တပ်ႉသိုၵ်းၸိုင်ႈတႆး SSPP/SSA တႅပ်းတတ်းတေထွၼ် ပၼ် တပ်ႉၵမ်ႈၽွင်ႈ၊ ၸွမ်းၼင်ႇၵႅမ်ႁူဝ်ပဝ်ႈ 3 ၶွမ်ႊမတီႊ ၵေႃႇသၢင်ႈလွင်ႈငမ်းယဵၼ် ဢူးတဵင်းၸေႃႇတုၵ်းယွၼ်းႁႂ်ႈ ယိူၼ်ႉၵၼ်ႈပၼ်လႄႈငိူင်ႉဝႄႈ ပၼ်ၽွင်ႈ။

ဢိင်ၼိူဝ်တပ်ႉသိုၵ်းမၢၼ်ႈတင်း တပ်ႉသိုၵ်းၸိုင်ႈတႆး SSPP/SSA ပဵၼ်ပၢင်တိုၵ်းၵၼ်ႁၢဝ်ႈႁႅင်းလႄႈသင်၊ ယူႇတီႈ SSPP/SSA လႆႈတႅမ်ႈလိၵ်ႈၸူးၸွမ်ၸိုင်ႈတဵင်းၸဵင်ႇ ႁႂ်ႈၵႄႈလိတ်ႈပၼ်ႁႃလွင်ႈၼႆႉလႄႈသင်၊ ၼင်ႇႁိုဝ်တေ ၵိုတ်းၵၢၼ်သိုၵ်းတေႃႇၵၼ် လႆႈၼၼ်ႉ ဝၼ်းထိ 03/07/12 (မိူဝ်ႈဝႃး) ယၢမ်းဝၢႆးဝၼ်း ယူႇတီႈၵႅမ်ႁူဝ်ပဝ်ႈ (3) ၶွမ်ႊမတီႊၾၢႆႇၵေႃႇသၢင်ႈလွင်ႈငမ်းယဵၼ် ၸိုင်ႈမိူင်းႁူမ်ႈတုမ် ဢူးတဵင်းၸေႃႇ မွၵ်ႇလၢတ်ႈတုၵ်းယွၼ်းမႃးဝႃႈ- ၽွင်းယၢမ်းဢၼ်ၶွမ်ႊမတီႊၾၢႆႇၵေႃႇသၢင်ႈလွင်ႈ ငမ်းယဵၼ် တိုၵ်ႉၶတ်း သၢင်ႈႁၢင်ႈပွင်ၵၢၼ်ငၢၼ်းယူႇၼႆႉ ၶႂ်ႈႁႂ်ႈၾၢႆႇတပ်ႉသိုၵ်း SSPP/SSA ယိူၼ်ႉၵၼ်ႈပၼ်သေ ငိူင်ႉဝႄႈပၼ် ၽွင်ႈ- ဝႃႈၼႆ။

ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉလၢတ်ႈဝႃႈ- ႁဝ်းၶႃႈၼႆႉ ယွၼ်ႉပိူဝ်ႈပဵၼ်ၶၢဝ်းၽုၵ်ႇၶၢဝ်းသွမ်ႈ၊ လႆႈတူၺ်းထိုင် ၵူၼ်းဝၢၼ်ႈၵူၼ်းမိူင်းတၵ်းလႆႈႁႃၵိၼ်လဵင်ႉတွင်ႉ လႄႈ ပိူဝ်ႈတႃႇႁႂ်ႈတပ်ႉသိုၵ်းမၢၼ်ႈၵိုတ်း ၵၢၼ်တိုၵ်းတေႃးၼၼ်ႉ လႆႈတႅမ်ႈ လိၵ်ႈၸူးၸွမ်ၸိုင်ႈတဵင်းၸဵင်ႇ၊ ၵူၺ်းၵႃႈ ႁၢၼ်ႉတေႃႇထိုင်ဝၼ်းမိူဝ်ႈၼႆႉ ဢမ်ႇတွပ်ႇသင်မႃး။ တူဝ်ၸွမ်ၸိုင်ႈတဵင်းၸဵင်ႇ ဢမ်ႇတွပ်ႇသင်မႃးၵေႃႈ ၵေႃႉပဵၼ်တူဝ်တႅၼ်းလူင်ပွင်ၸိုင်ႈ ဢူးတဵင်းၸေႃႇ တုၵ်းယွၼ်းမႃး ႁႂ်ႈယိူၼ်ႈၵၼ်ႈပၼ်လႄႈ ငိူင်ႉထွၼ်ပၼ်တပ်ႉၽွင်ႈၼႆႉ- ဝႃႈၼႆ။

သိုပ်ႇလၢတ်ႈဝႃႈ- ၾၢႆႇၼိုင်ႈၵေႃႈ ဢိင်ၼိူဝ်ဢူးတဵင်းၸေႃႇတုၵ်းယွၼ်းမႃးသေ ႁဝ်းၶႃႈၵေႃႈ ဢမ်ႇၶႂ်ႈႁႂ်ႈ တုမ်ႉတိူဝ်ႉၵၢၼ်ၵေႃႇ သၢင်ႈလွင်ႈငမ်းယဵၼ်လႄႈ မိူဝ်ႈၼႆႉ (04/07/12) ယူႇတီႈ SSPP/SSA ႁဵတ်းပၢင်ၵုမ် တီႈ ငဝ်ႈငုၼ်းသေတႅပ်းတတ်းဝႃႈ တေထွၼ်ဢွၵ်ႇပၼ်တပ်ႉပၢင်သဝ်းၽွင်ႈ၊ မိူၼ်ၼင်ႇတပ်ႉၵွင်းမႆႉႁုင်း ပွတ်းမိူင်းဢွတ်ႇ ၸႄႈဝဵင်းမိူင်းသူႈ။ တပ်ႉ 7 လၵ်း ၼႂ်းဢိူင်ႇၼမ်ႉလဝ်း ၸႄႈဝဵင်းတၢင်ႉယၢၼ်း။ တပ်ႉၵွင်း မႆႉၸူင် ၸိူဝ်းၼႆႉ၊ ၵူၺ်းၵႃႈ တေပႂ်ႉတူၺ်းငဝ်းလၢႆးၵွၼ်ႇ။ ၸွမ်းၼင်ႇ ၶွမ်ႊမတီႊငဝ်ႈငုၼ်းတႅပ်းတတ်း တႄႉ တေထွၼ်ပၼ်မိူဝ်ႈၽုၵ်ႈ (05/07/12) ၊ ပေႃးထွၼ်ယဝ်ႉ ၼင်ႇႁိုဝ်တပ်ႉသိုၵ်းမၢၼ်ႈ တေဢမ်ႇမႃး ပၵ်းယူႇၼၼ်ႉ ယူႇတီႈ SSPP/SSA လႆႈတုၵ်းယွၼ်းဝႆႉယူႇ၊ ပေႃးသိုၵ်းမၢၼ်ႈမႃးပုတ်ႈပၵ်းယူႇတႄႉ ႁဝ်းၶႃႈတေ ဢမ်ႇၽွမ်ႉ။

“ဢၼ်ထွၼ်ပၼ်ၼၼ်ႉ ဢမ်ႇၸႂ်ႈတပ်ႉယႂ်ႇတပ်ႉလူင်ၼင်ႇၵဝ်ႇ၊ ႁဵတ်းဝႆႉပဵၼ်သုမ်ႉပဵၼ်ယၢမ်းဢွၼ်ႇၵူၺ်း။ တပ်ႉတီႈၼမ်ႉ လဝ်းတႄႉ ႁဵတ်းဝႆႉၶႅမ်ႉ၊ ၵူၺ်းၵႃႈ တင်ႈတႄႇလႆႈထွၼ်ပၼ်ၸဵမ်မိူဝ်ႈပၢင်တိုၵ်း ပီၵၢႆၼၼ်ႉ ဢမ်ႇၵႂႃႇယူႇၶိုၼ်း”- ၽူႈၶၢၼ်ပၢၵ်ႇ SSPP/SSA လၢတ်ႈၼႄထႅင်ႈၼင်ႇၼႆ။

ပၢင်တိုၵ်းၼႂ်းၸႄႈဝဵင်းတၢင်ႉယၢၼ်းၼႆႉ တပ်ႉတႆး SSPP/SSA တိလႆႈတူဝ်တၢႆသိုၵ်းမၢၼ်ႈ 5 ၵေႃႉ၊ ပႃးၸၼ်ႉ 2 တုမ်ႇၵေႃႉ ၼိုင်ႈ၊ 3 တုမ်ႇၵေႃႉၼိုင်ႈ၊ ၵွင်ႈၵၢင်ႇၵူႈသႅၼ်းသႅၼ်းလၢႆလဝ်း၊ ၼႂ်းၼၼ်ႉပႃး မေႃႇထႃႇ ၶိူင်ႈၸၢၵ်ႈလၢတ်ႈၸိူဝ်းၼႆႉ- ၾၢႆႇပၢႆး ယူႇလီဢၼ်ၸမ်ၸႂ်သိုၵ်းမၢၼ်ႈ ၵေႃႉၼိုင်ႈလၢတ်ႈ။

ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ဢၼ်ၸွမ်သိုၵ်းပၢင်ႇၾႃႉဢွၼ်ႁူဝ်ၼႆႉ လႆႈတူၵ်း လူင်းၵိုတ်းယိုဝ်း ၵၼ်တင်းမၢၼ်ႈ မိူဝ်ႈဝၼ်းထိ 28/01/12 ၊ လူၺ်ႈၶွမ်ႊမတီႊငဝ်ႈငုၼ်းဢုပ်ႇလွင်ႈငမ်း ယဵၼ် SSPP/SSA ႁူပ်ႉဢုပ်ႇၸဝ်ႈ ၼႃႈတီႈမၢၼ်ႈ လူင်ပွင်ၸိုင်ႈတဵင်းၸဵင်ႇ လွင်ႈငမ်းယဵၼ်ၸၼ်ႉ ၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် တီႈလုမ်းလူင်ပွင် ၸိုင်ႈမိူင်းတႆး ဝဵင်းတူၼ်ႈတီး။ သွင်ၾၢႆႇလႆႈၸႂ် တူၵ်းလူင်း-လူင်းလၢႆးမိုဝ်း တင်းမူတ်း 10 ၶေႃႈ၊ ၸၼ်ႉၸႄႈမိူင်း 5 ၶေႃႈလႄႈ ၸၼ်ႉၸိုင်ႈမိူင်းႁူမ်ႈတုမ် 5 ၶေႃႈ။

ၼႂ်းၸၼ်ႉၸႄႈမိူင်း 5 ၶေႃႈ- ပႃးၵိုတ်းသိုၵ်းတေႃႇၵၼ်။ ၵူၼ်းဝၢၼ်ႈလႄႈလုၵ်ႈမေး ၶွင်လုၵ်ႈၸုမ်း SSPP/SSA ႁႂ်ႈလႆႈယူႇသဝ်း ၵိၼ်သၢင်ႈတီႈဝၢၼ်ႈႁႆးၵႂႃႇ။ ပေႃးယိပ်းၵွင်ႈၵၢင်ႇဢွၵ်ႇၼွၵ်ႈၼႃႈလိၼ် ဢၼ်ၵုမ်းၵမ်ဝႆႉၸိုင် သွင်ၾၢႆႇတေလႆႈပွင်ႇလႅင်းငူပ်ႉငိ ၵၼ်လူင်ႈၼႃႈ လႄႈ တေဢုပ်ႇဢူဝ်းၵၼ်ၸၼ်ႉ ၸိုင်ႈမိူင်းႁူမ်ႈတုမ်။ တင်ႈတႄႇတူၵ်းလူင်းၵိုတ်းယိုဝ်းၵၼ်မႃးၼႆႉ လႆႈပဵၼ်ပၢင်တိုၵ်းၵၼ်တီႈဢေႇသုတ်း ဢမ်ႇယွမ်း 19 ပၢင်။