ဢိင်ၼိူဝ်ၾူၼ်တူၵ်းႁႅင်းလၢႆဝၼ်းသေ ၼမ်ႉမႃႉဢၼ် လႆလတ်းၽၢၼ်ႇဝဵင်းမိူင်းလႃး လုပ်ႇၼွင်းယိုင်ႈထူမ်ႈ ၼႂ်းဝဵင်းမိူင်းလႃး၊ လူတ်ႉၵႃးလုၵွႆၼမ်။ ၼွၵ်ႈသေၼၼ်ႉ တၢင်းမိူင်းမႃႉ၊ ဝၢၼ်ႈသဵဝ်ႈ၊ ၵဵင်းၶၢင်ၵေႃႈ ၺႃးၽေးၼမ်ႉ ထူမ်ႈ။

ဝၼ်းထိ 26/07/12 (မိူဝ်ႈဝႃး) ဝၢႆးဝၼ်းတင်ႈတႄႇယၢမ်းမွၵ်ႈ 2-3 မူင်း၊ ၵေးၼမ်ႉမႃႉဢၼ်လႆလတ်းၽၢၼ်ႇ ဝဵင်းမိူင်းလႃး တႄႇၼွင်းယိုင်ႈၶိုၼ်ႈသေ ထိုင်မႃးယၢမ်းႁူဝ်ၶမ်ႈ 4-5 မူင်းၵေႃႈလူၼ်ႉၾင်ႇ ႁဵတ်းႁႂ်ႈၼမ်ႉ လုပ်ႇထူမ်ႈ ပိုၼ်ႉတီႈၼႃႈလိၼ် တီႈၶူင်ႈတီႈယၢၼ်း မိူၼ်ၼင်ႇပွၵ်ႉၶၢႆလူတ်ႉၵႃး၊ ပွၵ်ႉမႄးၵႃး တႄႇဢဝ်ႁေႃ ၼႃႇလီႇလူင်ၵၢင်ဝဵင်း တေႃႇထိုင်လႅၼ်လိၼ်ၶႄႇ- ၼႆယဝ်ႉ။

ၵူၼ်းမိူင်းလႃးၵေႃႉၼိုင်ႈလၢတ်ႈဝႃႈ- လူတ်ႉၵႃးဢၼ်ပိူၼ်ႈတမ်းဝၢင်းၶၢႆၼႂ်းႁၢၼ်ႉၸိူဝ်းဢမ်ႇတၼ်းၶၢႆႉ ဢိၵ်ႇလူတ်ႉၵႃးသုၼ်ႇ တူဝ်ၵူၼ်းမိူင်း ၸိူဝ်းၸွတ်ႇဝႆႉၸွမ်းႁိူၼ်း ၸိူဝ်းၼႆႉမွၵ်ႈ 100 လမ်းပၢႆ ၼမ်ႉထူမ်ႈ မူတ်း၊ ယွၼ်ႉၾူၼ်ၵေႃႈသိုပ်ႇတူၵ်းႁႃႇယႂ်ႇ ႁႃႇလူင်ဢမ်ႇထၢတ်ႇသေ ၵူၼ်းဝၢၼ်ႈၵူၼ်းမိူင်းၸိူဝ်းယူႇသဝ်း ႁိမ်းၾင်ႇၼမ်ႉလႆႈတေႃႉၶူဝ်းလဵင်း ပၢႆႈဢွၵ်ႇတင်းၶိုၼ်း တေႃႇထိုင်တဵင်ႈၶိုၼ်ႈ၊ တီႈမိူင်းလႃးၼႆႉ လုၵ်ႈဢွၼ်ႇႁူင်းႁဵၼ်းႁၢႆၵေႃႉၼိုင်ႈ- ဝႃႈၼႆ။

ၼႂ်ၼႆႉတႄႉၼမ်ႉယွမ်းလူင်းယဝ်ႉ၊ ၵူၺ်းၵႃႈ ၼမ်ႉမႃႉဢၼ်လႆၽၢၼ်ႇၼႂ်းၵၢင်ဝဵင်းမိူင်းလႃးတႄႉ တိုၵ်ႉၼွင်း ယိုင်ႈပဵင်းၾင်ႇ လႆႁႅင်းယူႇ၊ မိူဝ်ႈၼႆႉ (ဝၼ်းထိ 27/07/12) ၾူၼ်တိုၵ်ႉသိုပ်ႇတူၵ်းလူင်းႁႅင်း ႁႃႇယႂ်ႇႁႃႇ လူင်ယူႇ။ သင်ဝႃႈၾူၼ်တူၵ်းဢမ်ႇ ထၢတ်ႇတႄႉၼမ်ႉၸၢင်ႈထူမ်ႈထႅင်ႈ။ ၼွၵ်ႈသေတီႈမိူင်းလႃးယဝ်ႉ တိူၵ်ႇႁႆႈလွၵ်းၼႃး ၵူၼ်းဝၢၼ်ႈၵူၼ်းမိူင်းတၢင်းမိူင်းမႃႉ-ဝၢၼ်ႈသဵဝ်ႈ တၢင်းဢွၵ်ႇမႃးၵဵင်းတုင် ၼပ်ႉပၢၵ်ႇ ဢေႊၶိူဝ်ႊၸိူဝ်းၼၼ်ႉၵေႃႈ ၼမ်ႉထူမ်ႈမူတ်း- ဝႃႈၼႆ။

ၽူႈမီးၸၼ်ႉၸုမ်းမိူင်းလႃးၸဝ်ႈၼိုင်ႈလၢတ်ႈဝႃႈ- ပီၼႆႉပဵၼ်ဢၼ်လၢၵ်ႇလၢႆးတႄႉ၊ ၵူႈပီထူမ်ႈၵေႃႈဢိတ်း ဢွတ်း ၵူၺ်း၊ ဢမ်ႇတွၼ်ႈထူမ်ႈမိူၼ်ၼင်ႇပီၼႆႉသေပွၵ်ႈ။ ၼႂ်းၶၢဝ်းတၢင်း တႄႇတင်ႈဝဵင်းမိူင်းလႃးမႃးၶၢဝ်း တၢင်းလႆႈ 20 ပီၼႆႉ ၼမ်ႉထူမ်ႈ ပွၵ်ႈၼႆႉပဵၼ်ပွၵ်ႈဢၼ်ႁၢဝ်ႈႁႅင်းသုတ်း- ဝႃႈၼႆ။

သဵၼ်ႈတၢင်းၼမ်ႉလႆ ၼႃႈလိၼ်မိူင်းလႃးၼႆႉ မႄႈၼမ်ႉမႃႉလႆလတ်းၽၢၼ်ႇဝဵင်းမိူင်းလႃး ၵႂႃႇၶဝ်ႈၼမ်ႉလမ်း၊ ၼမ်ႉလင်းသိုပ်ႇ ၶဝ်ႈၼမ်ႉလူၺ် ၸင်ႇၵႂႃႇပွင်ႇသူပ်းၶွင်။ ယွၼ်ႉၼမ်ႉမႃႉၼွင်းႁႅင်းသေ မႄႈၼမ်ႉလၢႆသၢႆၵႂႃႇ ၶွၼ်ႈၵၼ်လႄႈ ၵူၼ်းမိူင်းၸိူဝ်းယူႇ သဝ်းၸွမ်းၾင်ႇၼမ်ႉလူၺ် မိူၼ်ၼင်ႇပွတ်းၵဵင်းၶၢင် ၼမ်ႉပၢၼ်းၸိူဝ်း ၼႆႉၵေႃႈၺႃးၽေးၼမ်ႉထူမ်ႈၼမ်။ မိူဝ်ႈဝႃးၼႆႉ (26/07/12) တီႈၵဵင်းၶၢင် ၼမ်ႉၼွင်းပတ်ႉ ႁိူၼ်းၸိူဝ်းယူႇ ၸမ်ၾင်ႇၼမ်ႉၵႂႃႇ 3 လင်၊ ၵူၼ်း 3 ၵေႃႉႁၢႆၵႂႃႇၸွမ်း တေႃႇထိုင်မိူဝ်ႈ လဵဝ် (မိူဝ်ႈၼႆႉပွတ်းၼႂ်) ယင်းႁႃပႆႇ ႁၼ် - ၼႆယဝ်ႉ။ လႆႈႁူႉဝႃႈမိူဝ်ႈလဵဝ် ၸဝ်ႈၼႃႈတီႈမိူင်းလႃး ပႃးၸဵမ်သိုၵ်း တိုၵ်ႉတေႃႉၶူဝ်းၸွႆႈၵူၼ်း မိူင်းၸိူဝ်းယူႇသဝ်း ၵိၼ်ၸမ်ႁိမ်းၾင်ႇၼမ်ႉ၊ ၵမ်ႈၽွင်ႈၵေႃႈတႅပ်းမႆႉႁႄႉတၢင်းၼမ်ႉၸိူဝ်းၼႆႉ- ဝႃႈၼႆ။