ပၢင်တိုၵ်းဝူင်ႈၵၢင်သိုၵ်းမၢၼ်ႈ တင်းသိုၵ်းတႆး SSPP/SSA ယဝ်ႉတူဝ်ႈၵႂႃႇဝၢႆးသိုၵ်းတႆးထွၼ်ပၼ်တပ်ႉၵမ်ႈ ၽွင်ႈ ယဝ်ႉၵေႃႈ သွင်ၾၢႆႇယင်းတိုၵ်ႉၶဵင်ႈၶႅင်ၵၢၼ်သိုၵ်းတေႃႇ ၵၼ်၊ ၵူၼ်းမိူင်းယင်းတိုၵ်ႉထုၵ်ႇသိုၵ်း မၢၼ်ႈပူၼ်ႉပႅၼ် သုၼ်ႇလႆႈၵူၼ်း။

ဢိင်ၼိူဝ်ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ထွၼ်ပၼ်တပ်ႉၵမ်ႈၽွင်ႈ ပွတ်းမိူင်းဢွတ်ႇ တွင်ႁဵဝ်း ၼႂ်းၸႄႈဝဵင်းမိူင်းသူႈ၊ ပွတ်းဝၢၼ်ႈလဝ်း 7 လၵ်း ၼႂ်းၸႄႈဝဵင်းတၢင်ႉယၢၼ်းသေ ပၢင်တိုၵ်း ဢၼ်တႄႇပဵၼ်မႃးၸဵမ်မိူဝ်ႈၽွင်း ၵၢင်လိူၼ်ၵျုၼ်ႊ ယဝ်ႉတူဝ်ႈၵႂႃႇၽွင်းႁူဝ်လိူၼ်ၵျူႊလၢႆႊ (2012)ၼႆႉသေတႃႉ ငဝ်းလၢႆးၵၢၼ်သိုၵ်းဝူင်ႈၵၢင်သိုၵ်းတႆးတင်း သိုၵ်းမၢၼ်ႈ ယင်းတိုၵ်ႉၶဵင်ႈၶႅင်တေႃႇၵၼ် ယူႇ၊ ၵူၼ်းဝၢၼ်ႈၵူၼ်းမိူင်းၵေႃႈ ယင်းတိုၵ်ႉထုၵ်ႇသိုၵ်းမၢၼ်ႈပူၼ်ႉပႅၼ်ၵၼ်ႉၸၼ် လူလၢႆယူႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းၼုမ်ႇတၢင်ႉယၢၼ်းႁွတ်ႈလႃႈသဵဝ်ႈၵေႃႉၼိုင်ႈ လၢတ်ႈဝႃႈ- သိုၵ်းတႆးထွၼ်ပၼ်တပ်ႉ ၵမ်ႈၽွင်ႈသေ တႃႉၵေႃႈ သိုၵ်းမၢၼ်ႈယင်းတိုၵ်ႉသိုပ်ႇတူင်ႉၼိုင်ပွတ်းတွၼ်ႈၼၼ်ႉယူႇ။ တပ်ႉဢၼ်သိုၵ်း တႆး ထွၼ်ဢွၵ်ႇပၼ်ၼၼ်ႉၵေႃႈ သိုၵ်းမၢၼ်ႈၶိုၼ်ႈပုတ်ႈပၵ်း။ ပူၼ်ႉမႃးမိူဝ်ႈဝၼ်းထိ 9 ၼႆႉ သိုၵ်းမၢၼ်ႈ ၶလယ 127 လႄႈ ၶလယ 68 ႁူမ်ႈၵၼ်သေ ၵႂႃႇၵၼ်ႉ ၸၼ်လူလၢႆၼၢင်းယိင်းၸၢဝ်းပလွင်ႈ ၸိုဝ်ႈၼၢင်း ၶမ်း ဢႃႇယု 35 ၊ ၼၢင်းၶွင်ႇ ဢႃႇယု 36 ၊ တီႈလွႆၸွင်ႈ ၼႂ်းဢိူင်ႇၼမ်ႉလဝ်း၊ ၸႄႈဝဵင်းတၢင်ႉယၢၼ်း။ ၼွၵ်ႈသေၼၼ်ႉ သိုၵ်းမၢၼ်ႈယင်းယႃႉဢဝ်ႁူဝ်ႉႁႆႈႁူဝ်ႉၼႃးၵူၼ်းဝၢၼ်ႈၵႂႃႇႁဵတ်းတပ်ႉၶဝ်ထႅင်ႈ- ဝႃႈၼႆ။

တပ်ႉသိုၵ်း SSPP/SSA ထွၼ်ပၼ်တပ်ႉတၢင်းပွတ်း 7 လၵ်း၊ ပွတ်းမိူင်းဢွတ်ႇမိူဝ်ႈႁူဝ်လိူၼ်ၼႆႉသေတႃႉ ၵေႃႈ ဢၼ်ၾၢႆႇ သိုၵ်းမၢၼ်ႈတုၵ်းယွၼ်းဝႆႉ ႁႂ်ႈသိုၵ်းတႆးထွၼ်သိုၵ်းၵႂႃႇယူႇၾၢႆႇတူၵ်းတၢင်းၵႃး တၢင်ႉယၢၼ်း၊ ၼမ်ႉလဝ်း၊ မိူင်းဢွတ်ႇ၊ မိူင်းသူႈၼၼ်ႉ ယွၼ်ႉၾၢႆႇတႆးဢမ်ႇႁပ်ႉၵူၺ်းပႆႇပေႃး၊ ယင်းတိုၵ်ႉသိုပ်ႇတူင်ႉ ၼိုင်ယူႇပွတ်းတွၼ်ႈ ၼၼ်ႉၵေႃႈပိူင်ၼိုင်ႈ။ ထႅင်ႈၾၢႆႇၼိုင်ႈ သိုၵ်းမၢၼ်ႈၵေႃႈယင်းတိုၵ်ႉသိုပ်ႇတူင်ႉၼိုင် ပၵ်းဢဝ်တီႈယူႇၸွမ်းတၢင်းၵႃး တၢင်ႉယၢၼ်း၊ ၼမ်ႉလဝ်း၊ မိူင်းဢွတ်ႇ၊ မိူင်းသူႈ ၸိူဝ်းၼႆႉယူႇ။ ၵွပ်ႈၼၼ် ပေႃးဝႃႈသိုၵ်းတင်းသွင်ၾၢႆႇႁူပ်ႉၵၼ်ၼႂ်းထိူၼ်ႇၵေႃႈ ၸၢင်ႈၵိူတ်ႇပၢင်တိုၵ်းလႆႈတႃႇသေႇ - ၽူႈမီးၸၼ်ႉ ငဝ်ႈငုၼ်းဝၢၼ်ႈႁႆးၸဝ်ႈၼိုင်ႈလၢတ်ႈ ၼင်ႇၼႆ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉၵေႃႈ လၢတ်ႈဝႃႈ- ပၢင်တိုၵ်းဢၼ်တႄႇမႃး ၸဵမ်မိူဝ်ႈဝၼ်းထိ 17 (လိူၼ်ၵျုၼ်ႊ)သေယဝ်ႉၵႂႃႇမိူဝ်ႈဝၼ်းထိ 4 (လိူၼ်ၵျူႊလၢႆႊ)ၼႆႉ ၾၢႆႇႁဝ်းၶႃႈထွၼ် ပၼ် တပ်ႉၵမ်ႈၽွင်ႈသေတႃႉၵေႃႈ ၾၢႆႇသိုၵ်းမၢၼ်ႈယင်းတိုၵ်ႉၵႂႃႇမႃးတူင်ႉၼိုင် ၼႂ်းၸႄႈဝဵင်းတၢင်ႉယၢၼ်း မိူင်းသူႈ ၼႃႈလိၼ်ပွတ်းတွၼ်ႈႁဝ်းၶႃႈတူင်ႉၼိုင်ယူႇ။ ၾၢႆႇၼိုင်ႈၵေႃႈ ၾၢႆႇႁွင်ႇတၢင်းၵႃးသီႇပေႃႉ-လႃႈသဵဝ်ႈ ၸိူဝ်းၼႆႉၵေႃႈ 3-4 ဝၼ်းၼိုင်ႈပွၵ်ႈ ယင်းတိုၵ်ႉငိၼ်းဝႃႈပဵၼ်ပၢင်တိုၵ်း ၵၼ်ယူႇ။ ၵွပ်ႈၼၼ် မိူဝ်ႈလဵဝ်ၼႆႉ ယူႇတီႈတူဝ်ႈတႅၼ်းႁဝ်းၶႃႈတင်းတူဝ်တႅၼ်းလူင်ပွင်ၸိုင်ႈ တေမီးတိုဝ်ႉတၢင်းႁူပ်ႉထူပ်းဢုပ်ႇ ၵၼ်ထႅင်ႈ မိူဝ်ႈလႂ် ၵေႃႈပႆႇၸၢင်ႈဝႃႈ၊ ၸူဝ်ႈၸႃႈၼႆႉ ဢူးတဵင်းၸေႃႇ ၵေႃႈဢမ်ႇတိတ်းတေႃႇမႃးသေပွၵ်ႈ- ဝႃႈၼႆ။

ၽွင်းၵၢင်လိူၼ်ၵျူၼ်ႊပူၼ်ႉမႃး ဢူးတဵင်းၸေႃႇ ၵႅမ်ႁူဝ်ပဝ်ႈ 3 ၶွမ်ႊမတီႊၶိုင်ပွင်လွင်ႈငမ်းယဵၼ်မိူင်းႁူမ်ႈ တုမ် တႅမ်ႈလိၵ်ႈ ႁွင်ႉမွၵ်ႇထိုင် SSPP/SSA ငဝ်ႈငုၼ်းဝၢၼ်ႈႁႆး ႁႂ်ႈၵႂႃႇဢုပ်ႇလွင်ႈငမ်းယဵၼ် တီႈၼေႇပျီႇ တေႃႇ၊ ပိူဝ်ႈတႃႇ ႁႂ်ႈလွင်ႈငမ်းယဵၼ် ၶိုပ်ႈၼႃႈၶိုၼ်ႈသင်ႉထႅင်ႈလိူဝ်ၵဝ်ႇ။ ၵၢၼ်ႁူပ်ႉဢုပ်ႇၵၼ် ႁႂ်ႈပဵၼ်ဝၢႆးလင် ဝၼ်းထိ 20 ဝႃႈၼႆသေတႃႉ ယွၼ်ႉပိူဝ်ႈၵိူတ်ႇပဵၼ် ပၢင်တိုၵ်းၵၼ်လႄႉ ႁဵတ်းႁႂ်ႈၵၢၼ်ဢုပ်ႇဢူဝ်းလုလႅဝ်ၵႂႃႇ။

မိူဝ်ႈဝၼ်းထိ 28/01/12 ၶွမ်ႊမတီႊငဝ်ႈငုၼ်းဢုပ်ႇလွင်ႈငမ်းယဵၼ် SSPP/SSA ႁူပ်ႉဢုပ်ႇၸဝ်ႈၼႃႈတီႈ မၢၼ်ႈ လူင်ပွင်ၸိုင်ႈ တဵင်းၸဵင်ႇ လွင်ႈငမ်းယဵၼ်ၸၼ်ႉၸႄႈမိူင်းလႄႈၸၼ်ႉၸိုင်ႈမိူင်းႁူမ်ႈတုမ် တီႈလုမ်း လူင်ပွင်ၸိုင်ႈမိူင်းတႆး ဝဵင်းတူၼ်ႈတီး။ ပိူဝ်ႈတႃႇၵေႃႇသၢင်ႈလွင်ႈငမ်းယဵၼ်ၼၼ်ႉ သွင်ၾၢႆႇလႆႈလူင်းလၢႆး မိုဝ်း ၵိုတ်းယိုဝ်းၵၼ်မႃး၊ ၵူၺ်းၵႃႈ ဝၢႆးမႃးယွၼ်ႉၾၢႆႇတပ်ႉ သိုၵ်းမၢၼ်ႈႁၢင်ႈသိုၵ်းလေႃႇတိုၵ်းတပ်ႉ SSPP/SSA ဢွၼ်တၢင်းသေ သွင်ၾၢႆႇတိုၵ်ႉပဵၼ်ပၢင်တိုၵ်းၵၼ်ယူႇ၊ ထိုင်ဝၼ်းမိူဝ်ႈ ၼႆႉၵေႃႈ တိုၵ်ႉၶဵင်ႈသိုၵ်း တေႃႇၵၼ်ဝႆႉ။