သၽႃးမိူင်းႁူမ်ႈတုမ်မၢၼ်ႈလိူၵ်ႈတၢင်ႇၸဝ်ႈသိုၵ်းလူင်ၺၢၼ်ႇ ထုၼ်း ၽူႈၵွၼ်းတပ်ႉႁိူဝ်း ၶိုၼ်ႈပဵၼ်ၵႅမ်ၸွမ်ၸိုင်ႈၵေႃႉမႂ်ႇ ပုတ်ႈတႅၼ်း တိၼ်ႇဢွင်ႇမိၼ်ႉဢူး ဢၼ်ယွၼ်းၵိုတ်းလိုဝ်ႈ ၵႂႃႇယွၼ်ႉလွင်ႈပၢႆးယူႇလီ ..။

ၶၢဝ်ႇၼွၵ်ႈမိူင်း AFP လၢႆးငၢၼ်းဝႃႈ - မိူဝ်ႈဝႃႈ (15/08/12) ၶိၼ်ႇဢွင်ႇမိၼ်ႉ ၽူႈၼင်ႈၸိုင်ႈသၽႃး (ပႃႊလီႊမၼ်ႊ) မၢၼ်ႈ ပိုၼ်ၽၢဝ်ႇဝႃႈ သၽႃးလႆႈလိူၵ်ႈတၢင်ႇ ၸဝ်ႈသိုၵ်းလူင် ၺၢၼ်ႇထုၼ်း ဢႃယု 58 ပီ ၽူႈၵွၼ်ႈတပ်ႉႁိူဝ်းၶိုၼ်ႈပဵၼ်ၵႅမ်ၸွမ် ၸိုင်ႈၵေႃႉမႂ်ႇ၊ ပုတ်ႈတႅၼ်းတီႈၼင်ႈတိၼ်ႇဢွင်ႇမိၼ်ႉဢူး ၵေႃႉဢၼ်ယွၼ်းၵိုတ်းလိုဝ်ႈၵႂႃႇလူၺ်ႈပၢႆးယူႇလီ။

ၸွမ်သိုၵ်းလူင် ၺၢၼ်ႇထုၼ်း ႁပ်ႉတၼ်းႁဵင်းပဵၼ်ၽူႈၵွၼ်းတပ်ႉႁိူဝ်းမႃးၸဵမ်ပီ 2008 လႄႈ မိူဝ်ႈဝၼ်း ပုတ်ႉ (15/08/12) လုၵ်ႈၸုမ်းသၽႃးၾၢႆႇသိုၵ်းဢၼ်မီးတီႈၼင်ႈ ၼႂ်းသၽႃး 25 ပိူဝ်ႊသႅၼ်ႊ ၽွမ်ႉၵၼ် တၢင်ႇၸိုဝ်ႈမၼ်းႁပ်ႉလိူၵ်ႈပဵၼ်ၵႅမ် ၸွမ်ၸိုင်ႈ။

ဝၢႆးလႆႈလိူၵ်ႈတၢင်ႇၶိုၼ်ႈပဵၼ်ၵႅမ်ၸွမ်ၸိုင်ႈ ၸဝ်ႈသိုၵ်းလူင် ၺၢၼ်ႇထုၼ်း လႆႈၵၢဝ်ႇလၢတ်ႈပၼ်ၵႂၢမ်း မၼ်ႈၵႅၼ်ႇၼႂ်းသၽႃးဝႃႈ - တေႁၢပ်ႇၵၢၼ်ၸွမ်းၼင်ႇပုၼ်ႈၽွၼ်းမီးႁႂ်ႈတဵမ်ထူၼ်ႈလႄႈသိုဝ်ႈသႂ်၊ တေၸုၵ်းမၼ်ႈၼိူဝ်သဵၼ်ႈတၢင်းတြႃး လွတ်ႈလႅဝ်း လႄႈလွင်ႈၽဵင်ႇပဵင်း - ဝႃႈၼႆ။

ပိူင်ငဝ်ႈပိုင်းမိူင်းပီ 2008 မၢၼ်ႈမၵ်းမၼ်ႈဝႆႉ ၸိုင်ႈမိူင်းႁူမ်ႈတုမ်မၢၼ်ႈႁႂ်ႈမီးၸွမ်ၸိုင်ႈ 1 ၵေႃႉ ၵႅမ်ၸွမ်ၸိုင်ႈ 2 ၵေႃႉ၊ ဝၢႆးလိူၵ်ႈ တင်ႈပီ 2011 ၸွမ်သိုၵ်းလူင်တဵင်းၸဵင်ႇ ပဵၼ်ၸွမ်ၸိုင်ႈ၊ တိၼ်ႇဢွင်ႇမိၼ်ႉဢူး လႄႈ ၻွၵ်ႈတိူဝ်ႊ ၸၢႆးမွၵ်ႇၶမ်း ပဵၼ်ၵႅမ် ၸွမ်ၸိုင်ႈ။ ၵူၺ်းၵႃႈမိူဝ်ႈၼႂ်းလိူၼ် 5 (မေႊ) ပူၼ်ႉမႃး တိၼ်ႇဢွင်ႇမိၼ်ႉ ဢူး ၽူႈဢၼ်လႆႈၸိုဝ်ႈဝႃႈပဵၼ်ၵူၼ်းႁူဝ်ၶႅင် ပဵၼ်ၵူၼ်းၸမ်ၸႂ်တၢၼ်းသူၺ်ႇ လႆႈယွၼ်းလိုဝ်ႈၵႂႃႇယွၼ်ႉမီး ပၼ်ႁႃပၢႆးယူႇလီ။

မိူဝ်ႈလိူၼ်ပူၼ်ႉၼႆႉ ၼႂ်းသၽႃးလႆႈတၢင်ႇ ၸွမ်သိုၵ်းလူင်မိၼ်ႉသူၺ်ႇ ၶိုၼ်ႈပဵၼ်ၵႅမ်ၸွမ်ၸိုင်ႈတႅၼ်းတၢင် တိၼ်ႇဢွင်ႇမိၼ်ႉ ဢူး ၊ ဢိင်ၼိူဝ်မီးလွင်ႈၶွင်ႉၶမ်ယွၼ်ႉ ၸွမ်သိုၵ်းလူင်မိၼ်ႉသူၺ်ႇ မီးလုၵ်ႈၸၢႆးယူႇၼွၵ်ႈ မိူင်းလႄႈယိပ်းၵူၼ်းၼွၵ်ႈမိူင်း ႁဵတ်းႁႂ်ႈၸွမ်သိုၵ်းလူင်မိၼ်ႉသူၺ်ႇ ဢမ်ႇၶဝ်ႈၶွပ်ႇပိူင်မၢႆမီႈဢၼ်ဝႃႈ ၵူၼ်းၵေႃႉလႂ်မီးၺႃတိၵပဵၼ်ၵူၼ်း ၼွၵ်ႈမိူင်းတေဢမ်ႇ လႆႈႁပ်ႉတၼ်းႁဵင်းၼႂ်းလူင်ပွင်ၸိုင်ႈ ၼႆလႄႈ ၸွမ်သိုၵ်းလူင်မိၼ်ႉသူၺ်ႇၵေႃႈဢဝ်ႁၢမ်းႁႅၵ်းၵႂႃႇသေ ၸင်ႇမီးၵၢၼ်လိူၵ်ႈ တၢင်ႇမႂ်ႇဢဝ် ၸွမ်သိုၵ်းလူင် ၺၢၼ်ႇထုၼ်းၶိုၼ်ႈတႅၼ်း - ၼႆယဝ်ႉ။