ၸုမ်းပဢူဝ်း PNLO ဢုပ်ႇဢူဝ်းလွင်ႈငမ်းယဵၼ် တင်းၸုမ်း လူင်ပွင်ၸိုင်ႈတဵင်းၸဵင်ႇ ၸုမ်းၵေႃႇသၢင်ႈ လွင်ႈငမ်းယဵၼ် တီႈတူၼ်ႈတီး၊ သွင်ၾၢႆႇလႆႈၸႂ်လူင်းလၢႆးမိုဝ်းၵၼ် 5 ၶေႃႈ။

ပူၼ်ႉမႃးမိူဝ်ႈဝၼ်းထိ 25/08/12 ၸုမ်းပူတ်းပွႆႇၸၢဝ်းၶိူဝ်းပဢူဝ်း (PNLO) ဢၼ်ၶုၼ်ဢူၵ်ႉၵႃႇပဵၼ်ႁူဝ် ပဝ်ႈဢုပ်ႇဢူဝ်းလွင်ႈ ငမ်းယဵၼ် ၵၼ်တင်းၸုမ်းလူင်ပွင်ၸိုင်ႈတဵင်းၸဵင်ႇ တီႈဝဵင်းတူၼ်ႈတီး။ တူဝ်တႅၼ်း ၾၢႆႇ လူင်ပွင်ၸိုင်ႈၸိူဝ်းၶဝ်ႈႁူမ်ႈပၢင် ဢုပ်ႇဢူဝ်း ပႃးၸုမ်းၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈ တုမ် UPWC ဢူးဢွင်ႇမိၼ်း (ၽွင်းလူင်ၾၢႆႇတေႃႉသူင်ႇ လူတ်ႉၾႆးလႄႈၵႅမ်ႁူဝ်ပဝ်ႈၸုမ်းၵေႃႇသၢင်ႈ လွင်ႈငမ်းယဵၼ်)၊ ၸဝ်ႈသိုၵ်းလူင်ဢွင်ႇတူႇ (ၽွင်းလူင်ႁွင်ႈၵၢၼ်လူင်ၾၢႆႇႁူမ်ႇ လူမ်ႈလႄႈလႅၼ်လိၼ် လူင်ပွင်ၸိုင်ႈၸႄႈမိူင်းတႆး)၊ ၼွၵ်ႈသေၼၼ်ႉ ပႃးတင်းၸဝ်ႈဢွင်ႇမျၢတ်ႈ ၸွမ်ၽွင်းလူင်မိူင်းတႆး ၸိူဝ်းၼႆႉ။ မီးၶေႃႈလႂ်ၸႂ်လူင်းလၢႆးမိုဝ်းၵၼ် 5 ၶေႃႈ-ၼႆယဝ်ႉ။

ၵေႃႉလူင်းလၢႆးမိုဝ်းလွင်ႈငမ်းယဵၼ် ၾၢႆႇလူင်ပွင်ၸိုင်ႈမၢၼ်ႈ ပဵၼ်ၸဝ်ႈသိုၵ်းလူင်ဢွင်ႇတူႇ။ ၵေႃႉလူင်း လၢႆးမိုဝ်း ၾၢႆႇၸုမ်း ပဢူဝ်း ပဵၼ်ၸဝ်ႈသိုၵ်းလူင်ၶုၼ်သုရိၼ်ႇ (တူႇရဵင်ႇ)-ၼႆယဝ်ႉ။

ၶေႃႈလႆႈၸႂ် ဢၼ်သွင်ၾၢႆႇလႆႈၸႂ်တူၵ်းလူင်းၵၼ်ၵႂႃႇၼၼ်ႉ မီး 5 ၶေႃႈ- 1.ၵိုတ်းသိုၵ်းၵၼ်၊ 2.ပိုတ်ႇလုမ်း ၵပ်းသၢၼ်တီႈဢၼ် သၢင်ႇထုၵ်ႇ (တူၼ်ႈတီး၊ မွၵ်ႇမႆႇ၊ သီႇသႅင်ႇ၊ သထုင်ႇ)၊ 3.ပေႃးဢမ်ႇပႃးၶိူင်ႈၵွင်ႈၵၢင်ႇ ၸိုင် ႁႂ်ႈၸုမ်း PNLO ၵႂႃႇမႃးၶဝ်ႈဢွၵ်ႇလႆႈ ထၢင်ႇႁၢင်ႈလွတ်ႈလႅဝ်း၊ 4.ႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ်၊ 5.တေတတ်းမၵ်းဝၼ်း/တီႈ တႃႇဢုပ်ႇဢူဝ်းၵၢၼ်မိူင်း- ၸိူဝ်းၼႆႉ။

ဢွၼ်ၼႃႈၼႆႉ လႅင်ႇၶၢဝ်ႇထႅင်ႈၾၢႆႇၼိုင်ႈလၢတ်ႈဝႃႈ- ၸုမ်းပဢူဝ်းၵႂႃႇဢုပ်ႇလွင်ႈငမ်းယဵၼ်ပွၵ်ႈၵမ်းၼႆႉ လႆႈငိၼ်းဝႃႈတေ တၢင်ႇလၢတ်ႈတုၵ်းယွၼ်းပႃးႁႂ်ႈလႆႈၶဝ်ႈၵႂႃႇပၵ်းတပ်ႉတီႈၵွင်ၼဵင်ႈ (ၼႂ်းၾင်ႇမိူင်းတႆး) ဢၼ်တေႃႇၼႃႈမိူင်းထႆး ဝၢၼ်ႈရၵ်ႉထႆး ၸႄႈဝဵင်းမႄႈႁွင်ႈသွၼ်။ ႁႂ်ႈလႆႈပိုတ်ႇလုမ်းၵပ်းသၢၼ်တီႈသထုင်ႇ လႄႈ တီႈတူၼ်ႈတီး၊ သမ်ႉႁႂ်ႈလႆႈတူင်ႉၼိုင်ပႃးၼႂ်းၾင်ႇ မိူင်းတႆး ၸွမ်းလႅၼ်လိၼ်မိူင်းယၢင်းလႅင်- ဝႃႈၼႆ။

ၶၢဝ်းတၢင်းၸုမ်းပဢူဝ်း PNLO ၵႂႃႇႁူပ်ႉဢုပ်ႇမၢၼ်ႈလွင်ႈငမ်းယဵၼ်ပွၵ်ႈထိ 2 ၼႆႉ ပူၼ်ႉမႃးမိူဝ်ႈဝၼ်းထိ 23/08/12 ၶုၼ်မိၼ်ႉ ထုၼ်းဢွၼ်ႁူဝ် ပႃးၸဵမ်ၶုၼ်သုရိၼ်း (တူႇရဵင်ႇ) ႁူမ်ႈၸုမ်းၸိူဝ်းၵူၼ်း 8 ၵေႃႉ ဢွၵ်ႇၶၢဝ်းတၢင်းလုၵ်ႉတၢင်းလႅၼ်လိၼ်မိူင်းထႆး ႁွတ်ႈၽႅဝ်လိုဝ်ႈႁႅမ်း တီႈမႄႈသၢႆ။ ဝၼ်းထိ 24/08/12 ဢွၵ်ႇၶၢဝ်းတၢင်းလုၵ်ႉတႃႈၶီႈလဵၵ်းၵႂႃႇတူၼ်ႈတီး၊ ဝၼ်းထိ 25/08/12 ႁူပ်ႉဢုပ်ႇၵၼ်။