ၵူၼ်းဝဵင်းၼမ်ႉတူႈ သူႇသမ်းၵိၼ်ယႃႈၼမ်မႃး၊ ၼႂ်းပွၵ်ႉ ယွမ်ႇမၢင်ပွၵ်ႉၶႂ်ႈၶၢႆယႃႈၵူႈႁိူၼ်း၊ ၸဝ်ႈၼႃႈတီႈ ပလိၵ်ႈ မၢၼ်ႈဢမ်ႇၸွႆႈၵႄႈပၼ်သင်။ ၽူႈမီးပၢႆးႁူႉၼႂ်းတႆးဝႃႈ ပဵၼ်လၢႆးတိုၵ်းၶွင်မၢၼ်ႈ ဢူမ်ဢိုၼ်ၶိူဝ်းတႆး ႁႂ်ႈတႆးလိုမ်း ၵၢၼ်ဝၢၼ်ႈမိူင်း ၸိူဝ်ႉၶိူဝ်းၸူမ်ႁၢႆ။

မိူဝ်ႈလဵဝ်တီႈဝဵင်းၼမ်ႉတူႈ ယႃႈၽိူၵ်ႇ ယႃႈမႃႉ ယႃႈလမ် လိူင်ႇမႃးလိူဝ်ႁႅင်း၊ တင်းဝဵင်း 10 ပွၵ်ႉ ၶႂ်ႈဝႃႈၶၢႆယႃႈ ၽိူၵ်ႇ/ၽွင်းၶၢဝ်၊ ယႃႈမႃႉၵူႈပွၵ်ႉ၊ တီႈပွၵ်ႉ 9 လင်ႁိူၼ်းၵူၼ်းမီးမွၵ်ႈ 120 လင် ၶၢႆယႃႈမႃႉယႃႈၽိူၵ်ႇ တီႈဢေႇ သုတ်းဢမ်ႇယွမ်းမွၵ်ႈ 40 လင်၊ ဢွၼ်ၵၼ်ၶၢႆၶၢႆၵိၼ်ၵိၼ်။ ၵပ်းၵၢႆႇလွင်ႈၼႆႉ ၸဝ်ႈၼႃႈတီႈ ပလိၵ်ႈမၢၼ်ႈ ၶဝ်ၵေႃႈ ဢမ်ႇၸွႆႈၵႄႈလိတ်ႈပၼ်သင်၊ ပေႃးၵူၼ်း ၵႃႉၶၢႆယႃႈၶဝ်ယဵတ်ႈမွၼ်ငိုၼ်းၵေႃႈ ပၼ်ၶၢႆလွတ်ႈ လွတ်ႈလႅဝ်းလႅဝ်း။ မီးၵူၼ်းၵႂႃႇတၢင်ႇလၢတ်ႈႁႂ်ႈၵႂႃႇတိၺွပ်းၵေႃႈဢမ်ႇဢဝ် သႂ်ႇၸႂ်- ဝႃႈၼႆ။

ၶၼ်ယႃႈၽိူၵ်ႇ(ႁႄႊရူဝ်ႊဢိၼ်ႊ) ၼိုင်ႈလွတ်ႇဢၼ်ၸႂ်ႉလုတ်ႇၵိၼ်ၼမ်ႉ သိုဝ်ႉၶၢႆၵၼ် 4,000 ပျႃး၊ ပေႃးႁဵတ်း 4 ပွတ်း (ဢိုတ်းႁူဝ်ဢိုတ်းႁၢင်) 1 ပွတ်း 1,000 ပျႃး။

ၵူၼ်းၼုမ်ႇပွတ်းႁွင်ႇတၢင်ႇၸႄႈဝဵင်းၵေႃႉၼိုင်ႈ ဢၼ်မီးတိုဝ်ႉတၢင်းႁွတ်ႈၽႅဝ် ၼမ်ႉတူႈသေ ၵႂႃႇၸွမ်း ဢူၺ်းၵေႃႉ မၼ်းတီႈ ပွၵ်ႉ 9 လၢတ်ႈဝႃႈ- ႁၼ်ဢူၺ်းၵေႃႉႁဝ်း သိုဝ်ႉယႃႈၽိူၵ်ႇလွတ်ႇ 4 ႁဵင်သေသမ်းဢဝ်၊ ၵူၼ်းသမ်းပၼ်ပဵၼ်ၸဝ်ႈႁိူၼ်းၵူၼ်း ၶၢႆယႃႈ။ လၢႆးသမ်းမၼ်းၼႆႉ လုတ်ႇလိူတ်ႈဢွၵ်ႇၶူၼ်းၶဝ်း ၽွင်ယႃႈ ၽိူၵ်ႇႁႂ်ႈၶဝ်ႈၵၼ် ၸင်ႇသိတ်းၶဝ်ႈတီႈၶႅၼ်- ဝႃႈၼႆ။

မၼ်းၸၢႆးလၢတ်ႈၼႄပႃးဝႃႈ- ပေႃးလုတ်ႇၵႂၼ်းမၼ်း သိုဝ်ႉငိုၼ်းမွၵ်ႈ 1 မိုၼ်ႇၸင်ႇဢိမ်ႇ ၸင်ႇတိူဝ်ႉယိၼ်ႉ မၼ်း။ ပေႃးဝႃႈ သိုဝ်ႉ 4 ႁဵင် သမ်ႉႁႂ်ႈတိူဝ်ႉယိၼ်ႉမၼ်း လႆႈသမ်းဢဝ်။ ၽိူဝ်ႇသမ်းယဝ်ႉၵမ်းၼိုင်ႈ လႆႈႁၼ် ဢူၺ်းၵေႃႉႁဝ်းပိၼ်ႈတူၵ်းတင်ႇၵႂႃႇ၊ ယူႇမွၵ်ႈႁိမ်း 2 မိၼိတ်ႉ ၸင်ႇၸိုၼ်ႇတူဝ်လုၵ်ႉၶိုၼ်ႈမႃး။ လၢတ်ႈပႃး ဝႃႈ- ပေႃးပဵၼ်ယႃႈမႃႉ ၵိၼ်ယဝ်ႉၸႂ်တိုၼ်ႇတဵၼ်ႈႁႅင်း၊ ၸႂ်ဢမ်ႇၼိမ်၊ ဢမ်ႇမေႃယူႇလၢႆလၢႆ၊ ၶႂ်ႈၵႂႃႇတီႈၼိုင်ႈ မိူဝ်းတီႈၼိုင်ႈ၊ ၶႂ်ႈႁဵတ်းဢၼ်ၼိုင်ႈယဝ်ႉဢၼ်ၼိုင်ႈ၊ ပေႃးၵိၼ်ယႃႈၽိူၵ်ႇ တႄႉၼိမ်လီ၊ မိူၼ်ပိဝ်ယူႇၼႂ်း လူမ်း- ဝႃႈၼႆ။

ဢိင်ၼိူဝ်ၵူၼ်းၵိၼ်ယႃႈၼႂ်းၸႄႈဝဵင်းၼမ်ႉတူႈၼမ်လိူဝ်ႁႅင်းသေ ၸဝ်ႈၼႃႈတီႈမၢၼ်ႈဢမ်ႇၸွႆႈၸတ်းၵၢၼ် ပၼ်သင်ၼၼ်ႉ ၽူႈမီးၼႃႈတႃၼႂ်းတူင်ႇဝူင်းတႆးၸဝ်ႈၼိုင်ႈလၢတ်ႈၼႄ 2 လွင်ႈဝႃႈ- 1.သိုၵ်းမၢၼ်ႈတင်း ပလိၵ်ႈမၢၼ်ႈၶဝ်လႆႈၵိၼ်ၸွမ်း၊ 2.လႅပ်ႈပဵၼ်ပေႃႇလသီႇ ၽႅၼ်ၵၢၼ်လၢႆးတိုၵ်းမၢၼ်ႈဢဝ်ယႃႈယႃႉၶိူဝ်းတႆး ပိူဝ်ႈတႃႇဢူမ်ဢိုၼ်ၶိူဝ်းတႆး၊ ႁႂ်ႈၵူၼ်းမိူင်းတႆးလုၵွႆ၊ ပေႃးဝႃႈၵူၼ်းၸၢႆးတႆးၵိၼ်ယႃႈပႅတ်ႈလၢႆၵႂႃႇၼမ်ယဝ်ႉ ၵေႃႈ ပိူဝ်ႈတႃႇတေပႂ်ႉပႃးၸိူဝ်ႉၶိူဝ်းၵႂႃႇၼၼ်ႉမၼ်းဢမ်ႇငၢႆႈ- ဝႃႈၼႆ။

ၼွၵ်ႈသေၼၼ်ႉ တုၵ်းယွၼ်းဝႃႈ- ဢၼ်သိုၵ်းတႆးပွတ်းၸၢၼ်းဝၢင်းၽႅၼ်ၽဵဝ်ႈယႃႈၼႆႉ ၸူမ်းၸွမ်းတႄႉ တႄႉ၊ ၵူၺ်းၵႃႈ ပေႃးပဵၼ်လႆႈၶႂ်ႈႁႂ်ႈသၢၼ်မိုဝ်းၵၼ်တင်းသိုၵ်းတႆးပွတ်းႁွင်ႇ ၽဵဝ်ႈပၼ်ယႃႈႁႂ်ႈထိုင်တီႈ ထိုင်လႅၼ်၊ ယွၼ်ႉပိူဝ်ႈၵႂၢမ်းႁဝ်းပွင်ႇ ၵၼ်။ ပေႃးႁဝ်းၵႂႃႇလၢတ်ႈမၢၼ်ႈ၊ ၵႂၢမ်းႁဝ်းၵေႃႈဢမ်ႇပွင်ႇၵၼ်၊ လၢတ်ႈၵႂၢမ်းမၢၼ်ႈ ၵေႃႈသမ်ႉဢမ်ႇပီႇ၊ မၢၼ်ႈၵေႃႈဢမ်ႇဢဝ် သႂ်ႇၸႂ်။ ၵဵဝ်ႇၵပ်းလွင်ႈယႃႈၼႆႉ ၵႂႃႇႁႃၽူႈ ၵွၼ်းပလိၵ်ႈၵေႃႈ ဢမ်ႇၺႃးသေပွၵ်ႈ၊ ၼွၵ်ႈသေၼၼ်ႉ ၶႂ်ႈႁႂ်ႈလၢႆၾၢႆႇႁူမ်ႈမိုဝ်းၵၼ် တင်းၵူၼ်းမိူင်းသေ ၽဵဝ်ႈ- ဝႃႈၼႆ။