ပပ်ႉႁဵၼ်းလိၵ်ႈတႆး ပိူဝ်ႈတႃႇပူင်သွၼ်ႁဵၼ်းၼႂ်းၶၢဝ်းယၢမ်း ႁဵၼ်း ၼႂ်းႁူင်းႁဵၼ်းလူင်ပွင်ၸိုင်ႈၼၼ်ႉ ပေႃးၵေႃလိၵ်ႈ လၢႆးပတ်းပိုၼ်ႉ ႁူမ်ႈၵၼ်တႅပ်းတတ်းပဵၼ်တၢင်းၵၢၼ်ယဝ်ႉ တေဢဝ်တၢင်ႇထိုင် ၸွမ်ၸိုင်ႈတဵင်းၸဵင်ႇ။

ဝၼ်းထိ 23/07/12 (မိူဝ်ႈဝႃး) ပၢင်ၵုမ်လူင်ငဝ်ႈငုၼ်း ၵေႃလိၵ်ႈလၢႆးပတ်းပိုၼ်ႉ ႁူမ်ႈၵၼ်လႆႈၸႂ်ဝႃႈ- ပပ်ႉႁဵၼ်းလိၵ်ႈလၢႆးတႆး ပိူဝ်ႈတႃႇပူင်သွၼ်ႁဵၼ်းၼၼ်ႉ တေဢဝ်ပိူင်လႂ် (ၸွမ်းပိူင်ႁူဝ်သိူဝ် ႁိုဝ် မႁႃႈတူဝ် ၼၼ်ႉ) တေမီးၵၢၼ်တႅပ်းတတ်းပဵၼ်တၢင်း ၵၢၼ်သေ တေတႅမ်ႈလိၵ်ႈတၢင်ႇထိုင်ၸွမ်ၸိုင်ႈတဵင်းၸဵင်ႇ။ ဢၼ်ႁပ်ႉဢဝ် ပုၼ်ႈၽွၼ်းတေတၢင်ႇယိုၼ်ႈ ပဵၼ်ငဝ်ႈငုၼ်း ၻီႊမွၵ်းၶရေႊသီႊၸိူဝ်ႉၶိူဝ်းတႆး SNLD ၊ တုၵ်းယွၼ်းပႃး 2 လွင်ႈ- 1.ႁႂ်ႈလႆႈပူင်သွၼ်ႁဵၼ်းၼႂ်းႁူင်းႁဵၼ်း၊ 2.ႁႂ်ႈလႆႈဢဝ် ၸွမ်းဝႅပ်ႇပိူင်ပပ်ႉႁဵၼ်းလိၵ်ႈ တႆး ဢၼ်ၵူၼ်းတင်းၼမ် လႆႈၸႂ်ႁၼ်လီ- ၼႆယဝ်ႉ။

ဢွၼ်ၼႃႈၼႆႉ မိူဝ်ႈဝၼ်းထိ 22/07/12 ပၢင်ၵုမ်လႆႈလိူၵ်ႈၽူႈလူင်ႉလႅၼ်ႇလိၵ်ႈလၢႆးတႆး ႁိုဝ် ၸဝ်ႈပၢႆးမေႃ တႆး 19 ၸဝ်ႈ/ၵေႃႉ ပိူဝ်ႈတႃႇတမ်းဝၢင်းပိူင်တႅမ်ႈပပ်ႉႁဵၼ်း။ ၼႂ်းၼၼ်ႉ 1.ၸဝ်ႈၶူးလူင်ထမ်မသႃမိ၊ 2.ၸဝ်ႈ ၼၼ်တႃ ဝမ်သ၊ 3.ၸဝ်ႈသုၶမ်း၊ 4.သြႃႇၸၢႆးဢွင်ႇထုၼ်း၊ 5.ၻွၵ်းတိူဝ်ႊၸၢႆးသၢင်ႇဢၢႆႈ၊ 6.ၻွၵ်းတိူဝ်ႊ ၸၢႆးၶမ်းလဵၵ်း၊ 7.မေႃသွၼ်လူင်လုင်းၸၢႆးၾႃႈ၊ 8.လုင်း ၸၢႆးၶမ်းၸိုၼ်ႈ တူၼ်ႈတီး၊ 9.ႁိုၼ်း ၵႃယၢင်း၊ 10.လုင်းၸၢႆးၸိုၼ်ႈသႂ် (တၢၼ်ႉၸိၼ်ႇ)ၵျွၵ်ႉမႄး၊ 11.ၸဝ်ႈၼွႆႉတၢၼ်းၸဵင်ႇ ၶမ်းတီႈ၊ 12.ၸၢႆးသၢမ်တိပ်ႉ ၶေမႃရၢတ်ႉ၊ 13.ၸၢႆးဢေးၵူဝ်ႇ ဝၢၼ်ႈမေႃႈ မိူင်းၶၢင်၊ 14.လုင်းၸၢႆးမွၵ်ႇၶမ်းသွႆႈ၊ 15.မေႃသွၼ် ၼၢင်းႁွမ် လဵၵ်း၊ 16.ၼၢင်းလၢဝ်သႂ်ယိင်း၊ 17.ၼၢင်းဝူဝ်းသႅင်၊ 18.ၼၢင်းၸိၼ်ႇၸိၼ်ႇဝိၼ်း (ႁူမ်ႈမၢၵ်ႇလၢင်း)၊ 19.ၻွၵ်း တိူဝ်ႊၸၢႆးသၢင်ႇၽေႇ (လၢႆးသႂ်တႆး)- ၸိူဝ်းၼႆႉ။

လႆႈႁူႉဝႃႈ ပပ်ႉႁဵၼ်းလိၵ်ႈတႆးဢၼ်တႅပ်းတတ်းပဵၼ်တၢင်းၵၢၼ်ယဝ်ႉၼၼ်ႉ တူဝ်ႁူဝ်ပဝ်ႈ SNLD ၸဝ်ႈၶုၼ်ထုၼ်းဢူး တေပဵၼ်ၵေႃႉၵႂႃႇႁူပ်ႉၸွမ်ၸိုင်ႈတဵင်းၸဵင်ႇသေ ယိုၼ်ႈပၼ်ၼႂ်းမိုဝ်းမၼ်းၸဝ်ႈ၊ တုၵ်းယွၼ်းပႃး ႁႂ်ႈလူင်ပွင်ၸိုင်ႈၶိုင်ပွင်ပၼ် လႄႈႁပ်ႉပုၼ်ႈၽွၼ်းပၼ်ပႃး လွင်ႈငိုၼ်းလိူၼ်ၶူးသွၼ်ၶဝ် ၸိူဝ်းၼႆႉ။ ၸိူင်ႉႁိုဝ်ၵေႃႈယဝ်ႉ ပပ်ႉႁဵၼ်းဢၼ်တေ ဢဝ်တၢင်ႇၼႆႉ တေလႆႈႁႂ်ႈၸဝ်ႈပၢႆးမေႃလိၵ်ႈလၢႆးတႆး 19 ၸဝ်ႈ/ၵေႃႉ ၸိူဝ်းလိူၵ်ႈဝႆႉ ႁၼ်လီတႅပ်းတတ်း ပဵၼ်တၢင်းၵၢၼ်ၵွၼ်ႇ- ၼႆယဝ်ႉ။

ၼွၵ်ႈသေၼၼ်ႉ ပၢင်ၵုမ်ဝၼ်းထိ 23/07/12 (မိူဝ်ႈဝႃး) မီးၵၢၼ်ပၢၵ်ႈပႅတ်ႈ ပပ်ႉႁဵၼ်းလိၵ်ႈတႆး ဢၼ်ၵေႃ လိၵ်ႈလၢႆးတူၼ်ႈတီး ႁပ်ႉပိၼ်ႇတီႈပပ်ႉႁဵၼ်းလိၵ်ႈမၢၼ်ႈမႃးၵမ်းသိုဝ်ႈ။ ၵဵဝ်ႇၵပ်းလွင်ႈၼႆႉ လႆႈဢုပ်ႇၵၼ်ႁိုင်၊ ၼၢၼ်းတူၵ်းလူင်းၵၼ်လႆႈတႄႉတႄႉ၊ ၵွပ်ႈဝႃႈ မၢင်ၸိူဝ်းၶႂ်ႈဢဝ်ၼႃႈၵၢၼ်ဝႃႈ၊ ၵမ်ႈၼမ်သမ်ႉဢဝ်ၼႃႈ ၸိူဝ်ႉၸၢတ်ႈဝႃႈ။ ၵူၺ်းၵႃႈ ၸဝ်ႈၶုၼ်ထုၼ်းဢူး (ၽူႈၼင်ႈ ၸိုင်ႈ) ၶိုၼ်းမႃးသပ်းလႅင်းၼႄ ဝၢႆးပွၵ်ႈပၢင်ၵုမ် 14 ပႃႇတီႇၵၢၼ်မိူင်း၊ ဢၼ်လႆႈတွင်ႈထၢမ်ဝႆႉပၼ်ႁႃတီႈၻွၵ်းတိူဝ်ႊဢူး မျႃႉဢေး ၽွင်းလူင်ၾၢႆႇပၺ်ႇၺႃႇ ၸိုင်ႈမိူင်းႁူမ်ႈတုမ်ယဝ်ႉ ပၢင်ၵုမ်ၸင်ႇလႆႈၶေႃႈတႅပ်းတတ်း- ၼႆယဝ်ႉ။

တီႈပၢင်ၵုမ်ဢုပ်ႇဢူဝ်းၵၢၼ်မိူင်း (14 ပႃႇတီႇ) ဢၼ်ဢူးဢွင်ႇမိၼ်း ဢွၼ်ႁူဝ်ၸတ်းႁဵတ်းၼၼ်ႉ ၸဝ်ႈၶုၼ်ထုၼ်းဢူး ယင်းသပ်းလႅင်းၼႄပိူင်ႁဵၼ်းလိၵ်ႈလၢႆးၸၢဝ်းၶိူဝ်း တင်းလိၵ်ႈမၢၼ်ႈဢမ်ႇမိူၼ်ၵၼ်။ မိူၼ်ၼင်ႇ လိၵ်ႈမၢၼ်ႈဝႃႈ- မမထထၵ (ပီႈၼၢင်းပီႈၼၢင်းလုၵ်ႉၵႃႈ)ၼႆ ၸိူဝ်းၼႆႉပေႃးပဵၼ်လိၵ်ႈတႆး ပႃးသရႃႇဢီႇ၊ သရႃႇဢႃး၊ သရႃႇဢူး၊ ဢႃပွတ်း၊ ၵၽႅတ်းၸိူဝ်း ၼႆႉမူတ်း၊ ပိူင်မၢၼ်ႈဢမ်ႇၶဝ်ႈပိူင်ႁဵၼ်း လိၵ်ႈတႆး- ၼႆယူႇ။

ၵဵဝ်ႇၵပ်းလွင်ႈၼႆႉ ၻွၵ်းတိူဝ်ႊမျႃႉဢေးလၢတ်ႈဝႃႈ လွင်ႈၼႆႉပဵၼ်ၵၢၼ်ၶဝ်ႈၸႂ်ၽိတ်းၵူၺ်း၊ ႁဝ်းတိုၼ်း ႁႂ်ႈပိၼ်ႇ ၽႃသႃတင်း 7 ၸၢဝ်းၶိူဝ်း၊ ပႃးၸဵမ်ၶျၢင်း ယၢင်း မွၼ်း၊ ၵူၺ်းၵႃႈလွင်ႈႁဵၼ်းလိၵ်ႈၽႂ်မၼ်းၼႆႉ ႁႂ်ႈပိၼ်ႇၸွမ်းပိူင်ၼႆႉ ႁဵၼ်းၸွမ်းပိူင်လိၵ်ႈမၢၼ်ႈ ၼႆႉၼႆ ႁဝ်းဢမ်ႇလႆႈဝႃႈ- ဝႃႈၼႆ။

ၽူႈလဵပ်ႈႁဵၼ်းၸဝ်ႈၼိုင်ႈ ယၢမ်ႈပၼ်တၢင်းႁၼ်ထိုင်ဝႃႈ- သင်ဝႃႈၸႂ်ႉ ပပ်ႉႁဵၼ်းဢၼ်လုၵ်ႉတီႈပပ်ႉ ႁဵၼ်းမၢၼ်ႈ ပိၼ်ႇမႃး ၵမ်းသိုဝ်ႈၸိုင် ႁွင်ႉဝႃႈပပ်ႉႁဵၼ်းလိၵ်ႈတႆးၼႆဢမ်ႇတူၵ်းထုၵ်ႇ၊ ပေႃးဝႃႈ ပပ်ႉႁဵၼ်း လိၵ်ႈမၢၼ်ႈတႃႇတႆးၼႆတႄႉထုၵ်ႇယူႇ၊ ၵွပ်ႈဝႃႈပဵၼ်ပိူင်သွၼ်လိၵ်ႈမၢၼ်ႈတႃႇတႆး၊ မိူၼ်တင်းႁႂ်ႈတႆးႁဵၼ်း လိၵ်ႈမၢၼ်ႈၸဵဝ်းႁူႉၸဵဝ်း မေႃဝႆး- ဝႃႈၼႆ။