ပၢင်ၵုမ် 14 ပႃႇတီႇၵၢၼ်မိူင်း ဢၼ်ဢူးဢွင်ႇမိၼ်းဢွၼ် ႁူဝ်ႁွင်ႉၸတ်းတီႈၼေႇပျီႇတေႃႇ၊ တိုၵ်းသူၼ်း ၽူႈဢွၼ် ႁူဝ်ၸၢဝ်းၶိူဝ်း၊ ပိူင်လူင်မၼ်းၸၢဝ်းၶိူဝ်းတႆး ႁႂ်ႈၼမ်းၼႃႈ ၸွႆႈၼႂ်းၵၢၼ်ၵေႃႇသၢင်ႈလွင်ႈငမ်းယဵၼ်။ ၵေႃႉလီဢွၵ်ႇၶၢဝ်ႇ မိူဝ်ႈဝႃးၼင်ႇၼႆ။

ဝၼ်းထိ 22/07/12 တင်ႈတႄႇယၢမ်း 09:00-13:30 မူင်း၊ ဢူးဢွင်ႇမိၼ်း ၸုမ်းၶိုင်ပွင်လွင်ႈငမ်းယဵၼ်မိူင်း တႆး (ၽွင်းလူင် ၾၢႆႇတေႃႉသူင်ႇ လူတ်ႉၾႆး)ဢွၼ်ႁူဝ်ၸတ်းႁဵတ်း ပၢင်ၵုမ်ဢုပ်ႇဢူဝ်းၵၢၼ်မိူင်း တီႈႁူင်း ႁဵၼ်း မျၢၼ်ႇမႃႇဢီႊၵရႅတ်ႊ။ ႁွင်ႉမွၵ်ႇပႃႇတီႇၵၢၼ်မိူင်းၸၢဝ်းၶိူဝ်း 14 ပႃႇတီႇၶဝ်ႈႁူမ်ႈ။ ပႃႇတီႇၸိူဝ်းၼၼ်ႉ ပႃႇတီႇၵၢၼ်မိူင်းတႆး SNLD (ၸဝ်ႈၶုၼ်ထုၼ်း ဢူး တင်း ၸၢႆးၼုတ်း)၊ ပႃႇတီႇရၶႅင်ႇ ALD ၊ ပႃႇတီႇမွၼ်း MDP ၊ ပႃႇတီႇယၢင်း၊ ပႃႇတီႇၶျၢင်း၊ ပႃႇတီႇၸူဝ်ႊမီႊ၊ ပႃႇတီႇပႃႈဢူဝ်း (ၸႄႈမိူင်းတႆး) PNO ၊ ပႃးၸဵမ်ပႃႇတီႇ ၵၢၼ်မိူင်မၢၼ်ႈ NUP လႄႈလၢႆပႃႇတီႇ ၸိူဝ်းၼႆႉ။

ဢူးဢွင်ႇမိၼ်းမွၵ်ႇလၢတ်ႈဝႃႈ- တႃႇတေပဵၼ်မႃးလွင်ႈငမ်းယဵၼ်ၼႆႉ ထုၵ်ႇလႆႈပႃးဢဵၼ်ႁႅင်းၵၢၼ်မိူင်း ဢၼ်ယူႇတၢင်းၼွၵ်ႈ သၽႃး၊ ဢၼ်ပဵၼ်ၸုမ်း NGO လႄႈ CBO ၸိူဝ်းၼႆႉ။ တုၵ်းယွၼ်း ႁႂ်ႈၸဝ်ႈၶုၼ် ထုၼ်းဢူး ဢွၼ်ႁူဝ်ၼမ်းၼႃႈၶိုင်ပွင် ၼႂ်းၵၢၼ်ၵေႃႇသၢင်ႈလွင်ႈငမ်းယဵၼ်၊ ၵွပ်ႈဝႃႈပဵၼ်ၽူႈယႂ်ႇ ဢၼ်ၸၢဝ်း ၶိူဝ်းတႆး ယုမ်ႇယမ်ၼပ်ႉထိုဝ်ၵူၺ်းပႆႇပေႃး၊ လၢႆၸၢဝ်းၶိူဝ်းၵေႃႈပိူၼ်ႈယုမ်ႇယမ်မၼ်းၸဝ်ႈ။ ၵပ်းၵၢႆႇလွင်ႈၼႆႉ ယူႇတီႈၸဝ်ႈၶုၼ်ထုၼ်းဢူးၵေႃႈႁပ်ႉဝႆႉ- ၵႅမ်ၽူႈဢွၼ်ႁူဝ် SNLD ၸၢႆးၼုတ်း လၢတ်ႈၼႄၼင်ႇၼႆ။

လွင်ႈၼႆႉ ၸဝ်ႈၶုၼ်ထုၼ်းဢူးတွပ်ႇဝႃႈ ႁပ်ႉလႆႈယူႇ၊ ၵူၺ်းၵႃႈ ငဝ်းလၢႆးမိူဝ်ႈလဵဝ် ပိူဝ်ႈတႃႇၵေႃႇသၢင်ႈ လွင်ႈငမ်းယဵၼ်ၼၼ်ႉ တိုၵ်ႉမီးလွင်ႈၶွင်ႉၶမ်ယၢပ်ႇၽိုတ်ႇယူႇ 2 လွင်ႈ- 1.ၾၢႆႇၽွင်းငမ်းလႄႈၾၢႆႇတပ်ႉသိုၵ်း ဢမ်ႇပေႃးၶႂ်ႈၶဝ်ႈတိၼ်ၶဝ်ႈမိုဝ်းၵၼ်၊ ဢၼ်ၾၢႆႇၽွင်းငမ်းသင်ႇၵၢၼ်ၵႂႃႇၼၼ်ႉ ၾၢႆႇတပ်ႉသိုၵ်းဢမ်ႇႁဵတ်း ၸွမ်း၊ ၵွပ်ႈၼၼ် လူင်းလၢႆးမိုဝ်းၵိုတ်းယိုဝ်းဢဝ်လွင်ႈ ငမ်းယဵၼ်ၵၼ်ယဝ်ႉၵေႃႈ တိုၵ်ႉမီးပၢင်တိုၵ်းယူႇ။ 2.လူင်ပွင်ၸိုင်ႈ တမ်းဝၢင်းဝႆႉလၵ်းၵၢၼ် 8 ၶေႃႈ ၼႂ်းၸၼ်ႉၸိုင်ႈမိူင်းႁူမ်ႈ တုမ်ၼၼ်ႉ ၶေႃႈ 1-4 ႁပ်ႉလႆႈ ၵၼ်ယူႇ၊ ဢမ်ႇမီးပၼ်ႁႃ၊ ၵူၺ်းၵႃႈ ၶေႃႈ 5-8 ၼၼ်ႉ တိုၵ်ႉမီးပၼ်ႁႃ၊ သင်ဝႃႈမီးၵၢၼ်မူၼ်ႉမႄး ၵႄႈလိတ်ႈ ၵေႃႈ ႁႂ်ႈၵႄႈၼွၵ်ႈသၽႃး- ဝႃႈၼႆ။

လၵ်းၵၢၼ်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် 8 ၶေႃႈ ဢၼ်ၸုမ်းလူင်ပွင်ၸိုင်ႈတဵင်းၸဵင်ႇ တမ်းဝၢင်းဝႆႉ ၼၼ်ႉ (1)တေဢမ်ႇလႆႈၽၢတ်ႇဢွၵ်ႇၼႂ်းၸိုင်ႈမိူင်းႁူမ်ႈတုမ်။ (2)တုင်းႁပ်ႉလၵ်းၵၢၼ် 3 ပိူင်- 1.ၸိုင်ႈမိူင်း ႁူမ်ႈတုမ်ယႃႇႁႂ်ႈတႅၵ်ႇယၢႆႈ၊ 2.လွင်ႈၽွမ်ႉႁူမ်ႈၸိူဝ်ႉၸၢတ်ႈယႃႇႁႂ်ႈတႅၵ်ႇယၢႆႈ၊ 3.ဢႃႇၼႃႇၸိၵ်း ၸွမ်ၸိုင်ႈမိူင်း ႁႂ်ႈလႆႈမၼ်ႈၵိုမ်း။ (3) တေႁူမ်ႈမိုဝ်းၵၼ်ပူၵ်း ပွင်ပၢႆးမၢၵ်ႈမီး။ (4)တေႁူမ်ႈမိုဝ်းၵၼ်သၢၼ် ၶတ်း/ၽဵဝ်ႈမူၺ်ႉ ယႃႈမဝ်းၵမ်။ (5) တေတင်ႈပႃႇတီႇၵၢၼ်မိူင်းသေ ၶဝ်ႈၶေႉၼႂ်း ၵၢၼ်လိူၵ်ႈတင်ႈ။ (6)တေယွမ်းႁပ်ႉပိူင်ငဝ်ႈပိုင်းမိူင်း 2008 သေယဝ်ႉ ၶိုင်ပွင်ၵႄႈလိတ်ႈမူၼ်ႉမႄးၵႂႃႇၸွမ်းသဵၼ်ႈတၢင်းမၢႆမီႈ။ (ၶဝ်ႈၵႂႃႇၼႂ်းသၽႃးသေမူၼ်ႉမႄးၵႂႃႇ ၸွမ်းၼႂ်းပိူင်ဢၼ်မၢၼ်ႈတမ်းဝႆႉ)။ (7) တေၶဝ်ႈၼႂ်းတူင်ႇဝူင်းမၢႆမီႈ တင်းပိုၵ်းသေယူႇ ၵိၼ်ၵႂႃႇၸွမ်းမၢႆမီႈ။ (8)ၸိုင်ႈမိူင်းလဵဝ်တေလႆႈမီးတပ်ႉသိုၵ်းလဵဝ်- ၸိူဝ်းၼႆႉ။

ၵဵဝ်ႇၵပ်း ၸဝ်ႈၶုၼ်ထုၼ်းဢူးလၢတ်ႈၵႂႃႇၼၼ်ႉ ဢူးဢွင်ႇမိၼ်းတွပ်ႇဝႃႈ- သဵၼ်ႈတၢင်းလၵ်းၵၢၼ်ဢၼ်ႁဝ်း ႁဵတ်းသၢင်ႈယူႇ ၸိူဝ်းၼႆႉ မၼ်းဢမ်ႇၸႂ်ႈဝၢင်းဝႆႉပိူင်တၢႆ၊ ႁဝ်းမႃးဢုပ်ႇဢူဝ်းငူပ်ႉငိၵၼ်ၵႄႈလိတ်ႈလႆႈ။ မိူဝ်ႈပႆႇထိုင်ပီ 2515 ၊ ၽွင်းႁၢင်ပီ 2014 တေမႃးၼႆႉ ဢၢၼ်းၶတ်းၸႂ်ၸတ်းပၢင်ၵုမ် ႁႂ်ႈမိူၼ်ၼင်ႇပၢင်လူင်- ၼႆယူႇ။

ၼွၵ်ႈသေၼၼ်ႉ ၸဝ်ႈၶုၼ်ထုၼ်းဢူးထၢမ်ဝႃႈ- ၵဵဝ်ႇၵပ်းလွင်ႈႁူမ်ႇလူမ်ႈၵူၼ်းၸွႆႈထႅမ်ၵၢၼ်ငၢၼ်းလွင်ႈ ငမ်းယဵၼ်ၼႆႉ သင်ဝႃႈဢမ်ႇပဵၼ်ၵၢၼ်မႃးၸိုင် ၸွင်ႇတေဢဝ်မတ်ႉတႃ 17/1 ဢၼ်မီးမႃးၸဵမ်ပၢၼ် ဢိင်းၵလဵတ်ႈ ၼၼ်ႉသေဢဝ်လိူင်ႈၵၼ်။ ဢူးဢွင်ႇမိၼ်းတွပ်ႇဝႃႈ- သင်ဝႃႈပိူၼ်ႈမႃးတိၸဝ်ႈႁဝ်းၶုၼ် ထုၼ်းဢူးၵႂႃႇၶဝ်ႈၶွၵ်ႈၼႆ ၵဝ်ၶႃႈႁဝ်းဢူးဢွင်ႇမိၼ်းတိုၼ်းတေၵႂႃႇ တီႈၶွၵ်ႈသေဢဝ်ဢွၵ်ႇၵူၺ်း၊ ပေႃးဝႃႈ ဢဝ်ဢွၵ်ႇဢမ်ႇလႆႈၵေႃႈ တေယူႇၼႂ်းၶွၵ်ႈၸွမ်း- ဝႃႈၼႆ။

ဝၢႆးဢုပ်ႇၵၼ်လွင်ႈၵၢၼ်မိူင်းယဝ်ႉ မိူဝ်ႈဢုပ်ႇၵၼ်ၵွင်ႉၵၢႆႇလွင်ႈၸၢဝ်းၶိူဝ်းမႃးၼၼ်ႉ ၸဝ်ႈၶုၼ်ထုၼ်းဢူး ၵေႃႈ လႆႈဢဝ်တိုဝ်ႉ တၢင်း တွင်ႈထၢမ်ပႃးၵဵဝ်ႇၵပ်းလွင်ႈႁဵၼ်းလိၵ်ႈလၢႆးၸၢဝ်းၶိူဝ်း ၼႂ်းႁူင်းႁဵၼ်းတီႈၻွၵ်း တိူဝ်ႊမျႃႉဢေး ၽွင်းလူင်ၾၢႆႇပၺ်ႇၺႃႇ ၸိုင်ႈမိူင်းႁူမ်ႈတုမ်- ၼႆယဝ်ႉ။