ၸဝ်ႈၼႃႈတီႈပလိၵ်ႈထႆး တိၺွပ်းလႆႈၵွင်ႈၵၢင်ႇ 1 လမ်းလူတ်ႉ ပွတ်းလႅၼ်လိၼ် ဝၢၼ်ႈႁိၼ်တႅၵ်ႇ၊ ၵူၼ်းတေႃႉဝႃႈ တေဢဝ်ၵႂႃႇသူင်ႇပၼ်သိုၵ်းဝႃႉ။

ဝၼ်းထိ 31/08/12 (မိူဝ်ႈၼႆႉ) ယၢမ်း 09:00 မူင်း၊ ပလိၵ်ႈထႆးတိလႆႈလူတ်ႉၵႃး 4 လေႃႉ သႂ်ႇၶိူင်ႈမၢႆၾၢႆႇ ပႃႇမႆႉထႆးလမ်းၼိုင်ႈ တၢင်ႇၵွင်ႈၵၢင်ႇတဵမ်ပိုၵ်း တီႈဝၢၼ်ႈႁိၼ်တႅၵ်ႇ (ထိူတ်ႉထႆး) ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆး။ ၸွပ်ႇထၢမ်ၵူၼ်းတေႃႉသူင်ႇမၼ်းလၢတ်ႈဝႃႈ တေဢဝ်ၵႂႃႇ သူင်ႇပၼ်သိုၵ်းဝႃႉ ပွတ်းႁူဝ်မႄႈၶမ်း ႁိမ်းလွႆၵေႃႇဝၼ်း (ၼႃႈလိၼ်သိုၵ်း SSA သၢႆသိုၵ်းၵဵင်းတုင်)။

ဢိင်ၼိူဝ်ၵၢၼ်ၸွပ်ႇထၢမ်လိုၼ်းသုတ်းလႆႈႁူႉဝႃႈ- ၵၢၼ်ၵႃႉၶၢႆၵွင်ႈၼႆႉ တိၺွပ်းလႆႈၵူၼ်းထႆး 2 ၵေႃႉ၊ ၸိူဝ်းၶဝ်လၢတ်ႈဝႃႈႁဵတ်းမႃးလၢႆပွၵ်ႈယဝ်ႉ၊ ၵႃႈပူၼ်ႉမႃး ဢဝ်ၶိူင်ႈမၢႆႁွင်ႈၵၢၼ်လူင်ပွင်ၸိုင်ႈထႆးတိတ်းပႃႉ တီႈလူတ်ႉၵႃးသေလွတ်ႈၵႂႃႇ။ ပွၵ်ႈၵမ်းၼႆႉသမ်ႉၸႂ်ႉၶိူင်ႈမၢႆႁွင်ႈၵၢၼ်ၾၢႆႇပႃႇမႆႉ။ ၶိူင်ႈၵွင်ႈၵၢင်ႇၸိူဝ်းထုၵ်ႇ တိၺွပ်း ပွၵ်ႈၼႆႉ မီးၶိူင်ႈယိုဝ်းမၢၵ်ႇ RPG (မၢၵ်ႇပီၵူၺ်ႈ)၊ ၵွင်ႈၸၢၵ်ႈဢႅပ်ႇတိူဝ်ႇ၊ လဝ်းမၢၵ်ႇ 79mm ၊ ၵွင်ႈပွတ်း၊ ၵွင်ႈဢႃႊၵႃႊ/မႅၵ်ႉၵူတ်ႉ၊ ၵွင်ႈ M16 ႁူမ်ႈတင်းမူတ်း 60 လဝ်းပၢႆ၊ ၵွင်ႈၸိူဝ်းၼႆႉ ပႃးၵွင်ႈမႂ်ႇၵွင်ႈ ၵဝ်ႇၼင်ႇၵၼ်- ၼႆယဝ်ႉ။