တၢင်းၵၢၼ်ၶႄႇတုၵ်းယွၼ်းႁႂ်ႈမၢၼ်ႈမွပ်ႈတူဝ် ၸၢႆးဢွင်ႇမျၢတ်ႈ ၵႅမ်ၸၢႆးၼေႃႇၶမ်း၊ ဢၼ်ထၢင်ႇထိူမ် ၵဵဝ်ႇၶွင်ႈ ၵူၼ်းတၢႆ 13 ၵေႃႉၼၼ်ႉ မၢၼ်ႈဢမ်ႇပၼ်၊ ဢိင်ဢၢင်ႈဝႃႈမၼ်းၸၢႆးၶဝ်ႈဝၢင်းၶိူင်ႈၵွင်ႈၵၢင်ႇ၊ ဢမ်ႇၸႂ်ႈ တိၺွပ်းလႆႈ။

ပူၼ်ႉမႃးမိူဝ်ႈဝၼ်းထိ 27/07/12 ၸဝ်ႈၼႃႈတီႈၶႄႇလုၵ်ႉတီႈၼေႇပျီႇတေႃႇ ၵႂႃႇတီႈၵဵင်းတုင်သေ ဝၼ်းထိ 28 ၵႂႃႇထဵတ်ႈထၢမ် ၸၢႆးဢွင်ႇမျၢတ်ႈ၊ ၵႅမ်ၸၢႆးၼေႃႇၶမ်း ဢၼ်ထၢင်ႇထိူမ်ဝႃႈၵဵဝ်ႇၶွင်ႈၵၢၼ်ၶႃႈႁႅမ် ၵူၼ်း ၸွမ်းႁိူဝ်း ၶႄႇတၢႆ 13 ၵေႃႉ ၼႂ်းမႄႈၼမ်ႉ ၶွင်။ ယူႇတီႈၶႄႇယွၼ်းတီႈမၢၼ်ႈၼေႇပျီႇတေႃႇ ႁႂ်ႈတၢင်းၵၢၼ် မၢၼ်ႈမွပ်ႈ ပၼ်တူဝ် ပိူဝ်ႈတႃႇဢဝ်ၵႂႃႇမိူင်းၶႄႇ။ ၵူၺ်းၵႃႈ မၢၼ်ႈဢမ်ႇယွမ်းပၼ်၊ လူၺ်ႈလၢတ်ႈၼႄလွင်ႈ တၢင်းဝႃႈ ၸၢႆးဢွင်ႇမျၢတ်ႈမႃးၶဝ်ႈဝၢင်းၶိူင်ႈၵွင်ႈၵၢင်ႇ၊ မၼ်းဢမ်ႇမိူၼ်ၵၼ်တင်း ၸၢႆးၼေႃႇၶမ်းၵေႃႉထုၵ်ႇ တိလႆႈ- ဝႃႈၼႆ။

ဢွၼ်တၢင်းၼႆႉ မိူဝ်ႈဝၼ်းထိ 23/07/12 ၸွမ်သိုၵ်းလူင်ၽဵဝ်းၽၼ်း ၻႃးမႃးၽူင်း ၽူႈၵွၼ်းပလိၵ်ႈသုင် သုတ်း မိူင်းထႆး လၢတ်ႈတီႈၽူႈသိုဝ်ႇၶၢဝ်ႇၶဝ် ပူၼ်ႉမႃးမိူဝ်ႈဝၼ်းၸၼ်ထိ 23/07/12 ၊ ဝၢႆးၸဝ်ႈၼႃႈတီႈ ၸၼ်ႉသုင်ၶႄႇ ၶဝ်မႃးဢႅဝ်ႇမၼ်းၸဝ်ႈ ဝႃႈ- မိူဝ်ႈလဵဝ် ၸဝ်ႈၼႃႈတီႈၶႄႇၶဝ်တေသိုပ်ႇၵႂႃႇမိူင်းမၢၼ်ႈ ပိူဝ်ႈတႃႇၵႂႃႇႁပ်ႉတူဝ် ၸၢႆးဢွင်ႇမျၢတ်ႈ (ၼၢႆးပွင်းမျႃႉ)။ ၵဵဝ်ႇၵပ်း လွင်ႈၶႃႈၵူၼ်းၸွမ်းႁိူဝ်းၶႄႇ 13 ၵေႃႉ ၼၼ်ႉ မၼ်းပဵၼ်ၵူၼ်းႁူႉ လွင်ႈပိူင်ပဵၼ်တင်းမူတ်း- ႁၢႆးငၢၼ်းၽိုၼ်ၶၢဝ်ႇမတိၶျူၼ်း ဢွၵ်ႇၵႂႃႇၼင်ႇၼႆ။

ၵႃႈပူၼ်ႉမႃး လွင်ႈၶႃႈၵူၼ်းၸွမ်းႁိူဝ်းၶႄႇ 13 ၵေႃႉၼႆႉ ၸၢႆးဢွင်ႇမျၢတ်ႈတွပ်ႇထဵင်မႃးတႃႇသေႇဝႃႈ ဢမ်ႇလႆႈ ၵဵဝ်ႇၶွင်ႈ၊ ဢမ်ႇလႆႈ ႁူႉၸွမ်းသင်၊ တိုၼ်းဢမ်ႇယွမ်းႁပ်ႉ။ ၵူၺ်းၵႃႈ ၵမ်ႈၽွင်ႈသမ်ႉဝႃႈ ၶေႃႈၵႂၢမ်းဢၼ် ၸၢႆးဢွင်ႇမျၢတ်ႈလၢတ်ႈၼႆႉဢမ်ႇပဵၼ်လႆႈ၊ လႆႈႁူႉဝႃႈဢၼ်လူင်းမိုဝ်းႁဵတ်း ပဵၼ်တူဝ်မၼ်းၵမ်းလဵဝ်၊ ဢမ်ႇၸႂ်ႈ ၸၢႆးၼေႃႇၶမ်းႁဵတ်း- လႅင်ႇၶၢဝ်ႇထႅင်ႈၾၢႆႇၼိုင်ႈလၢတ်ႈ ၼင်ႇၼႆ။

ဢွၼ်ၼႃႈၼၼ်ႉ ၸွမ်သိုၵ်းၾၢႆႇပလိၵ်ႈ ၽၼ်းသီရိ ပရႃႇၽႃးဝတ်း ၵေႃႉပဵၼ်ၵႅမ်ၶွင် ၸွမ်သိုၵ်းလူင်ၽဵဝ်း ၽၼ်းၵေႃႈလၢတ်ႈ ဝႃႈ- လႆႈႁပ်ႉႁၢႆးငၢၼ်းတီႈတၢင်းၸဝ်ႈၼႃႈတီႈၶႄႇဝႃႈ ၸၢႆးၼေႃႇၶမ်းယွမ်းႁပ်ႉလွင်ႈ ၶႃႈၵူၼ်း 13 ၵေႃႉတင်းမူတ်းယဝ်ႉ။ ၵပ်းၵၢႆႇလွင်ႈၼႆႉ ၽူႈလဵပ်ႈႁဵၼ်းၶဝ်ထတ်းသၢင်ဝႃႈ- လွင်ႈၼႆႉ မၼ်းပဵၼ်ၶၢဝ်ႇ ဢၼ်ၶႄႇၶဝ်ဢွၵ်ႇၵႂႃႇၵူၺ်း၊ ဢၼ်တႄႉမၼ်း ယွမ်းႁပ်ႉၽိတ်း ဢမ်ႇယွမ်းႁပ်ႉၽိတ်းတႄႉ ယင်းပႆႇႁူႉ- ဝႃႈၼႆ။

ၵူၼ်းၸမ်ၸႂ်ၼႃႈႁိူၼ်းၼၢင်းဢွၼ်ႇ ၵေႃႉပဵၼ်ၼၢင်းမေးၸၢႆးဢွင်ႇမျၢတ်ႈလၢတ်ႈဝႃႈ- “ၼၢင်းဢွၼ်ႇလၢတ်ႈ ၼႄဝႃႈ မၼ်း ၼၢင်းလႆႈၵႂႃႇဢႅဝ်ႇမႃးတီႈၵဵင်းတုင် တီႈၶွၵ်ႈဢၼ်ၶင်ၸဝ်ႈၽူဝ်မၼ်းဝႆႉ၊ ၽူဝ်မၼ်းလႆႈယွမ်း ႁပ်ႉ ၵဵဝ်ႇၵပ်းလွင်ႈၶႃႈၵူၼ်းတၢႆ ၼႂ်းမႄႈၼမ်ႉၶွင် 13 ၵေႃႉ၊ ၵွပ်ႈဝႃႈထုၵ်ႇၶႃတူဝ်ၶႃၸႂ်၊ ဢမ်ႇဢူတ်းယိူၼ်ႉလႆႈ ဢၼ်ပိူၼ်ႈထုပ်ႉတွႆႇလႄႈမၼ်းလႆႈယွမ်းႁပ်ႉၵႂႃႇ။ ၵမ်းလိုၼ်းသုတ်း လႆႈယွမ်းႁပ်ႉပဵၼ်သၢၵ်ႈသေႇ (ၽယၢၼ်း) ၾၢႆႇလူင်ပွင်ၸိုင်ႈ- လႅင်ႇၶၢဝ်ႇလၢတ်ႈၼႄၼင်ႇၼႆ။

ၸၢႆးဢွင်ႇမျၢတ်ႈ (ၸုမ်းၼေႃႇၶမ်း)ၼႆႉ ဝၢင်းၶိူင်ႈၵွင်ႈၵၢင်ႇ ပၼ်ၸဝ်ႈၼႃႈတီႈမၢၼ်ႈတီႈတႃႈၶီႈလဵၵ်း မိူဝ်ႈဝၼ်းထိ 15/05/12 ဝၢႆးၽူႈဢွၼ်ႁူဝ်မူႇၸုမ်း ၸၢႆးၼေႃႇၶမ်းထုၵ်ႇတိၺွပ်း မိူဝ်ႈဝၼ်းထိ 25 လိူၼ်ဢေႊပရိူဝ်ႊလ်။ ၼႂ်းၵူၼ်းၸိူဝ်းၶဝ်ႈဝၢင်းၶိူင်ႈ ၼၼ်ႉ လိူဝ်သေၸၢႆးဢွင်ႇမျၢတ်ႈ ၺႃးထဵတ်ႈထၢမ်မွၵ်ႈ 2-3 ဝၼ်းၵေႃႈ ပွႆႇပၼ်မူတ်း၊ ၵူၺ်းၵႃး ၸၢႆးဢွင်ႇမျၢတ်ႈတႄႉ ဢမ်ႇပွႆႇ ပၼ်ၵူၺ်းပႆႇပေႃး၊ လႆႈထုၵ်ႇ သိုပ်ႇထဵတ်ႈထၢမ်ၵုမ်းၶင်ဝႆႉတီႈတႃႈၶီႈလဵၵ်း သေ ဝၢႆးမႃးသိုပ်ႇသူင်ႇၵႂႃႇၵုမ်းၶင်တီႈၵဵင်းတုင်။

ၸၢႆးဢွင်ႇမျၢတ်ႈၼႆႉ ၸိုဝ်ႈတႄႉႁွင်ႉဝႃႈၸဵၼ်းႁူင်၊ ဢႃႇယု 42 ပီ၊ ၵူၼ်းဝၢၼ်ႈၼမ်ႉၶိုမ်း ဢိူင်ႇမိူင်းလဵၼ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ယၢမ်ႈႁပ်ႉၵိုတ်းၵၢၼ်သိုၵ်းၼႂ်းတပ်ႉသိုၵ်းမိူင်းတႆး MTA ဢၼ်ၸဝ်ႈၶုၼ်သႃႇဢွၼ်ႁူဝ်၊ ဝၢႆး MTA ဝၢင်းၶိူင်ႈၵွင်ႈၵၢင်ႇၵႂႃႇမိူဝ်ႈႁူဝ်ပီ 1996 ယဝ်ႉ မႃးပဵၼ်ႁူဝ်ၼႃႈထိ 2 ၶွင်ၸုမ်းပီႇတုၸိတ်ႉၸၢႆးၼေႃႇၶမ်း၊ ဝၢႆးမႃးၸၢႆးၼေႃႇၶမ်း ဢွၵ်ႇၵႂႃႇတူင်ႉၼိုင်ၵုမ်းပွတ်းသၢမ်ၸဵင်ႇၶမ်းၵေႃႈ ၵႂႃႇႁူမ်ႈတူင်ႉၼိုင်ၸွမ်းၵၼ်၊ တေႃႇပေႃးထိုင်ၸၢႆးၼေႃႇၶမ်း ထုၵ်ႇတိၺွပ်း မိူဝ်ႈၼႂ်းလိူၼ်ဢေႊပရိူဝ်ႊလ် သေ တႅပ်းတတ်းၶဝ်ႈဝၢင်းၶိူင်ႈၵွင်ႈၵၢင်ႇပၼ်မၢၼ်ႈ တီႈတႃႈၶီႈလဵၵ်း။