ၸၢႆးဢွင်ႇမျၢတ်ႈ ထုၵ်ႇၶၢႆႉလုၵ်ႉတီႈၾၢႆႇႁူမ်ႇလူမ်ႈသိုၵ်း ၵႂႃႇၵုမ်းၶင်ၼႂ်းၶွၵ်ႈလူင်ၵဵင်းတုင်၊ ယွၼ်ႉၶႄႇၸွမ်း ပႂ်ႉတူၺ်း၊ ဝၢႆးၶႄႇပွၵ်ႈမိူဝ်းယဝ်ႉၸၢင်ႈပွႆႇပၼ်။

ပူၼ်ႉမႃးမိူဝ်ႈဝၼ်းထိ 19/08/12 ၵၢင်ၶမ်ႈယၢမ်း 5 မူင်း၊ ၸဝ်ႈၼႃႈတီႈမၢၼ်ႈ ဢဝ်ၸၢႆးဢွင်ႇမျၢတ်ႈ လုၵ်ႉတီႈ ၾၢႆႇႁူမ်ႇလူမ်ႈသိုၵ်း (ၸယၽ) ၶၢႆႉၵႂႃႇသႂ်ႇၶွၵ်ႈလူင်တီႈၵဵင်းတုင်။ ၵွပ်ႈဝႃႈ ဝၢႆးၽွင်းတၢင်ၶႄႇ လုၵ်ႉတႃႈၵုင်ႈမႃးတီႈ ၵဵင်းတုင် ထဵတ်ႈထၢမ်ၸၢႆးဢွင်ႇမျၢတ်ႈယဝ်ႉ မီးၸဝ်ႈၼႃႈတီႈ CIP 4 ၵေႃႉမႃးယူႇဝႆႉ တီႈၵဵင်းတုင် မိူဝ်ႈလဵဝ်လႆႈဝူင်ႈပၢႆ၊ မႃးပႂ်ႉပၵ်းတႃတူၺ်းဝႃႈမၢၼ်ႈတေတႅပ်းတတ်းတြႃးၸၢႆးဢွင်ႇမျၢတ်ႈ ၸိူင်ႉႁိုဝ်-ၼႆယူႇ။

ၵဵဝ်ႇၵပ်းလွင်ႈၼႆႉ ၼႂ်းၸဝ်ႈၼႃႈတီႈမၢၼ်ႈဝႃႈ ၸၢႆးဢွင်ႇမျၢတ်ႈၼႆႉ မၼ်းပဵၼ်ၵူၼ်းဝၢင်းၶိူင်ႈ၊ မၼ်းဢမ်ႇမီး တၢင်းၽိတ်း၊ ထုၵ်ႇလႆႈပွႆႇမၼ်း။ ပိူဝ်ႈတႃႇႁဵတ်းပၼ်ဝႂ်ၵပ်းတူဝ်မၼ်းၵေႃႈ ယိုၼ်ႈတၢင်ႇၵႂႃႇတၢင်းၼေႇပျီႇ တေႃႇယဝ်ႉ၊ ပိူဝ်ႈတႃႇပွႆႇတူဝ်မၼ်းၵေႃႈ တူဝ်ႈတၼ်းယဝ်ႉ၊ ၵူၺ်းၵႃႈ ယွၼ်ႉၶႄႇၸိူဝ်းၼႆႉပႂ်ႉတူၺ်းဝႆႉယူႇ လႄႈ ပေႃးဝႃႈတေ ဢမ်ႇဢဝ်လိူင်ႈသင်သေ ပွႆႇပၼ်ၵေႃႈၵူဝ်ၶႄႇဝႃႈ၊ ၵွပ်ႈၼၼ်လႄႈၵႃႈလႆႈဢဝ်သႂ်ႇၶွၵ်ႈဝႆႉ၊ မၢင်ၽဝ်ႇပေႃးၶႄႇ CIP 4 ၵေႃႉပွၵ်ႈမိူဝ်းယဝ်ႉၶေးတေပွႆႇႁိုဝ်-ၼႆယဝ်ႉ။

ၸၢႆးဢွင်ႇမျၢတ်ႈတေၺႃးၶွၵ်ႈႁိုင်ၵႃႈႁိုဝ်ဢမ်ႇၸၢင်ႈဝႃႈ၊ ယွၼ်ႉပိူဝ်ႈၸဝ်ႈၼႃႈတီႈၶႄႇ CIP ၶႄႇမႃးပႂ်ႉ တူၺ်းလႄႈ ၸဝ်ႈၼႃႈတီႈမၢၼ်ႈၵႃႈလႆႈဢဝ်သႂ်ႇၶွၵ်ႈဝႆႉ။ ဢွၼ်ၼႃႈၼႆႉ ၶႄႇသီႇၵေႃႉၼၼ်ႉသိုဝ်ႉဝႂ်ႁိူဝ်းဝိၼ် ဝႆႉသေၶဝ်ဝႃႈ ၶဝ်တေမိူဝ်းယဝ်ႉ၊ ၵူၺ်းၵႃႈဢမ်ႇမိူဝ်း။ ပိူင်လူင်မၼ်းတႄႉ မၢၼ်ႈၵူဝ်ၶႄႇ၊ ယွၼ်ႉပိူဝ်ႈၵူဝ် ၶႄႇမႃးၵဝ်းတိၵ်းတိၵ်းလႄႈ မၢၼ်ႈၵေႃႈဢဝ်သႂ်ႇၶွၵ်ႈဝႆႉ-ၼႆယဝ်ႉ။

ဢွၼ်ၼႃႈၼႆႉ ၸဝ်ႈၼႃႈတီႈမၢၼ်ႈၶဝ် လူင်းၵူတ်ႇထတ်းသဵၼ်ႈမၢႆႁူဝ်ႁိူၼ်းၸၢႆးဢွင်ႇမျၢတ်ႈသေ လႆႈႁူႉဝႃႈ မၼ်း ပဵၼ်ၵူၼ်းဝၢၼ်ႈၼမ်ႉၶိုမ်းတႄႉ၊ ပိူဝ်ႈတႃႇႁဵတ်းပၼ်ဝႂ်ၵပ်းတူဝ်မၼ်းၸၢႆးၼၼ်ႉ ၸဝ်ႈၼႃႈတီႈၶဝ် တၢင်ႇၵႂႃႇတီႈ ၼေႇပျီႇတေႃႇယဝ်ႉ။ ၵူၺ်းၵႃႈ ယူႇတီႈၶႄႇသမ်ႉႁၼ်ဝႃႈ မၼ်းၸၢႆးပဵၼ်ၵူၼ်းႁဵတ်းၵၢၼ်ႁၢႆႉ လူင် ၵွပ်ႈသင်တေပွႆႇပၼ်-ၼႆယူႇ။