သိုၵ်းဝႃႉဢဝ်ႁႅင်းသိုၵ်းလူတ်ႉၵႃးသၢဝ်းလမ်းပၢႆ ႁၢင်ႈသိုၵ်း မုင်ႈၼႃႈၵႂႃႇတၢင်းတပ်ႉသိုၵ်းတႆး SSA လွႆသၼ် ၸု၊ ယွၼ်ႉဢမ်ႇႁၼ်လီၼိူဝ်ၵၢၼ်တူင်ႉၼိုင်သိုၵ်းတႆး၊ သွင်ၾၢႆႇၶတ်းၸႂ်ၵပ်းသိုပ်ႇဢုပ်ႇၵၼ်လႄႈ လူတ်းယွၼ်ႇ ၵၢၼ်သိုၵ်းမႃး။

ၸဝ်ႈၼႃႈတီႈၾၢႆႇႁူမ်ႇလူမ်ႈထႆးၸဝ်ႈၼိုင်ႈလၢတ်ႈဝႃႈ- ၼႂ်ဝႃး (30/07/12) လူတ်ႉၵႃး သိုၵ်းဝႃႉမွၵ်ႈ 10 လမ်း၊ ဢွၵ်ႇတၢင်းမုင်ႈၼႃႈၵႂႃႇၸူး တပ်ႉတႆး SSA လွႆသၼ်ၸု (တေႃႇၼႃႈမိူင်းထႆး ပွတ်းၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ) ။ ၵၢင်ၶမ်ႈႁၼ်မႃးထႅင်ႈမွၵ်ႈ 10 လမ်း၊ ပဵၼ်ၵႃးၾူဝ်ႊဝီႊလ်လွၼ်ႉ လွၼ်ႉ။ ၵပ်းၵၢႆႇ လွင်ႈၼႆႉ သိုၵ်းဝႃႉဢမ်ႇႁၢၼ်ႉၸႂ် ဢၼ်မီးၶၢဝ်ႇဝႃႈ သိုၵ်းတႆး RCSS/SSA တပ်ႉၸုမ်း 727 ဢၼ်ၸဝ်ႈ တိုၼ်း ၶိူဝ်း ဢွၼ်ႁူဝ် ဢၢင်ႈၵႂႃႇတင်ႈတပ်ႉတင်း ပုင်ႇၽႃပုင်ႇတွင်း ႁိမ်းမိူင်းၶိတ်ႈ၊ ဢၼ်ၸမ်ၵၼ်တင်း ႁူဝ်ယွတ်ႈ-ႁူဝ်ပၢင်ႇ သေၸင်ႇႁၢင်ႈသိုၵ်းမႃး- ဝႃႈၼႆ။

တွင်ႈထၢမ်ၸဝ်ႈတိုၼ်းၶိူဝ်း တွပ်ႇဝႃႈ - ၾၢႆႇသိုၵ်းတႆးဢၢင်ႈၵႂႃႇႁဵတ်းတပ်ႉတၢင်းပုင်ႇၽႃပုင်ႇတွင်းတႄႉ၊ ပိူဝ်ႈတႃႇႁူမ်ႇလူမ်ႈ ၵူၼ်းပၢႆႈၽေးၵႂႃႇႁဵတ်းၵၢၼ်ၽုၵ်ႇသွမ်ႈ၊ ယွၼ်ႉဝႃႈတင်ႈတႄႇၵိုတ်းယိုဝ်းမႃး လွင်ႈၸွႆႈ ထႅမ် ၸဝ်ႈတႃႇၼၵေႃႈလူတ်း ယွမ်းၵႂႃႇ။ ၵူၺ်းၵႃႈ ဝႃႉသမ်ႉႁၼ်ဝႃႈပဵၼ်ၼႂ်းၼႃႈလိၼ်တပ်ႉၸုမ်း 248 ႁူဝ်ပၢင်ႇႁူဝ်ယွတ်ႈၵုမ်းဝႆႉ။ တင်ႈတႄႇၶမ်ႈသိုၼ်း မႃးထိုင်မိူဝ်ႈဝႃး သိုၵ်းဝႃႉၶဝ်ဢဝ်ႁႅင်းသိုၵ်းမႃးမွၵ်ႈ လူတ်ႉၵႃး 20 လမ်း၊ ၵူၺ်းၵႃႈ ၼႂ်ၼႆႉပွၵ်ႈမိူဝ်းၵႂႃႇ 10 လမ်းပၢႆ၊ ၵိုတ်းမွၵ်ႈ 5-6 လမ်း။ ၾၢႆႇၼိုင်ႈ ပိူဝ်ႈတႃႇ ယႃႇႁႂ်ႈမီးၵၢၼ်တိုၵ်း ယိုဝ်းၵၼ်ၼၼ်ႉ ၵေႃႈလႆႈသူင်ႇၵူၼ်းၵႂႃႇသေ တိုၵ်ႉဢုပ်ႇဢူဝ်းၵၼ်ယူႇ- ဝႃႈၼႆ။

ပွတ်းပုင်ႇၽႃပုင်ႇတွင်းၼႆႉ ပဵၼ်ပိုၼ်ႉတီႈၼႃႈလိၼ် ဢၼ်တပ်ႉသိုၵ်းၸိုင်ႈတႆး RCSS/SSA ယၢမ်ႈတူင်ႉ ၼိုင် ၵၢၼ်သိုၵ်း လတ်းၽၢၼ်ႇၵႂႃႇမႃး၊ ၵူၺ်းၵႃႈဢမ်ႇလႆႈပၵ်းတပ်ႉ၊ မိူဝ်ႈလဵဝ်ၵေႃႈ တိုၵ်ႉၽၢၼ်ႇၵႂႃႇၽၢၼ်ႇ မႃးယူႇ။

လွင်ႈတၢင်းလႆႈၶဵင်ႈၵၢၼ်သိုၵ်းတေႃႇၵၼ်ပွၵ်ႈၼႆႉ ၵမ်ႈၽွင်ႈဝႃႈၾၢႆႇၼိုင်ႈၵေႃႈ ပူၼ်ႉမႃးမိူဝ်ႈဝၼ်းထိ 09/07/12 ယွၼ်ႉၾၢႆႇ SSA တိၺွပ်းၵူၼ်း ၶွမ်ႊပၼီႊႁူင်ပင်းပွတ်းသီႇပေႃႉ၊ ဝၢႆးမႃးတင်းသွင်ၾၢႆႇလႆႈဢုပ်ႇ ၵၼ်သေ ပွႆႇပၼ်ၶိုၼ်းမိူဝ်ႈဝၼ်းထိ 14 - ဝႃႈၼႆ။

လွင်ႈႁၢင်ႈႁႅၼ်းၶဵင်ႈၶႅင်ၵၢၼ်သိုၵ်းၸိူင်ႉၼႆၼႆႉ ပူၼ်ႉမႃးမိူဝ်ႈဝၼ်းထိ 16/06/12 ယၢမ်ႈပဵၼ်မႃးတီႈ လွႆၵေႃႇဝၼ်း။ သိုၵ်းဝႃႉ ဢဝ်လူတ်ႉၵႃး 50 လမ်း၊ ဢဵၼ်ႁႅင်းၵူၼ်းမွၵ်ႈ 500 (တပ်ႉၸုမ်း 518 ႁူၺ်ႈဢေႃႈ၊ တပ်ႉၸုမ်း 775 ပႃႈတႂ်ႈယၢင်ၵေႃႇၸူင်း ဝၢၼ်ႈႁုင်ႈ-မိူင်းယွၼ်း) မႃးဢိူမ်ႈၸမ်လွႆၵေႃႇဝၼ်း၊ ငဝ်ႈငုၼ်း RCSS/SSA ၼႃႈလိၼ်သိုၵ်းၵဵင်းတုင် ပႃႈတႂ်ႈၸဝ်ႈသိုၵ်းလူင် ၵွၼ်းၸိုၼ်ႈ ယိပ်းၵုမ်း။ မိူဝ်ႈၼၼ်ႉ ၼင်ႇႁိုဝ်တေမီးလွင်ႈလူတ်းယွၼ်ႇၵၢၼ်သိုၵ်းတေႃႇၵၼ်ၼၼ်ႉ ၵူၼ်းလူင်သွင်ပႃႈသွင် ၾၢႆႇလႆႈၶတ်းၸႂ် တႄႉတႄႉ။

ၵၢၼ်သိုၵ်းပွၵ်ႈၼႆႉ ယင်းမီးၶၢဝ်ႇလိုဝ်းဝႃႈ တပ်ႉသိုၵ်းဝႃႉ တေသူင်ႇ တပ်ႉၸုမ်း 468 လုၵ်ႉတၢင်းပၢင်သၢင်း လူင်းမႃးၸွႆႈယိုဝ်း လွႆတႆးလႅင်း လူးၵွၼ်ႇ - ဝႃႈၼႆ။

ၽူႈလဵပ်ႈႁဵၼ်းၸဝ်ႈၼိုင်ႈထတ်းသၢင်ဝႃႈ- သင်ဝႃႈတႆးတင်းဝႃႉယိုဝ်းၵၼ်ၸိုင် တိုၼ်းတူၵ်းလွၵ်းမၢၼ်ႈ ၽႅၼ်ၵၢၼ်ဝႆႉ၊ ပေႃးဝႃႉ ယိုဝ်းလွႆတႆးလႅင်းၵေႃႈ မၢၼ်ႈဢမ်ႇတၢပ်ႈႁဵတ်းသင်၊ ႁဵတ်းၵူၼ်းၵွတ်ႇၵႆႇပႂ်ႉတူၺ်း ပွႆးၵူၺ်း။ တၢင်းယိူင်းဢၢၼ်းၸၢဝ်းၶိူဝ်း ႁဝ်းၵေႃႈၽိတ်းၽိတ်းယိူင်းမၢႆမၼ်း၊ ၵမ်းလိုၼ်းသုတ်း ၵႆႇသွင် တူဝ်ႁိူဝ်ႉယဝ်ႉၵေႃႈပိူၼ်ႈ ႁႅမ်ပႅတ်ႈတင်းသွင်တူဝ် ၶဝ်ႈၼႂ်းမေႃႈၽၵ်း ၼၼ်ႉ ၵူၺ်း- ဝႃႈၼႆ။