ဢိင်ၼိူဝ်သိုၵ်းမၢၼ်ႈႁၢင်ႈသိုၵ်းလေႃႇတိုၵ်းတပ်ႉတႆး SSA ၶိူဝ်းယႂ်းၼႂ်းၸႄႈဝဵင်းမိူင်းသူႈသေ ၽႄႈလၢမ်း ၵႂႃႇထိုင်ၼႂ်း ၸႄႈဝဵင်းတၢင်ႉယၢၼ်း၊ ၵွပ်ႈပဵၼ်ၸုမ်းဢဝ်ငမ်းယဵၼ်သေ ၾၢႆႇတပ်ႉတႆးတိုၵ်ႉတေႃႇသူႈၵႅတ်ႇ ၶႄတူဝ်၊ လႆႈၵႂၢမ်းတွပ်ႇ တၢင်းၼေႇပျီႇတေႃႇႁႂ်ႈဝႆႉၸႂ်ယိုၼ်းယၢဝ်း။

ဝၼ်းထိ 03/07/12 ပၢင်တိုၵ်းဝူင်ႈၵၢင်သိုၵ်းမၢၼ်ႈတင်း ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ဢၼ်ယိုဝ်း ၵၼ်ၼႂ်းၸႄႈဝဵင်းမိူင်းသူႈ၊ ပွတ်းလွႆၵွင်းမႆႉႁုင်း လၢမ်းၽႄႈၵႂႃႇထိုင်ၼႂ်းၸိုင်ႈ တႆးပွတ်းႁွင်ႇ တီႈတပ်ႉ 7 လၵ်း (ဝူင်ႈၵၢင်မိူင်း ၵၢဝ်လႄႈတွင်ႁဵဝ်း) တင်းၵွင်းမႆႉၸူင် ပွတ်းမိူင်းၵၢဝ်၊ ၼႂ်းၸႄႈဝဵင်းတၢင်ႉယၢၼ်း။ ပၢင်တိုၵ်းတီႈတပ်ႉ 7 လၵ်းႁၢဝ်ႈႁႅင်းဝႆႉ၊ တႄႇယိုဝ်းၵၼ်ၵၢင်ၼႂ် 6 မူင်း တေႃႇထိုင်ၵၢင်ၶမ်ႈ 5-6 မူင်းၵေႃႈသဵင်ၵွင်ႈယင်းပႆႇယဵၼ်။ သိုၵ်းမၢၼ်ႈဢၼ်ၵႂႃႇပိုတ်ႇသိုၵ်း တိုၵ်းတႆး ဢွၼ်တၢင်းပွတ်းတွၼ်ႈၼႆႉ မီး 3 တပ်ႉၵွင်၊ တပ်ႉၶလယ 33 မိူင်းၵၢဝ်၊ တပ်ႉၶမယ 326 တၢင်ႉယၢၼ်း၊ တပ်ႉၶလယ 136 မိူင်းပၢတ်ႇ။ သွင်ၾၢႆႇမီးလွင်ႈတိူဝ်ႉဝၢတ်ႇၼင်ႇၵၼ်- ဝႃႈၼႆ။

ဝၢႆးတပ်ႉ SSPP/SSA ထွၼ်သိုၵ်းပၼ်တီႈလွႆၽႃၽိုင်ႈယဝ်ႉ ပူၼ်ႉမႃးမိူဝ်ႈဝၼ်းထိ 01/07/12 (မိူဝ်ႈသိုၼ်း) သိုၵ်းမၢၼ်ႈၶွၼ်ႈ ႁႅင်းသိုၵ်း သိုပ်ႇလေႃႇတိုၵ်းတပ်ႉၵွင်းမႆႉႁုင်းၶွင် SSPP/SSA ႁၢဝ်ႈႁႅင်းဝႆႉ။ ၾၢႆႇသိုၵ်း မၢၼ်ႈဝၢတ်ႇၸဵပ်းႁွတ်ႈၽႅဝ်တီႈႁူင်းယႃ မိူင်းသူႈ ဢမ်ႇယွမ်းမွၵ်ႈ 20 ၊ ဢၼ်တၢႆၵေႃႈၼမ်-လႆႈႁူႉၼင်ႇၼႆ။

ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉ လၢတ်ႈဝႃႈ- မိူဝ်ႈလဵဝ် ၾၢႆႇတပ်ႉသိုၵ်းၸိုင်ႈတႆး SSPP/SSA တိုၵ်ႉယိုဝ်းၵႅတ်ႇၶႄ တူဝ်ၵဝ်ႇၵူၺ်း၊ သင်ဝႃႈၾၢႆႇတပ်ႉသိုၵ်းမၢၼ်ႈ သိုပ်ႇတိုၵ်းယိုဝ်းယူႇတိၵ်းတိၵ်းၸိုင် ၾၢႆႇတပ်ႉ SSPP/SSA ၸၢင်ႈႁၢင်ႈႁႅၼ်းၼႃႈ သိုၵ်းတိုၵ်းၶိုၼ်း၊ မိူဝ်ႈဝႃး (02/07/12)ပဵၼ်ပၢင်တိုၵ်းထႅင်ႈတီႈ တပ်ႉ 7 လၵ်း တင်း ၵွင်းမႆႉၸူင် ၼႂ်းဢိူင်ႇမိူင်းၵၢဝ်၊ ၸႄႈဝဵင်း တၢင်ႉယၢၼ်း။ တပ်ႉသိုၵ်းမၢၼ်ႈ ဢၼ်ပိုတ်ႇ သိုၵ်းတေႃႇတပ်ႉတႆး ပွတ်းႁွင်ႇမီး 3 တပ်ႉၵွင်၊ ပွတ်းၸၢၼ်း ၼႂ်းၸႄႈဝဵင်းမိူင်းသူႈ 7 တပ်ႉၵွင်၊ ႁူမ်ႈတင်း မူတ်း 10 ၵွင်- ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈ SSPP/SSA လႆႈတၢင်ႇလၢတ်ႈၵႂႃႇတီႈ လူင်ပွင်ၸိုင်ႈတဵင်းၸဵင်ႇ၊ တၢင်းဢူးတဵင်း ၸေႃႇ ၵႅမ်ႁူဝ်ပဝ်ႈ (3) ၶွမ်ႊမတီႊၵေႃႇသၢင်ႈလွင်ႈငမ်းယဵၼ် လၢတ်ႈမႃးဝႃႈတေမီးၵၢၼ်ႁူပ်ႉထူပ်းဢုပ်ႇ ဢူဝ်းၵၼ်ထႅင်ႈ၊ မိူဝ်ႈလဵဝ် ၶႂ်ႈႁႂ်ႈၾၢႆႇ တပ်ႉသိုၵ်းၸိုင်ႈတႆး SSPP/SSA ယိူၼ်ႉၸႂ်/ဝႆႉၸႂ်ယိုၼ်းယၢဝ်းဢိတ်း ၼိုင်ႈ- ၽူႈၶၢၼ်ပၢၵ်ႇ SSPP/SSA သိုပ်ႇလၢတ်ႈၼႄ ၼင်ႇၼႆ။

ပၢင်တိုၵ်းၼႂ်းၸႄႈဝဵင်းမိူင်းသူႈၼႆႉ တူဝ်ၽူႈၵွၼ်းငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ) 2 မိူင်းၼွင်၊ ၵႅမ်ၸွမ်ႁၢၼ်တိၼ်ႉ လုၼ်ႇ ၵႂႃႇပၵ်းယူႇတီႈမိူင်းဢွတ်ႇသေၸတ်းၵၢၼ်၊ ၸၼ်ႉပႃႈတႂ်ႈမၼ်းၸဝ်ႈသိုၵ်း လူင်ဝိၼ်းၺုၼ်ႉ ၽူႈၵွၼ်းၽႅၼ်ၵၢၼ်လၢႆး တိုၵ်း(…) ၵေႃႈၵႂႃႇယူႇတီႈႁူၺ်ႈလွတ်ႇသေၸတ်းၵၢၼ်ယူႇ။ တူဝ်ၽူႈၵွၼ်း တိူင်းဝၼ်းဢွၵ်ႇၵၢင် (ၶူဝ်လမ်) ၵႅမ်ၸွမ်ႁၢၼ် ထုၼ်းထုၼ်းၼွင်ႇ တင်းၵျီႊဝၼ်ႊ (G1)မၼ်း ယႄးၺုၼ်ႉဝိၼ်း ၵေႃႈၵႂႃႇပၵ်းယူႇတီႈမိူင်းသူႈသေၸတ်းၵၢၼ်- လႆႈႁူႉၼင်ႇ ၼႆ။

ၼွၵ်ႈသေၼၼ်ႉ ၸဝ်ႈယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၵေႃႈလၢတ်ႈၼႄဝႃႈ- ၵၢၼ်သိုၵ်းပွၵ်ႈၼႆႉ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ(လႃႈသဵဝ်ႈ) ၵေႃႈလႆႈငိၼ်းဝႃႈ တေမႃးႁူမ်ႈၸွမ်း၊ ပၢင်တိုၵ်းၸၢင်ႈလၢမ်းယႂ်ႇ မိူၼ်ၼင်ႇၵမ်းပူၼ်ႉ- ဝႃႈၼႆ။

ၽူႈလဵပ်ႈႁဵၼ်းၸဝ်ႈၼိုင်ႈထတ်းသၢင်ဝႃႈ- ပၢင်တိုၵ်းၸိူဝ်းၼႆႉ ပိူၼ်ႈၶႂ်ႈႁႂ်ႈဢွၼ်ၵၼ်ထွၼ်သိုၵ်းၵႂႃႇယူႇတီႈ ဝၢၼ်ႈႁႆး။ ၵူၺ်းၵႃႈ ပေႃးၵႂႃႇယူႇတီႈဝၢၼ်ႈႁႆးယဝ်ႉ၊ တူၵ်းလွၵ်းပိူၼ်ႈယဝ်ႉ ပိူၼ်ႈၶႂ်ႈယိုဝ်းမိူဝ်ႈလႂ်ၵေႃႈလႆႈ- ဝႃႈၼႆ။

မၼ်းၸဝ်ႈသိုပ်ႇလၢတ်ႈဝႃႈ- ဢၼ်ပဵၼ်မႃးၸိူဝ်းၼႆႉ လွင်ႈလူင်ပွင်ၸိုင်ႈ တင်းၾၢႆႇတပ်ႉသိုၵ်းမၢၼ်ႈၵႂႃႇၵၼ် ၵေႃႉႁူးၵေႃႉတၢင်း ၼၼ်ႉ လႆႈႁၼ်တႅၵ်ႇလႅင်းမႃးတိၵ်းတိၵ်း။ ၵူၺ်းၵႃႈ ၸွမ်းၼင်ႇဢၼ်ၽူႈလူင်ႉလႅၼ်ႇ ၵၢၼ်မိူင်းမၢၼ်ႈၶဝ်လၢတ်ႈဝႃႈ- မၢၼ်ႈ လဵၼ်ႈမႆႉၶႅင်မႆႉဢူၼ်ႈ၊ လူင်ပွင်ၸိုင်ႈလဵၼ်ႈမႆႉဢူၼ်ႈ၊ တပ်ႉသိုၵ်း လဵၼ်ႈမႆႉၶႅင်ၼၼ်ႉၵေႃႈ ၸၢင်ႈပဵၼ်လႆႈယူႇ။ မိူဝ်ႈၵူႈပွၵ်ႈ ပေႃးထုၵ်ႇၸဝ်ႈၼႃႈတီႈ MI မၢၼ်ႈတိၺွပ်းယဝ်ႉ ၵေႃႈၼိုင်ႈမႃးထဵတ်ႈထၢမ်ပေႃႉထုပ်ႉတိၵ်းတိၵ်း၊ ထႅင်ႈၵေႃႉၼိုင်ႈသမ်ႉမႃးၶျေႃး၊ မႃးပၼ်လုတ်ႇလႅၼ်းယႃႈ၊ မႃးပၼ်တၢင်းၵိၼ်၊ ပၼ်ႇတူင်ႇၵၼ်တိၵ်းတိၵ်း။ ႁဝ်းသမ်ႉဝႃႈၵေႃႉၼႆႉႁၢႆႉ ၵေႃႉၼႆႉလီ၊ တီႈတႄႉ မၼ်းပဵၼ် ၽီတူဝ်လဵဝ်ၵၼ်၊ ၼႆႉၵေႃႈၸၢင်ႈပဵၼ်ၼၼ်။ ၵူၺ်းၵႃႈ မိူဝ်ႈလဵဝ်တႄႉမၢၼ်ႈဢမ်ႇၸႂ်ႈၽီတူဝ်လဵဝ်ၵၼ်ၵေႃႈ ပဵၼ်လႆႈ- ဝႃႈၼႆ။