ၵူၼ်းဝဵင်းၼမ်ႉၶမ်း လင်ႁိူၼ်းၼပ်ႉႁူဝ်ပၢၵ်ႇလင်လႆႈၾႆး ၶႅၼ်ႈဝၼ်း၊ သမ်ႉလႆႈသဵင်ႈၵႃႈၾႆးၵူႈလိူၼ်၊ သဵင်ႈပႃးၵႃႈပႂ်ႉ တူၺ်းမီႊတိူဝ်ႊပွၵ်ႊသ်ၵူၺ်းပႆႇပေႃး၊ သဵင်ႈပႃးၵႃႈၾႆးတႆႈ ၸွမ်းတၢင်း။

မီႊတႃႊပွၵ်ႉသ်ၾႆးၾႃႉ

တီႈဝဵင်းၼမ်ႉၶမ်းၼႆႉ ပဵၵ်ႉသမ်ႉဝႃႈမီးတၢတ်ႇဝၢၼ်ႈတၢပ်ႈ သူၺ်ႇလီႇ (ထုင်ႉမၢဝ်း) ဢၼ်ၸႂ်ႉႁဵတ်းဢွၵ်ႇ ၾႆးၾႃႉႁႅင်းၼမ်ႉၵမ်း သိုဝ်ႈသေတႃႉ ၵူၼ်းမိူင်းၼမ်ႉၶမ်း တိုၵ်ႉလႆႈၾႆးၾႃႉၶႅၼ်ႈဝၼ်းယူႇ၊ ၾႆးၾႃႉဢမ်ႇမႃး တႃႇသေႇ။ ၼွၵ်ႈသေၼၼ်ႉ လႆႈသဵင်ႈ ၵႃႈပႂ်ႉတူၺ်းမီႊတႃႊပွၵ်ႉသ် (Meter box) ဢၼ်တိတ်းတင်ႈဝႆႉ ၼႂ်းႁိူၼ်း ၵူၺ်းပႆႇပေႃး၊ လႆႈသဵင်ႈပႃးၵႃႈ လွတ်ႇၾႆးၵူတ်ႉ ၵူတ်ႉဢွၼ်ႇ ဢၼ်တႆႈၸွမ်းၶၢင်ႈတၢင်း၊ လၵ်းၾႆး 30 ၊ လွတ်ႇၾႆး 30 လုၵ်ႈ၊ ဢမ်ႇလႅင်းၽဵင်ႇ၊ မႃးမွၵ်ႈ 6 လုၵ်ႈၵူၺ်း။ ၵွပ်ႈၼၼ် ႁႂ်ႈၵိုင်ႇတင်းသဵင်ႈၵႃႈမၼ်း ၼၼ်ႉ ၵူၼ်းမိူင်းၶႂ်ႈႁႂ်ႈ ပိုတ်ႇပၼ်ၾႆးၵူႈဝၼ်း၊ ယႃႇႁႂ်ႈမိူၼ်ၼင်ႇမိူဝ်ႈလဵဝ်- ၵူၼ်းၼမ်ႉၶမ်း ၸၢႆးၶမ်း လၢတ်ႈၼႄၼင်ႇၼႆ။

မၼ်းၸၢႆးသိုပ်ႇၶၢင်းဝႃႈ- မီးတိူဝ်ႊပွၵ်ႊသ်ၵေႃႈမီးဝႆႉၼႂ်းႁိူၼ်းႁဝ်း၊ ပဵၼ်ႁဝ်းလႆႈပႂ်ႉတူၺ်းလုမ်းလႃး၊ ၵူၺ်းၵႃႈ ၵႃႈပႂ်ႉတူၺ်းမၼ်း သမ်ႉပဵၼ်ၾၢႆႇၾႆးၾႃႉၶဝ်လႆႈၵိၼ်၊ ၼိုင်ႈလိူၼ်လႆႈသႂ်ႇၼိုင်ႈႁိူၼ်းၼိုင်ႈႁဵင်။ မိူၼ်ၼင်ႇပွၵ်ႉတႂ်ႈ ဝဵင်းၼမ်ႉၶမ်း လင်ႁိူၼ်းၵူၼ်း မီး 350 လင်၊ ၸိူဝ်းတေႃႇသၢႆၸႂ်ႉၾႆးသေလႆႈၾႆးမီး 330 လင်၊ ၼိုင်ႈႁိူၼ်းၼိုင်ႈ လႆႈသဵင်ႈၵႃႈပႂ်ႉတူၺ်းမီႇတႃႇ (မီးတႃႇၸွင်ႉ သျွၵ်ႉ) ၼႆႉၼိုင်ႈႁဵင်- ဝႃႈၼႆ။

ၼႂ်းၸႄႈဝဵင်းၼမ်ႉၶမ်း မိူၼ်ၼင်ႇဝၢၼ်ႈၵုၼ်လူင်၊ ၼွင်ၵွင်ႊ၊ ၼွင်မႃႉ၊ မၢၼ်ႈႁွင်း၊ ႁူဝ်သၢႆး၊ မၢၼ်ႈၼွင်၊ ၸႄႈႁၢႆး၊ ၵုင်းသႃႇ၊ မၢၼ်ႈၵၢင်ႈ၊ ၵွင်းဝဵင်း၊ ၼွင်ၶၢင်၊ ၼမ်ႉတီး၊ ၼမ်ႉမႃႉ၊ ငွၼ်ႈဢႅၼ်ႇ၊ ႁူဝ်ပုင်ႇ၊ မၢၼ်ႈၶမ်း ၸိူဝ်းၼႆႉ ဢမ်ႇလႆႈၾႆးၾႃႉ(ဝၢၼ်ႈတၢပ်ႈ)လူင်ပွင်ၸိုင်ႈ၊ ၵမ်ႈၽွင်ႈၸႂ်ႉႁႅင်းၾႆးၾႃႉၼမ်ႉႁွင်ႈ၊ ၼမ်ႉၵေး ၸွမ်းမူႇဝၢၼ်ႈ ၸဝ်ႈၵဝ်ႇ၊ ၵမ်ႈၼမ်တႄႉတိုၵ်ႉလႆႈ ၸႂ်ယႂ်ႇၾႆးမိူင်းၶႄႇယူႇ- ၵူၼ်းၼုမ်ႇၼမ်ႉၶမ်းၵေႃႉၼိုင်ႈ လၢတ်ႈၼင်ႇၼႆ။