သိုၵ်းမၢၼ်ႈၶိုၼ်ႈယိုဝ်းသိုၵ်းတႆး ဢၼ်ပၵ်းယူႇဝႆႉ တီႈလွႆယႄး ၼမ်ႉၸၢင်၊ ၾၢႆႇမၢၼ်ႈလုသုမ်းၼမ်။ ၾၢႆႇၼိုင်ႈ ၵေႃႈ ၵႂႃႇယိုဝ်းသိုၵ်းတႆးတီႈၼွင်လိူဝ်ႇ မိူင်းပၼ်ႇ။

ဝၼ်းထိ 30/07/12 (မိူဝ်ႈဝႃး) တင်းၼႂ်ၼႆႉ ဝၼ်းထိ 31/07/12 သိုၵ်းမၢၼ်ႈၵႂႃႇၶိုၼ်ႈယိုဝ်းတပ်ႉသိုၵ်း ၸိုင်ႈတႆး RCSS/SSA တီႈလွႆယႄး ၼႂ်းၸႄႈဝဵင်းၼမ်ႉၸၢင်၊ တီႈတပ်ႉပၢင်သဝ်းဢၼ်တၢင်း SSA ႁုပ်ႈယိုတ်းပၵ်းယူႇ တႅၼ်းတီႈၸုမ်းပီႇတုၸိတ်ႉ ပဢူဝ်း PNO ၵႃႈပူၼ်ႉမႃး၊ လႆႈႁူႉဝႃႈ ၾၢႆႇသိုၵ်းမၢၼ်ႈ တူၵ်းသုမ်း ဝၢတ်ႇၸဵပ်း လုတၢႆၼမ်ဝႆႉ- ၼႆယဝ်ႉ။

တပ်ႉလွႆယႄးၼႆႉ ဝၢႆးပဢူဝ်းတင်းတႆးယိုဝ်းၵၼ်ယဝ်ႉ သၢႆသိုၵ်းၵွၼ်းၸိူင်းၵႂႃႇပၵ်းယူႇဝႆႉ။ ပၢင်တိုၵ်းပွၵ်ႈၼႆႉ ပဵၼ်ၵမ်းထိ 26 ဝူင်ႈၵၢင်သိုၵ်းမၢၼ်ႈတင်းသိုၵ်းတႆး ဝၢႆး RCSS/SSA ဢုပ်ႇဢူဝ်းတူၵ်းလူင်းၵိုတ်းယိုဝ်း ဢဝ်လွင်ႈငမ်းယဵၼ်။

ဝၼ်းထိ 31/07/12 ၵၢင်ၼႂ်ယၢမ်း 08:00 မူင်း သိုၵ်းမၢၼ်ႈၵႂႃႇယိုဝ်းသိုၵ်းတႆး တီႈၼွင်လိူဝ်ႇ ၸႄႈဝဵင်းမိူင်း ပၼ်ႇ၊ တီႈၼွင် လိူဝ်ႇၼႆႉ ၾၢႆႇတပ်ႉသိုၵ်းၸိုင်ႈတႆး တပ်ႉၸုမ်း 756 ပၵ်းယူႇဝႆႉ။

ၵဵဝ်ႇၵပ်းလွင်ႈၸိူဝ်းၼႆႉ လႆႈႁူႉဝႃႈ မိူဝ်ႈၼႆႉဝၼ်းထိ 31/07/12 ယူႇတီႈ RCSS/SSA လႆႈတႅမ်ႈလိၵ်ႈၵႂႃႇတီႈ ဢူးဢွင်ႇမိၼ်း (ၽွင်းလူင်ၾၢႆႇတေႃႉသူင်ႇ လူတ်ႉၾႆး လႄႈၵႅမ်ႁူဝ်ပဝ်ႈ ၶွမ်ႊမတီႊၶိုင်ပွင်လွင်ႈငမ်းယဵၼ်) ဝႃႈ- ၼင်ႇႁိုဝ်ပေႃးတေဢမ်ႇလႆႈ တိုၵ်းယိုဝ်းၵၼ်ထႅင်ႈ တေလႆႈႁဵတ်းႁိုဝ်၊ ဢူးဢွင်ႇမိၼ်းၵေႃႈမီးပုၼ်ႈ ၽွၼ်းၸွႆႈ ၵႅတ်ႇၵင်ႈပၼ်- ၼႆယဝ်ႉ။