ၸၢႆးဢွင်ႇမျၢတ်ႈ ဢၼ်ပဵၼ်ၵႅမ်ထိ 2 ၶွင်ၸၢႆးၼေႃႇၶမ်း၊ ၵေႃႉလႆႈထုၵ်ႇၵုမ်းၶင်ဝႆႉတီႈၶွၵ်ႈၵဵင်းတုင် ယွမ်းႁပ်ႉလွင်ႈ မီးသူၼ်ႇႁူမ်ႈၶႃႈၵူၼ်း 13 ၵေႃႉ၊ ၵွပ်ႈဢမ်ႇဢူတ်းယိူၼ်ႉလႆႈ ဢၼ်ၺႃးပေႃႉထုပ်ႉၸဵပ်းႁႅင်း။

ၵူၼ်းၸမ်ၸႂ်ၼႃႈႁိူၼ်းၼၢင်းဢွၼ်ႇ ၵေႃႉပဵၼ်ၼၢင်းမေးၸၢႆးဢွင်ႇမျၢတ်ႈလၢတ်ႈဝႃႈ- “ၼၢင်းဢွၼ်ႇလၢတ်ႈ ၼႄဝႃႈ မၼ်းၼၢင်း လႆႈၵႂႃႇဢႅဝ်ႇမႃးတီႈၵဵင်းတုင် တီႈၶွၵ်ႈဢၼ်ၶင်ၸဝ်ႈၽူဝ်မၼ်းဝႆႉ၊ ၽူဝ်မၼ်းလႆႈယွမ်း ႁပ်ႉ ၵဵဝ်ႇၵပ်းလွင်ႈၶႃႈၵူၼ်းတၢႆၼႂ်း မႄႈၼမ်ႉၶွင် 13 ၵေႃႉ၊ ၵွပ်ႈဝႃႈဢမ်ႇဢူတ်းယိူၼ်ႉလႆႈဢၼ်ပိူၼ်ႈ ထုပ်ႉတွႆႇ၊ ယွၼ်ႉပိူဝ်ႈၸဵပ်းႁႅင်းပူၼ်ႉလႄႈမၼ်းလႆႈယွမ်း ႁပ်ႉၵႂႃႇ။ ၵမ်းလိုၼ်းသုတ်း လႆႈယွမ်းႁပ်ႉပဵၼ် သၢၵ်ႈသေႇ (ၽယၢၼ်း)ၾၢႆႇလူင်ပွင်ၸိုင်ႈ- လႅင်ႇၶၢဝ်ႇလၢတ်ႈၼႄၼင်ႇၼႆ။

လႅင်ႇၶၢဝ်ႇထႅင်ႈၾၢႆႇၼိုင်ႈၵေႃႈ ဢိင်ဢၢင်ႈၵႂၢမ်းလၢတ်ႈၵူၼ်းၸမ်ၸႂ်ၼႃႈႁိူၼ်းၶဝ်ဝႃႈ- ၵဝ်ၶႃႈႁဝ်းၼႆႉ (ၸၢႆးဢွင်ႇမျၢတ်ႈ) ယွၼ်ႉလႆႈထုၵ်ႇၸဝ်ႈၼႃႈတီႈမၢၼ်ႈၶဝ် ထုပ်ႉတွႆႇၶႃတူဝ်ၶႃၸႂ်လိူဝ်ႁႅင်းလႄႈ ႁဵတ်းႁႂ်ႈ ၵဝ်ၶႃႈ လႆႈယွမ်းႁပ်ႉဝႃႈ ၵဝ်ၶႃႈၵေႃႉမီး သူၼ်ႇၼႂ်းၵၢၼ်ၶႃႈႁႅမ်ၵူၼ်းႁိူဝ်းၶႄႇ 13 ၵေႃႉၸိူဝ်းၼၼ်ႉ- ဝႃႈၼႆ။

ဢွၼ်တၢင်းၼႆႉ မိူဝ်ႈဝၼ်းထိ 23/07/12 ၸွမ်သိုၵ်းလူင်ၽဵဝ်းၽၼ်း ၻႃးမႃးၽူင်း ၽူႈၵွၼ်းပလိၵ်ႈသုင် သုတ်း၊ လၢတ်ႈတီႈ ၽူႈသိုဝ်ႇၶၢဝ်ႇၶဝ် ပူၼ်ႉမႃးမိူဝ်ႈဝၼ်းၸၼ်ထိ 23/07/12 ၊ ဝၢႆးၸဝ်ႈၼႃႈတီႈၸၼ်ႉသုင် ၶႄႇၶဝ်မႃး ဢႅဝ်ႇမၼ်းၸဝ်ႈဝႃႈ- မိူဝ်ႈလဵဝ် ၸဝ်ႈၼႃႈတီႈၶႄႇၶဝ်တေသိုပ်ႇၵႂႃႇမိူင်းမၢၼ်ႈ ပိူဝ်ႈတႃႇၵႂႃႇႁပ်ႉ တူဝ် ၸၢႆးဢွင်ႇမျၢတ်ႈ (ၼၢႆးပွင်းမျႃႉ)။ ၵဵဝ်ႇၵပ်းလွင်ႈၶႃႈၵူၼ်း ၸွမ်းႁိူဝ်းၶႄႇ 13 ၵေႃႉၼၼ်ႉ မၼ်းပဵၼ် ၵူၼ်းႁူႉလွင်ႈပိူင်ပဵၼ်တင်းမူတ်း- ႁၢႆးငၢၼ်းၽိုၼ်ၶၢဝ်ႇမတိၶျူၼ်းဢွၵ်ႇၵႂႃႇၼင်ႇ ၼႆ။

ဢွၼ်ၼႃႈၼၼ်ႉ ၸွမ်သိုၵ်းၾၢႆႇပလိၵ်ႈ ၽၼ်းသီရိ ပရႃႇၽႃးဝတ်း ၵေႃႉပဵၼ်ၵႅမ်ၶွင် ၸွမ်သိုၵ်းလူင်ၽဵဝ်း ၽၼ်းၵေႃႈလၢတ်ႈ ဝႃႈ- မိူဝ်ႈလဵဝ် လႆႈႁပ်ႉႁၢႆးငၢၼ်းတီႈတၢင်းၸဝ်ႈၼႃႈတီႈၶႄႇဝႃႈ ၸၢႆးၼေႃႇၶမ်းၼႆႉ ယွမ်းႁပ်ႉလွင်ႈ ၶႃႈၵူၼ်း 13 ၵေႃႉတင်း မူတ်းယဝ်ႉ- ဝႃႈၼႆ။

ၼွၵ်ႈသေၼၼ်ႉ ဝၢႆးၵိူတ်ႇလိူင်ႈမႃးၼႆႉ ၾၢႆႇပလိၵ်ႈထႆးလႆႈတၢင်ႇဢမု/ၶၻီးဝႆႉတီႈ သိုၵ်းထႆး 9 ၵေႃႉ ၸိူဝ်းထၢင်ႇထိူမ်ဝႃႈမီး သူၼ်ႇၵဵဝ်ႇၶွင်ႈလွင်ႈၶႃႈၵူၼ်း၊ ၵူၺ်းၵႃႈ သိုၵ်းထႆးတင်း 9 ၵေႃႉ တွပ်ႇထဵင်ဝႆႉဝႃႈ တိုၼ်းဢမ်ႇလႆႈၵဵဝ်ႇၶွင်ႈ။

ၸၢႆးဢွင်ႇမျၢတ်ႈ (ၸုမ်းၼေႃႇၶမ်း)ၼႆႉ ဝၢင်းၶိူင်ႈၵွင်ႈၵၢင်ႇ ပၼ်ၸဝ်ႈၼႃႈတီႈမၢၼ်ႈတီႈတႃႈၶီႈလဵၵ်း မိူဝ်ႈဝၼ်းထိ 15/05/12 ဝၢႆးၽူႈဢွၼ်ႁူဝ်မူႇၸုမ်း ၸၢႆးၼေႃႇၶမ်းထုၵ်ႇတိၺွပ်း မိူဝ်ႈၼႂ်းလိူၼ်ဢေႊ ပရိူဝ်ႊလ်။ ၼႂ်းၵူၼ်းၸိူဝ်း ၶဝ်ႈဝၢင်းၶိူင်ႈၼၼ်ႉ လိူဝ်သေၸၢႆးဢွင်ႇမျၢတ်ႈ ၺႃးထဵတ်ႈထၢမ်မွၵ်ႈ 2-3 ဝၼ်းၵေႃႈ ပွႆႇပၼ်မူတ်း၊ ၵူၺ်းၵႃး ၸၢႆးဢွင်ႇမျၢတ်ႈတႄႉဢမ်ႇပွႆႇပၼ် ၵူၺ်းပႆႇပေႃး၊ လႆႈထုၵ်ႇသိုပ်ႇထဵတ်ႈ ထၢမ်ၵုမ်းၶင်ဝႆႉတီႈတႃႈၶီႈလဵၵ်းသေ ဝၢႆးမႃးသိုပ်ႇသူင်ႇၵႂႃႇၵုမ်းၶင်တီႈၵဵင်းတုင်။

ၵႃႈပူၼ်ႉမႃး လွင်ႈၶႃႈၵူၼ်းၸွမ်းႁိူဝ်းၶႄႇ 13 ၵေႃႉၼႆႉ ၸၢႆးဢွင်ႇမျၢတ်ႈတွပ်ႇထဵင်မႃးတႃႇသေႇဝႃႈ ဢမ်ႇလႆႈ ၵဵဝ်ႇၶွင်ႈ၊ ဢမ်ႇလႆႈ ႁူႉၸွမ်းသင်၊ တိုၼ်းဢမ်ႇယွမ်းႁပ်ႉ။ ၵူၺ်းၵႃႈ ၵမ်ႈၽွင်ႈသမ်ႉဝႃႈ ၶေႃႈၵႂၢမ်းဢၼ် ၸၢႆးဢွင်ႇမျၢတ်ႈလၢတ်ႈၼႆႉဢမ်ႇပဵၼ်လႆႈ၊ လႆႈႁူႉဝႃႈဢၼ်လူင်းမိုဝ်းႁဵတ်း ပဵၼ်တူဝ်မၼ်းၵမ်းလဵဝ်၊ ဢမ်ႇၸႂ်ႈ ၸၢႆးၼေႃႇၶမ်းႁဵတ်း- လႅင်ႇၶၢဝ်ႇထႅင်ႈၾၢႆႇၼိုင်ႈလၢတ်ႈ ၼင်ႇၼႆ။

ၸၢႆးဢွင်ႇမျၢတ်ႈၼႆႉ ၸိုဝ်ႈတႄႉႁွင်ႉဝႃႈၸဵၼ်းႁူင်၊ ဢႃႇယု 42 ပီ၊ ၵူၼ်းဝၢၼ်ႈၼမ်ႉၶိုမ်း ဢိူင်ႇမိူင်းလဵၼ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ယၢမ်ႈႁပ်ႉၵိုတ်းၵၢၼ်သိုၵ်းၼႂ်းတပ်ႉသိုၵ်းမိူင်းတႆး MTA ဢၼ်ၸဝ်ႈၶုၼ်သႃႇဢွၼ်ႁူဝ်၊ ဝၢႆး MTA ဝၢင်းၶိူင်ႈၵွင်ႈၵၢင်ႇၵႂႃႇမိူဝ်ႈႁူဝ်ပီ 1996 ယဝ်ႉ မႃးပဵၼ်ႁူဝ်ၼႃႈထိ 2 ၶွင်ၸုမ်းပီႇတုၸိတ်ႉၸၢႆးၼေႃႇၶမ်း၊ ဝၢႆးမႃးၸၢႆးၼေႃႇၶမ်း ဢွၵ်ႇၵႂႃႇတူင်ႉၼိုင်ၵုမ်းပွတ်းသၢမ်ၸဵင်ႇၶမ်းၵေႃႈ ၵႂႃႇႁူမ်ႈတူင်ႉၼိုင်ၸွမ်းၵၼ်၊ တေႃႇပေႃးထိုင်ၸၢႆးၼေႃႇၶမ်း ထုၵ်ႇတိၺွပ်း မိူဝ်ႈၼႂ်းလိူၼ်ဢေႊပရိူဝ်ႊလ် သေ တႅပ်းတတ်းၶဝ်ႈဝၢင်းၶိူင်ႈၵွင်ႈၵၢင်ႇပၼ်မၢၼ်ႈ တီႈတႃႈၶီႈလဵၵ်း။

ပူၼ်ႉမႃးမိူဝ်ႈဝၼ်းထိ 02/07/12 ၼႆႉ ၾၢႆႇၽဵဝ်ႈမူၺ်ႉယႃႈမဝ်းၵမ်မၢၼ်ႈၶဝ်တိလႆႈယႃႈမဝ်းၵမ် တီႈဝၢၼ်ႈ ပုင်ႇ၊ ပဵၼ်ယႃႈမႃႉ 600,000 မဵတ်ႉ၊ ယႃႈၶၢဝ် 120 တႅင်ႈ၊ လွင်ႈၼႆႉၵေႃႈ ပဵၼ်ၸၢႆးဢွင်ႇမျၢတ်ႈၵေႃႉလၢတ်ႈ ၼႄ ၸင်ႇၵႂႃႇၶူၼ်ႉသွၵ်ႈတိလႆႈ- ဝႃႈၼႆ။ ၵူၺ်းၵႃႈ လႅင်ႇၶၢဝ်ႇၾၢႆႇမေးၼၢင်းတႄႉဝႃႈ ဢမ်ႇၸႂ်ႈၸၢႆးဢွင်ႇ မျၢတ်ႈ ၵေႃႉလၢတ်ႈ၊ ပဵၼ်ၸၢႆးသၢမ်တွႆးၵေႃႉပဵၼ်လုင်း ၼၢင်းဢွၼ်ႇၵေႃႉလၢတ်ႈ။

ဢွၼ်ၼႃႈၸၢႆးၼေႃႇၶမ်း တေၺႃးတိၼၼ်ႉ ဝၼ်းထိ 20/04/12 ၵႅမ်ႁူဝ်ၼႃႈၵေႃႉထိ 1 သၢင်ႇၶမ်းယၢဝ်း (ၼႂ်းၽူႈဢွၼ်ႁူဝ် 3 ၵေႃႉ) ထုၵ်ႇၸဝ်ႈၼႃႈတီႈထႆးထိၺွပ်း ၽွင်းဢွၵ်ႇၶၢဝ်းတၢင်းလုၵ်ႉတီႈမႄႈၾႃႉလူင် ၸႄႈတွၼ်ႈၵဵင်းႁၢႆး ဢွၵ်ႇၵႂႃႇတၢင်းၵဵင်းမႆႇ၊ သၢင်ႇၶမ်းယၢဝ်းၼႆႉ ၵွပ်ႈပိုတ်ႇဝႆႉႁၢၼ်ႉၵႃႉၶၢႆတီႈၼိုင်ႈ ၼႂ်းၵဵင်းမႆႇ လႄႈ ၵႆႉၵႂႃႇမႃးၶဝ်ႈဢွၵ်ႇမိူင်းထႆး- ၼႆယဝ်ႉ။