ၸုမ်းၶၢဝ်ႇၽူႈတွႆႇႁွၵ်ႈႁူပ်ႉထူပ်းတွင်ႈထၢမ် ၸၢႆးၶိူဝ်းသႅင် ၸုမ်းတူင်ႇဝူင်းတႆး (Shan CBO) ၵဵဝ်ႇၵပ်းလွင်ႈ ၵူၼ်း ပၢႆႈၽေးၵုင်းၵျေႃႇ (ဢိူင်ႇပဵင်းလူင် ၸႄႈဝဵင်းဝဵင်းႁႅင်) တေလႆႈၶၢႆႉပွၵ်ႈမိူဝ်းယူႇတၢင်းမိူင်းထႃး။ မၼ်းၸၢႆးတွပ်ႇ လၢတ်ႈမီးႁူဝ်ႁုပ်ႈတီႈၵႅပ်ႈၼင်ႇၼႆ။

ထၢမ်-ၵွပ်ႈသင် လႆႈႁဵတ်းပၢင်သပ်းလႅင်းၸႅင်ႈၶၢဝ်ႇၵဵဝ်ႇၵပ်းၵူၼ်းပၢႆႈၽေး ဝၼ်းမိူဝ်ႈၼႆႉ (27/08/12) ၶႃႈ?။

တွပ်ႇ-ႁဝ်းၶႃႈဢမ်ႇၶႂ်ႈႁႂ်ႈၵူၼ်းပၢႆးၽေးပွၵ်ႈမိူဝ်းၺႃးၽေးထႅင်ႈ။ ၵႃႈပူၼ်ႉမႃး ၵွပ်ႈၺႃးၽေးလႄႈ ၸင်ႇလႆႈပၢႆႈမႃး။ မိူဝ်ႈလဵဝ် မိူင်းမၢၼ်ႈၼႆႉ ဢမ်ႇဝႃႈၵၢၼ်မိူင်း၊ ၵၢၼ်မၢၵ်ႈမီး၊ ၵၢၼ်ပူၵ်းပွင်ၽဝၵူၼ်းမိူင်း၊ သုၼ်ႇလႆႈလွင်ႈၽဵင်ႇပဵင်းၸိူဝ်းၼႆႉ ငဝ်းလၢႆး ပႆႇၼႄႉၼွၼ်းသေပိူင်။ ၵွပ်ႈၼၼ် ပေႃးၶဝ်လႆႈပွၵ်ႈမိူဝ်း သမ်ႉတေမိူဝ်းထူပ်းၽေးသေ ပွၵ်ႈမႃးၶိုၼ်း။ ၵွပ်ႈၼၼ် ႁဝ်းၶႃႈႁၼ်ဝႃႈ ပိူဝ်ႈတႃႇႁၢင်ႈႁႅၼ်းသူင်ႇၵူၼ်းပၢႆႈ ၽေးပွၵ်ႈမိူဝ်းၼႆႉ ပႆႇထိုင်ၶၢဝ်းယၢမ်းမၼ်း။

ထၢမ်-လိူဝ်သေပၢင်သပ်းၸႅင်ႈၶၢဝ်ႇၼႆႉ ၶေႃႈတိုၵ်းသူၼ်း/ၶေႃႈတုၵ်းယွၼ်း မီးထႅင်ႈၸိူင်ႉႁိုဝ်ၶႃႈ?။

တွပ်ႇ-ႁဵတ်းသင်ၵေႃႈ ႁႂ်ႈဝူၼ်ႉတႃႇၼမ်ႉတွၼ်းၽွၼ်းလီၵူၼ်းမိူင်းဢွၼ်တၢင်း။ ပေႃးဝႃႈသူင်ႇၵူၼ်းပၢႆႈ ၽေးမိူဝ်းၶိုၼ်းၼႆ ၵၢၼ်မိူင်းတေလႅၵ်ႈလၢႆႈယူႇႁႃႉ၊ ပေႃးဝႃႈဢမ်ႇသူင်ႇမိူဝ်းၼႆ ၵၢၼ်မိူင်းတေလႅၵ်ႈလၢႆႈယူႇ ႁႃႉၸိူဝ်းၼႆႉ ပႆႇမီးၶေႃႈတွပ်ႇဢၼ် ထုၵ်ႇမႅၼ်ႈလႄႈၶေႃႈႁပ်ႉႁွင်းလႆႈ။ သင်ဝႃႈဝၢၼ်ႈမိူင်းမီးလွင်ႈငမ်းယဵၼ်၊ ႁပ်ႉႁွင်းလႆႈၵၢၼ်ၵိုတ်း ယိုဝ်းၵၼ်၊ ႁပ်ႉႁွင်းလႆႈဝႃႈ မီးသုၼ်ႇလႆႈၽဵင်ႇပဵင်းယဝ်ႉၸင်ႇ သူင်ႇၵူၼ်းပၢႆႈၽေး ပွၵ်ႈမိူဝ်းၵေႃႈ ပႆႇတူၵ်းလိုၼ်း။ ဝၼ်းမိူဝ်ႈၼႆႉ လၢတ်ႈဝႃႈပဵၼ်လွင်ႈငမ်း ယဵၼ်ၼႆသေတႃႉ သင်ဝႃႈၵိူတ်ႇပၢင် တိုၵ်းၵၼ်ၶိုၼ်ႈမႃး ၵူၼ်းမိူင်းၸိူဝ်း ပွၵ်ႈမိူဝ်းၶိုၼ်းသမ်ႉတေပၢႆႈၵႂႃႇတၢင်းလႂ်။ သင်ဝႃႈ ႁႂ်ႈၵူၼ်းပၢႆႈၽေး ယူႇသဝ်းၼႂ်းပၢင်သဝ်းၵူၼ်းပၢႆႈၽေး မိူၼ်ပၵ်းၵဝ်ႇပိူင်ၵဝ်ႇၵႂႃႇထႅင်ႈၸူဝ်ႈၵႃႈဝၢၼ်ႈမိူင်းပႆႇမၼ်ႈၼိမ်လီၼႆႉ တႄႉ ၶဝ်တိုၼ်းလွတ်ႈၽေး၊ တိုၼ်းမီးၶေႃႈ ႁပ်ႉႁွင်း။ ငဝ်းလၢႆးဝၼ်းမိူဝ်ႈၼႆႉ ပေႃးႁႂ်ႈၶဝ်ၶၢႆႉမိူဝ်းယူႇၸၢမ်း တူၺ်းၸိုင်မိူၼ်ႁႂ်ႈ ၶဝ်မိူဝ်းပဵၼ်ယိူဝ်ႇၵူၺ်း။

ထၢမ်-ပိူဝ်ႈတႃႇၵူၼ်းပၢႆႈၽေးတေလႆႈမိူဝ်းယူႇၶိုၼ်းဝၢၼ်ႈၵဝ်ႇမိူင်းလင်ၼၼ်ႉ ငဝ်းလၢႆးဝၢၼ်ႈမိူင်းထုၵ်ႇလီ ပဵၼ် ၸိူင်ႉႁိုဝ်?။

တွပ်ႇ-ပႃႇတီႇၵၢၼ်မိူင်းၶဝ်၊ ၸုမ်းယိပ်းၵွင်ႈၵၢင်ႇၶဝ်ၵူႈၸုမ်းတင်း လူင်ပွင်ႈၸိုင်ႈ ထုၵ်ႇလႆႈမီးၵၢၼ်ဢုပ်ႇ ဢူဝ်း လႆႈၸႂ်ၵၼ် ၵဵဝ်ႇၵပ်းၵၢၼ်မိူင်း၊ ႁပ်ႉႁွင်းပၼ်သုၼ်ႇလႆႈၽဵင်ႇပဵင်းၶၢဝ်းယၢဝ်း။ ၵွပ်ႈဝႃႈပေႃးသူင်ႇၵူၼ်း ပၢႆႈၽေးပွၵ်ႈ မိူဝ်းၶိုၼ်းမိူဝ်ႈလဵဝ်ၸိုင် သင်ဝႃႈမီးၵၢၼ်တိုၵ်းတေႃးၵၼ်ၶိုၼ်း ၵူၼ်းမိူင်းတေထူပ်းၽေးထႅင်ႈ။ ထႅင်ႈၾၢႆႇၼိုင်ႈ ဢၼ်ၵူႈၸိုင်ႈမိူင်းပၼ်ႁႅင်းဢီး ပိူဝ်ႈတႃႇသူင်ႇၵူၼ်းပၢႆႈၽေးပွၵ်ႈမိူဝ်းၶိုၼ်းၼၼ်ႉ ထုၵ်ႇလီ ပၼ်ႁႅင်းဢီးႁႂ်ႈ လူင်ပွင်ၸိုင်ႈ ဢုပ်ႇဢူဝ်းၸၢဝ်းၶိူဝ်း ႁႂ်ႈပေႃးလႆႈ သုၼ်ႇလႆႈၽဵင်ႇပဵင်းတေလီလိူဝ်ၼႆႉ။

ထၢမ်-ၵူၼ်းပၢႆႈၽေးၸွမ်းလႅၼ်လိၼ်(ၵုင်းၵျေႃႇ) တေလႆႈမိူဝ်းယူႇမိူင်းထႃးၼႆၼၼ်ႉ မီးၶေႃႈပိုၼ်ၽၢဝ်ႇ ပဵၼ်တၢင်းၵၢၼ်ယဝ်ႉ ၶႃႈႁႃႉ?။

တွပ်ႇ-ဢၼ်ပိုၼ်ၽၢဝ်ႇမႃးၼၼ်ႉ ပဵၼ်ၶေႃႈပိုၼ်ၽၢဝ်ႇတၢင်းၵၢၼ်ၵေႃႈဝႃႈလႆႈဢမ်ႇၸႂ်ႈတၢင်းၵၢၼ်ၵေႃႈ ဝႃႈလႆႈ။ မိူဝ်ႈၶွင်ႊသီႊ ဢဝ်ၶိုၼ်းၸိုင်ႈတႆး ဢုပ်ႇဢူဝ်းၵၼ်တင်းလူင်ပွင်ၸိုင်ႈမၢၼ်ႈ လွင်ႈငမ်းယဵၼ် တူၵ်းလူင်းၵိုတ်းယိုဝ်း ၵၼ်ၼၼ်ႉၵေႃႈ ပိူဝ်ႈတႃႇဢဝ်ၵူၼ်းပၢႆႈၽေးၸွမ်းလႅၼ်လိၼ် မိူဝ်းယူႇတီႈမိူင်း ထႃးၼၼ်ႉၵေႃႈ ဢုပ်ႇပႃးယူႇ။ မိူဝ်ႈၸဝ်ႈၼႃႈတီႈမိူင်းၼေႃႊဝေႊ ၶဝ်မႃးၵဵပ်းၶေႃႈမုလ်း၊ မႃးပၼ်ငိုၼ်းၸွႆႈ ထႅမ်ၼၼ်ႉ တေႁႂ်ႈၶၢႆႉ မိူဝ်ႈလႂ်ၵေႃႈၶဝ်ဢမ်ႇလၢတ်ႈ။ ၵူၺ်းၵႃႈ ပိူဝ်ႈတႃႇတေၶၢႆႉမိူဝ်း ၼၼ်ႉ မီးၵၢၼ်ႁၢင်ႈ ႁႅၼ်းဝႆႉယူႇ။ လွင်ႈပိုၼ်ၽၢဝ်ႇၼႆႉ ပဵၼ်တၢင်းၵၢၼ်ၵေႃႈလီ ဢမ်ႇပဵၼ်တၢင်းၵၢၼ်ၵေႃႈလီ၊ ယူႇတီႈႁဝ်းၶႃႈ တႄႉ ဢမ်ႇၶႂ်ႈႁႂ်ႈၵူၼ်းမိူင်းထူပ်းၽေးထႅင်ႈ တုၵ်ႉၶထႅင်ႈၼၼ်ႉၵူၺ်း။

ထၢမ်-ၸုမ်းဢၼ်ၸႂ်ႉၵူၼ်းပၢႆႈၽေးၶၢႆႉပွၵ်ႈမိူဝ်းၼႆႉ သမ်ႉပဵၼ်ၽႂ် ၸုမ်းလႂ်ၶႃႈ?။

တွပ်ႇ-ၸႂ်ႈၶၢႆႉတႄႉပႆႇဝႃႈ၊ ႁၢင်ႈႁႅၼ်းတႃႇတေၶၢႆႉမိူဝ်းၸၢမ်းတူၺ်းၵူၺ်း။ ၸုမ်းၸိူဝ်းဢၼ်ၶႂ်ႈႁႂ်ႈၵူၼ်းပၢႆႈ ၽေးပွၵ်ႈမိူဝ်း ၶိုၼ်းၼၼ်ႉ မီးလၢႆၸုမ်းမိူၼ်ၼင်ႇ 1.မိူင်းၼေႃႊဝေႊၵမ်ႉဝႆႉၸုမ်းၵမ်ႉထႅမ်လွင်ႈငမ်းယဵၼ် မိူင်းမၢၼ်ႈ (MYANMAR PEACE SUPPORT INITIATIVE-MPSI) တင်းၸုမ်းၵိုတ်းသိုၵ်းၸိူဝ်းၼႆႉ။ ပေႃးဢမ်ႇမီးၵူၼ်းၵမ်ႉထႅမ်ႁႅင်းငိုၼ်းတွင်းတုၵ်းယွၼ်း ႁႂ်ႈၶိုၼ်းပွၵ်ႈမိူဝ်းတႄႉ ၽႂ်ၵေႃႈတေပႆႇၶႂ်ႈပွၵ်ႈမိူဝ်း။ ၵွပ်ႈၼၼ် ထိၼိုင်ႈယူႇတီႈၵူၼ်းပၼ်ငိုၼ်းတွင်း၊ ထိသွင်ယူႇတီႈလၢႆလၢႆ ၸုမ်းဢၼ်ၶႂ်ႈႁႂ်ႈၵူၼ်းပၢႆႈၽေး ပွၵ်ႈမိူဝ်း။

ထၢမ်-ငဝ်းလၢႆးဝၢၼ်ႈမိူင်းယင်းပႆႇၼိမ်သဝ်း ၽႂ်ၽႂ်ၵေႃႈႁူႉယူႇ။ ၵူၺ်းၵႃႈ ႁဵတ်းသင်သမ်ႉတေတတ်းလွင်ႈ ၵမ်ႉၸွႆႈၼိူဝ်ၵူၼ်း ပၢႆႈၽေး။ ပေႃးၼၼ် ၵူၼ်းၼွၵ်ႈမိူင်းၼႂ်းမိူင်း ၸိူဝ်းမႃးၸွႆႈၵူၼ်းပၢႆႈၽေးၸိူဝ်းၼႆႉ ၸွင်ႇလႆႈဝႃႈၶဝ်မီး ၼမ်ႉၸႂ်ၸေႇတၼႃႇ ၸိုၼ်ႈၸၢင်ႇယူႇၶႃႈႁႃႉ?။

တွပ်ႇ-ၵူၼ်းၼေႃႊဝေႊလႄႈသင်၊ ၵူၼ်းမိူင်းၼွၵ်ႈလႄႈသင်၊ ဢမ်ႇၸႂ်ႈၵူၼ်းတႆး ဢမ်ႇၸႂ်ႈၵူၼ်းၼႂ်းမိူင်း မၢၼ်ႈ။ ပေႃးၸဵပ်း မႃးဢမ်ႇၸႂ်ႈၶဝ်ၸဵပ်း။ ၶဝ်မီးၸေႇတၼႃႇလီၵေႃႈယဝ်ႉ ဢၼ်ၶဝ်ဢဝ်ငိုၼ်းမႃးၸွႆႈ ၼၼ်ႉ လႆႈႁၼ်ဝႃႈ- 1.ၶဝ်တေဢဝ်ၶွမ်ႊပၼီႊတင်းၼမ်ၶဝ်ႈလူင်းတိုၼ်း ၼႂ်းမိူင်းမၢၼ်ႈပိူဝ်ႈတႃႇဢဝ်ၼမ်ႉ တွၼ်းမိူဝ်းၼႃႈ။ 2.ပိူဝ်ႈတႃႇလႆႈၼႃႈလႆႈတႃ ၼႂ်းလုမ်ႈၾႃႉ။ ဢဝ်ငိုၼ်းတွင်းမႃးၸွႆႈႁဝ်းၵေႃႈ မိူၼ်တင်းမႃး မတ်ႉႁဝ်းပႃးယူႇ။ ၸိုင်ႈမိူင်းၶဝ်ၵႆႁဝ်း ၶဝ်သမ်ႉမႃးၸွႆႈႁဝ်းၼၼ်ႉလီဝူၼ်ႉပႃးယူႇ၊ ၾၢႆႇၼိုင်ႈၵေႃႈၶဝ်ၶႂ်ႈၸႂ်ႉ ႁဝ်းႁဵတ်းပၼ်ၵၢၼ်ၶဝ်။

ထၢမ်-ယူႇတီႈၸုမ်း CBO တႆးသေ တေၸၢင်ႈၸွႆႈၵႄႈလိတ်ႈပၼ်ၵူၼ်းပၢႆႈၽေးသင်ၶႃႈ?။

တွပ်ႇ-မိူၼ်မိူဝ်ႈလဵဝ် ဢၼ်ၸွႆႈလႆႈတႄႉပဵၼ်ၵၢၼ်ႁူမ်ႈမိုဝ်းၵၼ်လၢႆၾၢႆႇသေပိုၼ်ၽၢဝ်ႇပၼ် ယႃႇႁႂ်ႈ ၵူၼ်းပၢႆႈၽေးၶဝ်လႆႈပွၵ်ႈ မိူဝ်း၊ ၵွပ်ႈဝႃႈ ပေႃးသူင်ႇပွၵ်ႈမိူဝ်းၸူဝ်ႈဝၢၼ်ႈမိူင်းပႆႇမၼ်ႈၼိမ်ၼႆႉ ၵူၼ်းမိူင်းၸၢင်ႈ ၶိုၼ်းတူၵ်းတၢင်းယၢပ်ႇၽိုတ်ႇ၊ ၵွပ်ႈဝႃႈ လွင်ႈငမ်းယဵၼ်ၵေႃႈမိူၼ်တိုၵ်ႉတႄႇႁဵတ်းၵူၺ်း၊ ၵိုတ်းယိုဝ်းၵၼ်မႃး ယဝ်ႉၵေႃႈတိုၵ်ႉ မီးပၢင်တိုၵ်းယူႇ။ သင်ဝႃႈၸိူဝ်းၶဝ်ပွၵ်ႈမိူဝ်း ၵိူတ်ႇပဵၼ်ပၢင်တိုၵ်းမႃးၵေႃႈပၢႆႈယၢပ်ႇ၊ ပၢႆႈၵႂႃႇ ယူႇၼႂ်းထိူၼ်ႇ ၵေႃႈၸၢင်ႈယဵပ်ႇၺႃးမၢၵ်ႇဢၼ်ပိူၼ်ႈႁၢင်ႈၵၢင်ဝႆႉ၊ ၸုမ်းယိပ်းၵွင်ႈ ၶဝ်ၼႄးတႂ်ႈတႂ်ႈၼိူဝ်ၼိူဝ် ၵေႃႈၵႃႈလႆႈတုင်းႁပ်ႉ ၵွပ်ႈပိူၼ်ႈမီးၵွင်ႈ။ ၼွၵ်ႈသေၼၼ်ႉ ၸၢင်ႈထူပ်းပၼ်ႁႃးပၢႆးပၺ်ႇၺႃႇၵၢၼ် သွၼ်ၵၢၼ်ႁဵၼ်း၊ ပၢႆးယူႇလီလွင်ႈ ယူတ်းယႃတူဝ် မိူဝ်ႈယူႇဢမ်ႇလီၵိၼ်ဢမ်ႇဝၢၼ်လႄႈပၼ်ႁႃၵၢၼ် မၢၵ်ႈမီးၸိူဝ်းၼႆႉ။

ၸွမ်းၼင်ႇသၢႆမၢႆၵဝ်ႇၵူၼ်းပၢႆႈၽေးၸိူဝ်းပိုင်ႈဢိင်ယူႇသဝ်းၸွမ်း RCSS/SSA မီးဝႆႉၼၼ်ႉ ပၢင်သဝ်းၵုင်း ၵျေႃႇ ဝဵင်းႁႅင် မီးလင်ႁိူၼ်း 120 ၵူၼ်းပၢႆႈၽေးမီး 620 ၊ ၵွင်းမုင်ႈမိူင်း တေႃႇၼႃႈမိူင်းထႆးဝဵင်းမႄႈႁွင်ႈသွၼ် မီး 250 ၵေႃႉ၊ လွႆတႆးလႅင်း တေႃႇၼႃႈၸႄႈဝဵင်းပၢင်မၢၵ်ႇၽႃႈ မီး 2,300 ၊ လွႆလမ် တေႃႇၼႃႈၸႄႈဝဵင်းဝဵင်း ႁႅင် 400 ၊ လွႆသၢမ်သိပ်း 1,500 ၊ လွႆၵေႃႇဝၼ်း 2,900 ၊ ႁူမ်ႈတင်းမူတ်း 7,970 ၵေႃႉ။ ၾၢႆႇၼိုင်ႈ ၵူၼ်းပၢႆႈ ၽေးၸိူဝ်းၼႆႉ ဢိင်ၼိူဝ်လႆႈငိၼ်းဝႃႈတေလႆႈၶၢႆႉပွၵ်ႈမိူဝ်းၼႆလႄႈ ၵမ်ႈၽွင်ႈလၵ်ႉပၢႆႈဢွၵ်ႇၼႂ်းပၢင်သဝ်း ၵူၼ်းပၢႆႈၽေးၵေႃႈမီး- ၼႆယဝ်ႉ။