇမႃးၵိုတ်းသိုၵ်း။ ၵွပ်ႈၼၼ် ၼင်ႇႁိုဝ်တေဢမ်ႇ ပဵၼ်ၼင်ႇဢၼ်ယၢမ်ႈမီး တူဝ်ထူပ်းတႃႁၼ်ၵႃႈပူၼ်ႉမႃးၼႆႉ ႁဝ်းတၵ်းလႆႈၶတ်းၸႂ်ၵႂႃႇ။

ၵဵဝ်ႇလူၺ်ႈလွင်ႈပူတ်းထွၼ်ၵၢၼ်မၢၵ်ႈမီး (Sanction) တေႃႇမိူင်းမၢၼ်ႈၼႆႉ ၵိုင်ႇလီပူတ်းထွၼ်ၵႃႈႁိုဝ် ၵေႃႈပူတ်းထွၼ်ၵႂႃႇ ယဝ်ႉ၊ ၵူၺ်းၵႃႈ ယင်းပႆႇပူတ်းထွၼ်တင်းမူတ်း။ ပေႃးဝႃႈႁဝ်းဢွၼ်ၵၼ်ၶတ်းၸႂ် ႁဵတ်းႁႂ်ႈၵၢၼ်ပူၼ်ႉပႅၼ်သုၼ်ႇလႆႈၵူၼ်း ဝွတ်ႈဝၢႆးႁၢႆၵႂႃႇ၊ လူင်ပွင်ၸိုင်ႈလႄႈၵူၼ်းမိူင်း မီးလွင်ႈႁူမ်ႈမိုဝ်း ၵၼ်သေပဵၼ်မႃးတူင်ႇဝူင်းၵူၼ်း ဢၼ်ပိုတ်ႇသႂ်ၸိုင် ၵၢၼ် Sanction ၸိူဝ်းၼႆႉ တေၸၢင်ႈပူတ်းထွၼ် ၵႂႃႇတင်းမူတ်းယူႇ။ မိူဝ်ႈလဵဝ် သုၼ်ႇလႆႈၸႄႈမိူင်းယင်းတိုၵ်ႉဢေႇ၊ ၵမ်ႈၼမ် လူင်ပွင်ၸိုင်ႈၵၢင်တိုၵ်ႉ ၵုမ်းၵမ်ဢႃႇၼႃႇဝႆႉ။ ယွၼ်ႉၼၼ် ၼင်ႇႁိုဝ်ၸႄႈမိူင်းၶဝ်ပေႃးတေၸၢင်ႈၵႄႈလိတ်ႈပၼ်ႁႃမိူဝ်းၼႃႈ ႁင်းၵူၺ်းၶဝ်ၼၼ်ႉ သုၼ်ႇလႆႈၸႄႈမိူင်းထုၵ်ႇလႆႈ မီးၼမ်မႃးလိူဝ်ၵဝ်ႇ- ၼႆယဝ်ႉ။

ဢွၼ်ၼႃႈၼႆႉ ပႃႇတီႇႁူဝ်သိူဝ်တင်ႈဝႆႉၸုမ်းၵေႃၵမ်ၵၢၼ်ၵၢင် 11 ၵေႃႉ၊ ၶုၼ်ထုၼ်းဢူးပဵၼ်ႁူဝ်ၼႃႈ။ ယူႇတီႈပႃႇတီႇႁူဝ်သိူဝ် ၶိုၼ်းမႄးတႅင်ႇတင်ႈထႅင်ႈ ႁူဝ်ပဝ်ႈပဵၼ်ၸဝ်ႈၶုၼ်ထုၼ်းဢူး၊ ၵႅမ်ႁူဝ်ပဝ်ႈ ၸၢႆးၸေႃး ဢွင်ႇ၊ ၽူႈၼမ်းၼႂ်း ၵူႈလွင်ႈလွင်ႈ ၸၢႆးၼုတ်း (ဢွၼ်ၼႃႈၼႆႉပဵၼ်ၵႅမ်ႁူဝ်ၼႃႈ)။ ၵႅမ်ၽူႈၼမ်းၼႂ်းဢိၵ်ႇ ၽူႈၶၢၼ်ပၢၵ်ႇ ၸၢႆးလဵၵ်ႉ၊ ၽူႈၵပ်းသၢၼ် ၸၢႆးၾႃႈ၊ ၾၢႆႇငိုၼ်းတွင်း ၼၢင်းထူၺ်းမုင်ႇ၊ ၾၢႆႇထတ်းသဵၼ်ႈမၢႆ ငိုၼ်း ၸၢႆးလိူၼ်မျၢတ်ႈ၊ ႁူမ်ႈ 7 ၵေႃႉ။ ထႅင်ႈ 4 ၵေႃႉပႆႇလႆႈလိူၵ်ႈ၊ တေပဵၼ်မိူင်းတႆးပွတ်းဢွၵ်ႇၵေႃႉၼိုင်ႈ၊ ပွတ်းၸၢၼ်းၵေႃႉၼိုင်ႈ၊ ပွတ်းႁွင်ႇၵေႃႉၼိုင်ႈ၊ သမ်ႉထႅင်ႈၼွၵ်ႈမိူင်းတႆး မိူၼ်ၼင်ႇ ၼႂ်းမိူင်းၶၢင် တင်းမိူင်းမၢၼ်ႈၵေႃႉၼိုင်ႈ- ၼႆယဝ်ႉ။

မိူဝ်ႈလဵဝ် ၵူၼ်းၶဝ်ႈပႃႇတီႇမီးႁဵင်ပၢႆယဝ်ႉ၊ ဢမ်ႇလႆႈမႆႈၸႂ်ယဝ်ႉ၊ တိုၵ်ႉသိုပ်ႇႁဵတ်းပၢင်ၵုမ်လူင်ငဝ်ႈငုၼ်း ဝႆႉသေ တေလိူၵ်ႈၵေႃ ၵမ်ၵၢၼ်ၵၢင်ထႅင်ႈ 4 ၵေႃႉ။ မိူဝ်ႈလဵဝ် တူဝ်တႅၼ်းမိူင်းတႆးပွတ်းႁွင်ႇ (15)ၸႄႈဝဵင်း တိုၵ်ႉၶၢတ်ႇဝႆႉလၢႆၸႄႈဝဵင်းလႄႈ ပႆႇၸၢင်ႈ လိူၵ်ႈ၊ ၵွပ်ႈၼၼ် ပေႃးမႃးၸေးၵၼ်ယဝ်ႉ တေလိူၵ်ႈၽူႈတႅၼ်း ထႅင်ႈ 4 ၵေႃႉသေ ၵေႃၵမ်ၵၢၼ်ၵၢင် (CEC) 11 ၵေႃႉၼၼ်ႉ တေလႆႈၸိုဝ်ႈမၼ်းမူတ်းယဝ်ႉ- ၽူႈၶၢၼ် ပၢၵ်ႇပႃႇတီႇႁူဝ်သိူဝ်သိုပ်ႇလၢတ်ႈ ၼင်ႇၼႆ။