ဝၼ်းထိ 24-25 လိူၼ်ၵျုႊလၢႆႊ ဝူင်းၵၢၼ်မိူင်း၊ ၸုမ်းၵိုတ်းယိုဝ်း၊ ၸုမ်းသိုၵ်းၵူၼ်းမိူင်း (ပီႇတုၸိတ်ႉ) ႁူပ်ႉထူပ်းဢုပ်ႇဢူဝ်းၵၼ် ၵဵဝ်ႇၵပ်းၵၢၼ်မိူင်း ပိူဝ်ႈတႃႇႁူမ်ႈသၢင်ႈၵႂႃႇမိူဝ်းၼႃႈ။ ပၢင်ၵုမ်ၼၼ်ႉ ၸတ်းႁဵတ်း တီႈတႃႈၵုင်ႈ။ ဢုပ်ႇဢူဝ်းတႅပ်းတတ်းသင်ၼႆၼၼ်ႉ ၵေႃသိုဝ်ႇၶၢဝ်ႇၽူႈတွႆႇႁွၵ်ႈ လႆႈတိတ်းတေႃႇတွင်ႈထၢမ် ၽူႈၶၢၼ်ပၢၵ်ႇပႃႇတီႇႁူဝ်သိူဝ် ၸၢႆးလဵၵ်ႉ ၼင်ႇၼႆၶႃႈဢေႃႈ။

ထၢမ်။ ။ ပၢင်ၵုမ်ဢၼ်ၸတ်းႁဵတ်းၼႂ်း 2 ဝၼ်းၼႆႉ မီးၶေႃႈတႅပ်းတတ်းလမ်ႇလွင်ႈၸိူင်ႉႁိုဝ်ၽွင်ႈၶႃႈ။

တွပ်ႇ။ ။ ႁဝ်းၶႃႈမႃးႁူပ်ႉၵုမ်ၵၼ်ၼႆႉတႄႉ ပိူင်လူင်မၼ်းပိူဝ်ႈတႃႇမိူဝ်းၼႃႈၶွင်မိူင်းတႆးၶႃႈ။ ၼႂ်းႁဝ်းၶႃႈ မႃးႁူမ်ႈဢုပ်ႇဢူဝ်း ၵၼ်ၼၼ်ႉ မီးၸဝ်ႈၶုၼ်ထုၼ်းဢူး ဢွၼ်ႁူဝ် ပႃႇတီႇႁူဝ်သိူဝ် 4 ၵေႃႉ၊ ၸဝ်ႈႁၢၼ်လၢဝ် သႅင် ဢွၼ်ႁူဝ် ၸုမ်းၶွင်ႊသီႊဢဝ်ၶိုၼ်း ၸိုင်ႈတႆး(RCSS/SSA) 3 ၵေႃႉ၊ ၸဝ်ႈသိုၵ်းလူင်ၸၢႆးတူး ဢွၼ်ႁူဝ် ၸုမ်းပႃႇတီႇမႂ်ႇသုင်ၸိုင်ႈတႆး (SSPP/SSA) ဝၢၼ်ႈႁႆး 3 ၵေႃႉ၊ ၸွမ်ႁၢၼ်ၵၢႆႇၾႃႉ ဢွၼ်ႁူဝ် တပ်ႉသိုၵ်းၵူၼ်း မိူင်းၸိုင်ႈတႆး သႅင်ၵႅဝ်ႉ 5 ၵေႃႉ။ လိူဝ်ၼၼ်ႉ မီးၸုမ်းလဵပ်ႈႁဵၼ်း 2 ၸုမ်း။ တင်းမူတ်း 6 ၸုမ်း။ မီးလွင်ႈ ဢုပ်ႇဢူဝ်းၵၼ်သေယဝ်ႉ တႅပ်းတတ်းၵႂႃႇ လၢႆလၢႆၶေႃႈ။ ႁူဝ်ပဝ်ႈၶုၼ်ထုၼ်းဢူးလႄႈ ပီႈၸၢႆးၼုတ်း ႁွင်ႉ ၸၢႆးၺုၼ်ႉလုၼ်ႇ တေလႆႈၵႂႃႇထူပ်း ၸွမ်ၸိုင်ႈဢူးတဵင်းသဵင်ႇ ၼႂ်းဝူင်ႈၼႆႉ။ ပေႃးၵႂႃႇထူပ်းမႃးၼႆ ပိူဝ်ႈတႃႇ ၵၢၼ်မိူင်း မိူင်းတႆး တင်းသဵင်ႈၼၼ်ႉ မွပ်ႈဢၢပ်ႈပၼ် ၸဝ်ႈၶုၼ်ထုၼ်းဢူး ၶဝ်သွင်ၸဝ်ႈ ႁႂ်ႈလႆႈ တၢင်တူဝ်ၵူႈမူႇၵူႈၸုမ်းသေ မွၵ်ႇလၢတ်ႈႁၢႆးငၢၼ်း ၼႄၵႂႃႇ၊ တုၵ်းယွၼ်းၵႂႃႇ လႆႈၸႂ်ၵၼ်ၸိူင်ႉၼၼ်။ ပိူင်လူင်မၼ်း ႁဝ်းၶႃႈတႅပ်းတတ်းဝႃႈ ႁႂ်ႈၸဝ်ႈၶုၼ် ထုၼ်းဢူး ယိုၼ်ႈယွၼ်း ပိူဝ်ႈတႃႇပႃႇတီႇတႆးတင်း သဵင်ႈလႄႈ တပ်ႉသိုၵ်းၼႂ်းမိူင်းတႆး ႁႂ်ႈလႆႈႁူမ်ႈၵၼ်သေ ႁဵတ်းပၢင်ၵုမ်လူင် တီႈမိူင်းတႆး။ ဝၢႆးၼၼ်ႉသမ်ႉ ယိုၼ်ႈယွၼ်းဝႃႈ ႁႂ်ႈလႆႈႁဵတ်းပၢင်ၵုမ် ဢၼ်ၶဝ်ႈမႃးမူတ်းမူတ်း ၸဵမ်ပႃႇတီႇပၢႆးမိူင်းလႄႈ ၸုမ်းယိပ်းၵွင်ႈ ၵၢင်ႇၼႂ်းမိူင်းတႆးတင်း သဵင်ႈ။ ႁႂ်ႈလႆႈဢုပ်ႇၵၼ်ၵႂၢင်ႈၵႂၢင်ႈၶႂၢင်ၶႂၢင် ပဵၼ်တၢင်းၵၢၼ်။ သွင်ၶေႃႈၼႆႉတႄႉ ႁဝ်းၶႃႈတေဝႆႉၼၵ်းၼႃသေ တၢင်ႇယွၼ်းၵႂႃႇ။

ထၢမ်။ ။ ဢုပ်ႇၵုမ်လွင်ႈငမ်းယဵၼ်ယဝ်ႉၼႆသေတႃႉ တေႃႇထိုင်ယၢမ်းလဵဝ်တိုၵ်ႉလႆႈပိုတ်းယိုဝ်းၵၼ် ယူႇတိၵ်းတိၵ်းၼႆႉ ႁူဝ်ပဝ်ႈတပ်ႉသိုၵ်းၸိုင်ႈတႆး RCSS/SSA ၸွမ်သိုၵ်းယွတ်ႈသိုၵ်းတႄႉလၢတ်ႈဝႃႈ တၢင်း ၽိတ်းၸၼ်ႉပႃႈတႂ်ႈ ၵူၺ်းဢမ်ႇၸႂ်ႈ ယဝ်ႉ။ တိုၼ်းတေပဵၼ်ၽႅၼ်ၵၢၼ် ၸၼ်ႉပႃႈၼိူဝ်ယဝ်ႉၼႆလႄႈ ပေႃးထိုင်တီႈတေဢုပ်ႇၵၢၼ်မိူင်းမႃးတႄႉတႄႉ ၸွင်ႇတေလႆႈ ဝၢင်းၸႂ်ယူႇၶႃႈႁႃႉ။ လွင်ႈငမ်းယဵၼ်ဢၼ်ၶဝ် ႁဵတ်းယူႇၼႆႉ ၸွင်ႇတေ မၼ်ႈၵႅၼ်ႇလႆႈယူႇၶႃႈႁႃႉ။

တွပ်ႇ။ ။ လွင်ႈငမ်းယဵၼ်ႁႂ်ႈပေႃးမၼ်ႈၵႅၼ်ႇၵႂႃႇဢၼ်ဝႃႈၼၼ်ႉတႄႉ ပိူင်ယႂ်ႇသုတ်း သွင်ပႃႈသွင်ၾၢႆႇ လူဝ်ႇလႆႈမီး လွင်ႈ ယုမ်ႇယမ်ၵၼ်။ ၼင်ႇၼၼ် ႁဝ်းၶႃႈႁူပ်ႉဢုပ်ႇၵၼ်တင်းၸွမ်ၸိုင်ႈ ၾၢႆႇဢုပ်ႉပိူင်ၼႆႉ တႄႉ ၵွပ်ႈပိူဝ်ႈႁဝ်းၶႃႈယိူင်းတႃႇလႆႈ သုၼ်ႇလႆႈသုၼ်ႇပဵၼ်ၽဵင်ႇပဵင်းၵၼ်လႄႈ တႃႈႁႂ်ႈလႆႈဢုပ်ႇၵၢၼ်မိူင်း။ ၾၢႆႇၼိုင်ႈသမ်ႉ မိူၼ်ၸိူင်ႉဢၼ်ဢုပ်ႉငၢမ်ႇဝႆႉ ဢၼ်ဝႃႈ ၵႃႇလူင်ႇ(ကာလုံ) ၶွင်ႊသီႊၵႅတ်ႇၶႄလႄႈႁူမ်ႇလူမ်ႈ ၸိုင်ႈမိူင်းၼၼ်ႉ ၸုမ်းသိုၵ်းၶဝ်ၼၼ်ႉသမ်ႉ ၸွမ်းၼင်ႇၶဝ်လႆႈၵမ်ငမ်ယိပ်း ဢႃႇၼႃႇမႃး လၢႆၵၢပ်ႈလၢႆပၢၼ် ႁိုင်ၼၢၼ်းယဝ်ႉလႄႈ ၵိုင်ႉၵၢင်ႉတေလူတ်းယွမ်းပႅတ်ႈဢႃႇၼႃႇၶဝ် ၵိုင်ႉၵၢင်ႉတေပွႆႇၽႃႈပႅတ်ႈ ဢႃႇၼႃႇ ၶဝ်ၼႆႉ ၶဝ်တိုၼ်းတေဢမ်ႇၽွမ်ႉသေတႃႉၵေႃႈ ၸုမ်းပႃႇတီႇပၢႆးမိူင်းလႄႈသင် ၸုမ်းၵိုတ်းယိုဝ်းဝႆႉသေ ဢဝ်ငမ်း ယဵၼ်ဝႆႉၼၼ်ႉလႄႈသင် ႁႂ်ႈပေႃးလႆႈဢုပ်ႇပၼ်ႁႃၵၢၼ်မိူင်း ၸၢင်ႈလႆႈၵႄႈလိတ်ႈႁူမ်ႈၽဵင်ႇၵၼ် ၼၼ်ႉတႄႉ တၵ်းတေလႆႈ သုတ်ႉၸူးၸွမ်ၸိုင်ႈသေ ပၼ် ႁႅင်းမၼ်း ၶဝ်ႁႃၸူးမၼ်း ႁႂ်ႈပေႃးလႆႈဢုပ်ႇၵႂၢင်ႈ ၵႂၢင်ႈၶႂၢင်ၶႂၢင်။ ပေႃးဝႃႈၶဝ် ၸဝ်ႈယွမ်းႁပ်ႉႁူပ်ႉ ဢုပ်ႇယူႇၼႆႉ ၶၵ်ႉၼိုင်ႈယဝ်ႉၶၵ်ႉ ၼိုင်ႈ ႁဝ်းၶိုၼ်ႈၵႂႃႇ။ မိူၼ်ၸိူင်ႉၼင်ႇ ၸုမ်းဢႃႊသီႊယၢၼ်ႊ(ASEAN) လႄႈသင် ၸုမ်းယူႇဢႅၼ်ႊ (UN) လႄႈသင် ၸုမ်းဢီႊယူႊ (EU) ၶဝ်ႁိုဝ် ဢမေႊရိၵႃႊၶဝ်ႁိုဝ်ၼႆ ႁၼ်ထိုင်မႃးပဵၼ်လွင်ႈၵေႃႇသၢင်ႈ ၵၢၼ်လီယူႇၼႆၵေႃႈ ၸုမ်းၾၢႆႇသိုၵ်းၼႆႉ ဢမ်ႇဝၼ်း ၼိုင်ႈၵေႃႈဝၼ်းၼိုင်ႈ မၼ်းၵႃႈလႆႈယွမ်းလူင်းၵႂႃႇလွႆးလွႆးယူႇ။ ႁဝ်းၶႃႈတႄႉ ႁၼ်ထိုင်ၼင်ႇၼၼ်ဢေႃႈ။

ထၢမ်။ ။ ယၢမ်းလဵဝ် ပႃႇတီႇၵၢၼ်မိူင်းပီႈၼွင်ႉတႆးၵေႃႈမီးလၢႆပႃႇတီႇ တပ်ႉသိုၵ်းတႆးၼႆၵေႃႈ မီး 2 -3 တပ်ႉသိုၵ်း။ ၵၢင် ၸႂ်ၵူၼ်းမိူင်း ႁဝ်းၶႃႈသမ်ႉ ပႃႇတီႇၵၢၼ်မိူင်းၵေႃႈၶႂ်ႈႁႂ်ႈႁူမ်ႈၵၼ် ပဵၼ်ဢၼ်လဵဝ် တပ်ႉသိုၵ်း တႆးၵေႃႈၶႂ်ႈႁႂ်ႈပဵၼ်ဢၼ်လဵဝ်။ ၵၢၼ်ၽွမ်ႉႁူမ်ႈၼႆႉ ၸွင်ႇလႅပ်ႈတေငၢႆႈၶႃႈႁႃႉ။

တွပ်ႇ။ ။ ၵၢၼ်ၽွမ်ႉႁူမ်ႈၵၼ်ဢၼ်ဝႃႈၼၼ်ႉတႄႉ မၼ်းပဵၼ်ၶေႃႈလီဝၢၼ်ၸႂ်ၸဵမ်းၸႂ်သေပိူၼ်ႈၶႃႈ။ ၵူၺ်းၵႃႈ တႃႇတေ ၵေႃႇသၢင်ႈလွင်ႈၽွမ်ႉႁူမ်ႈပဵၼ်မႃးဢၼ်ဝႃႈၼၼ်ႉ တေလႆႈယိူၼ်ႉၸႂ်သေ ဢဝ်ၶၢဝ်း ယၢမ်းၼမ်ၼမ်သေယဝ်ႉ ၶိုၼ်ႈၵႂႃႇၸွမ်း ၶၵ်ႉၶၵ်ႉ ၵမ်းတွၼ်ႈတွၼ်ႈ။ ပႃႇတီႇပၢႆးမိူင်းၵေႃႈလီ တပ်ႉသိုၵ်းၵေႃႈလီ ၵိုင်ႉၵၢင်ႉတေမႃးႁူမ်ႈၵၼ်သေယဝ်ႉ ၶူၼ်းၶဝ်းၵၼ်ၵမ်း လဵဝ်သေ ႁဝ်းၽွမ်ႉၵၼ်ယဝ်ႉ ဢၼ်ဝႃႈၼၼ်ႉတႄႉ မၼ်းတေဢမ်ႇၵိုင်ႉၵင်ႉပဵၼ်မႃးလႆႈၶႃႈ။ ၼႂ်းလုမ်ႈၾႃႉၵေႃႈ ဢၼ်ပဵၼ် လႆႈ မႃး ပႆႇယၢမ်ႈႁၼ်တူဝ်ယၢင်ႇမၼ်းမီးမႃးၼင်ႇၵဝ်ႇ။ ၵူၺ်းၵႃႈတီႈၼႆႈ ႁဝ်းၶႃႈတေလႆႈၾၢင်ႉတႄႉ ပိူၼ်ႈတိုၼ်း တေ ထႅၵ်ႇႁႂ်ႈႁဝ်း တႅၵ်ႇယူႇ။ ၼႂ်းၵႄႈၼႆႉ ပေႃးႁဝ်းဢမ်ႇလဵင်ႉၸႂ် တႃႇတေတႅၵ်ႇၵၼ်ၼႆတႄႉ တေၽွမ်ႉႁူမ်ႈၵၼ်လႆႈယူႇၶႃႈ။

ထၢမ်။ ။ ပေႃးၼႆ တူဝ်ၸွမ်ၸိုင်ႈၵေႃႈလီ ဢူးဢွင်ႇမိၼ်းၵေႃႈလီ ယင်းဢမ်ႇၸိသင်ႇႁၢမ်ႈႁႄႉတပ်ႉ သိုၵ်းလႆႈ။ ဢၼ်ဢူး ဢွင်ႇမိၼ်းယွၼ်းတၢင်းၸွႆႈထႅမ်မႃးတီႈၸဝ်ႈၶုၼ်ထုၼ်းဢူး ႁႂ်ႈၶဝ်ႈၸွႆႈၼႂ်း ၵၢၼ်ၵေႃႇသၢင်ႈ လွင်ႈငမ်းယဵၼ်ၼႆ တေၸၢင်ႈ ၸွႆႈလႆႈမွၵ်ႈၶႃႈႁိုဝ်ၶႃႈ။

တွပ်ႇ။ ။ သုင်ၼႃႇသုတ်းၵေႃႈ တေၸၢင်ႈႁွင်ႉဢဝ်ႁူဝ်ၼႃႈယိပ်းၵွင်ႈၵၢင်ႇ မိူၼ်ၼင်ႇ ၸဝ်ႈယွတ်ႈသိုၵ်း ႁိုဝ် ၸဝ်ႈပၢင်ႇၾႃႉ ႁိုဝ် ႁႂ်ႈၶဝ်လႆႈမႃးႁူပ်ႉတၢင်းၸွမ်ၸိုင်ႈ ဢမ်ႇၼၼ် ၽူႈမီးပုၼ်ႈၽွၼ်း ၼႂ်းလူင်ပွင်ၸိုင်ႈ သေယဝ်ႉ တူၵ်းလူင်းၵၼ်၊ ဢုပ်ႇဢူဝ်း ၵၼ် ၶိုပ်ႈၼႃႈၵႂႃႇလႆႈ။ တီႈၵေႇသုတ်းတႄႉ ၼင်ႇႁိုဝ်ႁဝ်းတေဢုပ်ႇ ဢူဝ်းၵၼ်လႆႈ ပိူဝ်ႈတႃႇတေ မူၼ်ႉမႄးပိူင်ငဝ်ႈပိုင်းမိူင်း ၼၼ်ႉ တႄႉ ႁဝ်းတေႁဵတ်းပဵၼ်လႆႈယူႇ။ ႁႂ်ႈပေႃးၵိုင်ႉၵၢင်ႉဝႃႈ တေသၢင်ႇထုၵ်ႇၵႂႃႇတၢင်းသွင်ပႃႈသွင်ၾၢႆႇၼႆတႄႉၵေႃႈ တေၸၢင်ႈမုင်ႈ မွင်းယၢပ်ႇ ယူႇၶႃႈ။

ထၢမ်။ ။ ပေႃးႁဝ်းၶႃႈတူၺ်းၶိုၼ်းပၢင်ၵုမ်မိူဝ်ႈဝႃးၼႆႉ ၸွင်ႇတေၸၢင်ႈဝႃႈၽိုၼ်ႉၶိုၼ်း ၵေႃႁူမ်ႈသၢင်ႈ ၸိုင်ႈတႆး SSJAC ၼၼ်ႉယူႇၶႃႈႁႃႉ။

တွပ်ႇ။ ။ ၸိူင်ႉၼၼ်ၵေႃႈဝႃႈလႆႈယူႇၶႃႈ။ SSJAC ၼႆႉ တီႈပွင်ႇမၼ်းၵေႃႈပဵၼ်ဝႃႈ ၵေႃႁူမ်ႈသၢင်ႈၸိုင်ႈတႆး ၼႆလႄႈ မူႇလႂ် ၸုမ်းလႂ်ၵေႃႈလီ ပေႃးဝႃႈ ယိူင်းဢၢၼ်းပိူဝ်ႈတႃႇၵူၼ်းမိူင်းမီးၽွၼ်းလီ၊ ယိူင်းဢၢၼ်းပိူဝ်ႈတႃႇ ၵူၼ်းမီးလႆႈလူမ်ၸႂ်ၼႆတႄႉ ႁဝ်းၶႃႈ ႁူမ်ႈမိုဝ်းၵၼ် ႁဵတ်းၵၢၼ်လႆႈယူႇ။ ဢၼ်ႁဝ်းၶႃႈမႃးဢုပ်ႇၵၼ် ဝၼ်းထိ 24-25 ၼၼ်ႉၵေႃႈ ဢွၵ်ႇၾၢင်ႁၢင်ႈၼၼ်ႉ ယူႇၶႃႈ ။

ထၢမ်။ ။ ၼင်ႇဢၼ်ႁဝ်းၶႃႈလႆႈႁူႉၸွမ်း ယွၼ်ႉ JAC ၼႆႉ ဢွၼ်ၶိုင်သၢင်ႈတႃႇပဵၼ်မႃး ၶွင်ႊသီႊၵိူဝ်း ၵုမ်ၸိုင်ႈတႆးလႄႈ ထိုင်တီႈ ၽူႈၼမ်းတႆးပေႃးၺႃးၺွပ်း၊ ယၢမ်းလဵဝ်မီးလူင်ပွင်ၸိုင်ႈမႂ်ႇယဝ်ႉသေတႃႉ တပ်ႉသိုၵ်း တေဢမ်ႇဝၢႆႇလင်ၶိုၼ်းထႅင်ႈ ၵမ်းၼိုင်ႈ၊ ဢမ်ႇႁဵတ်းၸွမ်းလၢႆးၵဝ်ႇၼႆ ဢမ်ႇၸၢင်ႈဝႃႈၶႃႈလူး။

တွပ်ႇ။ ။ ၼၼ်ႉတႄႉ မိူၼ်တင်းဝႃႈ လပ်းတႃသေ ငုမ်းပႃၵူၺ်းၶႃႈ။ ၵၢၼ်ၸိူင်ႉၼႆတႄႉ။ ၵူၺ်းၼႃႇမိူဝ်ႈ ၼၼ်ႉ ယူႇတီႈ SSJAC သေ ဢမ်ႇတၼ်းလႆႈၶိုင်ပွင်ၵၢၼ်ဢီႈသင်သေဢိတ်း။ တိုၵ်ႉငႃဝႃႈတေၵေႃႇတင်ႈ ၸုမ်းၵိူဝ်းၵုမ်ၵၢၼ်မိူင်းၶွင်မိူင်းတႆး ၼႆၵူၺ်းလႄႈ ပေႃးလႆႈထုၵ်ႇတိၺွပ်းၵႂႃႇယဝ်ႉဢၼ်ဝႃႈၼၼ်ႉ မၼ်းဢမ်ႇၵိုင်ႇသေဢိတ်းၶႃႈ။ ၵူၺ်းမိူဝ်ႈလဵဝ်ၼႆႉတႄႉ ပိူဝ်ႈတႃႇတပ်ႉသိုၵ်းပဵၼ်ဢၼ်လဵဝ်၊ ပိူဝ်ႈတႃႇပႃႇတီႇ ပၢႆးမိူင်းပဵၼ်ဢၼ်လဵဝ်၊ ပိူဝ်ႈတႃႇမူၼ်ႉမႄးလႆႈပိူင်ငဝ်ႈပိုင်း မိူင်း 2008 ႁၼ်တီႈယိူင်းမၼ်းၸႅင်ႈၸႅင်ႈ လႅင်းလႅင်းသေ ၽွမ်ႉႁဵတ်းၵႂႃႇယူႇၼၼ်ႉတႄႉ ဢမ်ႇသၢင်ႇတေႃႇ လႆႈထုၵ်ႇတိၺွပ်းၵုမ်းၶင်ၶွၵ်ႈ ယူႇၼႆၵေႃႈ ၵိုင်ႇယူႇၶႃႈ။ ၼႆႉမၼ်းပဵၼ် ၽႂ်ႁဵတ်းၵေႃႈ မၼ်းတေပဵၼ် ၽူႈၶွင်ႈမၢပ်ႇပိုၼ်းၵူၺ်းလႄႈ ယူႇတီႈၾၢႆႇ ၵေႃႉတေ ပဵၼ်မၢပ်ႇမၼ်းၵေႃႈ မၼ်းတေလႆႈဝူၼ်ႉၼၵ်းၼၵ်းၼႃၼႃၶႃႈ။ ႁဝ်းႁဵတ်းၼႆႉပဵၼ် ၼႂ်းၶွပ်ႇဢၼ် ဝႃႈ သုၼ်ႇႁဝ်းမီးလႄႈ ႁဝ်းႁဵတ်းၵူၺ်းၶႃႈလူး။

ထၢမ်။ ။ သင်ဝႃႈငမ်းယဵၼ်လုၵႂႃႇၶႃႈလူး။ ၵူၼ်းၶဝ်ႈၸွႆႈ ၸွင်ႇတေၸၢင်ႈ ၺႃးၵိၼ်ၸွမ်း - ၼႆႉ ၸွင်ႇဢူး ဢွင်ႇမိၼ်း ပၼ်ၵႂၢမ်းမၼ်ႈၶႃႈၼႄႇ။

တွပ်ႇ။ ။ မိူဝ်ႈဝၼ်းႁဝ်းၶႃႈဢုပ်ႇၵၼ်ၼၼ်ႉ ႁူဝ်ပဝ်ႈၶုၼ်ထုၼ်းဢူး လၢတ်ႈ တီႈဢူးဢွင်ႇမိၼ်းဝႃႈ ၾၢႆႇၼႃႈၽွင်းလူင် ဢူးသူဝ်းတဵင်း။ ၸွမ်ၸိုင်ႈၸိမဵဝ်းၼိုင်ႈ တၢင်းတႂ်ႈသမ်ႉႁဵတ်းမဵဝ်းၼိုင်ႈ ၸိူင်ႉၼၼ်ႉ သမ်ႉ ပေႃးသိုပ်ႇပဵၼ်ၵႂႃႇတႄႉ ႁဝ်းဢမ်ႇ ၸၢင်ႈၸွႆႈသူ။ ၾၢႆႇၸၢဝ်းၶိူဝ်းၵေႃႈ တေယုမ်ႇႁဝ်းဢမ်ႇၸႂ်ႈ။ ဢမ်ႇသၢင်ႇတေႃႇလွင်ႈၵေႃႇသၢင်ႈလွင်ႈငမ်းယဵၼ်လုမႃး သမ်ႉတေ ဢဝ် 17/1 ဝႃႈ လွင်ႈဝႃႈၵပ်းသိုပ်ႇ ၵူၼ်းထိူၼ်ႇဢၼ်ၼၼ်ႉ ဢၼ်ၼီႉဝႃႇ သမ်ႉၶိုၼ်းပေႃးႁဵတ်းလိူင်ႈတေႃႇႁဝ်းလူး။ မိူဝ်ႈၼၼ်ႉ ဢူးဢွင်ႇမိၼ်း ဝႃႈ တိုၼ်းတေဢမ်ႇႁႂ်ႈလႆႈပဵၼ်ၶႃႈ။ ပေႃးဢဝ် 17/1 သေ တိၺွပ်းၵႂႃႇ ဢပ (အဘ) ၼႆၸိုင် ၶႃႈတေထုၵ်ႈ ဢွၵ်ႇ။ ပေႃးထုၵ်ႈဢွၵ်ႇဢမ်ႇလႆႈၼႆၸိုင် ၶႃႈတေၶဝ်ႈယူႇဝႆႉၼႂ်းၶွၵ်ႈ ၸွမ်းဢပ(အဘ)ႁဝ်း။ မၼ်းၵေႃႈလၢတ်ႈဝႃႈ မွၵ်ႈၼၼ်ႉ ပၢၵ်ႇၼႃႈၸုမ်း 14 ပႃႇတီႇၼၼ်ႉတင်းသဵင်ႈ။ ၵႂၢမ်းမၼ်ႈတႄႉလႆႈမႃးၸိူင်ႉ ၼင်သေတႃႉၵေႃႈ ဢမ်ႇၸႂ်ႈၵႂၢမ်းမၼ်ႈ ၶဝ်ႈတၢင်းၵၢၼ်။ ၵႂၢမ်းမၼ်ႈဢၼ်ၼႆႉ မၼ်းပဵၼ်လူမ်းၵူၺ်း။ ဢၼ်ပၼ်ၵေႃႈပၼ်။ ၶႂ်ႈႁဵတ်းၸွမ်းၸင်ႇႁဵတ်းၸွမ်းၵူၺ်းၶႃႈၼႃႇ။ ဢၼ်ၼၼ်ႉၵေႃႈမီးတီႈႁဝ်း တႅပ်းတတ်းႁင်းၽႂ်မၼ်းၵူၺ်းၶႃႈ။

ထၢမ်။ ။ ပေႃးၼၼ် ပေႃးတူၺ်းပၢင်ၵုမ်မိူဝ်ႈဝႃးမိူဝ်ႈသိုၼ်းၼႆႉ ယိူင်းဢၢၼ်းသုင်သုတ်း ပဵၼ်လွင်ႈၽွမ်ႉ ႁူမ်ႈၼႆၸွင်ႇ ဝႃႈလႆႈၶႃႈ။

တွပ်ႇ။ ။ ဝႃႈလႆႈယူႇၶႃႈ။ ၵေႃႇသၢင်ႈလွင်ႈၽွမ်ႉႁူမ်ႈႁဝ်းၶႃႈၼႆႉတႄႉ - (1)တႆးတေႃႇတႆး လူဝ်ႇၽွမ်ႉႁူမ်ႈ ၵၼ်ဢွၼ်တၢင်း။ ၼႂ်းတႆးတေႃႇတႆး ဢၼ်ဝႃႈၼၼ်ႉ ပႃႇတီႇပၢႆးမိူင်းတႆးၼင်ႇၵၼ် လူဝ်ႇဢွၵ်ႇၶေႃႈလဵဝ်သဵင် လဵဝ်ၼင်ႇၵၼ်။ လူဝ်ႇဝႆႉတႃႈယိူင်း မိူၼ် ၵၼ်။ (2) တပ်ႉ သိုၵ်းၼင်ႇၵၼ် လူဝ်ႇဝႆႉတႃႈယိူင်းမိူၼ်ၵၼ်သေ ႁူမ်ႈၵၼ်ယွၼ်ႈၽဵင်ႇၵၼ်။ (3) ပႃႇတီႇပၢႆးမိူင်းလႄႈ တပ်ႉ သိုၵ်းမိူင်းတႆး တင်းသဵင်ႈ လူဝ်ႇဢွၵ်ႇၶေႃႈလဵဝ် သဵင်လဵဝ်ၸင်ႇ ဢၼ်ႁဝ်းၶႃႈမုင်ႈမွင်းဝႃႈ သုၼ်ႇလႆႈၽဵင်ႇပဵင်းၵၼ်လႄႈ ႁူဝ်မႃႇ ပဵင်းၵၼ် ၸတ်းပွင်လႆႈ ၵမ်ႇၸႃႇတႃႇႁင်းၵူၺ်းဢၼ်ဝႃႈၼၼ်ႉ တေပဵၼ်မႃးဢမ်ႇၵႃး ၵႃႈႁဝ်းၶႃႈပႆႇဢွမ်ႇလွမ်ႈၽွမ်ႉသဵင် ပဵင်း ပၢၵ်ႇၵၼ် မိူင်းတႆးပတ်းပိုၼ်ႉ ၶိူဝ်းတႆးပတ်းပိုၼ်ႉတႄႉ ဢၼ်ႁဝ်းၶႃးမုင်ႈမွင်းဝႆႉၼၼ်ႉ တေၼၢၼ်းၵႆဝႆႉ ယူႇၼႆလႄႈ ၶႂ်ႈႁႂ်ႈၵူႈမူႇ ၵူႈၸုမ်း ဢမ်ႇဝႃႈတၢင်းၼႂ်းတၢင်းၼွၵ်ႈပတ်းပိုၼ်ႉ လုမ်ႈၾႃႉတႆးၵူႈတီႈၵူႈလႅၼ် ၶႂ်ႈႁႂ်ႈၽွမ်ႉသဵင်ပဵင်းပၢၵ်ႇၵၼ်။ ႁဝ်းၶႃႈတႄႉ မုင်ႈမွင်းၼင်ႇၼႆၵူၺ်းၶႃႈ။