ၽွင်းတႅၼ်းသၽႃးၸိူဝ်ႉၶိူဝ်း တၢင်ႇလၢတ်ႈဝႃႈ- ၼႂ်းၸုမ်း လူင်ပွင်ၸိုင်ႈၸႄႈမိူင်း ထုၵ်ႇလီမီးၽွင်းလူင် ၾၢႆႇၸၢဝ်းၶိူဝ်း လႄႈ ႁူဝ်ပဝ်ႈၼႃႈလိၼ်ၽွင်းငမ်းတူဝ်ၵဝ်ႇ၊ ၵူၺ်းၵႃႈ ထုၵ်ႇပၢၵ်ႈပႅတ်ႈ။

မိူဝ်ႈဝၼ်းထိ 16/07/12 DVB ဢွၵ်ႇၶၢဝ်ႇဝႃႈ ပူၼ်ႉမႃးမိူဝ်ႈဝၼ်းထိ 13/07/12 ၼႂ်းပၢင်ၵုမ်သၽႃးၸိူဝ်ႉၶိူဝ်း (သၽႃးဝူၼ်)ၼၼ်ႉ ၻွၵ်းတိူဝ်ႊဢေးမွင်ႇ ပႃႇတီႇၵၢၼ်မိူင်းရၶႅင်ႇ RNDP လႆႈတၢင်ႇလၢတ်ႈၼႄဝႃႈ- မိူဝ်ႈလဵဝ် ၼႂ်းလူင်ပွင်ၸိုင်ႈၸႄႈ မိူင်းၵူႈၸႄႈမိူင်းၼႆႉ 1.ၽွင်းလူင်ၾၢႆႇၸၢဝ်းၶိူဝ်းလႄႈသင်၊ 2.ႁူဝ်ပဝ်ႈၼႃႈ လိၼ်ၽွင်းငမ်း တူဝ်ၵဝ်ႇၸိူဝ်းၼႆႉလႄႈသင် ယင်းပႆႇၶဝ်ႈပႃးၼႂ်းၸုမ်းလူင်ပွင်ၸိုင်ႈၸႄႈမိူင်း၊ ၸွမ်းၼင်ႇ ပိူင်ငဝ်ႈပိုင်းမိူင်း ၶဵၼ်ႇတႅမ်ႈဝႆႉပႃးၼၼ်ႉ ထုၵ်ႇလႆႈပႃးၶဝ်၊ ၵွပ်ႈသင်ဢမ်ႇပႃး- ဝႃႈၼႆ။

ၵဵဝ်ႇၵပ်းလွင်ႈၼႆႉ ဢၼ်ပဵၼ်ၵႅမ်ၸွမ်ၽူႈတၢင်ၼႃႈ (တုသေႉၼႄႇၶျူၵ်ႉ) ထုၼ်းထုၼ်းဢူး လၢတ်ႈဝႃႈ- လွင်ႈၼႆႉ ႁဝ်းၶႃႈ ဢမ်ႇထုၵ်ႇလႆႈတႅပ်းတတ်းသင်။ ႁဵတ်းႁႂ်ႈပဵၼ်တီႈဢမ်ႇႁၢၼ်ႉၸႂ်လၢႆၾၢႆႇလၢႆၵေႃႉသေ ၵမ်ႈၽွင်ႈဝႃႈ ပႃးၼႂ်းပိူင်ငဝ်ႈပိုင်းမိူင်းယူႇ၊ ၵွပ်ႈသင်ဢမ်ႇႁဵတ်းၸွမ်း- ဝႃႈၼႆ။

မိူၼ်ၼင်ႇၸႄႈမိူင်းတႆး ၼႂ်းၸုမ်းလူင်ပွင်ၸိုင်ႈမိူင်းတႆး မီးၸွမ်ၽွင်းလူင်ၸဝ်ႈဢွင်ႇမျၢတ်ႈ၊ ၾၢႆႇတႂ်ႈမီး ၸၢႆးဢၢႆႈပဝ် (ၽွင်းလူင် ၾၢႆႇႁူင်းၸၢၵ်ႈႁူင်းၵၢၼ်လႄႈၾၢႆႇမိူင်းႁႄႈ) ဢိၵ်ႇၽွင်းလူင်လၢႆႁွင်ႈၵၢၼ် မိူၼ်ၼင်ႇ ၾၢႆႇႁူမ်ႇလူမ်ႈလႄႈလႅၼ်လိၼ်၊ ၾၢႆႇၽႅၼ်ၵၢၼ်လႄႈၾၢႆႇငိုၼ်းတွင်း၊ ၾၢႆႇၵၢၼ်မၢၵ်ႈမီး၊ ၾၢႆႇတိတ်းတေႃႇ သိုဝ်ႇသၢၼ်၊ ၾၢႆႇႁႆႈၼႃးလႄႈပႃႇမႆႉ၊ ၾၢႆႇယူႇလီလႄႈ ၾၢႆႇပၺ်ႇၺႃႇ၊ ၾၢႆႇႁႅင်းၾႆးၾႃႉ၊ လႄႈ ၾၢႆႇၵေႃႇသၢင်ႈ ၸိူဝ်းၼႆႉ။ ၵူၺ်းၵႃႈ ၽွင်းလူင်ၾၢႆႇၸၢဝ်းၶိူဝ်း(ထၼု)၊ ႁူဝ်ပဝ်ႈၼႃႈ လိၼ်ၽွင်းငမ်း တူဝ်ၵဝ်ႇ (ပဢူဝ်း) ၸဵမ်ၸိူဝ်းၼႆႉၵႂႃႇပႆႇပႃး။