ၼႂ်းလိူၼ်ၵျူႊလၢႆႊၼႆႉ လူင်ပွင်ၸိုင်ႈတဵင်းၸဵင်ႇတေပိုတ်ႇ သုၼ်လွင်ႈငမ်းယဵၼ်၊ တေပၵ်းငဝ်ႈငုၼ်း တီႈတႃႈၵုင်ႈ၊ ပိူဝ်ႈတႃႇတင်းၼမ်ၶဝ်ႈဢွၵ်ႇလႆႈထၢင်ႇႁၢင်ႈလႄႈ ပဵၼ်ၵၢၼ် ၵမ်ႉၸွႆႈလွင်ႈငမ်းယဵၼ်။

VOA ဢွၵ်ႇၶၢဝ်ႇဝႃႈ ဝၼ်းထိ 01/07/12 ဢူးဢွင်ႇမိၼ်း ၵႅမ်ႁူဝ်ပဝ်ႈၶွမ်ႊမတီႊၶိုင်ပွင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC) လၢတ်ႈၼႂ်းပၢင်ၵုမ်ၽူႈသိုဝ်ႇၶၢဝ်ႇ ဢၼ်ၸတ်းႁႅၼ်းတီႈၼေႇပျီႇတေႃႇဝႃႈ- ၼင်ႇဢၼ်ႁဝ်းမီးဝႆႉၶၵ်ႉၵၢၼ်လွင်ႈငမ်း ယဵၼ် 3 ၶၵ်ႉတွၼ်ႈ 1.ၵိုတ်းယိုဝ်း၊ 2.ဢုပ်ႇဢူဝ်းၵၢၼ်မိူင်း၊ 3.ၸတ်းႁႅၼ်းပၢင်ၵုမ်လူင်မိူၼ်ၼင်ႇပၢင်လူင် ဢွၼ်တၢင်းပီ 2015 ၼၼ်ႉ တေသိုပ်ႇႁဵတ်းၵႂႃႇယဝ်ႉ။ လိူဝ်သေၼၼ်ႉ တေပိုတ်ႇသုၼ်လွင်ႈငမ်းယဵၼ် (Peace Center) တီႈတႃႈၵုင်ႈ ၼႂ်းလိူၼ်ၵျူႊလၢႆႊၼႆႉ၊ ပေႃးတင်ႈယဝ်ႉ ၽႂ်ၵေႃႈယဝ်ႉထၢင်ႇႁၢင်ႈၶဝ်ႈဢွၵ်ႇလႆႈ၊ ၼင်ႇႁိုဝ်ပေႃးတေၸၢင်ႈၵမ်ႉၸွႆႈ ၶၵ်ႉၵၢၼ် လွင်ႈငမ်းယဵၼ်- ဝႃႈၼႆ။

ၵၢၼ်ငၢၼ်းၾၢႆႇသုၼ်လွင်ႈငမ်းယဵၼ် တေမီးမိူၼ်ၼင်ႇတေဝႆႉ Peacemedia , Facebook, Blog ၊ ပေႃးမီး ၶၢဝ်ႇတေဢွၵ်ႇ ၼႂ်း Facebook, Blog ၸိူဝ်းၼႆႉ။

ၵူၺ်းၵႃႈ ဢၼ်ဢူးဢွင်ႇမိၼ်းလၢတ်ႈသေ VOA ပိုၼ်ၽၢဝ်ႇၵႂႃႇ ပိူင်ႈၵၼ်တင်း မိၸ်ႉၸိမဢွၵ်ႇဢွၼ်တၢင်း ၼၼ်ႉဝႃႈ မိူဝ်ႈဝၼ်းထိ 25-28/06/12 ဢူးဢွင်ႇမိၼ်းၵႂႃႇမိူင်းထႆး၊ မၼ်းၵႂႃႇဢုပ်ႇဢူဝ်းတၢင်းမႄႈသွတ်ႇ ဢွၼ်တၢင်းသေ ၸင်ႇပူၼ်ႉၵႂႃႇ ဢုပ်ႇတီႈၵုင်းထဵပ်ႈ၊ ၶၢဝ်းတၢင်း 4 ဝၼ်းလႆႈႁူပ်ႉတင်းမူတ်း 18 ၸုမ်း။ မိူဝ်ႈၼၼ်ႉ မၼ်းၸဝ်ႈလၢတ်ႈၶိူဝ်း တေၸတ်းပၢင်ၵုမ် လူင်မိူၼ်ၼင်ႇပၢင်လူင်ထႅင်ႈ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၻွၵ်းတိူဝ်ႊၼၢႆႇဢွင်ႇ FDB (Forum for Democracy in Burma) လၢတ်ႈတီႈ မိၸ်ႉၸိမ မိူဝ်ႈဝၼ်းထိ 29/06/12 ဝႃႈ- မိူဝ်ႈဢူးဢွင်ႇမိၼ်းမႃးတီႈမႄႈသွတ်ႇၼၼ်ႉ မၼ်းလၢတ်ႈဝႃႈ- ၼင်ႇႁိုဝ်ပေႃး တေ ပဵၼ်ပၢင်ၵုမ်လူင်မိူၼ်ၼင်ႇ ပၢင်လူင်ၼၼ်ႉ တေတႄႇႁဵတ်းသၢင်ႈၵႂႃႇ ဢွၼ်တၢင်းလိူၼ်ၻီႊသႅမ်ႊ ၿိူဝ်ႊ 2012 ၼႆႉ၊ သဵၼ်ႈတၢႆမၼ်းပဵၼ်ပီ 2014 ။ ဢၼ်ၵူႈၾၢႆႇၾၢႆႇတုၵ်းယွၼ်းမႃးၼၼ်ႉ ဢၼ်ယူႇၼႂ်းၶွပ်ႇ တူင်ႇ ဢႃႇၼႃႇလူင်ပွင်ၸိုင်ႈၵေႃႈ လူင်ပွင်ၸိုင်ႈတေတႅပ်းတတ်းပၼ်ၵႂႃႇ၊ ပေႃးဢမ်ႇယူႇၼႂ်းဢႃႇၼႃႇလူင် ပွင်ၸိုင်ႈၸိုင် သၽႃးတေတႅပ်းတတ်းပၼ်ၵႂႃႇ- ဝႃႈၼႆ။

ၵႂၢမ်းၶေႃႈၼႆႉ သၢၼ်ၶတ်းၵၼ်တင်းၾၢႆႇၸုမ်းလုၵ်ႉၽိုၼ်ႉၶဝ်ပႃးၸဵမ် RCSS/SSA ။ ၶဝ်တႄႉဝႃႈ ၵူႈလွင်ႈ လွင်ႈတူၵ်းလူင်းၵၼ် ၼွၵ်ႈသၽႃး။ တၢင်းသၽႃးၼၼ်ႉတႄႉ ထုၵ်ႇလႆႈမၵ်းမၼ်ႈႁပ်ႉႁွင်းပၼ်ၶေႃႈတူၵ်း လူင်းၸိူဝ်းၼၼ်ႉၵူၺ်း။