ဝၼ်းၸဝ်ႈၼၢင်းႁေႃၶမ်း ဢႃႇယုထူၼ်ႈ 80 ဝႃႇသႃ တဵမ်ၼႆႉ ပီႈၼွင်ႉတႆးၸိူဝ်းမႃးပိုင်ႈဢိင်ယူႇသဝ်းၼႂ်း မိူင်းထႆး ဢိၵ်ႇၸွမ်းလႅၼ်လိၼ် ႁဵတ်းပၢင်ၶုၵ်းထူပ်းယွင်ႈ ၵုၼ်းမုၼ်လၢႆလၢႆတီႈ၊ ယွၼ်းပွၼ်းႁႂ်ႈၸဝ်ႈၼၢင်းဢႃႇ ယုယိုၼ်းယၢဝ်း ပဵၼ်ႁူမ်ႈႁုင်းႁူမ်ႈႁႆးၵႂႃႇထႅင်ႈၶၢဝ်းႁိုင်။

ဝၼ်းထိ 12/08)12 (မိူဝ်ႈဝႃး) ဢၼ်ပဵၼ်ဝၼ်းၸဝ်ႈၼၢင်းႁေႃၶမ်းထႆး ဢႃႇယုထူၼ်ႈ 80 ပီတဵမ်၊ ႁွင်ႉ “ဝၼ်းမႄႈ”ၼၼ်ႉ မိူင်းထႆးမီးပၢင်ၶုၵ်းထူပ်းယွင်ႈယေႃးၵုၼ်းမုၼ်ၼၢင်းႁေႃၶမ်း တင်း ၵုၼ်းမုၼ်မႄႈၸွတ်ႇတူဝ်ႈ ပတ်းပိုၼ်ႉတင်းမိူင်း။ ပီႈၼွင်ႉတႆး ၸိူဝ်းတူၵ်းႁွတ်ႈထိုင်မိူင်းထႆး ဢမ်ႇဝႃႈၼႂ်းဝဵင်းလူင်မိူင်းၵွၵ်ႇ ၼႂ်းၵဵင်းမႆႇတင်းၼမ် ၶဝ်ႈႁူမ်ႈၸွမ်းဢၼ်တၢင်း လူင်ပွင်ၸိုင်ႈထႆးၸတ်းႁဵတ်း။ ၼွၵ်ႈသေၼၼ်ႉ တပ်ႉသိုၵ်းတႆး ဢိၵ်ႇပီႈၼွင်ႉတႆး ၵူၼ်းပၢႆႈၽေး ၸိူဝ်းပိုင်ႈဢိင်ယူႇသဝ်း ၸွမ်းလႅၼ်လိၼ်ၵေႃႈ ၸတ်းပၢင်ၶုၵ်းထူပ်းယေႃးမုၼ်။

တီႈဝဵင်းလူင်မိူင်းၵွၵ်ႇ ယူႇတီႈၸုမ်းမူလၼိထိ ၽြႃႉထမ်းသႅင်လႄႈၸုမ်းလုၵ်ႈႁဵၼ်း ဝတ်ႉမႂ်ႇသႃထုပရႃႇတိတ်ႇ ဢွၼ်ႁူဝ် ၼမ်းၼႃႈပီႈၼွင်ႉတႆးလၢႆမူႇၸုမ်းမွၵ်ႈႁိမ်း 100 ၵႂႃႇၶဝ်ႈႁူမ်ႈယွၼ်းပွၼ်းပၼ် ၸဝ်ႈၼၢင်းႁေႃၶမ်း တီႈၼႃႈႁူင်းယႃသီရိရၢတ်ႉ၊ ဝၢႆးၼၼ်ႉ ၵႂႃႇၶဝ်ႈထႅဝ်ႁူမ်ႈပႆတၢင်းႁူမ်ႈၸုမ်းၶႃႈႁၢပ်ႇၵၢၼ်ၶုၼ်ထႆး လုၵ်ႉတီႈ ဝတ်ႉၽြႃႉၵႅဝ်ႈၵႂႃႇၸူးတီႈဢွင်ႈတီႈၸတ်းပၢင်ပွႆး တီႈသၼၢမ်လူင်။ မီးလွင်ႈၵႃႈၼူၵ်ႉၵႃႈတူဝ်းၼႄၼႂ်းပၢင်ပွႆးသေ ႁူမ်ႈတႆႈတဵၼ်းယွၼ်းပွၼ်း ႁူမ်ႈၵၼ်တင်းပီႈၼွင်ႉထႆး ၼပ်ႉႁူဝ် မိုၼ်ႇၵေႃႉ- ဝႃႈၼႆ။

တီႈဝဵင်းၵဵင်းမႆႇ တင်ႈတႄႇၵၢင်ၶမ်ႈယၢမ်း 6-8 မူင်း ပီႈၼွင်ႉတႆးၼႂ်းၵဵင်းမႆႇ ၵေႃလိၵ်ႈလၢႆးၾိင်ႈငႄႈတႆး ဢွၼ်ႁူဝ်ၼမ်းၼႃႈ ပီႈၼွင်ႉတႆးလၢႆမူႇၸုမ်းတင်းၼမ်တင်းလၢႆသေ ႁူမ်ႈၵၼ်ၵႂႃႇၶဝ်ႈႁူမ်ႈ ပၢင်ၶုၵ်းထူပ်းၸဝ်ႈၼၢင်း ႁေႃၶမ်းထႆး ဢၼ်တၢင်း လူင်ပွင်ၸိုင်ႈထႆးၸတ်းတီႈၽၵ်းတူတႃႈၽႄး ၼႂ်းၵဵင်းမႆႇ။ ၵႂႃႇၶဝ်ႈႁူမ်ႈဝၢင်းတူင်ႇမွၵ်ႇ ၼွပ်ႈသၢၵ်ႈလႄႈႁူမ်ႈယွၼ်းပွၼ်း- ၼႆယဝ်ႉ။

ၾၢႆႇၼိုင်ႈတၢင်းၼိုင်ႈ ၼႃႈလိၼ်သိုၵ်းမၢႆ 1 SSA (ၼႃႈလိၼ်သိုၵ်းၵဵင်းတုင်) လွႆၵေႃႇဝၼ်းၵေႃႈ ၸဝ်ႈသိုၵ်းၵွၼ်းၸိုၼ်ႈဢွၼ် ႁူဝ်ၼမ်းၼႃႈ ၵူႈႁွင်ႈၵၢၼ်ၸတ်းႁဵတ်း။ မီးတၢင်းၵႃႈလုၵ်ႈႁဵၼ်း၊ မီးၵၢၼ်ဝၢင်းဢုမ်မွၵ်ႇ/ သၢၵ်ႈဢုပ်းမွၵ်ႇ၊ ၵူၼ်းသိုၵ်းလႄႈ ပီႈၼွင်ႉၵူၼ်းမိူင်းၼႂ်းၸွမ်းလႅၼ်လိၼ်ၾင်ႇမိူင်းတႆးလႄႈ ပီႈၼွင်ႉၵူၼ်းမိူင်းၼႂ်းမိူင်းထႆး ၵႂႃႇၶဝ်ႈႁူမ်ႈပၢင်ၶုၵ်းထူပ်းယွၼ်း ပွၼ်း မွၵ်ႈ 1,000 ပၢႆ။ မိူဝ်ႈယၢမ်းၸဝ်ႉၵေႃႈ မီးၵၢၼ်ယိုၼ်ႈတၢၼ်း တမ်ႈတီႈရတၼႃသၢမ်ၸဝ်ႈလႄႈယၢတ်ႇၼမ်ႉၶႂမ်ႈတဝ်ႈ ႁဵတ်းတၢင်းလီ ယိူင်းၸူးထိုင်ၸဝ်ႈၼၢင်းႁေႃၶမ်း-ၼႆယဝ်ႉ။


ဝၼ်း “ဝၼ်းမႄႈ” ႁိုဝ် ဝၼ်းၵိူတ်ႇၸဝ်ႈၼၢင်းႁေႃၶမ်းထႆးၼႆႉ ၵူၼ်းမိူင်းထႆး ဢွၼ်ၵၼ်ၸတ်းပၢင်ၶုၵ်းထူပ်းၵုၼ်းမုၼ် တူဝ်ႈမိူင်းထႆး၊ ပိူင်လူင်မၼ်း တီႈဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸတ်းယႂ်ႇသေပိူၼ်ႈ၊ မီးၵၢၼ်ထၢႆႇႁၢင်ႈဢွၵ်ႇ တၢင်းႁူင်း ပွႆႇႁၢင်ႈသဵင် (ထီႊဝီႊ)ၵမ်းသိုဝ်ႈသေ ပွႆႇႁႂ်ႈႁၼ်တူဝ်ႈမိူင်းထႆးလႄႈတူဝ်ႈလုမ်ႈၾႃႉ။