သိုၵ်းဝႃႉၶိုၼ်ႈလွမ်ႉသိုၵ်းတႆးလွႆတႆးလႅင်း တီႈတပ်ႉတႅဝ်း ၼႃႈလွႆသၼ်ၸုၼၼ်ႉ ဝႃႉတိုၵ်ႉပူတ်းၵွင်ႈႁွင်ႉဝႆႉ သိုၵ်းတႆး၊ ၾၢႆႇၼိုင်ႈထႅမ်ႁႅင်းသိုၵ်းထႅင်ႈ၊ ၵူၺ်းၵႃႈ သွင်ၾၢႆႇတေႁူပ်ႉ ဢုပ်ႇၵၼ် ပိူဝ်ႈတႃႇၵႄႈလိတ်ႈပၼ်ႁႃ။

ဝၢႆးသေသိုၵ်းဝႃႉ UWSA ၶိုၼ်ႈဝႅတ်ႉပူတ်းၵွင်ႈသိုၵ်းတႆး SSA တီႈလွႆပုင်ႇၽႃပုင်ႇတွင်း ဢၼ်ပဵၼ်တပ်ႉ တႅဝ်းၼႃႈတပ်ႉသၼ်ၸု တိုၵ်ႉၵေႃႇသၢင်ႈႁဵတ်းမႂ်ႇပႆႇယဝ်ႉ၊ ပႃႈတႂ်ႈၵၢၼ်ၵုမ်းၵမ်တပ်ႉၸုမ်း 727 တႄႇ ဝၼ်းထိ 30/07/12 မႃးၼႆႉ ၾၢႆႇသိုၵ်းဝႃႉဢမ်ႇ ပွႆႇပၼ်ၵူၼ်းသိုၵ်းတႆး SSA ၵူၺ်းပႆႇပေႃး၊ ယင်းသူင်ႇ သိုၵ်းၶိုၼ်ႈဢိူမ်ႈၸမ် လွႆသၼ်ၸုထႅင်ႈ။ မိူဝ်ႈလဵဝ် လႆႈႁူႉဝႃႈသိုၵ်းဝႃႉၸိူဝ်းမႃး ဢိူမ်ႈၸမ်သိုၵ်းတႆးၵမ်းၼႆႉ မီးႁႅင်းသိုၵ်းမွၵ်ႈ 300 ၵေႃႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လႆႈသူင်ႇတူဝ် တႅၼ်း 2 ၵေႃႉ ၵႂႃႇဢုပ်ႇ ဝႃႉတီႈမိူင်းၵျွတ်ႈ၊ ၵူၺ်းၵႃႈ ၾၢႆႇသိုၵ်းဝႃႉပႆႇႁပ်ႉဢုပ်ႇ၊ လၢတ်ႈဝႃႈ ဝၼ်းထိ 04/08/12 ၸင်ႇၵွႆႈမႃးထႅင်ႈ- ဝႃႈၼႆ။

မိူဝ်ႈဝၼ်းထိ 30/07/12 လူတ်ႉၵႃးသိုၵ်းဝႃႉမွၵ်ႈ 20 လမ်း၊ ဢွၵ်ႇတၢင်းမုင်ႈၼႃႈၵႂႃႇၸူးတပ်ႉတႆးလွႆ သၼ်ၸု။ ပဵၼ်ၵႃးၾူဝ်ႊဝီႊလ် လွၼ်ႉလွၼ်ႉ။ ၵပ်းၵၢႆႇလွင်ႈၼႆႉ သိုၵ်းဝႃႉဢမ်ႇႁၢၼ်ႉၸႂ်ဢၼ်မီးၶၢဝ်ႇဝႃႈ သိုၵ်းတႆး RCSS/SSA တပ်ႉၸုမ်း 727 ဢၼ်ၸဝ်ႈ တိုၼ်းၶိူဝ်းဢွၼ်ႁူဝ် ဢၢင်ႈၵႂႃႇတင်ႈတပ်ႉတင်း ပုင်ႇၽႃ ပုင်ႇတွင်း ႁိမ်းမိူင်းၶိတ်ႈ၊ ဢၼ်ၸမ်ၵၼ်တင်းႁူဝ်ယွတ်ႈ-ႁူဝ်ပၢင်ႇသေ ၸင်ႇႁၢင်ႈသိုၵ်းမႃး- ဝႃႈၼႆ။

လႅင်ႇၶၢဝ်ႇၵူၼ်းမိူင်းၼႂ်းပိုၼ်ႉတီႈလၢတ်ႈဝႃႉ ဝၼ်းလဵဝ်ၵၼ်ၼၼ်ႉ သိုၵ်းဝႃႉတိၺွပ်းဝႆႉ သိုၵ်းတႆးမွၵ်ႈ 9 ၵေႃႉ။ ၵပ်းၵၢႆႇလွင်ႈၼႆႉ ဢွၼ်ၼႃႈၼၼ်ႉ သိုၵ်းဝႃႉႁွင်ႉဢဝ်ၽူႈမီးၸၼ်ႉ ၼႂ်းတပ်ႉ RCSS/SSA 2 ၵေႃႉ (ၵေႃႉၼိုင်ႈၶုၼ်ႁၢၼ်၊ ၵေႃႉၼိုင်ႈၶုၼ်သိုၵ်း) ဢၼ်ဢမ်ႇပႃးၵွင်ႈသေၶီႇလူတ်ႉၶိူင်ႈၵႂႃႇ တီႈၾၢႆႇ ႁွင်ႇမိူင်းႁၢင်၊ သိုၵ်းဝႃႉၸင်ႇဢွၼ်ဢဝ်ၽူႈမီးၸၼ်ႉ 2 ၵေႃႉၼႆႉၵႂႃႇၸူး တီႈတပ်ႉ ဢၼ်သိုၵ်းတႆးတိုၵ်ႉ ႁဵတ်းမႂ်ႇ ပႆႇယဝ်ႉတီႈ ပုင်ႇၽႃပုင်ႇတွင်း။ မိူဝ်ႈပႆႇထိုင်တပ်ႉၼၼ်ႉ သိုၵ်းဝႃႉၶဝ်လၢတ်ႈဝႃႈ ႁဝ်းဢမ်ႇႁဵတ်း သင်၊ ၵူၺ်းၵႃႈ ၽိူဝ်ႇၵႂႃႇၽႅဝ် တပ်ႉယဝ်ႉ ၸႂ်ႉသိုၵ်းတႆးဝၢင်းၵွင်ႈသေ ႁွင်ႉဢဝ်ၵႂႃႇၸွမ်း။ လႆႈငိၼ်းဝႃႈ မိူဝ်ႈလဵဝ်မီးတီႈမိူင်းၵျွတ်ႈ၊ ၵမ်ႈၽွင်ႈဝႃႈမီးတီႈၼမ်ႉႁူး- ဝႃႈၼႆ။

ဢိင်ၼိူဝ်သွင်ၾၢႆႇၶဵင်ႈၵၢၼ်သိုၵ်းတေႃႇၵၼ်သေ မိူဝ်ႈဝႃးဝၼ်းထိ (02/08/12) သိုၵ်းဝႃႉၶၢၼ်းလူတ်ႉ ၵႃး ၵူၼ်းဝၢၼ်ႈ တင်ႈတႄႇ ပုင်ႇပႃႇၶႅမ်တေႃႇထိုင်မိူင်းတူၼ် မွၵ်ႈ 20 လမ်း၊ ၼႂ်ၼႆႉ ဝၼ်းထိ 3 ဢဝ်တၢင်ႇၵူၼ်း သိုၵ်းလုၵ်ႉတၢင်းမိူင်းၵျွတ်ႈဢွၵ်ႇၵႂႃႇတၢင်း ၼမ်ႉလုၵ်း၊ လွႆသၢင်း၊ မုင်ႈၼႃႈၵႂႃႇတၢင်း ပုင်ႇၽႃပုင်ႇတွင်း။ ထႅင်ႈၾၢႆႇၼိုင်ႈ ၼႂ်ၼႆႉၸဵမ်ၸဝ်ႉ (03/08/12) ၵႃးသိုၵ်းဝႃႉ 7 လမ်း၊ ၵႃး 6 လေႃႉ၊ 10 လေႃႉၵမ်ႈၽွင်ႈ လုၵ်ႉတီႈမိူင်းၵျွတ်ႈလတ်းၽၢၼ်ႇၼႃးၵွင်းမူး၊ ၵႂႃႇႁပ်ႉသိုၵ်းဝႃႉထႅင်ႈ တၢင်းႁူဝ် ယွတ်ႈ-ႁူဝ်ပၢင်ႇ၊ ၵူၺ်းၵႃႈ ယင်းပႆႇႁၼ်ပွၵ်ႈမႃး။

ၾၢႆႇၼိုင်ႈတၢင်းၼိုင်ႈ တင်ႈတႄႇမိူဝ်ႈဝႃးမႃးၼႆႉ သိုၵ်းဝႃႉႁၢမ်ႈၵူၼ်းဝၢၼ်ႈ တင်ႈတႄႇမႄႈၵႅၼ်း မွၵ်ႇၸလီႇ လူင်းမႃးမိူင်းႁၢင်၊ ၼႃးၵွင်းမူး တေႃႇထိုင်ႁူၺ်ႈဢေႃႈ ပုင်ႇပႃႇၶႅမ်ၸိူဝ်းၼႆႉ ဢွၵ်ႇတႃႈဢွၵ်ႇ တၢင်းၵႂႃႇမႃး။ မိူဝ်ႈဝႃး ဢၼ်ပဵၼ်ဝၼ်းၶဝ်ႈဝႃႇၶဝ်ႈၵမ်ၵေႃႈ ၵူၼ်းဝၢၼ်ႈမိူင်းႁၢင် ၵႂႃႇၶိုၼ်ႈဝတ်ႉ/ၵွင်း ၼမ်ႉႁူးၼၢႆးသႅင် (ၾၢႆႇၸၢၼ်း မိူင်းႁၢင်) ပႆႇတၼ်းလႆႈလူႇတၢၼ်း ထုၵ်ႇသိုၵ်းဝႃႉလိုပ်ႈ ပွၵ်ႈႁိူၼ်းမူတ်း။ ၼွၵ်ႈသေၼၼ်ႉ ဢမ်ႇပၼ်ၵူၼ်းဝၢၼ်ႈ ၵႂႃႇၼႂ်းထိူၼ်ႇၼႂ်းၶိူဝ်း ဢမ်ႇဝႃႈၵႂႃႇၸႂ်းႁႆႈၸႂ်းသူၼ်- ၼႆယဝ်ႉ။

တပ်ႉလွႆပုင်ႇၽႃပုင်ႇတွင်း (တပ်ႉတႅဝ်းၼႃႈလွႆသၼ်ၸု) တီႈဢၼ်သိုၵ်းဝႃႉႁွင်ႉဢဝ်သိုၵ်းတႆးၵႂႃႇၼႆႉ ပဵၼ်ပိုၼ်ႉတီႈၼႃႈလိၼ် ဢၼ်တပ်ႉသိုၵ်းၸိုင်ႈတႆး RCSS/SSA ယၢမ်ႈတူင်ႉၼိုင် ၵၢၼ်သိုၵ်း လတ်းၽၢၼ်ႇ ၵႂႃႇမႃးတႃႇသေႇ။ ၵူၺ်းၵႃႈဢမ်ႇပၵ်းတပ်ႉ၊ တေႃႇၼႃႈမိူင်းထႆး ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ။