ၸွမ်းၼင်ႇၸဝ်ႈၼႃႈတီႈမၢၼ်ႈ ၵႂႃႇၵူတ်ႇထတ်းဝၢၼ်ႈ ၸႃႇတိၾင်ႁူၵ်ႈၾင်ႁႄႇ ၶွင်ၸၢႆးဢွင်ႇမျၢတ်ႈၼၼ်ႉ လႆႈႁူႉဝႃႈမၼ်းပဵၼ်ၵူၼ်းမိူင်းမၢၼ်ႈ(မိူင်းတႆး)၊ ဢမ်ႇၸႂ်ႈ ၵူၼ်းမိူင်းၶႄႇ။ ဝၢႆးၾၢႆႇႁူမ်ႇလူမ်ႈသို်ၵ်းၵႂႃႇဢုပ်ႇ ၼေႇပျီႇ တေႃႇယဝ်ႉ လႅပ်ႈတေမီးၵၢၼ်ပွႆႇပၼ်။

ဝၼ်းထိ 14/08/12 (မိူဝ်ႈၼႆႉ) ၵူၼ်းၵေႃႉၶိုင်ပွင်ပၼ်ဢမ ု(ၶၻီး) ၸၢႆးဢွင်ႇမျၢတ်ႈ ဢၼ်ပဵၼ်ၸဝ်ႈၼႃႈတီႈ ႁူမ်ႇလူမ်ႈသိုၵ်း (ၸယၽ) တီႈၵဵင်းတုင် တေၵႂႃႇၼေႇပျီႇတေႃႇသေၵႂႃႇဢုပ်ႇဢူဝ်းၵႄႈလိတ်ႈလွင်ႈၸၢႆးဢွင်ႇမျၢတ်ႈ။ ပေႃးၵူႈၸိူဝ်ႉၵူႈလွင်ႈယဝ်ႉတူဝ်ႈယဝ်ႉ လႅပ်ႈတေ ပွႆႇပၼ်။ မိူဝ်ႈလဵဝ်ၵေႃႈ ၸၢႆးဢွင်ႇမျၢတ်ႈၼႆႉ လႆႈထုၵ်ႇၵုမ်းတူဝ် ယူႇဝႆႉၸွမ်းၾၢႆႇႁူမ်ႇလူမ်ႈသိုၵ်းၶဝ်ၵူၺ်း၊ ဢမ်ႇထုၵ်ႇၵုမ်းၶင်ဝႆႉၼႂ်းၶွၵ်ႈ- ၽူႈၸမ်ၸႂ်ၼႃႈႁိူၼ်းၸၢႆးဢွင်ႇမျၢတ်ႈ လၢတ်ႈၼႄၼင်ႇၼႆ။

လွင်ႈတၢင်းဢၼ်တေလႅပ်ႈပွႆႇပၼ်ၸၢႆးဢွင်ႇမျၢတ်ႈၼႆႉ ၵွပ်ႈဝႃႈမိူဝ်ႈဝၼ်းသုၵ်းထိ 10/08/12 ၼၼ်ႉ ၸဝ်ႈၼႃႈတီႈမၢၼ်ႈ ၵႅမ်ၽူႈၵွၼ်း ပလိၵ်ႈၵဵင်းတုင်၊ ၵႅမ်ၽူႈၵွၼ်းပလိၵ်ႈတႃႈၶီႈလဵၵ်း တင်းၸဝ်ႈၼႃႈတီႈၾၢႆႇႁဵတ်းဝႂ်ၵပ်းတူဝ် ၵူၼ်းမိူင်း (လဝၵ)လူင်းထတ်းသဵၼ်ႈမၢႆႁူဝ်ႁိူၼ်း ၸၢႆးဢွင်ႇမျၢတ်ႈ လႆႈႁူႉဝႃႈပဵၼ်ၵူၼ်းမိူင်းမၢၼ်ႈ (မိူင်းတႆး)တႄႉ။ တီႈဝၢၼ်ႈၼမ်ႉၶိုမ်းၼၼ်ႉ ပေႃႈတႄႉမႄႈတႄႉလႄႈမေးၼၢင်းမၼ်း ဢၼ်ပဵၼ်ၽူဝ်မၢဝ်ႇမေးသၢဝ်ၼၼ်ႉ ဢမ်ႇမီးယဝ်ႉ၊ ၵူၺ်းၵႃႈ မီးမေးၼၢင်းမၼ်းထႅင်ႈၵေႃႉၼိုင်ႈ ဢၼ်ပဵၼ်မေးမႂ်ႇယူႇတီႈတႃႈသၢမ်ပူး ၼႂ်းၵိင်ႇၸႄႈဝဵင်း တႃႈလိူဝ်ႇ-ၼႆယဝ်ႉ။

ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈမၢၼ်ႈၶဝ်ပွင်ႇလၢတ်ႈၵႂႃႇတီႈၸဝ်ႈၼႃႈတီႈၶႄႇ တီႈၵဵင်းတုင် ၸိူဝ်းမႃး ထဵတ်ႈထၢမ်ၸၢႆးဢွင်ႇမျၢတ်ႈဝႃႈ ၸႂ်ႈၵူၼ်းမိူင်းမၢၼ်ႈတႄႉ ၼႆလႄႈၶႄႇၵေႃႈလူင်းလၢႆးမိုဝ်းသေပွၵ်ႈမိူဝ်း။ ထႅင်ႈၾၢႆႇၼိုင်ႈ ၸဝ်ႈၼႃႈတီႈမၢၼ်ႈၵေႃႈလူင်းလၢႆးမိုဝ်းႁပ်ႉႁွင်း လွင်ႈၸဝ်ႈၼႃႈတီႈၶႄႇမႃးထဵတ်ႈထၢမ်ယဝ်ႉ တူဝ်ႈယဝ်ႉ- ဝႃႈၼႆ။

မိူဝ်ႈတႄႇမၼ်း မိူဝ်ႈၸဝ်ႈၼႃႈတီႈၶဝ်ၶႄႇမႃးၼၼ်ႉ ၶဝ်လႅပ်ႈၶႂ်ႈထုပ်ႉၶႂ်ႈႁႅမ်ၸၢႆးဢွင်ႇမျၢတ်ႈလူးၵွၼ်ႇ၊ ၵူၺ်းၵႃႈ ၸဝ်ႈၼႃႈတီႈမၢၼ်ႈၶဝ်ဢမ်ႇ ပၼ်ထုပ်ႉႁႅမ်။ မၢၼ်ႈၶဝ်ဝႃႈ တေလႆႈၸွပ်ႇထၢမ်ဢမုလီလီၵူၺ်း၊ ဢမ်ႇၸႂ်ႈသူႁႅမ် ၵူၼ်းတူၵ်းၶွၵ်ႈမိူင်းသူ- ၽူႈၸမ်ၸႂ်ၼႃႈႁိူၼ်းၸၢႆးဢွင်ႇ မျၢတ်ႈသိုပ်ႇလၢတ်ႈၼင်ႇၼႆ။