ဢိင်ၼိူဝ်ပၢင်တိုၵ်းတိုၵ်ႉၵိူတ်ႇၶိုၼ်ႈၶိူဝ်းယႂ်း ဝၢႆးဢဝ်လွင်ႈ ငမ်းယဵၼ်သေ RCSS/SSA လွႆတႆးလႅင်း သူင်ႇလိၵ်ႈ ထိုင်ဢူးဢွင်ႇမိၼ်း၊ ၶွမ်ႊမတီႊၶိုင်ပွင်လွင်ႈငမ်းယဵၼ်၊ သၢၼ်ၶတ်း တုၵ်းယွၼ်းႁႂ်ႈၵႄႈလိတ်ႈ လႄႈၵိုတ်းယိုတ်း။

ဝၼ်းထိ 31/07/12 (မိူဝ်ႈဝႃး) ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လႆႈတႅမ်ႈလိၵ်ႈယိုၼ်ႈၸူး ဢူးဢွင်ႇမိၼ်း (ၽွင်းလူင်ၾၢႆႇတေႃႉသူင်ႇလူတ်ႉၾႆး လႄႈၵႅမ်ႁူဝ်ပဝ်ႈ ၶွမ်ႊမတီႊ ၶိုင်ပွင်လွင်ႈငမ်းယဵၼ်)၊ လူၺ်ႈတႅမ်ႈလိၵ်ႈ သၢၼ်ၶတ်းၵႂႃႇလႄႈ ယွၼ်းၶေႃႈၵႄႈလိတ်ႈ ၼင်ႇႁိုဝ်ပေႃးတေ ဢမ်ႇလႆႈတိုၵ်းယိုဝ်းၵၼ်ထႅင်ႈတေလႆႈႁဵတ်းႁိုဝ်၊ ဢိၵ်ႇတုၵ်း ယွၼ်းႁႂ်ႈၵိုတ်းယိုတ်းၵၢၼ်တိုၵ်းတေႃးၵမ်း လဵဝ်- ၼႆယဝ်ႉ။

လွင်ႈတၢင်းလႆႈတႅမ်ႈလိၵ်ႈၵႂႃႇၼႆႉ ၵွပ်ႈဝႃႈပူၼ်ႉမႃးမိူဝ်ႈဝၼ်းထိ 30/07/12 တင်းပွတ်းၼႂ် ဝၼ်းထိ 31/07/12 (မိူဝ်ႈဝႃး) သိုၵ်းမၢၼ်ႈ တပ်ႉၶမယ 422 (မိူင်းပၢႆး)၊ တပ်ႉၶမယ 425 (ဝၢၼ်ႈယဵၼ်ႇ) 2 တပ်ႉၵွင် ႁူမ်ႈၵၼ်ၵႂႃႇၶိုၼ်ႈယိုဝ်းတပ်ႉသိုၵ်း ၸိုင်ႈတႆး RCSS/SSA (သၢႆသိုၵ်းၵွၼ်းၸိူင်း) ဢၼ်ပၵ်းယူႇဝႆႉတီႈလွႆ ယႄး ၼႂ်းၸႄႈဝဵင်း ၼမ်ႉၸၢင် ၸိုင်ႈတႆးပွတ်းၸၢၼ်း။ လႆႈႁူႉဝႃႈၾၢႆႇသိုၵ်းမၢၼ်ႈမီးလွင်ႈဝၢတ်ႇၸဵပ်းလု တၢႆၼမ်ဝႆႉ၊ ၾၢႆႇသိုၵ်းတႆး ယိုတ်းလႆႈၵွင်ႈၵၢင်ႇ ပႃးၸဵမ်ၶူဝ်းၶွင်ၵမ်ႈၽွင်ႈ- ဝႃႈၼႆ။

သၼ်လွႆယႄးၼႆႉ တၢင်း SSA ႁုပ်ႈယိုတ်းပၵ်းယူႇ တႅၼ်းတီႈၸုမ်းပီႇတုၸိတ်ႉပဢူဝ်း PNO ၵႃႈပူၼ်ႉမႃး။ မိူဝ်ႈလဵဝ် တီႈၼႆႈ သိုၵ်းမၢၼ်ႈတင်းသိုၵ်းတႆးယိုဝ်းၵၼ်တီႈဢေႇသုတ်း 3 ပွၵ်ႈ။

လွႆယႄး ဢိူင်ႇလွႆယႄးၼႆႉ မီးၼႂ်းၸႄႈဝဵင်းၼမ်ႉၸၢင်။ တေးႁူတ်ႈသၼ်လွႆယေး တတ်းၼၢင်ၶႅၼ်ႈထုင်ႉ ပူင်း တင်းၼမ်ႉၸၢင်၊ တႄးႁူတ်ႈႁၢင်သၼ်လွႆၵမ်ႈၽွင်ႈသေႇမႃးတၢင်းလွႆလႅမ်လႄႈ ၶဝ်ႈပႃးၼႂ်းၸႄႈဝဵင်း လွႆလႅမ် ၵမ်ႈၽွင်ႈ၊ ၵဵဝ်ႇၵပ်းလူၺ်ႈၵၢၼ် တိုၵ်း တေႃးၵမ်းၼႆႉ တၢင်းတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ဢၼ်ၵႅမ်ၸွမ်ႁၢၼ်ထုၼ်းထုၼ်းၼွင်ႇ ပဵၼ်ၽူႈၵွၼ်းတိူင်း ၼၼ်ႉ ဝႃႈတီႈၸၢႆးတေႇဝိင်ႇ ၸဝ်ႈၼႃႈတီႈတူဝ် တႅၼ်း ၾၢႆႇၵပ်းသၢၼ် RCSS/SSA ဝႃႈ ဢမ်ႇလႆႈႁူႉၸွမ်း- ဝႃႈၼႆ။

သိုၵ်းမၢၼ်ႈတပ်ႉၶမယ 422 (မိူင်းပၢႆး)၊ တပ်ႉၶမယ 425 (ဝၢၼ်ႈယဵၼ်ႇ) 2 တပ်ႉၵွင်ၼႆႉ ပဵၼ်တပ်ႉပႃႈတႂ်ႈ ငဝ်ႈငုၼ်းၵုမ်းၵမ် ၽႅၼ်ၵၢၼ်သိုၵ်း (ၸၵၶ) 7 (ၾၢႆၶုၼ်ႇ)။ ပႃႈတႂ်ႈၸၵၶ 7 ၼႆႉ တင်းမူတ်းမီး 10 တပ်ႉၵွင်၊ ယူႇၼႂ်းမိူင်းယၢင်းလႅင် 6 တပ်ႉၵွင်၊ ယူႇၼႂ်းမိူင်းတႆး ၸိုင်ႈတႆးပွတ်းၸၢၼ်း 4 တပ်ႉၵွင် (သီႇသႅင်ႇ 2 တပ်ႉၵွင်၊ ဝၢၼ်ႈယဵၼ်ႇ 2 တပ်ႉၵွင်)။

ၾၢႆႇၼိုင်ႈတၢင်းၼိုင်ႈ ဝၼ်းထိ 31/07/12 ၵၢင်ၼႂ်ယၢမ်း 08:00 မူင်း သိုၵ်းမၢၼ်ႈၵႂႃႇယိုဝ်းသိုၵ်းတႆး တီႈတပ်ႉပၢင်သဝ်းႁိမ်း ၼွင်လိူဝ်ႇ ၸႄႈဝဵင်းမိူင်းပၼ်ႇ၊ ဢၼ်ၸၢႆးလႅင် (ၸုမ်းထတ်းသၢင်ပႃႇမႆႉ)ဢွၼ်ႁူဝ် ပၵ်းပႂ်ႉဝႆႉ။ တီႈၼႆႈၵေႃႈ လႆႈႁူႉဝႃႈၾၢႆႇသိုၵ်း မၢၼ်ႈမီးလွင်ႈဝၢတ်ႇၸဵပ်းလုတၢႆၵမ်ႈၽွင်ႈ။ ဝဵင်းမိူင်းပၼ်ႇ ပဵၼ်တီႈပၵ်း ငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း ၸၵၶ17 ။ (ဢမ်ႇၸႂ်ႈတပ်ႉၸုမ်း 756 ပၵ်းယူႇဝႆႉ ၸွမ်းၼင်ႇဢွၵ်ႇၶၢဝ်ႇၵႂႃႇ ဢွၼ်ၼႃႈၼႆႉ)။

ၶၢဝ်းတၢင်း 2 ဝၼ်းပူၼ်ႉမႃးၼႆႉ ဢိင်ၼိူဝ်ပဵၼ်ပၢင်တိုၵ်းတီႈလွႆယႄး ဢမ်ႇယွမ်း 3 ပၢင်၊ တီႈၼွင်လိူဝ်ႇ 1 ပၢင်သေ ဝၢႆးဢုပ်ႇ ဢူဝ်းတူၵ်းလူင်းၵိုတ်းယိုဝ်း ဢဝ်လွင်ႈငမ်းယဵၼ်မႃးၼႆႉ ႁဵတ်းႁႂ်ႈပၢင်တိုၵ်းဝူင်ႈၵၢင် လွႆတႆးလႅင်း တင်းသိုၵ်းမၢၼ်ႈၵိူတ်ႇၶိုၼ်ႈ ဢမ်ႇယွမ်း 27 ပွၵ်ႈ။

ပူၼ်ႉမႃးမိူဝ်ႈဝၼ်းထိ 26-27/07/12 တၢင်းလွႆတႆးလႅင်း လႆႈႁဵတ်းပၢင်ၵုမ် ႁူဝ်ႁုပ်ႈ 6 လိူၼ်၊ ၼႂ်းၶေႃႈ တႅပ်းတတ်း RCSS/SSA တေသိုပ်ႇႁဵတ်းၵႂႃႇၸွမ်းပေႃႇလသီႇၵၢၼ်ၵိုတ်းယိုဝ်း ဢဝ်လွင်ႈငမ်းယဵၼ်မႃး။ ဝၢႆးပၢင်ၵုမ်ယဝ်ႉ လႆႈဢွၵ်ႇၶေႃႈ ပိုၼ်ၽၢဝ်ႇပႃး ဝႃႈ သွင်ၾၢႆႇ (RCSS/SSA တင်းလူင်ပွင်ၸိုင်ႈတဵင်းၸဵင်ႇ) မီးၽႅၼ်ပိူဝ်ႈတႃႇႁူပ်ႉထူပ်းဢုပ်ႇဢူဝ်းၵၼ် ၸၼ်ႉၸိုင်ႈမိူင်းႁူမ်ႈတုမ် ပွၵ်ႈၵမ်းထိ 3 ထႅင်ႈ ၼႂ်းၶၢဝ်းတၢင်း ဢမ်ႇႁိုင်ၼႆႉ၊ ၵူၺ်းၵႃႈ တေၸတ်းတီႈလႂ် ဝၼ်းလႂ်ၼၼ်ႉပႆႇႁူႉ။

ပေႃးဢဝ်တၢင်းၵၢၼ်ဝႃႈ ပၢင်ဢုပ်ႇဢူဝ်းပွၵ်ႈၵမ်းၼႃႈၼႆႉ ပဵၼ်ပွၵ်ႈၵမ်းထိ 4 ၊ ပေႃးဢဝ်ၸၼ်ႉၸိုင်ႈမိူင်း ႁူမ်ႈတုမ်ဝႃႈ ပွၵ်ႈၵမ်း 3 ၊ ပွၵ်ႈၵမ်းထိ 1 တီႈတူၼ်ႈတီး၊ ပွၵ်ႈၵမ်း 2 တီႈၵဵင်းတုင်။