တပ်ႉသိုၵ်းတႆးလွႆတႆးလႅင်း တင်းသိုၵ်းမၢၼ်ႈမိူင်းပဵင်းပဵၼ် ပၢင်တိုၵ်းၵၼ် ပွတ်းမိူင်းပူးဢွၼ်ႇ၊ ယွၼ်ႉသိုၵ်း မၢၼ်ႈတင်း ပီႇတုၸိတ်ႉငွႆးယိုဝ်းသိုၵ်းတႆးဢွၼ်တၢင်း။ ၸဝ်ႈယွတ်ႈသိုၵ်း ဝႃႈ တေတႅမ်ႈလိၵ်ႈသၢၼ်ၶတ်း တွင်ႈထၢမ်ၸွမ်ၸိုင်ႈတဵင်း ၸဵင်ႇ ၵွပ်ႈသင်သိုၵ်းမၢၼ်ႈတိုၵ်ႉပိုတ်ႇၼႃႈသိုၵ်းတေႃႇ ၸုမ်းၸၢဝ်းၶိူဝ်း။

ဝၼ်းထိ 22/07/12 (မိူဝ်ႈဝႃး) တင်ႈတႄႇယၢမ်း 12:00 မူင်းတေႃႇထိုင် 15:00 မူင်း၊ တပ်ႉသိုၵ်းၸိုင်ႈတႆး RCSS/SSA ဢၼ်ၸဝ်ႈႁၢၼ်သႅဝ်းႁၢၼ်ဢွၼ်ႁူဝ် တင်းသိုၵ်းမၢၼ်ႈ ၶမယ 360 မိူင်းပဵင်း၊ ပဵၼ်ပၢင် တိုၵ်းၵၼ် တီႈမိူင်းပူးဢွၼ်ႇ ၸႄႈဝဵင်း မိူင်းပဵင်း ၸိုင်ႈတႆးပွတ်းဢွၵ်ႇ။ ပၢင်တိုၵ်းပွၵ်ႈၵမ်းၼႆႉ လႆႈႁူႉဝႃႈ ၾၢႆႇသိုၵ်းမၢၼ်ႈ ဢွၵ်ႇငႃးသိုၵ်းတူင်ႉၼိုင် ၵႂႃႇသွၵ်ႈတဝ်ယိုဝ်း သိုၵ်းတႆးဢွၼ်တၢင်း- ဝႃႈၼႆ။

ၵပ်းၵၢႆႇလွင်ႈပၢင်တိုၵ်းၼႆႉ ၸၼ်ႉၽူႈၼမ်းၼႂ်းတပ်ႉ RCSS/SSA ၸဝ်ႈၼိုင်ႈလၢတ်ႈဝႃႈ- သိုၵ်းမၢၼ်ႈႁူမ်ႈ တင်းၸုမ်းပီႇတု ၸိတ်ႉလႃးႁူႇၶဝ်ႁူမ်ႈၵၼ် ႁႅင်းၵူၼ်းမွၵ်ႈ 80 မႃးလွမ်ႉငွႆးယိုဝ်းသိုၵ်းႁဝ်းဢွၼ်တၢင်း တီႈသလိုင်းၼႂ်းထိူၼ်ႇ၊ သိုၵ်းႁဝ်းသမ်ႉ ၸတ်းၵူၼ်းၵႂႃႇလွမ်ႉတၢင်းလင်ၶဝ်ၶိုၼ်း၊ မိူဝ်ႈဝႃးတေႃႇထိုင် 3 မူင်းဝၢႆးဝၼ်း သဵင်ၵွင်ႈယင်းပႆႇယဵၼ်။ ၶဝ်မႃးယိုဝ်းႁဝ်းဢမ်ႇ လႆႈသေထွၼ်သိုၵ်းၶိုၼ်း၊ ၾၢႆႇၶဝ်မီးလွင်ႈတၢႆ ဝၢတ်ႇယူႇ၊ ၵူၺ်းၵႃႈပႆႇလႆႈႁူႉဝႃႈမီးလၢႆၵေႃႉ။ ၾၢႆႇတပ်ႉတႆးဢမ်ႇပဵၼ်သင်။ လွင်ႈၼႆႉ တိုၵ်ႉတေတႅမ်ႈလိၵ်ႈ သၢၼ်ၶတ်း ၵႂႃႇတီႈမၢၼ်ႈဝႃႈ ၵွပ်ႈသင်မႃးယိုဝ်းႁဝ်း- ဝႃႈၼႆ။

ဝၢႆးဢုပ်ႇဢူဝ်းၵိုတ်းယိုဝ်းၵၼ်ယဝ်ႉ လွင်ႈသိုၵ်းမၢၼ်ႈတိုၵ်ႉႁွၼ်ႈထဝ်ႇသွၵ်ႈတဝ် ယိုဝ်းတပ်ႉတႆးယူႇတိၵ်း တိၵ်းၼႆႉ ၸဝ်ႈယွတ်ႈ သိုၵ်း ႁူဝ်ပဝ်ႈ RCSS/SSA လၢတ်ႈဝႃႈ- ငဝ်းလၢႆးၼႂ်းမိူင်းမၢၼ်ႈဝၼ်းမိူဝ်ႈၼႆႉ မီးၵူၼ်းၶႂ်ႈလႅၵ်ႈလၢႆႈ ၵေႃႈၵူၼ်းၸိူဝ်းပႆႇၶႂ်ႈလႅၵ်ႈ လၢႆႈယင်းတိုၵ်ႉမီးယူႇ။ ၼႂ်းတပ်ႉသိုၵ်းမၢၼ်ႈၼႆႉၸိူဝ်းၶႂ်ႈ လႅၵ်ႈလၢႆႈတိုၵ်ႉမီးဢေႇ၊ ပေႃးသိုၵ်းမၢၼ်ႈၵႂႃႇၸွမ်းဝၢၼ်ႈၼွၵ်ႈၼႃးပၢင်ႇ သေပဵၼ်ပၢင်တိုၵ်း၊ တီႈဢေႇသုတ်း ၶဝ်ၵေႃႈထၢင်ႇႁၢင်ႈ ဢဝ်ၵိၼ်မူၵိၼ်ၵႆႇ၊ ဢဝ်ၶူဝ်းၶွင်ၵူၼ်းဝၢၼ်ႈ။

လွင်ႈၵေႃႇသၢင်ႈလွင်ႈငမ်းယဵၼ်ၼၼ်ႉ ယူႇတီႈၵူၼ်းလူင်ငဝ်ႈငုၼ်းၼေႇပျီႇတေႃႇၶဝ်၊ ႁဝ်းယုမ်ႇယမ်ဝႃႈ ၶဝ်တေမူၼ်ႉမႄး ၵူၼ်းၶဝ်ၵႂႃႇတိၵ်းတိၵ်းယူႇ။ ႁဝ်းႁၼ်ဝႃႈ ၵၢၼ်ၵေႃႇသၢင်ႈလွင်ႈငမ်းယဵၼ်ၼႆႉ ထုၵ်ႇလႆႈၵေႃႇသၢင်ႈလွင်ႈယုမ်ႇယမ်ၵၼ်ဢွၼ် တၢင်း၊ ပေႃးႁဝ်းဢမ်ႇသၢင်ႈလွင်ႈယုမ်ႇယမ်ၵၼ်လႆႈ လွင်ႈငမ်းယဵၼ်ထႃဝရ မၼ်ႈၵိုမ်းယိုၼ်းယၢဝ်းၼၼ်ႉ ဢမ်ႇပဵၼ်မႃးလႆႈ။ လွင်ႈယုမ်ႇယမ်ၼႆႉ ပိူင်လူင်မၼ်း ယူႇတီႈတပ်ႉသိုၵ်းမၢၼ်ႈ။ ၵူၺ်းၵႃႈ ဝၢႆးႁဝ်းတႅမ်ႈလိၵ်ႈထိုင်ၸူဝ်းဝိၼ်း (ၸွမ်သိုၵ်းလူင်ၸူဝ်း ဝိၼ်း၊ ၵႅမ်ၽူႈၵွၼ်းသိုၵ်းသုင်သုတ်း) ၼႆႉ ပၢင်တိုၵ်းဝူင်ႈၵၢင်ႁဝ်းယင်းဝၢင်မႃး၊ တိုၵ်ႉပဵၼ်ထႅင်ႈမိူဝ်ႈဝႃးၼႆႉၵူၺ်း။

ငဝ်းလၢႆးမိူဝ်ႈလဵဝ် သိုၵ်းမၢၼ်ႈတင်းတပ်ႉသိုၵ်းတႆးပွတ်းႁွင်ႇ၊ တပ်ႉသိုၵ်းၶၢင်၊ တပ်ႉသိုၵ်းယၢင်းၸိူဝ်းၼႆႉ ၵေႃႈ တိုၵ်ႉပဵၼ်ပၢင် တိုၵ်းယူႇ။ လွင်ႈၼႆႉ ပဵၼ်ယွၼ်ႉၵူၼ်းၾၢႆႇတႂ်ႈၵူၺ်းၼႆ ဢမ်ႇပဵၼ်လႆႈ၊ တၢင်းၼိူဝ်ၶဝ် ၵေႃႈ တေမီးၽႅၼ်ယူႇ။ လွင်ႈပၼ်ႁႃ ဢၼ်သိုၵ်းမၢၼ်ႈသိုပ်ႇတိုၵ်းယိုဝ်းၵူႈၸုမ်းၸုမ်းယူႇၸိူဝ်းၼႆႉ ပေႃးၸွမ်ၸိုင်ႈ တဵင်းၸဵင်ႇယဵမ်ႈမိူင်းထႆးပွၵ်ႈၶိုၼ်းယဝ်ႉ ႁဝ်းတေ တႅမ်ႈလိၵ်ႈၸူး။ လွင်ႈဝႃႈ ပေႃးဢမ်ႇၵေႃႇ သၢင်ႈလႆႈ လွင်ႈယုမ်ႇယမ်ၵၼ် ဢမ်ႇၸၢင်ႈလႆႈလွင်ႈငမ်းယဵၼ်၊ မိူင်းႁူမ်ႈတုမ်ၼႆႉ ဢမ်ႇၸႂ်ႈတပ်ႉသိုၵ်းမီး ဢႃႇၼႃႇ သုင်သုတ်း- ၸဝ်ႈယွတ်ႈသိုၵ်းသိုပ်ႇလၢတ်ႈထႅင်ႈၼင်ႇၼႆ။

ပၢင်တိုၵ်းပွၵ်ႈၵမ်းၼႆႉ ပဵၼ်ပွၵ်ႈၵမ်းထိ 25 ဝၢႆးၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA တင်းၸုမ်းၶိုင် ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် ၶွင်လူင်ပွင်ၸိုင်ႈတဵင်းၸဵင်ႇ ႁူပ်ႉဢုပ်ႇဢူဝ်း တူၵ်းလူင်းၵိုတ်းယိုဝ်း ဢမ်ႇလွင်ႈ ငမ်းယဵၼ် မိူဝ်ႈဝၼ်းထိ 02/12/11 ပူၼ်ႉမႃး။ ပဵၼ်ပွၵ်ႈၵမ်း 3 ဝၢႆးသွင်ၾၢႆႇႁူပ်ႉဢုပ်ႇ ၸၼ်ႉၸိုင်ႈမိူင်းႁူမ်ႈတုမ် ပွၵ်ႈၵမ်း 2 တီႈၵဵင်းတုင် ဝၼ်းထိ 19/05/12 ဢၼ်ဝႆႉၼၵ်း လွင်ႈယႃႈမဝ်းၵမ်။

ဝၢႆးႁူပ်ႉဢုပ်ႇၵၼ်တီႈၵဵင်းတုင် 19/05/12 မႃးယဝ်ႉ ပၢင်တိုၵ်းပွၵ်ႈႁႅၵ်ႈ ၵိူတ်ႇၶိုၼ်ႈမိူဝ်ႈဝၼ်းထိ 23/05/12 တီႈပုင်ႇပႃႇၶႅမ်။ ပၢင်တိုၵ်းတေႃႇမႃး ဝၼ်းထိ 02/06/12 ယၢမ်း 17:00 မူင်း သိုၵ်းမၢၼ်ႈတပ်ႉမိူင်းတေႃႉ တပ်ႉၶလယ 49 မိူင်းပဵင်း၊ ဢဝ်မၢၵ်ႇ 81mm ယိုဝ်းသႂ်ႇတပ်ႉသိုၵ်းတႆး RCSS/SSA လႄႈၶိုၼ်ႈဝႅတ်ႉ တပ်ႉသိုၵ်းတႆး ဢၼ်ပၵ်းတီႈလွႆမူတ်ႉၼၢင်းလႅၼ်း။ ပၢင်တိုၵ်း ပွၵ်ႈၼႆႉ လႆႈႁူႉဝႃႈၸဝ်ႈသိုၵ်းၵျေႃႇမူဝ်း လုၼ်ႇ ဢွၼ်ႁူဝ်တပ်ႉၶလယ တပ်ႉ 49 ႁႅင်း 100 ပၢႆ၊ လႆႈႁပ်ႉၶေႃႈသင်ႇတၢင်းၼိူဝ် ပိူဝ်ႈတႃႇၶိုၼ်ႈလေႃႇ တပ်ႉသိုၵ်းတႆး။ ၸဝ်ႈၸၢႆးလူး RCSS/SSA လႆႈတိတ်းတေႃႇ ပွင်ႇလႅင်းၵႂႃႇတီႈၸၼ်ႉပႃႈၼိူဝ်မၢၼ်ႈတိူင်း သိုၵ်းသၢမ်ၸဵင်ႇ၊ လႆႈႁပ်ႉၵႂၢမ်းတွပ်ႇပွင်ႇလႅင်းမႃးဝႃႈၾၢႆႇမၢၼ်ႈယွမ်းၽိတ်း၊ ဢမ်ႇလႆႈမီးၶေႃႈၸိသင်ႇ ၼႆသေ သင်ႇသိုၵ်းမၢၼ်ႈ ႁႂ်ႈ ၶိုၼ်းထွၼ်။

ဝၼ်းထိ 16/06/12 ပွတ်းၼႂ် သိုၵ်းမၢၼ်ႈ ၶလယ 225 မိူင်းတူၼ် တင်း ၶလယ 65 ၼႃးၵွင်းမူး ႁူမ်ႈႁႅင်းသိုၵ်း 100 ပၢႆ ၶိုၼ်ႈလေႃႇတိုၵ်းတပ်ႉလွႆငွမ်း ပၢင်သဝ်းသိုၵ်းတႆး RCSS/SSA ဢၼ်မီးၸဵင်ႇႁွင်ႇ ဝၼ်းဢွၵ်ႇ ၵိင်ႇၸႄႈဝဵင်းပုင်ႇပႃႇၶႅမ်။ ပၢင်တိုၵ်းတႄႇၵၢင်ၼႂ် 7 မူင်းၶိုင်ႈ။ ဝၢႆးသိုၵ်းတႆးငိူင်ႉဢွၵ်ႇပၼ်ယဝ်ႉ ယၢမ်း 11.00 မူင်းပၢႆ သိုၵ်းမၢၼ်ႈၶိုၼ်ႈၽဝ်ပႅတ်ႈ ပၢင်သဝ်းတပ်ႉသိုၵ်းတႆး။ ဝၢႆးၼၼ်ႉ ယူႇတီႈ RCSS/SSA ၵေႃႈ လႆႈတႅမ်ႈလိၵ်ႈၼႄၵၢင်ၸႂ်သၢၼ်ၶတ်းၵႂႃႇတီႈလူင်ပွင်ၸိုင်ႈ မၢၼ်ႈယူႇ။

ဢူးဢွင်ႇမိၼ်း (ၽွင်းလူင်ၾၢႆႇတေႃႉသူင်ႇ လူတ်ႉၾႆး) လၢတ်ႈမိူဝ်ႈပၢင်သပ်းလႅင်းၸႅင်ႈၶၢဝ်ႇ၊ ဝၢႆးပၢင်ၵုမ် ၸၼ်ႉၸိုင်ႈမိူင်းႁူမ်ႈ တုမ်ပွၵ်ႈၵမ်း 2 တီႈၵဵင်းတုင်၊ မိူဝ်ႈဝၼ်းထိ 19/05/12 ဝႃႈ- တႄႇဢဝ်ဝၼ်းၼႆႉၵႂႃႇ တင်းသွင်ၾၢႆႇတေဢမ်ႇႁႂ်ႈမီးပၢင်တိုၵ်း ၵၼ်ထႅင်ႈယဝ်ႉ။