ၸုမ်းတႆးထုၵ်ႇမၢႆမီႈမိူင်းထႆး "သမႃးၶူမ်းၵၢၼ်သိုၵ်းသႃလႄႈဝတ်ႉထၼထမ်းတႆး" ဢၼ်ယိုၼ်ႈတၢင်ႇ ယွၼ်းမၢႆၾၢင်သေ လႆႈႁပ်ႉမၢႆၾၢင် ထုၵ်ႇၵူတ်း မၢႆတၢင်းၵၢၼ်ထႆး မိူဝ်ႈဝၼ်းထိ 30 လိူၼ်မၢတ်ႉၶျ် ပီ 2012 ပူၼ်ႉမႃးၼၼ်ႉ လိုၼ်းသုတ်း ၸုမ်းပွင်ၵၢၼ်လႆႈႁဵတ်းပၢင်ၵုမ် တႅပ်းတတ်းတေပိုတ်ႇလုမ်း။

ၸွမ်းၼင်ႇလႆႈတၢင်ႇယိုၼ်ႈယွၼ်းမၢႆၾၢင်သေ ၾၢႆႇၵဵဝ်ႇၶွင်ႈၶွင်လူင်ပွင်ၸိုင်ႈထႆးလႆႈဢၼုၺၢတ်ႈ မွပ်ႈမၢႆၾၢင် ထုၵ်ႇပၵ်း ပိူင်ၵူတ်းမၢႆၸိုင်ႈမိူင်းၶွင်လူင်ပွင်ၸိုင်ႈထႆးလူင်းမႃးမိူဝ်ႈဝၼ်းထိ 30/03/2012 ၼၼ်ႉယဝ်ႉ ထိုင်မႃး ဝၼ်းထိ 22/07/2012 ဝူင်ႈပူၼ်ႉၼၼ်ႉ ၸုမ်းၸတ်းၶိုင်ယိုၼ်ႈယွၼ်းလဝ်ႈတၢင်ႇ သမႃးၶူမ်းၵၢၼ်သိုၵ်းသႃ လႄႈဝတ်ႉထၼထမ်းထႆးယႂ်ႇ ႁိုဝ် သမႃးၶူမ်းၵၢၼ်လိၵ်ႈလၢႆးလႄႈၾိင်ႈငႄႈတႆး (ဢၼ်လုၵ်ႉတီႈ) ၵေႃလိၵ်ႈ လၢႆးလႄႈၾိင်ႈငႄႈတႆးမႃးၼၼ်ႉ လႆႈၸတ်းႁဵတ်း ပၢင်ၵုမ်ဢုပ်ႇဢူဝ်းလႆႈ ၸႂ်ၵၼ်သေတႅပ်းတတ်းတေပိုတ်ႇ လုမ်းပဵၼ်တၢင်းၵၢၼ် ၼႂ်းဝၼ်းထိ 19/08/2012 ။

ၼႂ်းပၢင်ၵုမ်တႅပ်းတတ်းၸတ်းၶိုင်ဢဝ်ဝၼ်းထိ 19/08/2012 ပဵၼ်ဝၼ်းပိုတ်ႇပၢႆႉလႄႈဢွင်ႈလုမ်းႁဵတ်း ၵၢၼ်တီႈလုမ်းၵေႃ လိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇ ၸႄႈတွၼ်ႈၵဵင်းမႆႇ။ တွၼ်ႈၵၢင်ၼႂ် 9.59 မူင်း ပိုတ်ႇပၢႆႉ/လုမ်း ပဵၼ်မင်းၵလ(မူင်းၶူလ်ႊ)၊ 11.00 မူင်း လဵင်ႉၽဵၼ်ႊ (ၵၢပ်ႈသွမ်း) သင်ၶၸဝ်ႈ 9 တူၼ်။ ႁူဝ်ၶမ်ႈ 19.30 မူင်း မီးပၢင်ဢုၼ်ႇငၢၼ်း ၸတ်း(ၶၼ်တူၵ်ႇ) ပၢင်ၵိၼ်ၶဝ်ႈႁူမ်ႈၽိူၼ်မူႇ ဢိၵ်ႇတင်းမွၵ်ႇၸိူၼ်းၽူႈယႂ်ႇၵူၼ်းလူင်ထႆး/ တႆး လႄႈၸဝ်ႈၼႃႈတီႈထႆး ၶဝ်ႈႁူမ်ႈ ပၼ်ႁႅင်းသေတေၸတ်းၼႄတၢင်းၵႃႈဝႅၼ်ၾိင်ႈငႄႈတႆးႁူမ်ႈတင်းႁပ်ႉဝတ်ႉထုငိုၼ်း တွင်းလွင်ႈၸွႆႈထႅမ်။

ၽိူၼ်မူႇၶဝ်ႈၼၼ်ႉ တေၶၢႆပဵၼ်ငိုၼ်းၵွင်ၵၢင် တူၼ်ႈတိုၼ်းၶွင်သမႃးၶူမ်းၵၢၼ်သိုၵ်းသႃလႄႈဝတ်ႉထၼ ထမ်း ထႆးယႂ်ႇ (တႆး) ၵႂႃႇမိူဝ်းၼႃႈၼႆလႄႈတေမွၵ်ႇၸိူၼ်းၽူႈယႂ်ႇၵူၼ်းလူင် ပီႈၼွင်ႉတႆးၵူႈတီႈတီႈၶဝ်ႈ ႁူမ်ႈပၼ်ႁႅင်းၵမ်ႉၸွႆႈ ပိူဝ်ႈတႃႇဢဝ်ပဵၼ်ႁႅင်း ႁဵတ်းသၢင်ႈၵၢၼ်ငၢၼ်းၽွၼ်းပၢင်ႈပၼ်တႃႇပီႈၼွင်ႉၵူၼ်းၶိူဝ်း တႆး-ၼႆယဝ်ႉ။