ငိုၼ်းလိူၼ်သိုၵ်းဝႃႉၸၼ်ႉဢွၼ်ႇလႄႈၸၼ်ႉသုင် လႆႈၽဵင်ႇ ပဵင်းၵၼ်၊ သိုၵ်းတႆးလႆႈၼမ်ဢေႇၸွမ်းၸၼ်ႉ ၽႂ်မၼ်း။ ၶႃႈႁၢပ်ႇၵၢၼ်ၶုၼ်မၢၼ်ႈငိုၼ်းလိူၼ်တိုၵ်ႉဢေႇၸွမ်းၵၢၼ် မၢၵ်ႈမီးဝၢၼ်ႈမိူင်းတူၵ်းတႅမ်ႇ။

ငိုၼ်းလိူၼ်ၶွင် တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၼိုင်ႈၵေႃႉ 60 ယႂၼ်ငိုၼ်းၶႄႇ (မွၵ်ႈ 300 ဝၢတ်ႇ ငိုၼ်းထႆး)၊ ၵူၼ်း သိုၵ်းတင်ႈတႄႇသိုၵ်းႁၢၼ်တေႃႇထိုင်ၽူႈမီးၸၼ်ႉသုင် ပၼ်ၽဵင်ႇပဵင်းၵၼ်မူတ်း။ ၵူၺ်းၵႃႈ ပေႃးပဵၼ်ၽူႈၵွၼ်း တပ်ႉမူႇ ပၼ်ပႃးလူတ်ႉၶိူင်ႈ 1 လမ်း၊ ပေႃးပဵၼ်ၽူႈၵွၼ်းတပ်ႉမုၵ်ႉလႆႈ ၸၢၵ်ႈထႆၼႃး ႁိုဝ် ထူဝ်ႈရၵျီႊပိူဝ်ႈတႃႇ ႁဵတ်းၵိၼ်ၵၢၼ်ၼိုင်ႈၶိူင်ႈ၊ ပေႃးပဵၼ်ၽူႈၵွၼ်းတပ်ႉၵွင် လႆႈလူတ်ႉၵႃး 1 လမ်း။ ၽႂ်ႁဵတ်းၵၢၼ်ၶႅၼ်ႇၵေႃႈ လႆႈၶူဝ်းၾၢၵ်ႇၶွင်တွၼ်ႈတီႈမူႇၸုမ်းၼမ်။ ၼွၵ်ႈသေၼၼ်ႉ ၽူႈၵွၼ်း တပ်ႉၶဝ်ယင်းမီးသုၼ်ႇလႆႈ ၵႂႃႇထုၵ်ႈငိုၼ်း တီႈမူႇၸုမ်းပိူဝ်ႈတႃႇပဵၼ်တိုၼ်းလၢင်းႁဵတ်းၵၢၼ်လႄႈ ထုၵ်ႈပၼ်လုၵ်ႈၼွင်ႉႁဵတ်းၵၢၼ်ငၢၼ်းထႅင်ႈ-ၼႆယဝ်ႉ။

ငိုၼ်းလိူၼ်တပ်ႉသိုၵ်းၸိုင်ႈတႆး RCSS/SSA ၸိူဝ်းယူႇၼႂ်းမိူင်းလႆႈငိုၼ်းမၢၼ်ႈ၊ ၸိူဝ်းယူႇၸွမ်းလႅၼ်လိၼ် မိူင်းထႆး လႆႈငိုၼ်းထႆး၊ မီးၵၢၼ်ၼပ်ႉသွၼ်ႇသေပၼ်ပဵင်းၵၼ်။ ၵေႃႉသိုၵ်းၶဝ်ႈႁၢပ်ႇၵိုတ်းၵၢၼ်သိုၵ်း 5 ပီ ၼိုင်ႈၵေႃႉ 10,000 ပျႃး (တူၵ်းငိုၼ်းထႆးမွၵ်ႈ 400 ဝၢတ်ႇ)၊ ၸိူဝ်းပဵၼ်လွၼ်ႉသိုၵ်း၊ ႁူဝ်ႁၢၼ်၊ ႁူဝ်သိုၵ်း ၶိုၼ်ႈၵႂႃႇထိုင်ၸၼ်ႉ ၸဝ်ႈသိုၵ်းလူင်ၼၼ်ႉ ၶိုၼ်ႈပၼ်ၸွမ်းၸၼ်ႉၸၼ်ႉ 2,000 ပျႃး။ ၼွၵ်ႈၼိူဝ်သေငိုၼ်း ၸၼ်ႉသိုၵ်းယဝ်ႉမီးပႃးငိုၼ်း တၼ်းႁဵင်းၼႃႈၵၢၼ်ထႅင်ႈ။

ငိုၼ်းလိူၼ်သိုၵ်းႁၢၼ်ၼႂ်း တပ်ႉသိုၵ်းဢူၺ်းလီၻီႊမွၵ်းၶရႅတ်ႊတိၵ်ႊၸိူဝ်ႉၸၢတ်ႈ-ၸိုင်ႈတႆးပွတ်းဢွၵ်ႇ (NDAA-ESS) ၸုမ်းမိူင်းလႃး သမ်ႉလႆႈၵေႃႉ 250 ယႂၼ်-ၼႆယဝ်ႉ။

ပၢင်ၵုမ်သၽႃးၸိုင်ႈမိူင်းႁူမ်ႈတုမ်မၢၼ်ႈပွၵ်ႈၵမ်းၼႆႉ မီးၵၢၼ်ဢုပ်ႇဢူဝ်းၶိုၼ်ႈပၼ်ငိုၼ်းလိူၼ်ၶႃႈ ႁၢပ်ႇၵၢၼ်ၶုၼ် မၢၼ်ႈ၊ ငိုၼ်းလိူၼ်ၶူးသွၼ် ၽူႈၵွၼ်းႁူင်းႁဵၼ်းၸၼ်ႉငဝ်ႈ ဢၼ်ယၢမ်ႈလႆႈ 53,000-58,000 ၶိုၼ်ႈတေႃႇထိုင် 59,000-64,000 ပျႃး။ ၽူႈၵွၼ်းႁူင်းႁဵၼ်းၸၼ်ႉၵၢင် ဢၼ်လႆႈ 59,000-59650 ၶိုၼ်ႈထိုင် 100,000-110,000 ပျႃး။