ပီႇတုၸိတ်ႉမိူင်းသၢတ်ႇတင်းတႃႈၶီႈလဵၵ်း တဵၵ်းႁုပ်ႈယိုတ်းဢဝ် တီႈလိၼ်သူၼ်ႁႆႈၵူၼ်းဝၢၼ်ႈ ႁဵတ်းသူၼ် ၽုၵ်ႇတူၼ်ႈယၢင် တင်၊ ၵူၼ်းဝၢၼ်ႈတၢင်ႇလၢတ်ႈၸဝ်ႈၼႃႈတီႈမၢၼ်ႈၵေႃႈ ဢမ်ႇတၵ်းသဵင်သင်။

ပူၼ်ႉမႃးမိူဝ်ႈလိူၼ်ၵျုၼ်ႊ (2012)ၼႆႉ ၸုမ်းပီႇတုၸိတ်ႉလႃးႁူႇ ဝၢၼ်ႈသၢႆးၶၢဝ် ဢိူင်ႇသၢႆးၶၢဝ် ၸႄႈဝဵင်း မိူင်းသၢတ်ႇ တဵၵ်းႁုပ်ႈ ယိုတ်းဢဝ်တီႈလိၼ် ႁႆႈ သူၼ် ၵူၼ်းဝၢၼ်ႈၼႂ်းဢိူင်ႇသၢႆးၶၢဝ်၊ ပိူဝ်ႈတႃႇဢဝ်ႁဵတ်း သူၼ်ၽုၵ်ႇ တူၼ်ႈယၢင်တင်၊ ႁဵတ်းႁႂ်ႈ ၵူၼ်းဝၢၼ်ႈပွတ်းၼၼ်ႉ လႆႈသုမ်းႁႆႈၶဝ်ႈ၊ ႁႆႈၶဝ်ႈၵၢပ်ႇ တင်းသူၼ် ထူဝ်ႇလိၼ်ၵၼ်ၼမ်လူင်လၢင် -ၵူၼ်းဝၢၼ်ႈသၢႆးၶၢဝ်လၢႆလၢႆ ၵေႃႉလၢတ်ႈၼႄၼင်ႇၼႆ။

ႁႆႈၶဝ်ႈ၊ ႁႆႈၶဝ်ႈၵၢပ်ႇလႄႈသူၼ်ထူဝ်ႇလိၼ် ဢၼ်ပီႇတုၸိတ်ႉလႃးႁူႇၶဝ် တဵၵ်းႁုပ်ႈယိုတ်းဢဝ်ၵႂႃႇၼၼ်ႉ ၸဝ်ႈၶွင်ႁႆႈသူၼ်ၶဝ် ပဵၼ်ၵူၼ်းတႆးၵမ်ႈၼမ်၊ တင်းမူတ်းမီး 12 ၸဝ်ႈ၊ ႁႆႈၶဝ်ႈၵေႃႈဢွၵ်ႇတူၼ်ႈယဝ်ႉ၊ ႁႆႈၶဝ်ႈၵၢပ်ႇ ၵေႃႈမိူၼ်ၵၼ်၊ သူၼ်ထူဝ်ႇလိၼ်ၵေႃႈ ပူင်ႇတူၼ်ႈယဝ်ႉလႄႈတိုၵ်ႉမၢႆယိူဝ်ႈမၼ်းယဝ်ႉၵူၺ်း။ ၸုမ်းပီႇတုၸိတ်ႉ ဝၢၼ်ႈသၢႆးၶၢဝ် ဢၼ်ပူဝ်ႇၵျႁႄးပဵၼ်ႁူဝ်ၼႃႈ ဢမ်ႇလၢတ်ႈ လူင်ႈၼႃႈသင်၊ ႁွင်ႉၵူၼ်း ဝၢၼ်ႈၸိူဝ်းပဵၼ် ၸဝ်ႈသူၼ်မႃးၶွၼ်ႈတုမ်ၵၼ်သေ ပၼ်ၶေႃႈပူင်ဝႃႈ- ပိူဝ်ႈတႃႇၸုမ်းပီႇတုၸိတ်ႉႁဝ်း တေႁဵတ်းသူၼ်ၽုၵ်ႇ တူၼ်ႈယၢင်တင်ၼၼ်ႉ ႁဝ်းယွၼ်းလႆႈတီႈလိၼ် တီႈဢၼ်သူၶဝ်ၽုၵ်ႇၶဝ်ႈ၊ ၶဝ်ႈၵၢပ်ႇ၊ ထူဝ်ႇလိၼ်ဝႆႉ ၸိူဝ်းၼႆႉ တီႈတပ်ႉသိုၵ်းမၢၼ်ႈမိူင်းသၢတ်ႇယဝ်ႉ၊ ၵွပ်ႈၼၼ် မိူဝ်ႈၽုၵ်ႈမိူဝ်ႈႁိုဝ်းၼႆႉ ႁဝ်းတေဢဝ်လူတ်ႉထႆၵႂႃႇထႆယဝ်ႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၸိူဝ်းပဵၼ်ၸဝ်ႈသူၼ်ၶိုၼ်းလၢတ်ႈဝႃႈ- ႁႆႈသူၼ်ၸိူဝ်းၼႆႉ ႁဝ်းၶႃႈႁဵတ်း ၵိၼ်မႃးၸဵမ်လႂ်၊ ဢမ်ႇၸႂ်ႈ တိုၵ်ႉမႃးႁဵတ်းဢဝ်ပီသွင်ပီၼႆႉၵူၺ်း၊ ႁဵတ်းသင်မႃးယိုတ်းဢဝ်ၶွင်ႁဝ်းၶႃႈ၊ ၽွင်းၼႆႉ ၶဝ်ႈၵေႃႈပႆႇဢွၵ်ႇႁူင်း၊ ၶဝ်ႈၵၢပ်ႇၵေႃႈ တိုၵ်ႉ ဢွၵ်ႇတူၼ်ႈၵူၺ်း၊ ထူဝ်ႇလိၼ်ၵေႃႈပႆႇၵႄႇ၊ တေႁႂ်ႈႁဝ်းၶႃႈႁဵတ်း ၸိူင်ႉႁိုဝ်- ၼႆသေတႃႉ ပူဝ်ႇ(ၶုၼ်သိုၵ်း)ၵျႁႄးဢမ်ႇၸူး၊ လၢတ်ႈဝႃႈ- လွင်ႈၼႆႉႁဝ်း ဢမ်ႇႁူႉ၊ ႁဝ်းႁူႉလႆႈ ၽုၵ်ႇတူၼ်ႈယၢင်ႁဝ်းဝႆးဝႆးၵူၺ်း ၼႆသေဢွၵ်ႇမိူဝ်းၵႂႃႇပႅတ်ႈ- ၼႆယဝ်ႉ။

ၵူၼ်းဝၢၼ်ႈၶဝ် ႁွင်ႉတင်းပူႇၵၢင်ႉ/ပူႇသႅၼ်ဝၢၼ်ႈၶဝ်သေ ဢွၼ်ၵၼ်ၵႂႃႇတၢင်ႇလၢတ်ႈဝႆႉတီႈၸဝ်ႈၼႃႈတီႈ မၢၼ်ႈထိုင်ဝဵင်း မိူင်းသၢတ်ႇယူႇ၊ ၵူၺ်းၵႃႈ တေႃႇထိုင်ပူၼ်ႉမႃးမိူဝ်ႈဝၼ်းထိ 28/07/12 ၼႆႉ ယင်းပႆႇလႆႈၶၢဝ်ႇ သင်- ဝႃႈၼႆ။

ၼွၵ်ႈသေၼၼ်ႉ မိူဝ်ႈပီၵၢႆ (2011) တၢင်းတႃႈၶီႈလဵၵ်းၵေႃႈ ပူဝ်ႇမူး(ၸဝ်ႈႁၢၼ်)ၸၢႆးသူၺ်ႇ ပဵၼ်ၵူၼ်းဝႃႉ ၸုမ်းႁူင်ပင်းၵဝ်ႇ၊ ပိုင်ႈမုၼ် မႅၵ်ႇၶႃၾၢႆႇသိုၵ်းမၢၼ်ႈသေ ၵႂႃႇႁုပ်ႈသိုဝ်ႉဢဝ်တီႈလိၼ်ၵူၼ်းဝၢၼ်ႈၸၢဝ်း လႃးႁူႇ ပွတ်းတၢင်းႁူၺ်ႈသၢၼ်ႈ ဢိူင်ႇၾင်ႇ မိၼ်ႇ ၸႄႈဝဵင်းတႃႈၶီႈလဵၵ်း၊ ဢဝ်ႁဵတ်းသူၼ်ၽုၵ်ႇယၢင်တင် တႃႇသုၼ်ႇတူဝ်မၼ်း။ ၵပ်းၵၢႆႇလွင်ႈၼႆႉ သဵၼ်ႈတၢင်းပႆၵူၼ်း ဝၢၼ်ႈၵေႃႈ မၼ်းတတ်းႁႄႉဢဝ်ႁဵတ်းသဵၼ်ႈ တၢင်း ၵႂႃႇသူၼ်မၼ်းပႅတ်ႈ။ မၼ်းၸၢႆးလၢတ်ႈဝႃႈ- တေၶိုၼ်းႁဵတ်းသဵၼ်ႈတၢင်း မႂ်ႇပၼ်ၼႆသေတႃႉ တေႃႇထိုင်မိူဝ်ႈလဵဝ် လႆႈပီပၢႆယဝ်ႉ ဢမ်ႇႁၼ်မႃးႁဵတ်းပၼ်သင်လႄႈ ႁဵတ်းႁႂ်ႈၵူၼ်းဝၢၼ်ႈၶဝ်လိူတ်ႇမႆႈၵၼ်- ၼႆယူႇ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၶဝ်ၵႂႃႇတၢင်ႇလၢတ်ႈဝႆႉတီႈ ၸဝ်ႈၼႃႈတီႈမၢၼ်ႈယူႇ၊ ၵူၺ်းၵႃႈ ဢမ်ႇႁၼ်ၽႂ်မႃး တၵ်းသဵင်တၵ်းပၢၵ်ႇသင်- လႅင်ႇၶၢဝ်ႇလႅၼ်လိၼ်ပွင်ႇမႃးၼင်ႇၼႆ။