လုမ်းၽွင်းတၢင်မၢၼ်ႈၼႂ်းမိူင်းၵွၵ်ႇ ၸိုင်ႈထႆးသၢၼ်ၶတ်း လွင်ႈလၢႆမူႇၸုမ်း ပႃႈတႂ်ႈလူင်ပွင်ၸိုင်ႈထႆး မွပ်ႈပၼ်သူး (ရၢင်းဝလ်း) တီႈၶွင်ႊသီႊဢဝ်ၶိုၼ်းၸိုင်ႈတႆး RCSS ၊ ဝႃႈပဵၼ်လွင်ႈၶဝ်ႈၸိမ်ၵၢၼ်မိူင်းမိူင်း မၢၼ်ႈ။

မီးၶၢဝ်ႇဢွၵ်ႇမႃးဝႃႈမိူဝ်ႈဝၼ်းသဝ်ထိ 30/03/12 ယူႇတီႈလုမ်းၽွင်းတၢင်မၢၼ်ႈ တီႈဝဵင်းလူင်မိူင်းၵွၵ်ႇ (ၸိုင်ႈထႆး) ၶႂမ်ႈၶတ်း မႃးတီႈတၢင်းၵၢၼ်ထႆး ၵဵဝ်ႇၵပ်းလွင်ႈထႆးပၼ်သူး/ရၢင်းဝလ်း တီႈၶွင်ႊသီႊဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ယွၼ်ႉၽွၼ်းၵၢၼ်ၽဵဝ်ႈမူၺ်ႉယႃႈမဝ်းၵမ်။ ၵူၺ်းၵႃႈ လႆႈႁူႉဝႃႈ ၾၢႆႇမၢၼ်ႈ ၶႂမ်ႈၶတ်းမႃးတၢင်းသူပ်းၵႂၢမ်းၵူၺ်း၊ ဢမ်ႇၸႂ်ႈၶႂမ်ႈၶတ်းမႃးတၢင်းလိၵ်ႈလၢႆး- ဝႃႈၼႆ။

ၼမ်ႉၵႂၢမ်းႁူဝ်ယွႆႈလွင်ႈၼႆႉဢမ်ႇလႆႈႁူႉသေတႃႉ ႁူဝ်ႁုပ်ႈမၼ်း တၢင်းၾၢႆႇမၢၼ်ႈၼႄးဝႃႈ- ထႆးမႃးၸိမ် ၸွမ်းၵၢၼ်မိူင်း/လိူင်ႈ တၢင်းၼႂ်းၶွင်မိူင်းမၢၼ်ႈ။ ၼွၵ်ႈသေၼၼ်ႉ မၢၼ်ႈယင်းလၢတ်ႈၼႄလွင်ႈဢမ်ႇ ႁၢၼ်ႉၸႂ် ဢၼ်ၾၢႆႇထႆးပိုၼ်ၽၢဝ်ႇၵႃႈႁူဝ် ၵူၼ်းၼႂ်းၸိုင်ႈမိူင်းႁူမ်ႈတုမ်မၢၼ်ႈ 3 ၵေႃႉ- 1.ၸၢႆးၼေႃႇၶမ်း၊ 2.ၼၶၼ်းမူၺ်း 3.ၸဝ်ႈယီႈသေး မိူဝ်ႈဝၼ်းထိ 20/04/12 လူၺ်ႈၸိၼႄးဝႃႈ ပဵၼ်ၵႄႇယႃႈ။ မၢၼ်ႈဝႃႈ ၵွၼ်ႇၼႃႈထႆး တေပိုၼ်ၽၢဝ်ႇၼၼ်ႉ ထုၵ်ႇလီဢုပ်ႇဢူဝ်းၵိူဝ်းၵုမ်မၢၼ်ႈဢွၼ်တၢင်း- ၾၢႆႇႁူမ်ႇလူမ်ႈထႆး ၵေႃႉၼိုင်ႈလၢတ်ႈၼႄ ၼင်ႇၼႆ။

ဝၢႆးထႆးပိုၼ်ၽၢဝ်ႇၵႃႈႁူဝ်ယဝ်ႉ 5 ဝၼ်း ၸၢႆးၼေႃႇၶမ်း (ၵေႃႉလႆႈထုၵ်ႇလၢႆၾၢႆႇၸိၼႄးဝႃႈ ပဵၼ်ၵႄႇယႃႈလူင် ပွတ်းတွၼ်ႈသၢမ်ၸဵင်ႇၶမ်း) ထုၵ်ႇတၢင်းၵၢၼ်လၢဝ်းတင်းၶႄႇႁူမ်ႈၵၼ်တိၺွပ်းၼႂ်းမိူင်းလၢဝ်း၊ မိူဝ်ႈလဵဝ် မၼ်းၸၢႆးထုၵ်ႇၵုမ်းၶင်ယူႇၼႂ်း မိူင်းၶႄႇ။ ၵူၺ်းၵႃႈ ထႅင်ႈ 2 ၵေႃႉ ၼၶၼ်းမူၺ်း ၽူႈဢွၼ်ႁူဝ်တပ်ႉသိုၵ်း ယၢင်း DKBA ၊ ၸဝ်ႈယီႈသေး ႁူဝ်ၼႃႈပီႇတုၸိတ်ႉ ၼမ်ႉပုင်ႇ တႃႈၶီႈလဵၵ်းတႄႉ တိုၵ်ႉထၢင်ႇႁၢင်ႈၵႂႃႇမႃး မိူၼ်ၵဝ်ႇယူႇ၊ ၸဝ်ႈၼႃႈတီႈၾၢႆႇမၢၼ်ႈဢဝ်လိူင်ႈသင်။

ၸဝ်ႈယွတ်ႈသိုၵ်း ႁူဝ်ပဝ်ႈ RCSS/SSA လၢတ်ႈဝႃႈ- လႆႈငိၼ်းလွင်ႈၼႆႉယူႇ၊ ၵူၺ်းၵႃႈၵဝ်ၶႃႈၵေႃႈဢမ်ႇ ပေႃးၸၢင်ႈ လၢတ်ႈသင်။ ဢၼ်ၵဝ်ၶႃႈၸၢင်ႈလၢတ်ႈတႄႉ မိူဝ်ႈထႆးတေပၼ်သူးၵေႃႈ ၵဝ်ၶႃႈဢမ်ႇလႆႈႁူႉ ဝႆႉထႃႈဢွၼ်တၢင်း၊ မီးၵၢၼ်ပွင်ႇမႃးဝႃႈႁႂ်ႈၵႂႃႇႁပ်ႉ သူးၼႆ ၵဝ်ၶႃႈပေႃးဢၢမ်းၵႂႃႇ။ ပဵၼ်ႁိုဝ်ၵေႃႈ ၵဝ်ၶႃႈလႆႈၸွႆႈ ထႅမ်လွင်ႈၵႄႈလိတ်ႈ ပၼ်ႁႃယႃႈမဝ်းၵမ်မႃးၼႆႉ ယွၼ်ႉသႂ်ႇၸႂ်ဝႃႈ ပဵၼ်ၼႃႈတီႈပုၼ်ႈၽွၼ်းၵူၼ်းၵေႃႉ ၼိုင်ႈၼၼ်ႉၵူၺ်း။ ဢမ်ႇမီး တၢင်းမုင်ႈမွင်းၸႂ်ယႂ်ႇႁပ်ႉသူးသင်။ ၵူၺ်းၵႃႈ တီႈဢၼ်ၽူႈယႂ်ႇ ၶဝ်မႃးပၼ် သူးၼႆႉ ၶဝ်ၸႂ်ဝႃႈ ပဵၼ်ၵၢၼ်ႁပ်ႉႁွင်း မၵ်းမၢႆပၼ်ၵၢၼ်လီႁဝ်းႁဵတ်းမႃးၼႆလႄႈ ယိၼ်းၸူမ်းၶွပ်ႈၸႂ်ယူႇ- ဝႃႈၼႆ။

ပူၼ်ႉမႃးမိူဝ်ႈဝၼ်းထိ 23/06/12 ပိူဝ်ႈတႃႇၶုၵ်းထူပ်းဢဝ်မုၼ် ဝၼ်းသၢၼ်ၶတ်းယႃႈမဝ်းၵမ်ၵူႈၸိုင်ႈမိူင်း ဝၼ်းထိ 26/06/12 ၼၼ်ႉ ၸဝ်ႈၼႃႈတီႈထႆး 3 ၾၢႆႇ- 1.ၾၢႆႇၽဵဝ်ႈမူၺ်ႉယႃႈမဝ်းၵမ်၊ 2.ၾၢႆႇသိုၵ်း၊ 3.ၾၢႆႇပလိၵ်ႈ ႁူမ်ႈမိုဝ်းၵၼ်ႁဵတ်းၸဝ်ႈတႃႇၼ ၸတ်းမွပ်ႈသူး/ရၢင်းဝလ်း ၼူၵ်ႉႁုင်ႉၶမ်း ပၼ် RCSS/SSA ပႃးၸဵမ်ၵူၼ်းမိူင်းထႆးလၢႆၵေႃႉလၢႆၾၢႆႇ ၸိူဝ်းတူင်ႉၼိုင်သၢၼ်ၶတ်း ယႃႈမဝ်းၵမ်၊ တီႈဝဵင်းလူင်မိူင်းၵွၵ်ႇ။ ၼွၵ်ႈသေၼၼ်ႉ ပိုၼ်ၽၢဝ်ႇပႃးလွင်ႈသွင်ၾၢႆႇတေႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ် ၵႂႃႇမိူဝ်းၼႃႈ။