ဢိင်ၼိူဝ်ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP လုင်းၸၢႆးဢၢႆႈ ပဝ်း ႁွင်ႉမွၵ်ႇသေ ၸုမ်းမျၢၼ်ႇမႃႇဢီႊၵရႅတ်ႉ လူင်းပၼ် ပၢင်သွၼ် ၵဵဝ်ႇၵပ်းၵၢၼ်မိူင်း ၼႂ်းၸိုင်ႈတႆးပွတ်းၸၢၼ်း၊ ၵူၼ်းၼုမ်ႇလၢႆလၢႆၸႄႈဝဵင်းသူၼ်ၸႂ် ၶဝ်ႈႁူမ်ႈတင်းၼမ်။

“မျၢၼ်ႇမႃႇဢီႊၵရႅတ်ႊၶဝ်လူင်းပၼ်ပၢင်သွၼ် ၼႂ်းၸိုင်ႈတႆးပွတ်းၸၢၼ်းၸဵမ်မိူဝ်ႈႁူဝ်လိူၼ်ၼႆႉ၊ ၶဝ်ဝႃႈ ပဵၼ်လုင်းၸၢႆးဢၢႆႈပဝ်း ႁွင်ႉမွၵ်ႇႁႂ်ႈမႃးသွၼ်ပၼ်။ ၶဝ်မႃးသွၼ်ၼႂ်းပၢင်သွၼ်တႄႉ ၵမ်ႈၼမ်ၵဵဝ်ႇၵပ်း ၵၢၼ်မိူင်း။ ပိူဝ်ႈတႃႇၵူၼ်းၼုမ်ႇၸိုင်ႈတႆးႁဝ်း တႄႉ ၾၢႆႇၼိုင်ႈၵေႃႈ လႆႈဝႃႈပဵၼ်လွင်ႈလီယူႇၼႆသေတႃႉ ပၢင်သွၼ်ဢၼ် ၶဝ်ၸဝ်ႈမႃးပၼ်ၼၼ်ႉ ၵိူင်းၾၢႆႇပေႃႇလသီႇ ၶွင်လူင်ပွင်ၸိုင်ႈၵမ်ႈၼမ်- ၵူၼ်းၼုမ်ႇဝဵင်း လၢင်းၶိူဝ်းၵေႃႉၼိုင်ႈ လၢတ်ႈၼင်ႇၼႆ။

မျၢၼ်ႇမႃႇဢီႊၵရႅတ်ႊၶဝ်လူင်းပၼ်ပၢင်သွၼ်ၼႆႉ ၸိုင်ႈတႆးပွတ်းၸၢၼ်း မိူၼ်ၼင်ႇပၢင်လူင်၊ မိူင်းၼၢႆး၊ လၢင်းၶိူဝ်း၊ မိူင်းပၼ်ႇ၊ မိူင်းၵိုင်၊ ၵႃလိ၊ လၢႆးၶႃႈ၊ မိူင်းသူႈ။ ပူင်သွၼ်ပၼ်ၵဵဝ်ႇၵပ်းလွင်ႈၵၢၼ်မိူင်းၵူၺ်းပႆႇပေႃး ပႃးၸဵမ်ၵၢၼ်မၢၵ်ႈမီးလႄႈ ၵၢၼ်ပူၵ်းပွင်၊ လွင်ႈပႂ်ႉပႃးသိင်ႇဝႅတ်ႉလွမ်ႉၸိူဝ်းၼႆႉ။ မီးၵူၼ်းၼုမ်ႇ ၸိူဝ်းတိုၵ်ႉ ႁဵၼ်းလိၵ်ႈလၢႆး၊ ၵူၼ်းၶၢႆၶူဝ်းၼႂ်းၵၢတ်ႇ၊ ၵူၼ်းႁဵတ်းၵၢၼ်ႁိူၼ်း ၵၢၼ်ယေး၊ ပိုတ်ႇႁၢၼ်ႉဝိူၵ်ႊသျွပ်ႊ၊ ယဵပ်ႉၶူဝ်း ၸိူဝ်းၼႆႉၶဝ်ႈႁူမ်ႈ။ ၼွၵ်ႈသေၼၼ်ႉ ယင်းမီးၵူၼ်းၼုမ်ႇၸဝ်ႈႁႆႈၸဝ်ႈသူၼ်ၵမ်ႈ ၽွင်ႈၶဝ်ႈႁူမ်ႈ- ၵူၼ်းၼုမ်ႇ လၢင်းၶိူဝ်းသိုပ်ႇလၢတ်ႈ။

တီႈလၢင်းၶိူဝ်းၼၼ်ႉ မျၢၼ်ႇမႃႇဢီႊၵရႅတ်ႊ ပူင်သွၼ်ပၼ် တင်ႈတႄႇဝၼ်းထိ 24-29/06/12 ၊ ဝၢႆးၼၼ်ႉ သိုပ်ႇၵႂႃႇလၢႆးၶႃႈ သေ မိူဝ်ႈလဵဝ် လႆႈႁူႉဝႃႈၶၢဝ်းတၢင်းပၢင်သွၼ်ယဝ်ႉတူဝ်ႈယဝ်ႉ။ တီႈမိူင်းၵိုင်တင်းမိူင်းသူႈ တႄႉ ၵွပ်ႈပိူဝ်ႈၼႃႈလိၼ်တိုၵ်ႉယုင်ႈ ယၢင်ႈယူႇ၊ ဢမ်ႇပႆႇၵတ်းယဵၼ်လႄႈ ၶဝ်ဢမ်ႇၵႂႃႇသွၼ်ယဝ်ႉ၊ လႆႈငိၼ်းဝႃႈၶဝ် တေၵႂႃႇလၢႆးၶႃႈၵူၺ်းသေ ပေႃးယဝ်ႉၵေႃႈတေပွၵ်ႈ မိူဝ်းၵႂႃႇၶိုၼ်း- ၵူၼ်းၼုမ်ႇၼႂ်းသိူဝ်ၽိူၵ်ႇ သိုပ်ႇလၢတ်ႈထႅင်ႈ။

ဢွင်ႈတီႈၸတ်းပၢင်သွၼ်ၼႆႉ ၵူၼ်းၼုမ်ႇမိူင်းပၼ်ႇတင်းလၢင်းၶိူဝ်း ႁူမ်ႈၵၼ်သွၼ်တီႈလၢင်းၶိူဝ်း၊ ၵူၼ်းၶိုၼ်ႈပၢင်သွၼ်မီး တင်းမူတ်းမီးမွၵ်ႈ 70 ၊ ၵူၼ်းလုၵ်ႉမိူင်းပၼ်ႇမႃးမီးမွၵ်ႈ 30 ပၢႆ။ ၼမ်ႉၸၢင်လႄႈ ပၢင်လူင် ႁူမ်ႈၵၼ်သွၼ်။ ၶူဝ်လမ်(ၶူဝ်ၶမ်း)၊ ၵုၼ်ႁဵင် လႄႈၵႃလိ ႁူမ်ႈၵၼ်သွၼ်တီႈၵႃလိ။ မိူင်းၼၢႆးလႄႈ မွၵ်ႇမႆႇ ႁူမ်ႈၵၼ်သွၼ်တီႈမိူင်းၼၢႆး။

လႆႈႁၼ်ပေႃႇလသီႇၶဝ်ၵိူင်းၾၢႆႇလူင်ပွင်ၸိုင်ႈၼမ်သေတႃႉ ၵွပ်ႈဝႃႈၵူၼ်းၼုမ်ႇမိူင်းတႆးႁဝ်း ဢမ်ႇပေႃးမီး တၢင်းႁူႉတၢင်းႁၼ် ၵဵဝ်ႇၵပ်းၵၢၼ်မိူင်းလႄႈ လႆႈဝႃႈပဵၼ်ၸုတ်းလီဢွၼ်ႇဢၼ်ၼိုင်ႈၼႂ်းၸုတ်းႁၢႆႉ။ ပေႃးမီး တၢင်းႁူႉတၢင်းႁၼ်မႃး ၵူၼ်းၼုမ်ႇ ႁဝ်းၶႃႈတေမေႃတႅပ်းတတ်းၵူၺ်းဝႃႈ ဢၼ်လႂ်ထုၵ်ႇဢၼ်ၽႂ်ၽိတ်း။ ၵူၺ်းၵႃႈ ပေႃးပဵၼ်လႆႈ ၶူးသွၼ်ဢၼ်မႃးပူင်သွၼ်ၼႆႉ ႁႂ်ႈၶႂ်ႈပဵၼ်ၸုမ်းတႆး ၵူၼ်းၼုမ်ႇတႆး- ၵူၼ်းၼုမ်ႇသိူဝ် ၽိူၵ်ႇ သိုပ်ႇလၢတ်ႈ။

ၵူၼ်းပၢင်လူင်ၵေႃႉၼိုင်ႈလၢတ်ႈၼႄဝႃႈ- “ၸုမ်းမျၢၼ်ႇမႃႇဢီႊၵရႅတ်ႉၼႆႉ ၶဝ်ၸႅၵ်ႇႁဵတ်းပဵၼ် 2 ၸုမ်းသေ ၸုမ်းၼိုင်ႈၵႂႃႇမိူင်း တႆးပွတ်းႁွင်ႇ၊ ၸုမ်းၼိုင်ႈၵႂႃႇမိူင်းတႆးပွတ်းၸၢၼ်း။ ၶဝ်မႃးပၼ်ပၢင်သွၼ်ၸိူင်ႉၼႆၵေႃႈ ႁဝ်းယိၼ်းၸူမ်းယူႇ၊ ၵူၺ်းၵႃႈ ဢၼ်ႁဝ်းၶႃႈၶႂ်ႈပဵၼ်တႄႉ ၶႂ်ႈႁႂ်ႈပဵၼ်ၼႂ်းမူႇၸုမ်းတႆး၊ ၼႂ်းၵူၼ်းမေႃႁူႉလိၵ်ႈ လၢႆးတႆး၊ ၵူၼ်းလူင်တႆးၸိူဝ်းမီးတူဝ်ထူပ်းၵၢၼ်မိူင်း ၸိူဝ်းၼၼ်ႉ မႃးပူင်သွၼ်ပၼ်၊ ပေႃးပဵၼ်တႆးၼင်ႇၵၼ် ႁဝ်းၶႃႈႁၼ်ထိုင်ဝႃႈတေမီးၼမ်ႉတွၼ်းၽွၼ်းလီၼမ်၊ ၵွပ်ႈဝႃႈ ပေႃးလဵပ်ႈႁဵၼ်းတူၺ်းပၢင်သွၼ်ၵၢၼ်မိူင်း မိူဝ်ႈလဵဝ်ၼႆႉ ၼိုင်ႈၸႄႈဝဵင်းမီးၵူၼ်းၼုမ်ႇၶဝ်ႈႁဵၼ်းၽတ်ႉၽဵင်ႇဢမ်ႇယွမ်း 60-70 ၵေႃႉ၊ မိူၼ်ၼင်ႇတီႈ ၵႃလိ ၵူၼ်းမႃးၶိုၼ်ႈပၢင်သွၼ်မီး 100 ပၢႆ။ တပ်ႉၸုမ်း 7 လွႆၽႃ ဢၼ်လႅၵ်ႈလၢႆႈပဵၼ်ပီႇတုၸိတ်ႉၵူၺ်းမီး 50 ပၢႆ”- ဝႃႈၼႆ။

မျၢၼ်ႇမႃႇဢီႊၵရႅတ်ႉ (Myanmar Egress) ၼႆႉ ၵမ်ႈၼမ်ႁူႉၸၵ်းၵၼ်ဝႃႈ ပဵၼ်ၸုမ်း NGO ၶွင်လူင်ပွင် ၸိုင်ႈ။ တင်ႈတႄႇ မိူဝ်ႈဝၼ်းထိ 24 လိူၼ်မေႊ တေႃႇထိုင်ဝၼ်းထိ 27 လိူၼ်ၵျုၼ်ႊ ယၢမ်ႈပၼ်ပၢင်သွၼ် ၵၢၼ်မိူင်းတီႈလုမ်းၶဝ် တႃႈၵုင်ႈ၊ ႁွင်ႉၸိုဝ်ႈဝႃႈပၢင်သွၼ်ၵၢၼ်ၽွင်းငမ်းပိူဝ်ႈတႃႇၵၢၼ်ဢွၼ်ႁူဝ် ၼမ်းၼႃႈ (Governance Training for Leaders and Change Agent) ။ မိူဝ်ႈပၢင်သွၼ်ၼၼ်ႉ ၶဝ်ႁွင်ႉမွၵ်ႇၽူႈတႅမ်ႈ လိၵ်ႈၸိုဝ်ႈယႂ်ႇၼႂ်းမိူင်းမၢၼ်ႈမႃးမွၵ်ႇလၢတ်ႈ ပူင်သွၼ်ပၼ် ၵူၺ်းပႆႇပေႃး၊ ႁွင်ႉမွၵ်ႇပႃးၽူႈ လူင်ႉလႅၼ်ႇ ၵၢၼ်မိူင်း ၼွၵ်ႈမိူင်း မိူၼ်ၼင်ႇလႄႊရီႊ ၻၢႆႊမၼ်ႊ တင်းရူဝ်ႊပိူတ်ႊ တေႊလႃႊ ၸိူဝ်းၼႆႉမႃး ပူင်သွၼ်ပၼ်ပႃး- ၼႆယဝ်ႉ။