ၸွမ်းၼင်ႇလႆႈဢွၵ်ႇၶၢဝ်ႇၵႂႃႇမိူဝ်ႈလိူၼ်ပူၼ်ႉဝႃႈ တပ်ႉသိုၵ်းဝႃႉ သိုဝ်ႉၵွင်ႈၵၢင်ႇတီႈၶူဝ်ႊရီႊယိူဝ်ႊႁွင်ႇၼၼ်ႉ ယူႇတီႈဝႃႉတွပ်ႇဝႃႈဢမ်ႇၸႂ်ႈ၊ ၼႂ်းတပ်ႉသိုၵ်းဝႃႉမီးၵွင်ႈ ၵၢင်ႇဢၼ်လုၵ်ႉတၢင်ႇ ဝၢၼ်ႈတၢင်ႇမိူင်းမႃးၵူၺ်း။

ဝၼ်းထိ 04/07/12 (မိူဝ်ႈဝႃး) ၵူၼ်းၸမ်ၸႂ်ၸဝ်ႈၼႃႈတီႈၸၼ်ႉသုင်ၼႂ်းၸုမ်းဝႃႉၵေႃႉၼိုင်ႈ ၼႂ်းတပ်ႉသိုၵ်း မိူင်းဝႃႉၽွမ်ႉႁူမ်ႈ UWSA ငဝ်ႈငုၼ်းပၢင်သၢင်း ပွင်ႇလၢတ်ႈမႃးဝႃႈ- ဢၼ်ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ဢွၵ်ႇၶၢဝ်ႇၵႂႃႇ (မိူဝ်ႈ 11/06/12)ဝႃႈ ၸုမ်းဝႃႉႁဝ်းသိုဝ်ႉၶိူင်ႈၵွင်ႈၵၢင်ႇၶူဝ်ႊရီႊယိူဝ်ႊႁွင်ႇ (ၵဝ်းလီၼိူဝ်) တင်းမူတ်း 42 တူႈၶွၼ်ႊထဵၼ်ႊၼိူဝ်ႊ(Container)ၼၼ်ႉ ဢမ်ႇၸႂ်ႈလႃးလႃး။ ၶိူင်ႈၵွင်ႈၵၢင်ႇဢၼ်မီးဝႆႉၼႂ်း တပ်ႉသိုၵ်းလႄႈ မီးဝႆႉၼႂ်းၵူဝ်ႇတွင်ႇႁဝ်းၸိူဝ်းၼႆႉ လုၵ်ႉတၢင်ႇတီႈမႃးလွၼ်ႉလွၼ်ႉ၊ ဢမ်ႇၸႂ်ႈလုၵ်ႉတီႈမိူင်း ၶူဝ်ႊရီႊယိူဝ်ႊႁွင်ႇမႃး၊ ယႃႇဝႃႈတေသိုဝ်ႉၵွင်ႈတီႈၶူဝ်ႊရီႊယိူဝ်ႊႁွင်ႇ၊ ႁဝ်းတေတိတ်းတေႃႇၵပ်းသိုပ်ႇၶဝ် ၸိူင်ႉႁိုဝ် ႁင်းယင်းဢမ်ႇႁူႉ လၢႆးမၼ်း- ဝႃႈၼႆ။

ၵႃႈပူၼ်ႉမႃး ၽႂ်ဢမ်ႇၽႂ်ၵေႃႈႁူႉဝႃႈ ၶိူင်ႈၵွင်ႈၵၢင်ႇတပ်ႉသိုၵ်းဝႃႉၵမ်ႈၼမ် လုၵ်ႉတီႈမိူင်းၶႄႇမႃး။ ၵူၺ်းၵႃႈ တင်ႈတႄႇပီ 2009 ဝၢႆးၸုမ်းသိုၵ်းမၢၼ်ႈ တဵၵ်းမိပ်ႇဝႃႉလႅၵ်ႈလၢႆႈႁဵတ်းတပ်ႉပႂ်ႉလႅၼ်လိၼ် BGF မႃးၼႆႉ လွင်ႈသိုဝ်ႉၵွင်ႈၵၢင်ႇ၊ ပိူဝ်ႈတႃႇသိုဝ်ႉလႆႈ ၶိူင်ႈၵွင်ႈၵၢင်ႇၼၼ်ႉ တပ်ႉသိုၵ်းမိူင်းဝႃႉလႆႈ တိတ်းတေႃႇၵပ်းသိုပ်ႇ မိူင်းႁိမ်းႁွမ်းၵိၼ်ၸမ်လၢႆလၢႆၸိုင်ႈမိူင်း- မီးၵၢၼ်ႁၢႆးငၢၼ်း ၶၢဝ်ႇမႃးၼင်ႇၼႆ။

ၶဝ်ႈတူၺ်းႁူဝ်ယွႆႈဢၼ်ဢွၵ်ႇၶၢဝ်ႇၵႂႃႇမိူဝ်ႈဝၼ်းထိ 11/06/12 လႆႈတီႈ- http://www.shan.panglong.org/news/war/2539-2012-06-11-11-42-44.html