ၵွင်းမူးသိူဝ်ၽိူၵ်ႇ ဢၼ်တင်ႈယူႇၵၢင်ဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ႁိမ်းလႅၼ်လိၼ်မိူင်းၶႄႇ တေမီးၵၢၼ်မႄးၵုမ်း လုမ်းလႃးၶိုၼ်းတႃးသီၶၢဝ်။

ၵွင်းမူးၸဝ်ႈသိူဝ်ၽိူၵ်ႇ ၵၢင်ဝဵင်းၼမ်ႉၶမ်းယၢမ်းလဵဝ်ၼႆႉ တႃးသီလိူင်ႁိုဝ်သီၶမ်းဝႆႉ၊ တိုၼ်းမၼ်းမိူဝ်ႈၵူႈပွၵ်ႈ တႃးသီၶၢဝ် ႁိုဝ် သီၽိူၵ်ႇဝႆႉ။ တင်ႈတႄႇတႃးသီလိူင်မႃး မိူဝ်ႈၽွင်းသိုၵ်းမၢၼ်ႈၶဝ်ၶိုၼ်ႈမႃးမိူင်းတႆး၊ မႃးတႃးသီးၶမ်းတဵၵ်းႁူမ်ႇပႅတ်ႈသီၶၢဝ်ဝႆႉ။ ၵူၺ်းၵႃႈ လႆႈငိၼ်းဝႃႈမိူဝ်ႈလဵဝ် တေၶိုၼ်းတႃးသီငိုၼ်း ႁိုဝ် သီၶၢဝ် ႁႂ်ႈမိူၼ်ၶိုၼ်းၸၢတ်ႈၸႃတိပၵ်းၵဝ်ႇပိူင်ၵဝ်ႇတိုၼ်းမၼ်း ၵူႈပွၵ်ႈ- ၼႆယဝ်ႉ။

ၵွင်းမူး (ၸေႇတီႇ)ၸဝ်ႈသိူဝ်ၽိူၵ်ႇၼႆႉ ပဵၼ်တီႈၼပ်ႉထိုဝ်ၵိူဝ်းလီၶွင် ၵူၼ်းမိူင်းၼမ်ႉၶမ်း၊ ၸိုဝ်ႈယႂ်ႇမႃး မိူဝ်ႈပၢၼ်သိုၵ်းလုမ်ႈ ၾႃႉပွၵ်ႈ 2 ၊ ၵွပ်ႈဝႃႈမိူဝ်ႈၼၼ်ႉ သိုၵ်းဢိင်းၵလဵတ်ႈ၊ သိုၵ်းဢမႄႊရိၵၼ်ႊၶဝ်ၵႂႃႇ ပိုင်ႈႁူမ်ႈပိုင်ႈၽူၺ်းယူႇသဝ်းတီႈၵွင်းမူးၸဝ်ႈ သိူဝ်ၽိူၵ်ႇၼႆႉ မၢၵ်ႇတႅၵ်ႇဢမ်ႇတိူဝ်ႉၺႃးၶဝ်-ၼႆယဝ်ႉ။

မိူဝ်ႈလဵဝ် ပိူဝ်ႈတႃႇၶိုၼ်းတႃးသီၶၢဝ် ႁိုဝ် သီငိုၼ်းၼႆႉ ၵေႃႉလႂ်ၽႂ်ဢွၼ်ႁူဝ်၊ ၸဝ်ႈၼႃႈတီႈၵေႃႉလႂ်သမ်ႉပၼ် ဢၼုၺၢတ်ႈၼၼ်ႉ ယင်းတိုၵ်ႉတိတ်းတၢမ်ထႅင်ႈႁူဝ်ယွႆႈမၼ်းယူႇ။