ဢိင်ၼိူဝ်တပ်ႉသိုၵ်းမၢၼ်ႈၸႂ်ႉႁႅင်းသိုၵ်းလေႃႇတိုၵ်းတပ်ႉသိုၵ်းၸိုင်ႈတႆး SSPP/SSA တႄႇႁၢင်လိူၼ် ၵျုၼ်ႊ မႃးသေ ပိူဝ်ႈတႃႇၵိုတ်းယိုဝ်းၵၼ်ၼၼ်ႉ SSPP/SSA တႅမ်ႈလိၵ်ႈၸူးၸွမ်ၸိုင်ႈတဵင်းၸဵင်ႇ၊ ၵူၺ်းၵႃႈတဵင်းၸဵင်ႇ ၸိသင်ႇလူင်းႁႂ်ႈၵိုတ်းယိုဝ်းၵၼ်သေတႃႉ ယင်းတိုၵ်ႉ သိုပ်ႇပဵၼ်ပၢင်တိုၵ်းလႄႈ လႅပ်ႈၸႂ်ႉပႃးမၢၵ်ႇၶေႊမီႊ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉ လၢတ်ႈ ဝႃႈ- မိူဝ်ႈႁၢင်လိူၼ်ၵျုၼ်ႊၼၼ်ႉ ပဵၼ်ပၢင်တိုၵ်း 4 ဝၼ်းထတ်းၵၼ် (19-22/06/12)၊ တူဝ်ႁဝ်းၶႃႈလႆႈၵႂႃႇတီႈဝဵင်းလိူဝ်ႇသေၵႂႃႇဢုပ်ႇ ဢူးတဵင်း ၸေႃႇ(ၵႅမ်ႁူဝ်ပဝ်ႈ 3 ၶွမ်ႊမတီႊ ၶိုင်ပွင်လွင်ႈငမ်းယဵၼ်မိူင်းႁူမ်ႈတုမ်)၊ ယူႇတီႈဢူးတဵင်းၸေႃႇ တႅမ်ႈလိၵ်ႈထိုင်ၸွမ်ၸိုင်ႈတဵင်းၸဵင်ႇ။ ဢူးတဵင်း ၸေႃႇၵေႃႈ လၢတ်ႈဝႃႈ ၸွမ်ၸိုင်ႈတဵင်းၸဵင်ႇၸိသင်ႇလူင်းႁႂ်ႈၵိုတ်း ၵၢၼ်တိုၵ်းတေႃးၵၼ်ယဝ်ႉ ဝႃႈၼႆသေတႃႉ ၽိူဝ်ႇႁဝ်းၶႃႈပွၵ်ႈမႃးထိုင် ၶိုၼ်းငဝ်ႈငုၼ်း (ဝၢၼ်ႈႁႆး) မိူဝ်ႈဝၼ်းထိ 30/06/12 ၼၼ်ႉ သိုၵ်းမၢၼ်ႈ ပေႃးႁၢင်ႈသိုၵ်းလေႃႇတိုၵ်းႁဝ်းၶႃႈထႅင်ႈယဝ်ႉ- ဝႃႈၼႆ။

ဢၼ်ႁႅၼ်းသိုၵ်းလေႃႇတိုၵ်းတပ်ႉသိုၵ်း SSPP/SSA ယၢမ်းလဵဝ်ၼႆႉ ပဵၼ်တပ်ႉသိုၵ်းမၢၼ်ႈတပ်ႉၵွင်တႂ်ႈတိူင်းသိုၵ်းဝၼ်း ဢွၵ်ႇၵၢင် (ၶူဝ်လမ်) လႄႈ တႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) တင်းမူတ်း မွၵ်ႈ 10 တပ်ႉၵွင်။ တင်ႈတႄႇ မိူဝ်ႈဝႃးမႃးမိူဝ်ႈၼႆႉ သိုၵ်းမၢၼ်ႈယူႇတီႈၵႆသေ ဢဝ်ၵွင်ႈလူင် 81mm, 82mm, 120mm ယိုဝ်းပွႆႇသႂ်ႇတပ်ႉၵွင်းမႆႉႁုင်းၶွင် SSPP/SSA ဢမ်ႇထၢတ်ႇ၊ ယင်းလႅပ်ႈၸႂ်ႉပႃးမၢၵ်ႇၶေႊမီႊထႅင်ႈ လူးၵွၼ်ႇ၊ ယွၼ်ႉဢၢႆၵႂၼ်းမၢၵ်ႇယၢမ်းၶေႊမီႊၼႆႉသေ သိုၵ်းတႆး 2 ၵေႃႉလႆႈႁၢၵ်ႈမဝ်းလိုမ်းတူဝ်ၵႂႃႇ။

ၾၢႆႇတပ်ႉသိုၵ်း SSPP/SSA တႄႉ ယွၼ်ႉပဵၼ်ၶၢဝ်းၵူၼ်းဝၢၼ်ႈၵူၼ်းသူၼ်ႁဵတ်းႁိူၵ်ႈလႄႈ ဢမ်ႇတုမ်ႉတွပ်ႇ ၾၢႆႇသိုၵ်းမၢၼ်ႈ ႁၢဝ်ႈႁႅင်း။ ၾၢႆႇၼိုင်ႈၵေႃႈ ၶႂ်ႈဢဝ်လွင်ႈၵတ်းယဵၼ်ၵႄႈလိတ်ႈ လူၺ်ႈလၢႆးႁႂ်ႈလူင်ပွင်ၸိုင်ႈ ၸိသင်ႇၵိုတ်းသိုၵ်းပၼ်ၶိုၼ်း။ ၵပ်းၵၢႆႇလွင်ႈၼႆႉ ယူႇတီႈၸုမ်းဢဝ်ငမ်းယဵၼ်ဝႆႉသေ SSPP/SSA လႆႈတႅမ်ႈ လိၵ်ႈၸူးလူင်ပွင်ၸိုင်ႈတဵင်းၸဵင်ႇ မိူဝ်ႈဝႃး (02/07/12) ထႅင်ႈၽိုၼ်ၼိုင်ႈ- ၸဝ်ႈႁၢၼ်ၸၢႆးလႃႉ သိုပ်ႇလၢတ်ႈ ၼင်ႇၼႆ။

ဝၢႆး SSPP/SSA ထွၼ်ပၼ်တီႈလွႆၽႃၽိုင်ႈယဝ်ႉ ဝၼ်းထိ 30/06-01/07/12 ၼၼ်ႉ သိုၵ်းမၢၼ်ႈႁၢင်ႈသိုၵ်း ၶိုၼ်ႈတိုၵ်းတပ်ႉ ၵွင်းမႆႉႁုင်းလႄႈ ၾၢႆႇသိုၵ်းတႆး SSA လႆႈတိုၵ်းၵႅတ်ႇၶႄတူဝ်ၶိုၼ်း။ မိူဝ်ႈဝႃးမႃးမိူဝ်ႈၼႆႉ သိုၵ်းမၢၼ်ႈဢမ်ႇဢဝ်ႁႅင်းသိုၵ်းတိုင်ႈ ၼႃႈၶိုၼ်ႈလေႃႇယဝ်ႉ၊ ယူႇတီႈၵႆသေဢဝ်မၢၵ်ႇလူင်ယိုဝ်း သႂ်ႇၶိူဝ်းယႂ်း ဢမ်ႇထၢတ်ႇ၊ မိူဝ်ႈဝႃးတူၵ်း 50 လုၵ်ႈပၢႆ၊ မိူဝ်ႈၼႆႉၵေႃႈ တူၵ်းႁိမ်းတပ်ႉ ဢမ်ႇယွမ်း 30 လုၵ်ႈယဝ်ႉ။ ႁဝ်းၶႃႈၼႆႉ ပဵၼ်ၸုမ်းၵိုတ်းယိုဝ်း၊ ၵွပ်ႈသင်သိုၵ်းမၢၼ်ႈမႃးယိုဝ်းႁဝ်းၶႃႈၸိူင်ႉၼႆ။ ၾၢႆႇၼိုင်ႈၵေႃႈ ပဵၼ်ၶၢဝ်း ၵူၼ်းဝၢၼ်ႈၶဝ်ႁဵတ်းႁႆႈႁဵတ်းသူၼ်လႄႈ ဢမ်ႇၶႂ်ႈဢဝ်လၢႆးႁၢႆႉသေႁဵတ်းပၢင်တိုၵ်းတေႃႇၵၼ်၊ ၶႂ်ႈႁႂ်ႈ ဢဝ်လၢႆး ငမ်းယဵၼ်သေၵႄႈလိတ်ႈ၊ ႁဝ်းၶႃႈၸၼ်ႉၽူႈၼမ်းဢုပ်ႇဢူဝ်းၵၼ်သေ တႅမ်ႈလိၵ်ႈထိုင်ၸွမ် ၸိုင်ႈတဵင်းၸဵင်ႇ မိူဝ်ႈဝႃးၼႆႉၽိုၼ်ၵမ်းထိသွင်။ လွင်ႈပဵၼ်ပၢင်တိုၵ်းယူႇၼႆႉ ၾၢႆႇလူင်ပွင်ၸိုင်ႈတင်းၾၢႆႇ တပ်ႉသိုၵ်းမၢၼ်ႈၵေႃႈႁဵတ်းပၢင် ၵုမ်ၵၼ် ယူႇ- ဝႃႈၼႆ။

ယွၼ်ႉပၢင်တိုၵ်းသေ လႆႈငိၼ်းဝႃႈၵူၼ်းမိူင်းဢွတ်ႇ ၸဝ်ႈထူဝ်ႈဢၼ်ၺႃးသိုၵ်းမၢၼ်ႈတိၶျေႃးၵႂႃႇသူင်ႇ တၢင်းၺႃးယိုဝ်းၸွမ်း တၢင်းတၢႆထင်တီႈ။ ၵပ်းၵၢႆႇလွင်ႈၼႆႉ ၸဝ်ႈႁၢၼ်ၸၢႆးလႃႉဝႃႈ- ဢၼ်ဝႃႈၸဝ်ႈထူဝ်ႈ တၢႆၼႆၼၼ်ႉ ဢမ်ႇၸႂ်ႈ၊ လႆႈႁပ်ႉဝၢတ်ႇ ၸဵပ်းၵူၺ်း- ဝႃႈၼႆ။

ယၢမ်းလဵဝ် သိုၵ်းမၢၼ်ႈတပ်ႉပႃႈတႂ်ႈတိူင်းသိုၵ်းလႃႈသဵဝ်ႈ လုၵ်ႉတၢင်းၼမ်ႉလဝ်း-တၢင်ႉယၢၼ်း ၸတ်းငႃး သိုၵ်းလၢႆသၢႆလႄႈၶိုၼ်ႈ တိုၵ်း တပ်ႉၵွင်းမႆႉႁုင်း။ သိုၵ်းမၢၼ်ႈပႃႈတႂ်ႈတိူင်းသိုၵ်းၶူဝ်လမ်ၵေႃႈ ၸွမ်ႁၢၼ် ထုၼ်းထုၼ်းၼွင်ႇ ယူႇတီႈမိူင်းသူႈသေၵုမ်း ၵႅဝ်ၵၢၼ်သိုၵ်း။ ၸူဝ်ႈသွင်ၾၢႆႇပဵၼ်ပၢင်တိုၵ်းၵၼ်မႃးၼႂ်းၸူဝ်ႈ ၸႃႈၼႆႉ လႆႈႁူႉဝႃႈၾၢႆႇသိုၵ်းမၢၼ်ႈဝၢတ်ႇၸဵပ်း 20 ပၢႆ- ၼႂ်းတူင်ႇဝူင်းပၢႆးယူႇလီမိူင်းသူႈၶဝ်လၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၸဝ်ႈႁၢၼ်ၸၢႆးလႃႉၵေႃႈလၢတ်ႈဝႃႈ- ၾၢႆႇ SSPP/SSA ၼွၵ်ႈၼိူဝ်သေၵူၼ်းသိုၵ်း 2 ၵေႃႉ ဢၼ်သုတ်ႇမႅၼ်ႈ ဢၢႆၵႂၼ်းမၢၵ်ႇၶေႊမီႊယဝ်ႉ ၵူၼ်းသိုၵ်းတိူဝ်ႉဝၢတ်ႇၸဵပ်းလိူဝ်ႁႅင်း 5 ၵေႃႉ၊ မိူဝ်ႈသိုၼ်း (01/07/12)ၼၼ်ႉ လႆႈႁူႉဝႃႈၾၢႆႇသိုၵ်း မၢၼ်ႈ ၸၼ်ႉၶုၼ်သိုၵ်း 2 ၵေႃႉတင်းၵူၼ်းသိုၵ်း 5-6 ၵေႃႉ ဝၢတ်ႇ ၸဵပ်းလိူဝ်ႁႅင်း၊ ၵမ်ႈၽွင်ႈဝႃႈမိူဝ်းတၢႆတၢင်းမိူင်းသူႈဝႃႈၼႆၵေႃႈ မီး- ဝႃႈၼႆ။

ဢိင်ၼိူဝ်ပဵၼ်ပၢင်တိုၵ်းသေ ၼႂ်းၸိုင်ႈတႆးပွတ်းၸၢၼ်း ၸႄႈဝဵင်းမိူင်းသူႈ၊ ၾၢႆႇႁွင်ႇမိူင်းသူႈ ပွတ်းတွၼ်ႈ မိူင်းဢွတ်ႇ-တွင်ႁဵဝ်း ၸိူဝ်းၼႆႉ ၵူၼ်းဝၢၼ်ႈၵူၼ်းသူၼ် 10 ဝၢၼ်ႈ၊ ႁူဝ်ၵူၼ်း 300 ပၢႆ လႆႈပၢႆႈၽၢတ်ႇႁိူၼ်း ယေး ၸဝ်ႈၵဝ်ႇၶဝ်ႈထိူၼ်ႇမူၵ်းယုမ်းသေ ဢမ်ႇလႆႈႁဵတ်းၵိၼ်ႁဵတ်းယႅမ်ႉ၊ လွင်ႈၼႆႉမႆႈၸႂ်ၸွမ်းလွင်ႈပၢႆး ယူႇလီၶဝ်တႄႉတႄႉ- ၵူၼ်းၼုမ်ႇဢၼ်တူင်ႉတိုၼ်ႇၸွႆႈထႅမ် ၵၢၼ်တူင်ႇဝူင်းၵူၼ်းၵေႃႉၼိုင်ႈလၢတ်ႈ ၼႄၼင်ႇၼႆ။