တပ်ႉပၢင်သဝ်း တပ်ႉသိုၵ်းၸိုင်ႈတႆး SSPP/SSA ပွတ်း ၼမ်ႉလဝ်း-မိူင်းဢွတ်ႇၵမ်ႈၽွင်ႈ ထွၼ်ပၼ် ၸွမ်းၼင်ႇ မၢၼ်ႈတုၵ်းယွၼ်းယဝ်ႉ၊ ၵူၺ်းၵႃႈ ဢမ်ႇထွၼ်ၵႂႃႇယူႇ ၾၢႆႇတူၵ်းတၢင်းၵႃး ၸွမ်းၼင်ႇမၢၼ်ႈ တုၵ်းယွၼ်း။

ဝၼ်းထိ 05/07/12 (မိူဝ်ႈဝႃး) ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ထွၼ်ပၼ် တပ်ႉပၢင်သဝ်း ဢၼ်မီးၼႂ်းၵႄႈမႄႈၼမ်ႉပၢင်တင်းၼမ်ႉၶူင်း မိူၼ်ၼင်ႇတပ်ႉၵွင်းမႆႉႁုင်း ပွတ်းမိူင်းဢွတ်ႇ ၼႂ်းၸႄႈဝဵင်းမိူင်းသူႈ၊ တပ်ႉပၢင် သဝ်း 7 လၵ်း ပွတ်းမိူင်းၵၢဝ် ၸႄႈဝဵင်းတၢင်ႉယၢၼ်းၸိူဝ်းၼႆႉ။ ထွၼ်လူင်း တပ်ႉ သေၶၢႆႉၵႂႃႇပၵ်းဢဝ်တီႈယူႇၸွမ်းသၢပ်ႇၶူင်း- ၼႆယဝ်ႉ။

လွင်ႈတၢင်းဢၼ် SSPP/SSA ထွၼ်ပၼ်ၼႆႉ မိူဝ်ႈဝၼ်းထိ 03/07/12 ယူႇတီႈၵႅမ်ႁူဝ်ပဝ်ႈ (3) ၶွမ်ႊမတီႊ ၾၢႆႇၵေႃႇသၢင်ႈ လွင်ႈငမ်းယဵၼ် ၸိုင်ႈမိူင်းႁူမ်ႈတုမ် ဢူးတဵင်းၸေႃႇ မွၵ်ႇလၢတ်ႈတုၵ်းယွၼ်းမႃးဝႃႈ- ၽွင်းယၢမ်းဢၼ်ၶွမ်ႊမတီႊၾၢႆႇၵေႃႇ သၢင်ႈလွင်ႈငမ်းယဵၼ် တိုၵ်ႉၶတ်းသၢင်ႈႁၢင်ႈပွင်ၵၢၼ်ငၢၼ်းယူႇၼႆႉ ၶႂ်ႈႁႂ်ႈၾၢႆႇ တပ်ႉသိုၵ်း SSPP/SSA ယိူၼ်ႉၵၼ်ႈပၼ်သေ ငိူင်ႉဝႄႈပၼ်ၽွင်ႈ။

ၵပ်းၵၢႆႇလွင်ႈၼႆႉ ဢွၼ်ၼႃႈၼၼ်ႉ ဢိင်ၼိူဝ်တပ်ႉသိုၵ်းမၢၼ်ႈတင်းတပ်ႉသိုၵ်းတႆး ပဵၼ်ပၢင်တိုၵ်းၵၼ် ႁၢဝ်ႈႁႅင်း၊ ၼင်ႇႁိုဝ် ၵိုတ်းယိုတ်းလႆႈၵၢၼ်သိုၵ်းသေဢမ်ႇတုမ်ႉတိူဝ်ႉလွင်ႈငမ်းယဵၼ်လႄႈသင်၊ ၵွပ်ႈတူၺ်း ထိုင်ၵူၼ်းဝၢၼ်ႈၵူၼ်းမိူင်း ပဵၼ်ၶၢဝ်း ၽုၵ်ႇၶဝ်ႈတဝ်ႈၼမ်ႉလႄႈ ယူႇတီႈ SSPP/SSA လႆႈတႅမ်ႈလိၵ်ႈၸူးၸွမ် ၸိုင်ႈတဵင်းၸဵင်ႇ ႁႂ်ႈၵႄႈလိတ်ႈပၼ်ႁႃလွင်ႈၼႆႉ။ ၸွမ်ၸိုင်ႈတဵင်းၸဵင်ႇဢမ်ႇတွပ်ႇသင်မႃးသေတႃႉ တူဝ်တႅၼ်းလူင်ပွင်ၸိုင်ႈ ဢူးတဵင်းၸေႃႇတွပ်ႇလၢတ်ႈတုၵ်းယွၼ်းမႃး။

ၾၢႆႇသိုၵ်းတႆးထွၼ်လူင်းတပ်ႉသေပၵ်းယူႇဝႆႉႁိမ်းႁွမ်းၸွမ်းသၢပ်ႇၶူင်း၊ ဢမ်ႇယူႇၼိူဝ်တပ်ႉ။ ဢမ်ႇထွၼ်ၵႂႃႇ တၢင်းတူၵ်းၸွမ်း ၼင်ႇသိုၵ်းမၢၼ်ႈတုၵ်းယွၼ်း။ ၾၢႆႇၼိုင်ႈၵေႃႈ SSPP/SSA ၶတ်းၸႂ်ပၵ်းတႃတူၺ်းလၢႆး ႁဵတ်း သၢင်ႈသိုၵ်းမၢၼ်ႈယူႇ။ ၽွင်းသိုၵ်းတႆးတိုၵ်ႉထွၼ်ယူႇၼၼ်ႉ သိုၵ်းမၢၼ်ႈပႃႈတႂ်ႈတိူင်းသိုၵ်းၸဵင်ႇ ႁွင်ႇဝၼ်းဢွၵ်ႇ (လႃႈသဵဝ်ႈ)လုၵ်ႉတၢင်ႉယၢၼ်းမႃးထႅမ်ႁႅင်း သိုၵ်းထႅင်ႈပွတ်းမိူင်းၵၢဝ်-ၼမ်ႉလဝ်း ၵႃး 8 လမ်း၊ ၼိုင်ႈလမ်းတၢင်ႇ သိုၵ်းဢမ်ႇယွမ်း 30-40 ၼႆယဝ်ႉ။

ၾၢႆႇသိုၵ်းမၢၼ်ႈဝႃႈ လူင်းပၼ်တပ်ႉၵူၺ်းဢမ်ႇလႆႈ၊ ယႃႇပၵ်းဢိူမ်ႈၸွမ်းသၢပ်ႇၶူင်း၊ ႁႂ်ႈ(လုၵ်ႉတၢင်းဢွၵ်ႇ) ထွၼ်ၵႂႃႇၾၢႆႇတူၵ်း တၢင်း(ၼမ်ႉပၢင်)တင်းမူတ်း။ ၵွပ်ႈၼၼ် ပေႃးၾၢႆႇသိုၵ်းမၢၼ်ႈဢမ်ႇၽွမ်ႉဢၼ်သိုၵ်းတႆး ပၵ်းဢိူမ်ႈသၢပ်ႇၶူင်းၸၢင်ႈယိုဝ်းၵၼ် ထႅင်ႈ- ၵူၼ်းၼႂ်းပိုၼ်ႉတီႈလၢတ်ႈၼႄၼင်ႇၼႆ။