ဝၢႆးလွႆတႆးလႅင်းၵိုတ်းယိုဝ်း ဢဝ်လွင်ႈငမ်းယဵၼ်မႃးၼႆႉ ဢိင်ၼိူဝ်ၸဝ်ႈတႃႇၼတတ်းၵၢၼ်ၸွႆႈထႅမ်သေ ၵူၼ်းပၢႆႈ ၽေးၶဝ်ၵႂႃႇႁဵတ်းႁႆႈႁဵတ်းသူၼ်ၸွမ်းလွႆၼၼ်ႉ ယူႇတီႈ တပ်ႉသိုၵ်းဝႃႉ ပႆႇၶဝ်ႈၸႂ်လႄႈယဵၼ်းပဵၼ် လွင်ႈၶဵင်ႈၶႅင် ၵၢၼ်သိုၵ်း။

တၢင်းၾၢႆႇ RCSS/SSA ဝႃႈ- ၵူၼ်းပၢႆႈၽေးၶဝ် ၸိူဝ်းပိုင်ႈဢိင်ယူႇသဝ်းၸွမ်းလႅၼ်လိၼ်ထႆး၊ တႂ်ႈႁူမ်ႈ ငဝ်းၶွင်ႊသီႊဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼႆႉ ပေႃးဝႃႈတႆးလႅင်း ၵိုတ်းယိုဝ်း ဢဝ်လွင်ႈငမ်းယဵၼ်ၵၼ်တင်းမၢၼ်ႈယဝ်ႉၵေႃႈ လႆႈထုၵ်ႇတတ်းတၢင်းၸွႆႈထႅမ်၊ ၶဝ်ၵေႃႈလႆႈႁႃၵိၼ် ႁင်းၵူၺ်းသေ မႃးပဵၼ်ႁၢပ်ႇလူင်တပ်ႉသိုၵ်း၊ တပ်ႉသိုၵ်းလႆႈၸွႆႈထႅမ်ၸွမ်း ၼင်ႇ ၵႃႈပွင်ပဵၼ်လႆႈ။ ၵႃႈပူၼ်ႉမႃး ယူႇတီႈ လွႆၵေႃႇဝၼ်း လႆႈၸူဝ်းၶဝ်ၵႂႃႇႁဵတ်းႁႆႈႁဵတ်းၵၢၼ်ၸွမ်းႁူၺ်ႈၸွမ်းလွႆသေ မီးပၼ် ႁႃၵၼ်တင်းဝႃႉ။ ၵမ်းၼႆႉၵေႃႈ ယွၼ်ႉသိုၵ်းလွႆတႆးလႅင်း တေၵႂႃႇပၵ်းတပ်ႉပွတ်းပုင်ႇၽႃပွင်ႇတွင်း ပိူဝ်ႈတႃႇဢဝ်ႁူမ်ႇလူမ်ႈၵူၼ်း ပၢႆႈၽေးၵႂႃႇ ႁဵတ်းႁႆႈႁဵတ်းသူၼ်လႄႈ ၾၢႆႇပီႈၼွင်ႉဝႃႉ ယင်းပႆႇၶဝ်ႈၸႂ်သေမီးပၼ်ႁႃဝႆႉ။

ထႅင်ႈၾၢႆႇၼိုင်ႈ ပဵၵ်ႉသမ်ႉဢုပ်ႇဢူဝ်းတူၵ်းလူင်းၵိုတ်းယိုဝ်း ဢဝ်လွင်ႈငမ်းယဵၼ်ယဝ်ႉၵေႃႈ လွႆတႆးလႅင်း တင်း ၾၢႆႇသိုၵ်းမၢၼ်ႈ တိုၵ်ႉမီးလွင်ႈပိုတ်းယိုဝ်းၵၼ်ယူႇ၊ ႁဵတ်းႁႂ်ႈမီးပၼ်ႁႃလၢႆၾၢႆႇဝႆႉ- ဝႃႈၼႆ။

ၸွမ်းၼင်ႇသၢႆမၢႆၵဝ်ႇၵူၼ်းပၢႆႈၽေးၸိူဝ်းပိုင်ႈဢိင်ယူႇသဝ်းၸွမ်း RCSS/SSA မီးဝႆႉၼၼ်ႉ တီႈၵွင်းမုင်ႈမိူင်း တေႃႇၼႃႈမိူင်းထႆး ဝဵင်းမႄႈႁွင်ႈသွၼ် မီး 250 ၵေႃႉ၊ လွႆတႆးလႅင်း တေႃႇၼႃႈၸႄႈဝဵင်းပၢင်မၢၵ်ႇၽႃႈ မီး 2,300 ၊ လွႆလမ် တေႃႇၼႃႈၸႄႈဝဵင်း ဝဵင်းႁႅင် 400 ၊ လွႆသၢမ်သိပ်း 1,500 ၊ လွႆၵေႃႇဝၼ်း 2,900 ၊ ပၢင်သဝ်းၵုင်းၵျေႃႇ ဝဵင်းႁႅင် 620 ၊ ႁူမ်ႈတင်းမူတ်း 7,970 ၵေႃႉ။

ၸဝ်ႈတိုၼ်းၶိူဝ်း ၽူႈၵွၼ်းတပ်ႉၸုမ်း 727 လၢတ်ႈဝႃႈ- တီႈသၼ်ၸုၼႆႉ မိူဝ်ႈလဵဝ်ၵူၼ်းပၢႆႈၽေးၵိုတ်းမွၵ်ႈ 150 ၵူၺ်း၊ ၵွပ်ႈဝႃႈ ၸိူဝ်းပၢႆႈမႃးမီးတင်းၼမ်မွၵ်ႈ 1,500 ၵႃႈပူၼ်ႉမႃးၼၼ်ႉ ပေႃးဝႃႈၵတ်းယဵၼ်ၶိုၼ်းယဝ်ႉ ၵေႃႈ ၸိူဝ်းပဵၼ်ၸၢဝ်းလိသေႃးၵမ်ႈၼမ် ပွၵ်ႈမိူဝ်းၶိုၼ်း၊ ဝၢႆးမႃးၵိုတ်းမွၵ်ႈ 400 ပၢႆ၊ ၼႂ်းၼႆႉမွၵ်ႈ 200 ပၢႆ သမ်ႉလူင်းၵႂႃႇ ႁဵတ်းၵၢၼ်ၼႂ်းၶူးၼႂ်းဝဵင်းသေ မိူဝ်ႈလဵဝ်ၸင်ႇ ၵိုတ်းမွၵ်ႈ 150 ၼႆႉၵူၺ်း- ဝႃႈၼႆ။

မၼ်းၸဝ်ႈလၢတ်ႈပႃးဝႃႈ- မိူဝ်ႈဝႃးၾၢႆႇတပ်ႉဝႃႉၶဝ်တိၺွပ်းၵူၼ်းႁဝ်းဝႆႉၵမ်ႈၽွင်ႈ၊ ၵူၺ်းၵႃႈ လွင်ႈႁဵတ်းႁၢႆႉ ၸႃႉ ဢမ်ႇမီး၊ ၼႂ်ၼႆႉ လႆႈသူင်ႇတူဝ်တႅၼ်း ၶုၼ်သိုၵ်းထမ်ႇမ ၵႂႃႇဢုပ်ႇဝႃႉတီႈၼႃးၵွင်းမူးယဝ်ႉ- ဝႃႈၼႆ။

ၵဵဝ်ႇၵပ်းလွင်ႈတပ်ႉသိုၵ်းဝႃႉၶဵင်ႈၵၢၼ်သိုၵ်းၼၼ်ႉ ၵူၼ်းတၢင်းၼႃးၵွင်းမူးၵေႃႉၼိုင်ႈလၢတ်ႈဝႃႈ- မိူဝ်ႈဝႃး (ဝၼ်းထိ 31/07/12) ဝၢႆးဝၼ်းပွတ်းၶမ်ႈ မွၵ်ႈ 3-4 မူင်း လႆႈႁၼ်လူတ်ႉၵႃး သိုၵ်းဝႃႉ(ၾူဝ်ႊဝီႊလ်) 16 လမ်း လုၵ်ႉၼႃးၵွင်းမူးဢွၵ်ႇတၢင်းၵႂႃႇ၊ လႅပ်ႈမုင်ႈၼႃႈၵႂႃႇၸူးတၢင်းလွႆသၼ်ၸုထႅင်ႈ- ဝႃႈၼႆ။

ၵူၼ်းပုင်ႇပႃႇၶႅမ်ၵေႃႉၼိုင်ႈလၢတ်ႈဝႃႈ- ဢၼ်လၢၵ်ႇလၢႆးလိူဝ်ၵူႈပွၵ်ႈတႄႉ မိူဝ်ႈသိုၼ်းၵၢင်ၶမ်ႈတေႃႇထိုင် မိူဝ်ႈဝႃး ၵၢင်ဝၼ်း (31/07/12)ၼႆႉ လႆႈႁၼ်သိုၵ်းဝႃႉသႂ်ႇၶူဝ်းသိုၵ်းတဵမ်ထူၼ်ႈ ပႃးတင်းၵွင်ႈၵၢင်ႇသေ မႃးသိုဝ်ႉၶဝ်ႈၼမ်ႉတၢင်းၵိၼ် ဢီယူတ်းဢီ ယႃတီႈပုင်ႇပႃႇၶႅမ်။ ၵူႈပွၵ်ႈၼႆႉၶဝ်မႃးၵေႃႈဢမ်ႇသႂ်ႇၶူဝ်းၶဵဝ် ၵူႈၵေႃႉ၊ ၵမ်ႈၽွင်ႈသႂ်ႇၶူဝ်း ၵူၼ်းႁိူၼ်းမႃး- ၼႆယဝ်ႉ။

ၼွၵ်ႈသေၼၼ်ႉ မိူဝ်ႈလဵဝ် သဵၼ်ႈတၢင်းတႃႈၶီႈလဵၵ်းတေႃႇပေႃးမႃးထိုင်မိူင်းတူၼ်-ပုင်ႇပႃႇၶႅမ်ၸိူဝ်းၼႆႉ ပိုၼ်ႉတီႈ ဢၼ်သိုၵ်း ဝႃႉယူႇသဝ်းပၵ်းပႂ်ႉၼၼ်ႉ သိုၵ်းဝႃႉၼုင်ႈၶူဝ်းသိုၵ်းပႃးၵွင်ႈပၵ်းပႂ်ႉဝႆႉၸွမ်းတၢင်း ၼမ်ဝႆႉ၊ ထဵတ်ႈထၢမ် ၵူၼ်းၵႂႃႇမႃးႁႅင်းၼႅၼ်ႇ၊ ထဵတ်ႈထၢမ်ၼမ်လိူဝ်ၵူႈပွၵ်ႈတႄႉတႄႉဝႃႈဝႃႈ- ၼႆယဝ်ႉ။