ၸွမ်းၼင်ႇမေႃယႃမိူင်းထႆးလႆႈၼတ်ႉ/ၽတ်းဝႆႉ မိူဝ်ႈမႃးယႃ တူဝ်ၵမ်းပူၼ်ႉသေ မိူဝ်ႈၼႆႉ ၸဝ်ႈၶုၼ် ထုၼ်းဢူးတေလုၵ်ႉ မိူင်းမၢၼ်ႈ လူၺ်ႈသၢႆၵၢၼ်ဝိၼ် ၶဝ်ႈယူတ်းယႃတူဝ်မိူင်းထႆး ထႅင်ႈ။

ဝၼ်းထိ 22/08/12 မိူဝ်ႈၼႆႉ ၸဝ်ႈၶုၼ်ထုၼ်းဢူး ႁူဝ်ပဝ်ႈငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) တေၸွမ်းႁိူဝ်းဝိၼ် TG 306 လုၵ်ႉမိူင်းမၢၼ်ႈတႃႈၵုင်ႈ ယၢမ်း 19:45 (ၶၢဝ်းယၢမ်း မိူင်းမၢၼ်ႈ) သေ တေၽႅဝ်ဝဵင်း လူင်မိူင်းၵွၵ်ႇမွၵ်ႈယၢမ်း 21:40 မူင်း။

ဝၢႆးၶဝ်ႈယူတ်းယႃတူဝ်မိူင်းထႆးသေ ပွၵ်ႈမိူဝ်းၶိုၼ်းမိူင်းမၢၼ်ႈတႃႈၵုင်ႈၼႆႉ ၸဝ်ႈၶုၼ်ထုၼ်းဢူး တူဝ်မဝ်ၸႂ် မဝ်ၵႂႃႇမႃးလႅတ်း သႅဝ်းလိူဝ်ၵဝ်ႇ၊ ၼမ်ႉၼၵ်းလူတ်းလူင်း 28 ၵီႊလူဝ်ႊ၊ ထူၺ်ႈၸႂ်ၵေႃႈလီ၊ ၼွၼ်းလပ်းလီ၊ ၼွၼ်းၵေႃႈဢမ်ႇၶူၼ်၊ မၼ်းၸဝ်ႈ လၢတ်ႈဝႃႈ မႃးယူတ်းယႃတူဝ်မိူင်းထႆးၼႆႉႁၢၼ်ႉၸႂ်ယူႇ- ၸၢႆးဢွင်ႇတဵင်း ၽူႈၵႅမ်တူဝ်မၼ်းၸဝ်ႈလၢတ်ႈၼႄၼင်ႇၼႆ။

လွင်ႈတၢင်းတေၶဝ်ႈမိူင်းထႆးထႅင်ႈပွၵ်ႈၵမ်းၼႆႉ ဢိင်ၼိူဝ်မေႃယႃ ၼတ်ႉ/ၽတ်းဝႆႉ မိူဝ်ႈၶဝ်ႈယူတ်းယႃတူဝ် မိူင်းထႆးပူၼ်ႉမႃး မိူဝ်ႈႁူဝ်လိူၼ်ၵျူႊလၢႆႊ။ မေႃယႃၶဝ်ပၼ်ယႃႈယႃၵိၼ်မိူဝ်းၶၢဝ်းတၢင်းၼိုင်ႈလိူၼ်၊ ႁႂ်ႈမိူဝ်းၵိၼ်တူၺ်း၊ တၢင်းပဵၼ်ၶႅၼ်းၸႂ် လူတ်းယွမ်းလူင်းၸိူင်ႉႁိုဝ်ၵေႃႈ ႁႂ်ႈပွင်ႇၶၢဝ်ႇၸူးမေႃယႃၶဝ်- ၼႆယဝ်ႉ။