ဢိင်ၼိူဝ်ၸုမ်းၶၢဝ်ႇၽူႈတွႆႈႁွၵ်ႇလႆႈတွင်ႈထၢမ်သေ ၽူႈၶၢၼ်ပၢၵ်ႇပႃႇတီႇႁူဝ်သိူဝ် SNLD လုင်းၸၢႆးလဵၵ်ႉ တွပ်ႇလၢတ်ႈလွင်ႈငဝ်းလၢႆး ၵၢၼ်ၸိူဝ်ႉၸၢတ်ႈဝၢၼ်ႈမိူင်း ပႃးၸဵမ်ၵၢၼ်သိုၵ်းလၢႆၸိူဝ်ႉလၢႆလွင်ႈၼင်ႇၼႆ။

ထၢမ်- ဢွၼ်တၢင်းသုတ်း ၶႂ်ႈထၢမ်လွင်ႈပၢင်ၵုမ်ဢၼ်ၸတ်းႁဵတ်း ၼႂ်း 2 ဝၼ်းပူၼ်ႉမႃးၼႆႉ၊ ပဵၼ်ပၢင် ၵုမ်သင်၊ မီးၶေႃႈတႅပ်း တတ်းလမ်ႇလွင်ႈၸိူင်ႉႁိုဝ် လၢတ်ႈၼႄပၼ်ၽွင်ႈၶႃႈ?။

တွပ်ႇ- ဢၼ်ႁဝ်းၶႃႈလႆႈၸတ်းပၢင်ၵုမ်ၼႆႉ ပိူင်လူင်မၼ်းပိူဝ်ႈတႃႇမိူဝ်းၼႃႈ(ဢၼႃၵတ်)ၶွင်မိူင်းတႆး၊ ၸိူဝ်းမႃးၶဝ်ႈႁူမ်ႈ မီးပႃႇတီႇႁူဝ်သိူဝ် ၸဝ်ႈၶုၼ်ထုၼ်းဢူးဢွၼ်ႁူဝ် 4 ၵေႃႉ။ ၸုမ်းၶွင်ႊသီႊဢဝ်ၶိုၼ်းၸိုင်ႈ တႆး RCSS ၸဝ်ႈႁၢၼ်လၢဝ်သႅင် ဢွၼ်ႁူဝ်ၶဝ်ႈႁူမ်ႈ 3 ၵေႃႉ၊ ၸုမ်းပႃႇတီႇမႂ်ႇသုင်ၸိုင်ႈတႆး SSPP (ဝၢၼ်ႈႁႆး) ၸဝ်ႈသိုၵ်းလူင်ၸၢႆးတူး ဢွၼ်ႁူဝ်ၶဝ်ႈႁူမ်ႈ 3 ၵေႃႉ၊ တပ်ႉသိုၵ်းၵူၼ်းမိူင်းၸိုင်ႈတႆး (သႅင်ၵႅဝ်ႉ) ၸွမ်ႁၢၼ် ၵၢႆႇၾႃႉဢွၼ်ႁူဝ် ၶဝ်ႈႁူမ်ႈ 5 ၵေႃႉ။ လိူဝ်သေၼၼ်ႉ မီးၸုမ်းၶဝ်ႈႁူမ်ႈ လဵပ်ႈႁဵၼ်း 2 ၸုမ်း တင်းမူတ်း 6 ၸုမ်း။

မီးလွင်ႈဢုပ်ႇဢူဝ်းတႅပ်းတတ်းလၢႆလၢႆၶေႃႈယူႇ၊ ၼႂ်းၼၼ်ႉ ဢၼ်ၸၢင်ႈလၢတ်ႈလႆႈ ႁူဝ်ပဝ်ႈၸဝ်ႈၶုၼ် ထုၼ်းဢူး လႄႈ ပီႈၸၢႆးၼုတ်း (ႁွင်ႉၸၢႆးၺုၼ်ႉလုၼ်ႇ)တေလႆႈ ၵႂႃႇထူပ်း ၸွမ်ၸိုင်ႈၼႂ်းဝူင်ႈၼႆႉ၊ ပေႃးၵႂႃႇ ထူပ်းၼႆ ပိူဝ်ႈတႃႇၵၢၼ်မိူင်းမိူင်းတႆး တင်းသဵင်ႈၼၼ်ႉ လႆႈၸႂ်ၵၼ်ဝႃႈ မွပ်ႈပၼ်ၶုၼ်ထုၼ်းဢူးၶဝ်သွင်ၸဝ်ႈ ႁႂ်ႈလႆႈတၢင်တူဝ်ၵူႈမူႇၵူႈၸုမ်းသေ တၢင်ႇလၢတ်ႈႁၢႆး ငၢၼ်းၼႄၵႂႃႇ။

တီႈဢေႇသုတ်း ႁႂ်ႈၸဝ်ႈၶုၼ်ထုၼ်းဢူး ယိုၼ်ႈယွၼ်းပိူဝ်ႈတႃႇ ပႃႇတီႇတႆးတင်းသဵင်ႈလႄႈ တပ်ႉသိုၵ်းၼႂ်း မိူင်းတႆး တင်းသဵင်ႈ ႁႂ်ႈလႆႈႁူမ်ႈၵၼ်သေ ႁဵတ်းပၢင်ၵုမ်လူင်တီႈမိူင်းတႆး။ ဝၢႆးၼၼ်ႉသမ်ႉ တုၵ်းယွၼ်းဝႃႈ ပႃႇတီႇၵၢၼ်မိူင်းလႄႈၸုမ်းယိပ်းၵွင်ႈၵၢင်ႇ ၼႂ်းမိူင်းတႆးတင်းသဵင်ႈ ႁႂ်ႈလႆႈဢုပ်ႇၵၼ်ၵႂၢင်ႈၵႂၢင်ႈၶႂၢင်ၶႂၢင်၊ ႁႂ်ႈလႆႈၶဝ်ႈပႃးၵူႈမူႇၵူႈၸုမ်း၊ ႁႂ်ႈၶဝ်ႈတၢင်းၵၢၼ်။ 2 ၶေႃႈၼႆႉ ႁဝ်းၶႃႈဝႆႉလမ်ႇလွင်ႈၼၵ်းၼႃသေ တေတၢင်ႇယိုၼ်ႈယွၼ်းၵႂႃႇ- ဝႃႈၼႆ။
ထၢမ်- ပေႃးဝႃႈႁဝ်းၶႃႈတူၺ်းၸုမ်းမႅၵ်ႇၵွင်ႈၶဝ် ၵိုတ်းၵၢၼ်တိုၵ်းတေႃးၵၼ်၊ ဢုပ်ႇၵုမ်လွင်ႈငမ်းယဵၼ် ဝႃႈၼႆသေတႃႉ တေႃႇထိုင် ယၢမ်းလဵဝ် ယင်းတိုၵ်ႉပိုတ်းယိုဝ်းၵၼ်ယူႇတိၵ်းတိၵ်း၊ ထိုင်တီႈႁူဝ်ပဝ်ႈၶွင်ႊသီႊ ဢဝ်ၶိုၼ်းၸိုင်ႈတႆး RCSS ၸဝ်ႈယွတ်ႈသိုၵ်း ပေႃးတူၵ်ႇလၢတ်ႈဝႃႈ- ဢၼ်လႆႈပိုတ်းယိုဝ်းၵၼ်ဝၢႆးၵိုတ်း ယိုဝ်းၼႆႉ ဢမ်ႇၸႂ်ႈၸၼ်ႉပႃႈတႂ်ႈၵူၺ်း၊ ၸၢင်ႈပႃးၽႅၼ်ၵၢၼ်ၸၼ်ႉပႃႈ ၼိူဝ်။ ၵွပ်ႈၼၼ် ပေႃးထိုင်ၸၼ်ႉ ဢုပ်ႇဢူဝ်း ၵၢၼ်မိူင်းၵၼ်မႃးတႄႉတႄႉ လွင်ႈၼႆႉၸွင်ႇလီဝႆႉဝၢင်းၸႂ်ၶႃႈႁႃႉ။ လွင်ႈငမ်းယဵၼ် ဢၼ်ႁဵတ်း သၢင်ႈယူႇၼႆႉ ၸွင်ႇတေမၼ်ႈၵႅၼ်ႇၶႃႈႁႃႉ?။

တွပ်ႇ- ပိူဝ်ႈတႃႇလွင်ႈငမ်းယဵၼ်ႁႂ်ႈပေႃးမၼ်ႈၵႅၼ်ႇၼၼ်ႉ ပိူင်လူင်မၼ်း သွင်ၾၢႆႇတၵ်းလႆႈမီးလွင်ႈယုမ်ႇ ယမ်ၵၼ်၊ ဢၼ်ႁဝ်း ႁူပ်ႉဢုပ်ႇၵၼ်တင်းၸုမ်းလူင်ပွင်ၸိုင်ႈ (ၾၢႆႇၽွင်းငမ်း)ၼႆႉ ႁဝ်းယိူင်းထိုင်လွင်ႈ သုၼ်ႇလႆႈၽဵင်ႇပဵင်း လႄႈ ပိူဝ်ႈတႃႇဢုပ်ႇ ၵၢၼ်မိူင်း။ ၾၢႆႇၼိုင်ႈ ၾၢႆႇၵႅတ်ႇၶႄၸိုင်ႈမိူင်း/တပ်ႉသိုၵ်းသမ်ႉ ၵွပ်ႈၶဝ်လႆႈႁုပ်ႈယိုတ်း ၵုမ်းၵမ်ဢႃႇၼႃႇမႃး လၢႆၵၢပ်ႈလၢႆပၢၼ် ႁိုင်ၼၢၼ်းယဝ်ႉလႄႈ ၵိုင်ႉၵၢင်ႉတေလူတ်း ယွမ်း/ပွႆႇၽႃႈပႅတ်ႈဢႃႇၼႃႇ ၶဝ်ၼၼ်ႉ ၶဝ်တိုၼ်းတေဢမ်ႇၽွမ်ႉ။

ႁူမ်ႈဝႃႈၼၼ်သေတႃႉ ႁဝ်းၶႃႈၸုမ်းပႃႇတီႇၵၢၼ်မိူင်းလႄႈသင်၊ ၸုမ်းၵိုတ်းယိုဝ်း ဢဝ်လွင်ႈငမ်းယဵၼ်ဝႆႉ လႄႈသင်၊ ႁႂ်ႈႁဝ်းပေႃး လႆႈဢုပ်ႇလွင်ႈပၼ်ႁႃၵၢၼ်မိူင်း၊ ႁႂ်ႈလႆႈႁူမ်ႈၵၼ်ၵႄႈလိတ်ႈၼၼ်ႉတႄႉ တၵ်းတေ လႆႈ ၶဝ်ႈႁႃၸွမ်ၸိုင်ႈသေပၼ်ႁႅင်းမၼ်း ၸဝ်ႈ၊ ပိူဝ်ႈတႃႇႁႂ်ႈပေႃးလႆႈဢုပ်ႇၵုမ်ၵၼ်ၵႂႃႇၵႂၢင်ႈၵႂၢင်ႈၶႂၢင်ၶႂၢင်။ ပေႃးဝႃႈ ၶဝ်ၸဝ်ႈယွမ်းႁပ်ႉယူႇ ၶၵ်ႉတွၼ်ႈၼိုင်ႈယဝ်ႉတွၼ်ႈ ၼိုင်ႈ ႁဝ်းၸင်ႇၶိုင်ပွင်ၵႂႃႇ၊ မိူၼ်ၼင်ႇၸုမ်း ဢႃႊသျႅၼ်ႊ (ASEAN) လႄႈသင်၊ ၸုမ်း (UN) လႄႈသင်၊ လိူဝ်ၼၼ်ႉ ၸုမ်းယူႊရွပ်ႉ (EU) လႄႈသင်၊ ၸုမ်းမိူင်းဢမႄႊရိၶိူဝ်ႊ (US)လႄႈသင်၊ ပေႃးႁၼ်ထိုင်ဝႃႈပဵၼ်လွင်ႈၵေႃႇသၢင်ႈၵၢၼ်လီယူႇ ၼႆတႄႉၵေႃႈ ၸုမ်းၾၢႆႇသိုၵ်းၼၼ်ႉ ဢမ်ႇဝၼ်းၼိုင်ႈၵေႃႈဝၼ်းၼိုင်ႈ တိုၼ်းတေလူတ်းယွမ်းလူင်းၵႂႃႇလွႆးလွႆးယူႇ။

ထၢမ်- ယၢမ်းလဵဝ် ပေႃးႁဝ်းၶႃႈတူၺ်းပႃႇတီႇၵၢၼ်မိူင်း၊ ပီႈၼွင်ႉတႆးၵေႃႈမီးလၢႆပႃႇတီႇ၊ တပ်ႉသိုၵ်းၵေႃႈတိုၵ်ႉ မီးပွတ်းႁွင်ႇ ပွတ်းၸၢၼ်း၊ ၵၢင်ၸႂ်ၵူၼ်းမိူင်းႁဝ်းၶႃႈသမ်ႉ မုင်ႈမွင်းၶႂ်ႈႁႂ်ႈပႃႇတီႇၵၢၼ်မိူင်းပဵၼ်ဢၼ်လဵဝ် ၵၼ်၊ တပ်ႉသိုၵ်းၵေႃႈၶႂ်ႈႁႂ်ႈပဵၼ် ဢၼ်လဵဝ်ၵၼ်၊ ၵွပ်ႈၼၼ် ၵၢၼ်ၵေႃႇသၢင်ႈလွင်ႈၽွမ်ႉႁူမ်ႈၼႆႉ ၸွင်ႇတေ ပဵၼ်မႃး ငၢႆႈငၢႆႈၶႃႈႁႃႉ?။

တွပ်ႇ-ၵၢၼ်ၽွမ်ႉႁူမ်ႈဢၼ်ဝႃႈၼႆႉ မၼ်းပဵၼ်ၵၢၼ်လီ ဢၼ်လီဝၢၼ်ၸႂ်ၸဵမ်းၸႂ်လိူဝ်ပိူၼ်ႈ၊ ၵူၺ်းၵႃႈ ပိူဝ်ႈတႃႇၵေႃႇသၢင်ႈႁႂ်ႈ ပဵၼ်လွင်ႈၽွမ်ႉႁူမ်ႈၵၼ်ၼၼ်ႉ တေလႆႈယိူၼ်ႉၸႂ်ဢဝ်ၶၢဝ်းယၢမ်းၼမ်ၼမ်သေ ၶိုၼ်ႈၵႂႃႇၸွမ်းၶၵ်ႉၸွမ်းတွၼ်ႈ၊ လွင်ႈသွင် မူႇသွင်ၸုမ်းႁူမ်ႈၵၼ်ၼႆႉ ပႃႇတီႇၵၢၼ်မိူင်းၵေႃႈလီ၊ တပ်ႉသိုၵ်း ၵေႃႈလီ ၵိုင်ႉၵင်ႉတေမႃးႁူမ်ႈႁွမ်း ၶူၼ်းၶဝ်းၵၼ်သေ လၢတ်ႈဝႃႈႁဝ်းၽွမ်ႉၵၼ်ယဝ်ႉ ၼႆၼၼ်ႉတေ ဢမ်ႇၵိုင်ႉၵင်ႉ ပဵၼ်လႆႈ။ ၼႂ်းလူၵ်ႈၼႆႉၵေႃႈ ပႆႇတွၼ်ႉႁၼ်ၸုမ်းတူဝ်ယၢင်ႇမၼ်း မီးမႃးသေပွၵ်ႈ။ ၵူၺ်းၵႃႈ ဢၼ်ႁဝ်းလႆႈ ၾၢင်ႉၼႆႉ ပိူၼ်ႈတႄႉတေထႅၵ်ႇႁႂ်ႈႁဝ်းတႅၵ်ႇၵၼ်ယူႇ၊ ၼႂ်းၵႄႈၼႆႉ ပေႃးႁဝ်းဢမ်ႇလဵင်ႉ ဝႆႉၸႂ်တႅၵ်ႇၵၼ်ၸိုင် တိုၼ်းတေၽွမ်ႉႁူမ်ႈၵၼ်လႆႈယူႇ။

ထၢမ်- တူဝ်ၸွမ်ၸိုင်ႈၵေႃႈလီ၊ တူဝ်ၵႅမ်ႁူဝ်ပဝ်ႈ ၾၢႆႇၵေႃႇသၢင်ႈလွင်ႈငမ်းယဵၼ် ဢူးဢွင်ႇမိၼ်းၵေႃႈလီ၊ ယင်းဢမ်ႇႁႄႉႁၢမ်ႈလႆႈ တပ်ႉသိုၵ်းလူင်ပွင်ၸိုင်ႈ ယႃႇႁႂ်ႈတိုၵ်းၸုမ်းၸၢဝ်းၶိူဝ်း။ မိူၼ်ၼင်ႇဢူးဢွင်ႇမိၼ်း ယိုၼ်ႈယွၼ်းတၢင်းၸွႆႈထႅမ်မႃးတီႈ ၸဝ်ႈၶုၼ်ထုၼ်းဢူး ႁႂ်ႈၶဝ်ႈၸွႆႈၼႂ်းၵၢၼ်ၵေႃႇသၢင်ႈလွင်ႈငမ်းယဵၼ်ၼႆႉ တေၸၢင်ႈၸွႆႈလႆႈမွၵ်ႈၵႃႈႁိုဝ်၊ တေၸၢင်ႈထိုင်တီႈထိုင် လႅၼ်မွၵ်ႈၵႃႈႁိုဝ်ၶႃႈ?။

တွပ်ႇ- ၵတ်ႉသုတ်းၵေႃႈတေၸၢင်ႈႁွင်ႉဢဝ် ႁူဝ်ၼႃႈၸုမ်းယိပ်းၵွင်ႈၵၢင်ႇ မိူၼ်ၼင်ႇၸဝ်ႈယွတ်ႈသိုၵ်း၊ ၸဝ်ႈပၢင်ႇၾႃႉၸိူဝ်းၼႆႉ ႁႂ်ႈလႆႈႁူပ်ႉထူပ်းၵၼ်တင်းၸွမ်ၸိုင်ႈ၊ ဢမ်ႇၼၼ် တင်းၽူႈမီးပုၼ်ႈၽွၼ်းၼႂ်း လူင်ပွင်ၸိုင်ႈသေ ဢုပ်ႇဢူဝ်းတူၵ်းလူင်းၵၼ် ၸိူဝ်းၼႆႉ တေပဵၼ်လႆႈ။ တီႈဢေႇသုတ်း ၼင်ႇႁိုဝ်ႁဝ်းတေ ဢုပ်ႇဢူဝ်းၵၼ်လႆႈ ပိူဝ်ႈတႃႇမူၼ်ႉမႄးၵႄႈလိတ်ႈပိူင်ငဝ်ႈပိုင်းမိူင်း ၼၼ်ႉ ႁဝ်းတေႁဵတ်းပဵၼ်လႆႈယူႇ၊ ႁႂ်ႈပေႃးၵိုင်ႉၵင်ႉတေသၢင်ႇထုၵ်ႇၵႂႃႇတင်း သွင်ပႃႈသွင်ၾၢႆႇတႄႉ တေၸၢင်ႈမုင်ႈမွင်းယၢပ်ႇ ယူႇ-ဝႃႈၼႆ။

ထၢမ်- ပေႃးႁဝ်းတူၺ်းပၢင်ၵုမ်မိူဝ်ႈဝႃး (26/07/12) ၼႆႉ ၸွင်ႇၸၢင်ႈဝႃႈလႆႈၽိုၼ်ႉၶိုၼ်းၵေႃႁူမ်ႈသၢင်ႈ ၸိုင်ႈတႆး SSJAC ဢၼ်ယၢမ်ႈၵေႃႈတင်ႈမႃးၵႃႈၵွၼ်ႇပူၼ်ႉမႃးၼၼ်ႉၶႃႈႁႃႉ?။

တွပ်ႇ- ဝႃႈလႆႈယူႇ၊ SSJAC ၼႆႉ ၵွပ်ႈပိူဝ်ႈတီႈပွင်ႇမၼ်းၵေႃႈ ပဵၼ်ၵေႃႁူမ်ႈသၢင်ႈၸိုင်ႈတႆး၊ မူႇၸုမ်းလႂ်ၵေႃႈ လီ ပေႃးယိူင်းဢၢၼ်း ပိူဝ်ႈတႃႇၵူၼ်းမိူင်းမီးၽွၼ်းလီ၊ လႆႈလူမ်ၸႂ်ၶႅၼ်းၸႂ်ၼႆတႄႉ ႁဝ်းၶႃႈႁူမ်ႈမိုဝ်းၵၼ် ႁဵတ်းၵၢၼ်လႆႈယူႇ၊ ဢၼ်ႁဝ်းၶႃႈမႃးဢုပ်ႇ ၵၼ် 5-6 ၸုမ်းၼႆႉၵေႃႈ ဢွၵ်ႇၾၢင်ႁၢင်ႈၼၼ်ႉယူႇ။

ထၢမ်- ၼင်ႇဢၼ်ႁဝ်းၶႃႈႁူႉၸွမ်း၊ ယွၼ်ႉ SSJAC ဢွၼ်ၶိုင်သၢင်ႈႁၢင်ႈပွင် ပိူဝ်ႈတႃႇပဵၼ်မႃးၶွင်ႊသီႊၵိူဝ်း ၵုမ်ၸိုင်ႈတႆး လႄႈ ထိုင်တီႈၽူႈၼမ်းတႆးႁဝ်းလၢႆၸဝ်ႈ၊ ပႃးၸဵမ်ၸဝ်ႈၶုၼ်ထုၼ်းဢူး ၺႃးတိၺွပ်း။ ယၢမ်းလဵဝ် မီးလူင်ပွင်ၸိုင်ႈမႂ်ႇယဝ်ႉသေတႃႉ တပ်ႉသိုၵ်းတေဢမ်ႇႁူၼ်လင်ၶိုၼ်း၊ တေဢမ်ႇၸွမ်းလၢႆးၵဝ်ႇ ၶိုၼ်းၼႆ ၸွင်ႇတေၸၢင်ႈဝႃႈလႆႈၶႃႈ?။

တွပ်ႇ- လွင်ႈၼၼ်ႉ မၼ်းမိူၼ်တင်းလပ်းတႃငုမ်းပႃ၊ ၵူၺ်းၵႃႈ မိူဝ်ႈၼၼ်ႉယူႇတီႈ SSJAC ဢမ်ႇတၼ်းလႆႈ ပွင်ၵၢၼ်သင်သေ ဢိတ်း၊ တိုၵ်ႉငႃဝႃႈတေၵေႃႇတင်ႈၸုမ်းၵိူဝ်းၵုမ်ၵၢၼ်မိူင်း ၶွင်မိူင်းတႆးၼႆၵူၺ်း ပေႃးတၼ်းလႆႈ ထုၵ်ႇတိၺွပ်းယဝ်ႉ။ လွင်ႈၼႆႉ ဢမ်ႇၵိုင်ႇပဵၼ်သေဢိတ်း။ ၵူၺ်းၵႃႈမိူဝ်ႈလဵဝ် ဢၼ်ႁူမ်ႈ ၵၼ်ႁဵတ်းသၢင်ႈယူႇၼႆႉ ပိူဝ်ႈတႃႇတပ်ႉသိုၵ်း/ပႃႇတီႇၵၢၼ်မိူင်းပဵၼ် ဢၼ်လဵဝ်၊ ပိူဝ်ႈတႃႇမူၼ်ႉမႄးလႆႈ ပိူင်ငဝ်ႈပိုင်းမိူင်း 2008 ၸိူဝ်းၼႆႉ ႁၼ်ၸႅင်ႈလႅင်းလီယူႇလႄႈ သမ်ႉတိုၵ်ႉဝႃႈထုၵ်ႇၺႃးတိ ၺွပ်းၶင်ၶွၵ်ႈ ယူႇၼႆတႄႉ ၽ်ႂႁဵတ်းၵေႃႈမၼ်းတေပဵၼ် ၽူႈမၢပ်ႇပိုၼ်းၵူၺ်း၊ ယူႇတီႈၾၢႆႇၵေႃႉမၢပ်ႇပိုၼ်း တေလႆႈဝူၼ်ႉ ၼၵ်း ၼႃယူႇ။ ၵွပ်ႈဝႃႈ ႁဝ်းႁဵတ်းၼႆႉပဵၼ်ၼႂ်းၶွပ်ႇ ဢၼ်ႁဝ်းမီးသုၼ်ႇလႆႈလႄႈႁဝ်းၸင်ႇႁဵတ်း- ဝႃႈၼႆ။

ထၢမ်- သင်ဝႃႈလွင်ႈငမ်းယဵၼ်လုၵႂႃႇ၊ ၵူၼ်းၶဝ်ႈၸွႆႈၶဝ် ၸွင်ႇတေၸၢင်ႈၺႃးၵိၼ်ၸွမ်းၶႃႈႁႃႉ။ ၵဵဝ်ႇၵပ်း လွင်ႈၸိူဝ်းၼႆႉ ဢူးဢွင်ႇမိၼ်းၸွင်ႇပၼ်ၵႂၢမ်းမၼ်ႈ ၶေႃႈမၼ်းၵႅၼ်ႇၸိူင်ႉႁိုဝ်ၶႃႈ။

တွပ်ႇ- မိူဝ်ႈဝၼ်းႁဝ်းၶႃႈဢုပ်ႇၵၼ်ၼၼ်ႉ ႁူဝ်ပဝ်ႈၶုၼ်ထုၼ်းဢူး လၢတ်ႈတီႈဢူးဢွင်ႇမိၼ်း ပၢၵ်ႇၼႃႈၽွင်း လူင် ဢူးၸူဝ်းတဵင်း၊ ၸွမ်ၸိုင်ႈၸိသင်ႇပိူင်ၼိုင်ႈ၊ တၢင်းတႂ်ႈႁဵတ်းပိူင်ၼိုင်ႈ။ ပေႃးပဵၼ်ၸိူင်ႉၼၼ်သိုပ်ႇ ၵႂႃႇတႄႉႁဝ်းၶႃႈဢမ်ႇၸၢင်ႈ ၸွႆႈသူ၊ ၾၢႆႇၸၢဝ်းၶိူဝ်းၵေႃႈ တေဢမ်ႇယုမ်ႇယမ်ႁဝ်း၊ ဢမ်ႇသၢင်ႇတေႃႇ ပေႃးဝႃႈလွင်ႈ ငမ်းယဵၼ်လုမႃး၊ သူၸဝ်ႈသမ်ႉတေ ႁႃလိူင်ႈ တၢင်ႇတၢင်းၽိတ်း လွင်ႈတိတ်းတေႃႇၵူၼ်း ထိူၼ်ႇ၊ ၶေႃႈႁႃဢၼ်ၼၼ်ႉဢၼ်ၼႆႉၸိူဝ်းၼႆႉ။

ဢူးဢွင်ႇမိၼ်း တွပ်ႇလၢတ်ႈတေႃႇပၢၵ်ႇၼႃႈပႃႇတီႇၵၢၼ်မိူင်းတင်း 14 ပႃႇတီႇဝႃႈ- တိုၼ်းတေဢမ်ႇႁႂ်ႈလႆႈ ပဵၼ်၊ ယွၼ်ႉ 17/1 သေ ပိူၼ်ႈမႃးတိၺွပ်းၸဝ်ႈႁဝ်း (ၶုၼ်ထုၼ်းဢူး)ၵႂႃႇၵုမ်းၶင်ၶွၵ်ႈၵေႃႈ ၶႃႈတေၵႂႃႇဢဝ် ဢွၵ်ႇ၊ ဢဝ်ဢွၵ်ႇဢမ်ႇလႆႈၵေႃႈတူဝ် ၶႃႈတေၶဝ်ႈယူႇၼႂ်းၶွၵ်ႈၸွမ်း။ ၶေႃႈမၼ်ႈၵႅၼ်ႇတႄႉတိုၵ်ႉလႆႈမႃး ၼင်ႇၼႆ၊ ၵူၺ်းၵႃႈ ဢမ်ႇၸႂ်ႈၵႂၢမ်းမၼ်ႈၶဝ်ႈတၢင်းၵၢၼ်၊ တိုၵ်ႉပဵၼ်လူမ်းၵူၺ်း၊ ၶႂ်ႈႁဵတ်းၸင်ႇႁဵတ်းၸွမ်း၊ လွင်ႈၼႆႉမီးတီႈႁဝ်း တႅပ်းတတ်းဢဝ် ႁင်းၽႂ်မၼ်း။

ထၢမ်- ပၢင်ၵုမ်မိူဝ်ႈဝႃးမိူဝ်ႈသိုၼ်းၼႆႉ ယိူင်းဢၢၼ်းသုင်သုတ်း ပဵၼ်လွင်ႈၽွမ်ႉႁူမ်ႈၼႆ ၸွင်ႇဝႃႈလႆႈၶႃႈ?။

တွပ်ႇ- ပိူဝ်ႈတႃႇၵေႃႇသၢင်ႈလွင်ႈၽွမ်ႉႁူမ်ႈႁဝ်းၼၼ်ႉ 1.တႆးတေႃႇတႆး ထုၵ်ႇလႆႈၽွမ်ႉႁူမ်ႈၵၼ်ဢွၼ်တၢင်း၊ ပႃႇတီႇၵၢၼ်မိူင်း တႆးၼင်ႇၵၼ် ထုၵ်ႇလႆႈဢဝ်ၶေႃႈလဵဝ်သဵင်လဵဝ်ၵၼ်၊ ထုၵ်ႇဝႆႉတႃႈယိူင်းမိူၼ်ၵၼ်။ 2.တပ်ႉ သိုၵ်းၼင်ႇၵၼ် ထုၵ်ႇဝႆႉတႃႈယိူင်း မိူၼ်ၵၼ်သေ ႁူမ်ႈၵၼ်။ 3.ပႃႇတီႇၵၢၼ်မိူင်းလႄႈ တပ်ႉသိုၵ်းမိူင်းတႆး တင်းသဵင်ႈ ထုၵ်ႇလႆႈပဵၼ်ၶေႃႈလဵဝ်သဵင်လဵဝ်။ ပေႃးၼၼ် ၸင်ႇ ဢၼ်ႁဝ်းၶႃႈမုင်ႈမွင်းဝႃႈ သုၼ်ႇလႆႈ ၽဵင်ႇပဵင်းၵၼ်လႄႈ ႁူဝ်မႃႇပဵင်းၵၼ်၊ ၵုမ်းၵမ်လႆႈၸႃတႃတူဝ်ၵဝ်ႇႁင်းၵူၺ်းၼၼ်ႉ တေပဵၼ်မႃး။ ၵႃႈႁဝ်းၶႃႈ မိူင်းတႆးပတ်းပိုၼ်ႉ ၶိူဝ်းတႆးပတ်းပိုၼ်ႉ ပႆႇဢွမ်ႇလွမ်ႈၽွမ်ႉသဵင်ပဵင်းပၢၵ်ႇၵၼ်ၼၼ်ႉ ဢၼ်ႁဝ်းၶႃႈ မုင်ႈမွင်းဝႆႉတေၼၢၼ်းၵႆဝႆႉယူႇ၊ ၵွပ်ႈၼၼ် ၶႂ်ႈႁႂ်ႈၵူႈမူႇၵူႈၸုမ်း ဢမ်ႇဝႃႈတၢင်းၼႂ်းတၢင်းၼွၵ်ႈတူဝ်ႈလူၵ်ႈ၊ တႆးၵူႈတီႈၵူႈလႅၼ် ၶႂ်ႈႁႂ်ႈၽွမ်ႉသဵင်ပဵင်းပၢၵ်ႇၵၼ်- ၽူႈၶၢၼ်ပၢၵ်ႇႁူဝ်သိူဝ် ၶွတ်ႇယွတ်ႈလူပ်းလင်ပၢႆၵႂၢမ်း ၵႂႃႇၼင်ႇၼႆ။